كل سنه وانت طيب واحنا مش طيبين .................. احمد فؤاد نجم

سيدي الرئيس

في عيد ميلادك الكام وسبعين

كل سنة وأنت طيب

واحنا مش طيبين

كل سنة وأنت حاكم

واحنا محكومين

واحنا مظلومين

واحنا متهانين

ويا ترى يا حبيب الملايين

فاكرنا ولا احنا خلاص منسيين

فاكر المعتقلين

فاكر الجعانين

فاكر المشردين

فاكر اللي ماتو محروقين

فاكر الغرقانين

الله يكون في عونك - هاتفتكر مين وللا مين

في عيد ميلادك الكام وسبعين

بقول لك كلمتين

الأوله

شيلتنا طين

وهل تعلم أن النيل بقى رشاح

والجو أصبح بيئة والعيشة ولعة

والشرفا قلوبهم عالبلد والعة

وانت عاملهم مذبحة ولا بتاعة القلعة

والاقتصاد سداح

والسرقة بقت كفاح

ومصر متاحة بس للسياح

وعرض البلد بقى مستباح

والتانية

ورتنا الويل

دا الخطوة في عهدك بقت ميل

والضحك بقى نواح وعويل

والكوسة

عارف الكوسة

ممكن أقولك فيها موواويل

والجامعة بقت يا إما كباريه أو دار مسنين

والشباب معظمهم من غير خمرة سكرانين

والعلم عز على المتعلمين

والأساتذة بقم دجالين

والقادة بقم طبالين

واديني في الهايف يا حبيب الملايين

والتالتة

عارف اليابانيين

زمان في سنة اتنين وخمسين

كان عندنا تروماي وكان عندنا علم ومتعلمين

وثقافة ومثقفين

وأدبا وعلما وفنانين

وكانو اليابانيين

بالنووي لسة مضروبين

وللصدقة مستحقين

دلوقتي إحنا فين وهما فين

هما فوق واحنا في أسفل سافلين

والرابعة

أمن البلد بقى تنين

والمحاكم اتملت مظالم

والعدالة بقت كمالة

وكلمة الحق في الزبالة

وأصحابها في الزنازين

والخامسة

القطاع العام…. عام

والفساد…. ساد

وفي جتة بلدنا بيرعى

أفتكر لجنابك إيه وللا إيه

وكل ذكرى ليك بدمعة

آآآآآآآآه آآآآآآآآه

أنا كنت حالف ميت يمين

أكملهم لك تمنية وسبعين

بس هاكفيهم ورق منين

وكل سنة وأنت

واحنا طيبين

زائر

كلمات قاسية كل القسوة أخدت عاطل بباطل أو حابل بنابل
أستاذة أمنية
مش عارف أهنئك وأحييك على هذة الكلمات ولا الأفضل أواسيكى شكرآ لكى

حلوة ياأستاذة / امنية " بجد شديدة هههههههه"
وحلوة يا أستاذ / ممدوح وخدوا دى مني للشاعر / احمد فؤاد نجم أيضا

فى المعتقل

فى المعتقل ياسلام سلم
موت وأتألم
لكن لمين راح تتظلم
والكل كلاب

كلاب حراسه
وكلاب صيد
واقفين بالقيد
يكتفوا عنتر وأبو زيد
ويهينوا دياب

الكلب فيهم لايميز
ولا يتميز
عن الغوريلا
ومطيز
وبضفر وناب

ومدربينه يدق الكعب
فوق راس الشعب
يزرع ف قلبه الخوف
والرعب
من غير أسباب

غير أن شلة حرامية
وشمحطية
عايشين فى مصر عواطلية
وبياكلوا كباب

عايزين يعيشوا عرض وطول
على كده علطول
وان واحد بلضم
سيدنا يقول جريه ياكلاب

ع المعتقل
يرموه فى الضيق
مايلاقى صديق
وإدارة شغتلها التلفيق
تكتب له جواب

وع النيابة ومحاكمة
وتقوم حاكمة
علشان بلدنا بلد بكمه
عاش الكداب

غير الصحافة ماتهول
بقى وتقول
وبعد مالكدب يطول
تطلع فى كتاب

لكن يامصر حيجى اليوم
ويطير النوم
وكل ظالم أو مظلوم
حيكون له حساب

للشاعر / احمد فؤاد نجم

استاذى الفاضل أ/ ممدوح

اشكرك لمرورك المشرف وادعوك ان تواسينى من فضلك انا وجميع ابناء جيلى الذين قسم لهم القدر ان يصبح مستقبلهم فى هذه المرحله العصيبه ........

وقد حاولت ان انتقى من اشعار احمد فؤاد نجم ما يجمع بين التعبير عن واقعنا والبعد عن الالفاظ التى قد يستخدمها نجم فى بعض اشعاره .

الاستاذه امنيه تحياتى لإختيارك الرائع لنجم وكما ذكرتى انك اخترت من اشعاره مايجمع بين التعبير عن واقعنا والبعد عن الالفاظ التى قد يستخدمها فى بعض اشعاره وهى بصراحه مهمه مش سهله لأن نجم طبقا لظروف نشأته فهو معجون فى طين أزقة مصر وتخرج منه الالفاظ واضحه صريحه معبره عما يحيط بنا
نشكرك

أستاذتي الفاضلة / أمنية
شكرا جزيلا لحضرتك على الإنتقاء المتميز و الرائع لواحدة من أجمل قصائد نجم وهي بالفعل معبرة جدا عن ما آل إليه حالنا ..
أكرر شكري لحضرتك أستاذتي الفاضلة
وخالص تحياتي لشخص حضرتك المحترم .

بجد الأشعار جميلة والكلام كتير

بس مش العتب عليه

ده على كل الشعب

شكرا أستاذة أمنية

بس أنا أحيانا مش بحب ألفاظه

فى مرة كان على برنامج لبنانى

قال كلام غير لائق ابدا

بس هو عفوى

تحياتى

رسالة للرئيس فى عيد ميلاده !!!

كل سنة وأنت طيب ياسيادة الرئيس
لكن لي رجاء بمناسبة عيد ميلادك
أرجوك إفرج عن المعتقلين ياريس
90% منهم لايشكل خطر على أحد
طلبة أولاد فلاحين وعمال
طلبة هم وقود المستقبل ياريس
إطلب بياناتهم وأعيد النظر فيهم
من أجل أمهاتهم وآبائهم ياريس
جهاز الأمن الله يسامحهم
دايما بيعملوا من الحبة قبة
دول غلابة ولاد غلابة ياريس
صرخة من مصري بيحبك وبيحب مصر
وربنا يطول عمرك

» كل سنه وإنتوا طيبين :)
» كل ثوره واحنا دايما فرحنيين
» كلام عجبك وانت بتذاكر...!
» احترس وانت راكب المترو
» كل سنة وكلنا طيبين