from dr.Mat7oon

انا بصراحة مش عارف ابعت الرسالة دي ازاي للبرنامج فقلت احطها هنا برده نشوف رأيكم ايه ولو حد يعرف يوصلها يبقى جزاه الله كل خير


رسالة الى برنامج العاشرة مساء
تحية طيبة وبعد...

تحية طيبة من اطباء مصر الى شهدائها الابرار...الذين ضحوا بارواحهم من اجل تحرير الوطن..من ذلك الظلم الذي استشرى فيه...كما تستشري النار في الهشيم..ومن اجل رفع راية الحق والعدل والمساواة
ومن هذا المنطلق كان لابد لنا جميعا..ان نبدأ صفحة جديدة مع انفسنا...صفحة ناصعة لا تشوبها شائبة..تتحقق فيها الكرامة والحرية والعدالة الاجتماعية لكل فئات وطوائف هذا المجتمع بالصورة التي تضمن لهذا الوطن التقدم والنمو والرخاء
ولذلك فقد وجب علينا ان نحمل راية العدالة الاجتماعية مطالبين بما لنا من حقوق..ومعترفين بما علينا من واجبات..
املين ان يسع صدركم لنا وان تسمحوا لوفد صغير منا بلقاء سيادتكم....في اي يوم يتم تحديده

مع الوضع في الاعتبار ...التصاعد المستمر لحالة الاحتقان عند الاطباء ...
بعد ان رفضت رئاسة الوزراء مناقشة مطالب الاطباء متعللين بضرورة الاتيان بقرار رسمي من النقابة ..وكما تعلمون نحن غير مقتنعين بهذة النقابة وبمن فيها في الوقت الحالي وتحتاج الي اعادة هيكلة . وتدني حال الاطباء الي ان اصبحنا ضمن اقل 10 دول افريقية من ناحية دخل الطبيب ... ودولة مثل الجزائر اضرب اطباؤها لان دخل النائب 800 دولار شهريا في حين دخل النائب المصري 120 دولار شهريا !!!!! امر مهين للغاية ان ياخذ خريج الدبلوم الذي يعمل بالكهرباء والبترول اضعاف ما يتقاضاة الطبيب الذي يعمل في العطلات وليل نهار ويواجة الامراض والمخاطر وينقظ الارواح !!!

هناك اضراب جزئي للاطباء 10 مايو نريد حلا قبل هذا الموعد وقبل تصعيد الامور وشكرا ...
مع تحيات جروب شباب اطباء 25 يناير




========================================================================================================


كنت عايز اضيف حاجة:
- اولا كل الشكر والتقدير للاستاذة منى الشاذلي وربنا يشهد اني اكن لها كل الاحترام والتقدير على مجهودها العظيم
-ثانيا كنت عايز اضرب مثال صغير عن حال الاطباء في مصر وارجوا من حضارتكم سعة الرحب لسماع المشكلة:


انا خريج دفعة 2009 اللي لسة مخلصة امتيازها في شهر مارس الماضي جامعة الاسكندرية وخلال سنة الامتياز الجميله احنا بنقبض 248.50 جنيه شهريا علشان نعمل ايه؟؟
المفروض ان احنا في سنة تدريب وبنتعلم فيها عملي كل اللي درسناه في 6 سنين بنطبقه عمليا على الحالات اللي بتيجي المستشفى والمفروض اننا بنقضي مده محددة في كل قسم بحيث اننا نكون تعاملنا نع جميع الحالات واتعلمنا المهارات اللي المفروض اي دكتور خريج يبقى عارفها


