موقف مش هنساااااااااااااه !!!

كل سنه وإنتوا طيبين الأول

النهارده وأنا بقلب فى الفيس لقيت الصورة دى

موقف مش هنساااااااااااااه !!! 487147_10151282372213294_1697418437_n

افتكرت فى رمضان اللى فات كان منتشر أوى ع الفيس الموقف بتاع الولد اللى كان بيوزع تمر
ع الناس ف السيارات اللى ع الطريق وقت الفطار

فرايح يدى لواحد ، فالراجل ابتسم وقال له : متشكر أوى يا حبيبى أنا مسيحى !!!

فالولد رد عليه : يعم خد يعنى هوا أنا اللى مسلم !!!

أد ايه الموقف ده تحس بإشعاع الحب من كل حته فيه وبنبذ التعصب والكراهيه

شخصيا حصل معايه موقف مش هنساه طول عمرى

رمضان اللى فات كنت لسه داخل الجيش ، كان بقالى كام يوم بس ،

يعنى كنت لسه عسكرى مستجد وما أدراكم ما عسكرى مستجد فى الجيش !

المهم مرة كنت واقف خدمه ع البوابه وقت الفطار فقبل المغرب بحولى نصف ساعه

لقيت 2 عساكر بس أقدم منى كان بقالهم فى الجيش واحد سنه ونصف

والتانى كان باقى له 90 يوم ويخلص جيش وكان جيشه 3 سنين !

يعنى كانت ناس أقدم منى بكتير فى الجيش واحد رديف والتانى منتظر رديف

المهم لقيتهم هما الإثنين (وكانوا مسيحيين) جايين يقفوا مكانى أنا وزميلى ع البوابه

قالوا لنا يلا روحوا افطروا مع زمايلكم ، بس تفتطروا وتيجوا على طول Smile

العسكريين دول ولا يعرفونى أنا وزميلى ولا نعرفهم ومفيش حد قلهم روحوا اقفوا مكان

زمايلكم على ما يفطروا و هما أصلا مش بيقفوا خدمه ، دى ناس قديمه فى الجيش

على الرغم إن كان فيه ناس عساكر مستجده زينا مسيحيين كانوا ممكن وقفوهم مكاننا

وبكدا يبقوا عملو خير برضه ، لأ هما اللى جم وقفوا !

مش كدا وبس ، لأ دا أنا تابعت الحكايه دى ، لقيتهم طول رمضان بيروحوا وقت

الفطار يقفوا مكان اللى واقف ع البوابه لحد ما يفطر مع زمايله !

لأ وايه كمان ، مقسمين الموضوع عليهم ، إحنا 6 مثلا يبقى كل اتنين هيقفوا يوم

لا حد قال لهم كدا ، ولا ضابط أمرهم ، ولا هوا بالميرى مفروض عليهم ، وعادى

يعنى لما العسكرى يفطر ع البوابه ، بس هما من نفسهم يجوا يقولوا لك روح افطر مع زمايلك فى الميس !!!

أنا عمرى ما هنسى الموقف ده والناس دى خلصت جيش وخرجت من زمان بس كل لما هقابلها هشكرها

كل سنه وكل مصر بخير

جميل اوي بجد
ودا الشعب المصري اللي مفيش فرق بين مسلم ومسيحي
ومعرفش ليه ومين اللي بيعمل الفرق دا

