مش عارفه بس إزاي وليه ؟

لما كنت صغيرة كان أبويه مرتبه 90 جنيه
هوه ده اللي في الشهر كان بيتحصل عليه
وأمي من ناحيتها كات تساعده باللي كات تقدرعليه
مرة عدس مرة بامية مش شرط يعني كل يوم ناكل فيليه

وفمدارس حلوة علمونا لاجل مابقى مُدرسة وأخويا بيه
كنت شاطرة في دراستي .. مدياها كل وقتي
ولدروسي بانتبه جت منين وإزاي وليه
أسئلة دايما بقولها في الحصص لأساتذتي
عشان أفهم الدرس كله ومن جميع نواحيه

ونجحت في الثانوية العامة وبفضل دعاك يامه
دخلت التربية وأكتر من كده أنا عايزه إيه
محتاجة طقم شيك ألبسه والتاني نص نص بس أبدل فيه
مَراجع أبحاث وكتب وعارفة إن المصاريف زادت عليه
كنت في الصبح اتكسف لما أقوله يابا هات جنيه
يدهولي وهو متغصب ده اللي كنت بشوفه من عينيه

بعد التخرج اشتغلت في مَدرسة والحَمد ليه
أستاذة اسمي في حِتتي ده اللي بينادوني بي
رايحة جاية بكراريس العيال الشاطرة واللي مش هيه
اجتهد في الشرح لاجل ما يحصلوا كلهم على ميه ميه

وفمعاد القبض كنت طايرة لما خدت أول مرة 300 جنيه
نِفسي اشتري مرة بلوزة وشنطة غالية من أم 45 جنيه
كنت راضية بحالي دايما وباللي ربنا قاسملي بيه

وف يوم سمعت إن ناس بتقبض في السنة بالتسعة مليون جنيه
إشاعات دي كنت بفتكر لحد ما اتأكدت وقالوا وفيها إيه
ناس في مجالها بتجتهد ترقص تمثل مش عارفه حتى تتورب
في بطولة تكسب والشعب يفرح مع إن مفيش حاجة هتعود عليه

من ساعتها كترت في راسي الأسئلة زي وقت التلمذة
مش عارفه إيه ؟؟ الفلوس دي جت منين وإزاي وليه
مش برده أكل ولبس ومكان نضيف بيعيشوا فيه
يا عالم اتقو ربنا ده النعيم اللي هتيجو في يوم وتتحاسبو عليه .