مقترحات عشان مستقبلنا كلنا

رأيي ان الوقت الفاضل ضيق جدا قبل الانتخابات و أضيق قبل تعديل الدستور.... وأنا موش مختلف مع اللي عايزين ياخدوا حقهم من الماضي ولا مختلف مع اللي عايزين يطووا الصفحة و يبتدو من جديد.... سواء اختلفنا أو اتفقنا أو اتخانقنا \ في الآخر مسيرنا لانتخابات مجلس شعب ورياسة

وبتصور ان تغيير القوانين والدستور والعملية الانتخابية هما أكتر حاجة حتأثر على مستقبلنا كلنا ولمدة خمس سنين جايين على الأقل

لو في حد مننا عنده اقتراح و الأغلبية في الجروب وافقت عليه يا ريت نرفعه باسم الجروب لأخذ الرأي العام سواء في التليفزيون أو جروبز النت عشان نلحق نطلب تنفيذه ويلحق يتنفذ قبل ميعاد الانتخابات

أرجو من الأدمن عمل استفتاءات للتصويت على أي اقتراح من أي حد

و أرجوك يا كل من تقرأ الآن.... الاقتراح طالما اتحط على الورق بقى ملك للكل .... أرجوك اختلف معايا وغيّر اللي انت عايزه في الاقتراحات اللي جاية دي سواء في التفاصيل أو الموضوع... واتأكد اني نسيت اقتراحي المرفوض وحلتزم بتأييد وتنفيذ اقتراحك اللي الأغلبية قبلته... مجالات الاقتراحات كتير (سياسة\ اقتصاد\ اجتماع\ تعليم\ صحة\ انتاج\ صناعة\ زراعة\ تجارة\ بناء\ نقل\ مرور\ اتصالات\ معلومات...الخ) وابعته باسمك سواء هنا أو للي انت تعرفهم واحنا لسة سلطة الشفافية في ادينا.... عشان مصلحتي ومصلحتك .... قبل ما نكتشف اننا ضيعنا مستقبل ولادنا بسكوتنا وعدم مشاركتنا في وقت كان مسموح وممكن للجميع انهم يشاركوا في صنع مستقبلهم

واللي جاي أهداف ومقترحات يا ريت يتم التصويت عليها وتطويرها

الهدف 1 : زيادة عدد الناخبين و ضمان نزاهة الانتخابات
المقترح 1 : الانتخاب بتحقيق الشخصية و يتجمع على داتا بيز زي الرقم القومي أوالرقم التأميني نشوف أنهي فيهم الأشمل والأأمن ونطلب من القضاء المشرف على الانتخابات يعمل له أكسيس على النت مع تصنيفه طبقا للدوائر الانتخابية و يعمل هايد للأرقام و البيانات الشخصية عدا الاسم طبعا و في حالة تشابه الأسماء ينضاف بيان تاني يفرق ما بينهم بحيث ان حضرتك تروح اللجنة تنتخب و ناس في اللجنة تعمل للي كتبته داتا انتري على النت فتخش على السايت تعمل سيرش وتتأكد بنفسك من صحة صوتك أو صوت غيرك و لو عايز تراجع على الحكومة العدد كمان تقدر تعملها\ كمان قانون يسمحلك انك تاخد صورة من اللي انت كتبته في اللجنة (صوتك الانتخابي) ممضية من القاضي المشرف أنها طبق الأصل\ يعني يبقى معاك مستند يثبت اللي انت كتبته\ موش تسيب الورقة و تمشي\ ده انا لما بسلم عدة تيليفون بآخد وصل من السنترال انهم استلموها يبقى لما اسلم صوتي الأنتخابي ما آخدش منه صورة؟

الهدف 2 : ضمان صحة صوت عضو مجلس الشعب في أي تصويت داخل المجلس بحيث تختفي الى الأبد جملة "الموافق يتفضل برفع يده موافقة" واللي اتعودنا انها بتتقال في ثانيتين بالكتير\ أعتقد ان التصويت الالكتروني حيبقى أكتر حاجة الشعب يشك فيها\
المقترح 2 : يتعاد تصميم صالة مجلس الشعب بحيث يتعمل فيها تلات أماكن بالاضافة لأماكن الجلوس: مكان للموافقين و مكان للرافضين ومكان للممتنعين عن التصويت وجلسات مجلس الشعب تتذاع على سايت المجلس و في التليفزيون على الهوا\ وعند لحظة التصويت للقرار ينتقل كل عضو للمكان الخاص بقراره و تبقى الصورة مسجلة على عينك يا تاجر لكل الشعب ويطلع عنوان تحت الشاشة على ايه الموضوع اللي تم التصويت عليه\