هى دى عظمة اشعب المصرى اللى بيثبت كل مرة انه فصيل واحد بس مصرى

الاخ العزيز محمد عبد الكريم
اللى انت بتحكيه ده جوانا يعنى مش بنفتعله عشان نبقى حلوين
والله العظيم انا فى شهر رمضان على قبل الفطار بساعتين ببقى نفسى انزل اعمل اى خدمة لأخوتى واحبائى المسلمين واللى بيمثلوا 98% من اصدقائى المقربين .. يعنى اقل حاجة بعملها انا ساكن فى عين شمس لو جاى من العباسية مثلا بعربيتى والاقى الاخوة الاحباء واقفين على محطة الاتوبيس فى ساعة الذروة عادتى اقف واخد معايا 2 او 3 يكونوا فى طريقى ,, وللعلم الحاجة دى اقول لك حاجة غريبة وجميلة انا اتعلمتها من سيدنا محمد صلى الله عليه وسلم .. يعنى احنا بنحبكم وبنتعلم الحاجات الحولوة اللى فى دبنكم .. فى حاجة قالها سيدنا محمد اسمها زكاة الركوبة ( وللعلم اكتشفت ان فيه كتير ماسمعوش عنها ) زكاة الركوبة دى يعنى زمان لو واحد رايح السوق ومعاه حمارين مثلا هو راكب حمار وفيه حمار ماشى معاه فاضى .. لو خد معاه حد فى طريقه على الحمار التانى دى اسمها زكاة الركوبة .. والتميز فى التطبيق الصح للدين انك بتتعامل حسب طبيعة العصر ... يعنى انا رايح مشوار بعربيتى وجنبى كرسى فاضى وورايا كنبة فاضية زكاة الركوبة انى ممكن اخد معاها حد يكون تعبان او واحدة ست كبيرة وبتقعد تديعيلى دعوات ممكن تحفظنى سنة ... وزاة الركوبة دى ربنا بيردها للإنسان بكذا طريقة يعنى بيحفظه من شر الطريق وثانيا وانا حسيتها كتير اوى .. ان ربنا بيخلى العربية لو عطلت بتعطل قدام ميكانيكى .. او لو فيه مكان مافيهوش ميكانيكى تلاقى طلع لك ميكانيكى من تحت الارض من حيث لاتدرى .. يعنى سواق تاكسى مثلا يكون فايت تلاقيه وقف لك وعمل معاك حركة جدعنة والله وكتير مش بيرضى ياخد فلوس ... واحنا فى مصر لو رجعت للتاريخ حتلاقى مصر كانت من 1400 سنة كلها قبطية ولما دخل الاسلام جزء من المسيحيين دول اعتنقوا الاسلام .. يعنى العملية لو نفهمها كويس اوى مش مواطنة فقط ولكن قرابة .. صلة رحم ودم يعنى واحد واخوه الاول فضل مسيحى واخوه اعتنق الاسلام ... واحنا عندنا اللى بيعتنق الاسلام ماعندناش فى الدين المسيحى كلمة مرتد ولا توابعها يعنى كل واحد له يختار ما يعبد ( وماحدش ينسى ان كلنا بنعبد الله وهو إله واحد ) بتلاقى العلاقة بتفضل زى ماهى بين الاخ واحوه وبعدين بين ولادهم والسلالة .. يعنى النهاردة انت لو جبت 100 مسلم و100 مسيحى وعملت لهم تحليل الحامض النووى حايطلع منهم كتير قرايب يعنى جدهم واحد ... وبعدين من اهم مميزات مصر واللى مش بتتوفر فى معظم دول العالم ( وانا رحت دول كتير جدا جدا مختلفة ) ان من 1400 سنة لا اللى اعتنقوا الإسلام فضلوا فى اماكنهم يعنى ما انفصلوش فى اماكن خاصة .. دى جعلت المصريين بقوا نسيج متاخل زى القماش او زى الكشرى او زى حائط كبير جدا جدا فيه طوب مسيحى وطوب مسلم
وللعلم ان الطوب ده مختلط فى الحائط من تحت لفوق ومن جميع الاتجاهات يعنى لو حبيت تفصل الطوب المسيحى عن الطوب المسلم الحائط حاينهار
وده اللعب القذر اللى بيتعلعب على مصر ... احداث الفتنة بين الاشقاء وخطورة اللعب زى ماقلت ان المسيحيين والمسلمين مختلطين يعنى كل شارع وكل حارة وكل عمارة وحتى العشوائيات مختلطين مع بعض ...
لو شفنا بلد زى لبنان كانت من اجمل دول الشرق الاوسط يعنى كانت هى نزهة او الفسحة او المكان السياحى الجميل فى الشرق الاوسط وناس مبسوطين ومتدلعين وبيغنوا وهايصين ... اللى لعب عليهم عشان يخرب لبنان لعب ع الناحية الطائفية واستغل ان هناك مش اقل من 3 طوائف مسلمين ومش اقل من 5 طوائف مسيحيين ... جه اللعب القذر على الوقيعة بين اى طائفة والتناية يعنى السلمين مع المسيحيين ككل .. سكتوا راحوا مولعين المسلمين ف بعض .. سكتوا راحوا مولعين المسيحيين فى بعض .. واللى شجع على الحروب الطاحنة دى ان هناك مش زى مصر .. يعنى بإستثناء العاصمة والمدن الكبرى باقى لبنان كل البلاد الصغيرة بتبقى فصيل واحد يعنى بلد سنية وبلد شيعية وبلد دروز وبلد ارثوذكس وبلد مارونيين وهكذا .. ولعوا الحروب بين كل بلد والتانية والاخطر ان اللى بيولع بيدى الطرفين سلاح عشان يقطعوا بعض
بس ده مستحيل يحصل هنا برغم اى حاجة لأن اللى بيعمل كده : بيمكرون ولكن الله بيمكر بهم وبيتكشفوا
اتمنى ربنا يديم المحبة ومع اطيب تحياتى ... ويارب ع العيد تكون مصر فقت شوية

marwa magdy كتب:: جميل اوي بجد

ودا الشعب المصري اللي مفيش فرق بين مسلم ومسيحي

ومعرفش ليه ومين اللي بيعمل الفرق دا

متعصب مش فاهم ، هوا دا الى بيحاول يعمل الفرق يا مروة بس مش هيعرف لسبب واحد وهو إن مصريتنا بتغلب علينا

