احبائى
قد يكون طرحى للموضوع ما يعجبش ناس
وانا مش مباركى ولا من انصار العهد البائد .. وماليش اى مطامع سياسية ولا مكسب من اى نوع
انا سنى 61 وعملت كل اللى فى نفسى والحمد لله لحد دلوقتى مش بعانى شوية من المشاكل الطاحنة اللى ابتدت تحصل ( لحد دلوقتى )
بس كلمة نعمة يعنى ايه ؟؟ يعنى اوضاع زى الزفت كانت عموما فى فصر وقامت ثورة شعبية جميلة ,, وراح فيها مايقرب من الف شهيد قدموا ارواحهم فداء للوطن واتخلع النظام اللى كان خارب البلد .. بس كان المفروض او الوطنية تحتم ان الشعب كله يتماسك وتحصل عملية تطهير مش لرؤوس الفساد فقط ولكن الرؤوس والجسم والذيل .. يعنى فيه كائنات ممكن تقطع نصفه ويطلع لو نصف جديد زى البرص مثلا ممكن يتقطع ذيله ويطلع لوذيل جديد
ولما الكل يتكاتف ونمسك نفسنا على مطالنا الشخصبة ونبتدى ننتج .. وكان احلى حاجة فى الثورة اننا المفروض مش حانتسرق تانى .. وكل المبهورين بدول الخليج زى السعودية مثلا والله احنا عندنا كمية موارد قد السعودية 25 مرة فى مختلف المجالات لو اشتغلنا بذمة واخلاص ووطنية كنا ممكن فى ظرف سنة حالنا يتغير لكن ايه اللى حصل ؟ بعد 15 شهر ثورة اللى اتغير التوقيت الصيفى ,, وارقام الموبايلات زادت زيرو وتغير بعد ترددات القنوات الفضائية
وال 3 حاجات دول ماكانوش محتاجين ثورة ولا 1000 شهيد .. لكن لو شفنا المصايب اللى بتحصل دلوقتى وبتزيد كل يوم .. وحلها كل ما بتزيد بقى صعب جدا نقول ايه ؟ ابسط حاجة ازمة البنزين والسولار والبوتاجاز .. انا بتكلم وانا مش متضرر منهم لأن عندى غاز طبيعى وانا ع المعاش مش بخرج كتير يعنى مش محتاج بنزين اوى لكن صعبان عليا اللى بيحصل لمصر .. والوقود ده انا لزق فى بيتى محطة بنزين كبيرة وعشان زبون عندهم وجيران هم اصحابى قالوا ان بيجى لهم كل يوم اقل من ثلث الكمية المقررة .. علما بأن الشركة المنتجة بتقول احنا زودنا الإنتاج 25 % وتشوف شريط الاخبار كل يوم يقولوا مسكنا ييجى100 طن بنزين او سولار متهرب .. والمفروض ان الوقود ده مدعوم يعنى لتز البنزيناللى انا بشتريه ب 2 جنيه الدولة بتتحمل عليه ممكن اكتر من كده ..ازاى نسمح انه يتهرب يعنى ده اشبه بسفك دماء الشعب المصرى .. وانا يعنى بشوف بنظرة متعتة شوية حسيت انو كمان مش بيتباع فى السوق السوداء .. لأن فيه نس ممكن تشتريه اغلى .. لكن وقوف العربيات ساعات طويلة امام المحطات ده بيدل ان مفيش كتير فى السوق السودا وانه بيروح حتة تانية .. والمشكلة الاخطر ان الوقود ده بتشتغل منه المخابز يعنى ايه قولكم لو رغيق العيش كمان حصل فيه ازمة ؟؟
وابتدت فعلا فى اماكن .. وسيارات الاسعاف ابتدت تتعطل ومحطات الكهربا بتشتغل بالوقود ... ومحطات المياة اللى بتجيب لكم الماء فى البيوت بتشتغل بالوقود ... ولا حد هنا
والمطاهرات والاعتصامات الفئوية نفسى اعرف .. مش واخدين بالهم ان الاحتياطى النقدى كل يوم بينقص ؟؟ بنسحب منو بدون اى مورد يعمل دخل يسد محل المسحوب وبالطريقة دى خلاص قرب يخلص
انا مذاكر تاريخ مصر من 7000 سنة .. عمر مامصر اتبهدلت بكل معنى الكلمة زى خلال ال 15 شهر الماضى .. والمؤسف والمخجل انها مش بتتبهدل
على يد التتار ولا الهكسوس ولا الصهاينة .. ولكن بتتبهدل على يد ناس اخجل انى اقول انهم مصريين .. يعنى مصر مر عليها نكبات ونكسات وهزائم كتير
لكن كل مرة كان الشعب بيبقى ايد واحدة والاتحاد عشان قوة كبيرة اوى كان بيخرج مصر من النكبات .. ايام الحروب كان الحرامية بيبطلوا سرقة .. والمجرمين بيتوبوا .. يعنى انت مش بتخاف على بيتك ؟؟ مش بتخاف على اولادك ؟؟ بيتك واولادك دول خلية فى جسم كبير اسمه الوطن
ولو الجسم ده اتأذى اكيد بيتك وولادك كمان حا يتأذوا
لحد دلوقتى الثورة عاملة زى واحد عنده خراج صغير مليان صديد بس فى حتة صغيرة من جسمه وكان ماشى بيه بيروح الشغل عادى بيتألم شوية لكن ماشى .. اللى حصل ان واحد حاولا يعالج الخراج خلاه ضرب فى كل جسمه وجاب لو شلل ولقعده عن الحركة وبياكل فى الملاليم الفاضلة معاه ساعة مكان بيشتغل بس خلاص حاتخلص .. او عش دبابير كان على جنب كده يعنى مؤذى شوية حد جه كشفه وخلا الدبابير تطلع وتملا البلد
او قنبلة واحد جه يعطلها ماعرفش فين السلك اللى لو قطعه يبطلها وقطع سلك تانى
مصر بقت زى واحد فى غرفة الانعاش وكل ما يبقى حا يسترد انفاسه واحد يدوس على خرطوم الهواء عشان يفطسه ......
مع اطيب تحياتى
النوع
موضوع: ثورة 25 يناير بعد 15 شهر 
الإثنين مارس 26, 2012 4:36 am