الهدف 3 : ضمان جدية تمثيل عضو مجلس الشعب لدايرته وأنه شغال بجد
المقترح 3 : يسن قانون بوجوب اجتماع أسبوعي مفتوح للنائب (زي ما كان بيعمل في مرحلة الدعاية الانتخابية) مع دايرته ووجوب نشره على النت على الهوا للشفافية لكل الدوائر\ يعني تدخل على الويب سايت لمجلس الشعب تلاقي دايرة كذا تدخلها تلاقي الاجتما ع الأسبوعي تشوفه على الهوا و تعمل داونلود للاجتماع بتاع تاني أسبوع في الشهر قبل اللي فات\ كمان يسمح للنائب بالتغيب عن 10% كحد أقصى من اجتماعات الدايرة الأسبوعية أو الجلسات الدورية لمجلس الشعب لأسباب مقبولة من رئيس المجلس واذا تعدى النسبة دي في نهاية أول أو أي سنة نيابية يتم الغاء عضويته و اعادة الانتخابات في دايرته و منعه من الترشيح في أي انتخابات نيابية مقبلة سواء للمحليات أو لمجلس الشعب\

الهدف 4 : ضمان استمرارية النائب في تنفيذ مهامه طبقا لمصلحة أهل دايرته
المقترح 4 : يسن قانون يسمح لنصف عدد الناخبين بدايرته كل 6 شهور مثلا بتقديم طلب موثق بتوقيعاتهم لرئيس مجلس الشعب لأسقاط عضوية النائب واعادة الانتخابات في الدايرة\ وبكدة يبقى النائب عنده موسمين في السنة لازم يأكد فيهم لدايرته انه عند مطالبهم و احتياجاتهم\ موش قاعد على قلبهم 4 أو 5 سنين بالعافية\ يعني لو الدائرة شافت ان نائبها غير كفء من حقها تسقط عضويته\ و النائب كمان من حقه ياخد فترة كافية يثبت فيها كفاءته\ ما أعتقدش ان 6 شهور قليلين\

الهدف 5 : تقليل دور التأثر الشخصي للناخب في قراره باختيار المرشح
المقترح 5 : يتعمل استفتاء شعبي غلي صيغة موحدة لجدول ثابت يشمل بنود البرنامج الانتخابي (لمرشحي مجلس الشعب أو رئاسة الجمهورية) والتي يجب أن تغطي كل نواحي الحياة للمواطن المصري وحقيقة وضع مصر وترتيبها بالأرقام بين دول العالم طبقا لمعايير يضعها علمائنا المنتشرين في كل مكان في العالم \ ويسن قانون بالزام المرشح لملأ خانات الجدول بمقترحاته وتحديد أهدافه على الجدول الثابت بأرقام واضحة وتواريخ محددة وطبقا لمعايير علمية وتنسيب للمعدلات العالمية \ وكدة تبتدي الناس تدورعلى مصلحتهم بشكل عملي وعلمي بعيد عن الشخصنة\ وتنتخب برنامج العمل اللي حيحقق لها مصالحها بدل ما تنتخب الشخص اللي اتعلقت بيه\ ويعاد الاستفتاء الشعبي على محتوي الجدول الثابت وصيغته قبل كل انتخابات لتعديله بما يناسب الظروف وقتها\