rahaf كتب:: هى دى عظمة اشعب المصرى اللى بيثبت كل مرة انه فصيل واحد بس مصرى

صح كلامك يا أستاذه / rahaf

عادل صموئيل كتب:: الاخ العزيز محمد عبد الكريم
اللى انت بتحكيه ده جوانا يعنى مش بنفتعله عشان نبقى حلوين
والله العظيم انا فى شهر رمضان على قبل الفطار بساعتين ببقى نفسى انزل اعمل اى خدمة لأخوتى واحبائى المسلمين واللى بيمثلوا 98% من اصدقائى المقربين ..
لو شفنا بلد زى لبنان كانت من اجمل دول الشرق الاوسط يعنى كانت هى نزهة او الفسحة او المكان السياحى الجميل فى الشرق الاوسط وناس مبسوطين ومتدلعين وبيغنوا وهايصين ... اللى لعب عليهم عشان يخرب لبنان لعب ع الناحية الطائفية واستغل ان هناك مش اقل من 3 طوائف مسلمين ومش اقل من 5 طوائف مسيحيين ... جه اللعب القذر على الوقيعة بين اى طائفة والتناية يعنى السلمين مع المسيحيين ككل .. سكتوا راحوا مولعين المسلمين ف بعض .. سكتوا راحوا مولعين المسيحيين فى بعض .. واللى شجع على الحروب الطاحنة دى ان هناك مش زى مصر .. يعنى بإستثناء العاصمة والمدن الكبرى باقى لبنان كل البلاد الصغيرة بتبقى فصيل واحد يعنى بلد سنية وبلد شيعية وبلد دروز وبلد ارثوذكس وبلد مارونيين وهكذا .. ولعوا الحروب بين كل بلد والتانية والاخطر ان اللى بيولع بيدى الطرفين سلاح عشان يقطعوا بعض
بس ده مستحيل يحصل هنا برغم اى حاجة لأن اللى بيعمل كده : بيمكرون ولكن الله بيمكر بهم وبيتكشفوا
اتمنى ربنا يديم المحبة ومع اطيب تحياتى ... ويارب ع العيد تكون مصر فقت شوية

المواقف دى مش نتاج تدين أحد الطرفين أ/ عادل ، خالص معتقدش دا على الإطلاق ، المواقف دى نتاج سلام داخلى فى نفس كل مصرى

دى صفات أصيله فى المصريين ملهاش دعوة لا بدين ولا بلون ولا بشكل

حلو الموقف جدا فكرني بالشاب المسيحي الي كان بيساعد شاب مسلم للوضوء في الميدان انالما كنت بسمع برنامج كان فيه مفيدفوزي قالك ان كلمة عنصري الأمه دي كله مش صح وانا معاه المفروض ان احنا عنصرواحد بيجري في عروقنا دم واحد فيه نيل مصر وحب الوطن (حب الوطن من الأيمان )ومفيشفرقبين مسلم مسيحي ودي حدوته كنت بحكيها وقولت فيها ان في شاب اسمة مصعب كان في ايده الصليب وبيصلي استغرب العالم لما شافة بس لما عرف انه من مصر الجميع كانو في حالة من الصمت............. وكل احترامي وتحياتي لكل مصر مش عقول مسلم او مسيحي علشان احنا واحد

جميل اوى الموقف يا زينب ، طبعا لازم يستغربوا بس إحنا كمصريين عاااااااادى

أشكر مشاركتك يا زينب ويارب مصر دائما بخير

Very Happy

مواقف مش غريبة على المصريين

انتم شعب اصيل

ياريت الاعلام او الفن يوضح هذه المواقف الجميلة بشكل ذكي

زمان كنت في زيارة للقاهرة في رمضان ودخلت لصيدلية شفت دكتورة كانت مسيحية من ( الاسم المكتوب)

وشفت وحدة تانية بتشتغل معاها بعد ماخلصت جلست تقرأ قرآن

لما طلبت الدواء قالت الدكتورة للعاملة الصائمة الي بتشتغل معها ارتاحي انا راح اجيب الدواء

صراحة منتهى الجمال والروعة

تعامل الدكتورة راقي مهذب صادق للغاية

الله يحميكم لبعض

تعرفو ان مدام مني الشاذلي برده حكت موقف زي ده قبل كده فالبرنامج !

كانت راجعة متاخر وقت الفطار وبعدين شاب من الشباب بيوزع تمر بسرعة علي الناس فالعربيات

وبعد ما مد ايده...لقي قدامه الي سايق العربية قسيس !!

فالولد ارتبك..بس القسيس مسك ايده وخدها وشرب وقاله كل سنة وانتم طيبين

مصر جميلة واهلها شعب جميل بجد

كل سنة وحضرتك طيب يا استاذ محمود وكل اعضاء الموقع طيبين

» لأ كده لازم البرنامج ياخد موقف
» موقف أبناؤنا فى الخارج (الثانوية العامة السعودية) وبالتحديد فى منطقة حائل
» شاهد مني الشاذلي مع محمود سعد تحكي له ما دار في لقاء الاعلاميين مع محمد مرسي . و موقف غريب لمرسي اثناء اللقاء
» خريطة ظهور الإعلاميين على الفضائيات المصرية عام 2011 .. و إدارة شبكة قنوات "دريم" تحدد موقف الاعلامية مني الشاذلي ..
» بقلم ارنست جبران . وعلى الرغم من أنني من أشد المعجبين بها, إلا انها فشلت مني الشاذلي في إرباكهما أو حتى وضعهما في موقف المغلوبين على أمرهما ..