انا مولود جديد في الحياة دي لسه جاي الدنيا العجيبة دي من كذا سنة محدش بيبحبني أبدا ولا حد بيطئني ولا بيئبلني على الرغم إني أصبحت أمر واقع ومفروض عليهم جايز عشان اتعوده على اخويا الكبير لان هو الاصل من ساعة مالناس اتولده وهما عارفينه
بس هو خلاص بينقرض وانا جيلي هو القادم
خرجت من الحضانة بتاعتي لإيد واحد صراف طيب اوي خدني انا واخواتي وكان خايف علينا جدا اكتر من نفسه لاننا برده في الاخر أمانة معاه كان حنين علينا جدا حطنا في الدرج بتاعه لحد مجه دوري اني أروح لصاحب نصيبي التاني وكان المدير بتاعه كان قرفان مني ووكان شكله مغرور متكبر ومتعطنز أخدني وكان عليا خايف جدا بس مش خوف زي خوف الصراف لا دا خوف أنانية وإمتلاك وحب فينا وفي قيمتنا مهما قلت واللي أكدلي دا صحابي الاكبر مقاما وخبرة انهم بئالهم سنين في خزنته متحركوش سعيت وانا في جيبه إني أهرب منه وفعلا كانت اجمل لحظة في حياتي الصغيرة لما هربت منه وقعت على أرض ناشفة صلبة قاسية لقاني واحد شكله طيب وغلبان كان بيكنس الشارع فرح بيا جدا وراح جاب بيا ساندوتشين فول وكان شايف اني أكبر من ساندوتشين الفول بس هو حرام كان جعان ودعته لاني حبيته جدا رغم اني قعدت معاه فترة قليلة وكان صاحب المطعم شكلي مش عاجبه قال ايه مبيمشيش أداني لواحد شكله عجيب كنت باقي مكانش راضي ياخدني الراجل زعئله وقاله انا مش جايبها من بيت ابويا دي بتاعة الحكومة خدني غصب عنه كان نفسي أهرب منه بس معرفتش ركب بيا ميكروباص وكانت فرصته انه يتخلص مني بس السواق كان شكله مفتري ومرعب ومرضيش ابدا ياخدنيوقال هو كلكوا هتدوني من العينة دي؟ طب مش طالع وركن العربية وصمم ان الراجل ينزل وكانت خنائة كبيرة لحد مجه واحد لابس ابيض في ابيض وهدده انه يطلع وياخد الفلوس حاول يجادله اتخنئ منه خلاه يعتذر للي معايا من الأول وجه طالع بالعربية قال له رايح فين هات دول الراجل أخدني وأخدت اصحاب واصحاب اصحابي وبيتهيئلي كان هيئلع السواق هدومه لولا ان الناس اتحايلت عليه اخدنا الراجل المفتري دا في جيبه كانت ايده مش نضيفه خالص راح صرفني سمعته بيقول لصاحب الكشك عايز اتنين فرط وأديني اهه ماشي في رحلتي القصيرة في الحياة وبشوف أشكال وأصناف وبتعلم منها وبعرفها
كتبها / عمرو علي
النوع
موضوع: شخصية الجنيه !!!!!! 
الإثنين مايو 10, 2010 11:59 pm