الواقع بقى ايه ؟
اننا لا بنتعلم ولا بنستفيد اي حاجة خالص و 80 % من شغلنا عبارة عن حاجة اسمها

dirty work
يعني من الاخر شغل عمال ناخد عينة بول نوديها المعمل نمشي بورق الاشعة والتحاليل من مبنى لمبنى نروح نجيب دم ونودي دم
وعلى سبيل المثال لا الحصر:
انا كنت مرة في مستشفى ناريمان للعظام في الاسكندرية (الحضرة ) والنائب طلب مني اني اخد مريضة اعملها اشعة في المستشفى الميري ( الازاريطة ) واداني عشرة جنيه في ايدي وقالي خد تاكسي
الحالة دي بقى كان شكلها عامل ازاي:
- طفلة لا يتعدى عمرها 6 سنين واقعة من الدور الثالث عندها شلل في عنيها مش معروف سببه ومتركبلها قسطرة بول
- وكان معهاش اي حد من اقاربها
وكان المطلوب مني اني اخدها اركب بيها تاكسي واروح بيها الميري ولما سألته عن اي حد من قرايبها قالي مفيش ولقى معاها طفله تانية متتعداش برده ال 6 سنين قالي معاها بنت عمها اهيه حتيجي معاك طبعا زود الطين بلة لأني كده بدل ما حمشي بطفله واحدة حمشي باتنين
ولما اعترضت قالي معلش يا دكتور ثواب ولما قلتله حد من التمريض يجي معايا قالي ماهم مش موافقين

قلتله يعني التمريض مش موافق على كده ومطلوب مني اني اوافق
قالي معلش يا دكتور دي حالة انسانية

المهم طلعت معاها وكانت بنت عمها شايلها في الطريق والقسطرة مدلدلة في الارض واخر بهدلة


انا اسف طولت في سرد القصة بس المشكلة هنا مش بس في سوء احوالنا احنا ده كمان في سوء احوال المرضى نفسهم والقصص دي في منها كتير بس لا اريد الاطالة


كل ده في مقابل كام 248.5 جم اللي مرة لما رحت اقبضهم لقيت مخصوم مني 10 ايام ومش عارف كام يوم جزاء وقبضت 40 جم والله كنت مكسوف وانا باخدهم
والحمد لله لما انتهت السنة الجميلة لقيت اني مينفعش استلم شهادة امتيازي ليه
لاني كان عندي ايام غياب لازم احضرها (علشان ما يبقاش فاتني اي حاجة من العلام اللي كان ممكن اتعلمه في الايام الللي غبيتها) علشان في كام عينة بول ما ودتهمش المعمل وده طبعا حيضر بمستقبلي وبادائي كطبيب بعد كده

وياريتها جت بس على كده ده انا كمان طلع عليا فلوس للكلية اللي لما بعد ما اعوض ايام الغياب حعرف هما كام وكل اللي اتقالي هما كتير


انا من مواليد ديسمبر 86 وحقدم على جيشي شهر يناير 2012 وطبعا احنا عارفين اني حيجيلي ظابط واقعد في الجيش لمدة 3 سنين وبعد كده اطلع للدنيا صفر على الشمال عايز احضر واذاكر واعمل 100 حاجة عشان يبقى ليا مستقبل

ده يرضي مين؟؟؟؟


رجاء شديد من الاستاذة منى اللي تعودنا منها انها تتناول كل مشاكل الشعب المصري وكان ليها دور فعال في الكثير منها
ارجوكي رجاء خاص بالله عليكي ناقشي مشكلتنا كاطباء ممكن حد يسمعنا ويلتفت لينا




شكرا جزيلا


د.مطحون ولسة بيطحن

علي فكرة انا اتكلمت قبل كدة في موضوع الاطباء وحالهم في مصر وللأسف ان محدش بيتعرض ابدا لمشاكل الاطباء خصوصا ان هذا الموضوع في غاية الاهمية لكن انا مع أ.شيماء ان ده مش وقت اعتصامات لان البلد مش حمل اعتصامات تانى دلوقتى وعلي فكرة انا طبيبة ومتضررة جدا من حال الاطباء خصوصا انى بتعب جدا في شغلي ومش باخد مقابل علي قد التعب لكن لازم نصبر شوية علي ما البلد تقوم من تانى وانا متأكدة ان مستوى الاطباء هايبقي احسن انشاءالله واتمنى ان حال مصر كلها يبقي احسن (يارب)