احبائى
ناس كتير بتتكلم , وفضائيات عن كلام بيتقال ان فيه مصيبة او كارثة حاتحصل يوم 29 سبتمبر القادم , سمعتوا عنها ؟
والمشكلة مع الإشاعات والكلام المش محدد , يعنى هل الكارثة دى حاتحصل فى مصر او فى العالم كله ؟
يعنى نفسى اسألكم سمعتوا ايه او ايه تخيلاتكم
يعنى حصل كتير من بعد سنة 1940 ( واقصد بهذا الوقت انتشار وسائل نقل الأخبار فى العالم ) طلع كتير واحد مشعوذ فى دولة بعديدة بيتنبأ ان يوم القيامة يوم كذا , او واحد بيدعى انه مكشوف عنه الحجاب او متصل ل ..... فوق يعنى بيعرف المستخبى , او وصلت لأن واحد يدعى ان الاله اوحى لهفى حلم او حاجة زى كده , وطبعا كله طلع كذب
بس التخوف انك لما تتأمل , وبالذات بعد عدم الإستقرار اللى عايشينه الأيام دى , بيحصل ان الخيال بيروح لزوايا غريبة وتخيلات مخيفة , يعنى على مستوى مصر بس ممكن تتخيل ان الناس اللى بتخرب كل يوم مش مكفيها الخراب اللى البلد فيه وعايزين يجيبوا عاليها واطيعا وتبقى خرابة بالمرة , يعنى الناس مثلا اللى بتلمح ان لو ماحصلش الإنتخابات فى موعدها ممكن تحصل ثورة تانية , والثورة التانية دى حتكون مين ضد مين , وممكن تبقى سلمية ولا مش .... , وبالطبع يعنى انا من وجهة نظرى مش فاهم الإنتخابات تتم بطريقة صحيحة وسط الفوضى الامنية او ال لا أمن اللى موجودة , يعنى زمان كان الانتخابات بيحصل فيها حوادث وقلق ومع تواجد الشرطة الطبيعى , لكن دلوقتى ممكن يحصل ايه
وممكن التصورات تكون حاجة عالمية , يعنى عملية ارهابية كبرى لضرب حاجة نووية مثلا والارهابيين مش عايزين يعملوها فجأة ولكن عايزين يبينوا سطوتهم الاول ,
وفكرى برضه وصل لحاجة , ان الله حس ان الناس مش طايقة السلام وعايزين يخربوها ( والدليل على كلامى ممكن نكتب احداث عنف وقلق تملا كتاب )
وحيأدبهم بقوته زى الاحداث اللى بتحصل كانت زمان , لما اغرق الارض واختص نوح واسرته وحدهم بالنجاة ( قصة نوح والفلك )
انتم رأيكم ايه ؟؟؟؟
النوع
موضوع: يوم 29 سبتمبر وايه اللى ممكن يحصل 
الأحد سبتمبر 25, 2011 6:58 pm