الهدف 6 (خلاص ده آخر واحد): تحقيق الرقابة الحقيقية و المؤثرة لمجلس الشعب على الحكومة
المقترح 6 : ببساطة قطع خط مصلحة النائب اللي تحت ضرس الحكومة\ عن طريق الغاء الجزء المعيب في أواخر القوانين واللوايح التنفيذية اللي بينص على "استثناء ما يراه الوزير المختص" من القانون\ واللي خلى تأشيرة و توقيع الوزير هما الطريق لتجاهل القوانين و تحقيق مصالح غير قانونية (ويا للعجب بشكل قانوني) استفاد منها عضو مجلس الشعب اما لحسابه الشخصي أو عشان يحقق لنفسه شعبية مبنية على الفساد بين أهل دايرته\ اللي أعرفه هو ان الوزير سلطة تنفيذية\ يعني بينفذ القانون \ لو القانون بيعوقه عن تطوير العمل في مجال وزارته يبقى الوزير يرفع طلب لمجلس الشعب بتغيير القانون\ لأن ببساطة ايه معنى القانون اللي السلطة التنفيذية تنفذ منه فقط الأجزاء اللي تعجبها في وقت ما يعجبها ؟\ رأيكم ايه نشيل استثناء الوزير والا نسيبه؟

اقتراحات رائعه فعلا
و اكتر جزء اعجبنى الخاص بالزام عضو مجلس الشعب بتنفيذ مطالب الناس
شكرا

ايماء شكرا على رأيك

يا أدمن يا آيات يا أمير يا ريت تعملوا استفتاءات للتصويت على أي اقتراح من أي حد

يا كل من تقرأ الآن برجاء قولوا رأيكوا و عدلوا في المقترحات اللي فوق وضيفوا مقترحاتكم في مواضيع جديدة

يا ريت تقولوا رأيكم في المقترح اللي جاي ده

الهدف 7 : تحقيق الرقابة الحقيقية للشعب (من خلال نوابه بمجلس الشعب) على رئيس الجمهورية وتجنب الخسائر الاقتصادية والأمنية المصاحبة للثورات
المقترح 7 : تصور معايا لو الشعب عبر عن رأيه لنوابه في اجتماعاتهم الدورية بأهل دوايرهم\ و أغلبيتهم اتفقوا على ضرورة اقالة الرئيس\ الحقيقة هي موش فارقة معايا اذا كانت ديموقراطية رئاسية أو برلمانية\ لكن على أي حال تصور لو فيه بند في الدستور بيدي الحق لأغلبية أعضاء مجلس الشعب (سواء النصف أو التلتين أو التلات أرباع حسب ما نتفق) الحق في تقديم طلب للتصويت بمجلس الشعب على اقالة الرئيس\ أعتقد ده يوفر على كل الشعب كتير من الخسائر الأمنية و الاقتصادية اللي حتكون تمن لازم يدفع أثناء مماطلة الرئيس و تمسكه بالكرسي زي ما شوفنا\ أعتقد في تناقض كبير ان الشعب يختار رئيس في انتخابات حرة و بعدين ييجي الرئيس ويبقى من حقه حل مجلس نواب الشعب اللي اختاره\ أعتقد ان من المنطق ان الشعب اللي اختار الرئيس هو اللي من حقه يقيل الرئيس\ وبدل ما يبقى البديل الوحيد انه يقيله بثورة أعتقد ان الأأمن والأسلم و الأوفر ان الشعب يقيل الرئيس من خلال نوابه\ ايه رأيكم؟

آرائكم من فضلكم

ريحو نفسكم مجلس الشعب الجديد هايعمل زى القديم هايشوفو المصلحة مع مين وهايطبلولو ياعمى احنا فراعنة مفيش فايدة

أحمد كمال شكرا على رأيك و انا شايف انك متشائم حبتين

أرجو من الأدمن عمل استفتاءات للتصويت على أي اقتراح من أي حد... خلاص فاضل 9 أيام على استفتاء التعديلات الدستورية

و أرجوك يا كل من تقرأ الآن.... الاقتراح طالما اتحط على الورق بقى ملك للكل .... أرجوك اختلف معايا وغيّر اللي انت عايزه في الاقتراحات اللي جاية دي سواء في التفاصيل أو الموضوع... واتأكد اني نسيت اقتراحي المرفوض وحلتزم بتأييد وتنفيذ اقتراحك اللي الأغلبية قبلته.... مجالات الاقتراحات كتير (سياسة\ اقتصاد\ اجتماع\ تعليم\ صحة\ انتاج\ صناعة\ زراعة\ تجارة\ بناء\ نقل\ مرور\ اتصالات\ معلومات...الخ) وابعته باسمك سواء هنا أو للي انت تعرفهم واحنا لسة سلطة الشفافية في ادينا.... عشان مصلحتي ومصلحتك .... قبل ما نكتشف اننا ضيعنا مستقبل ولادنا بسكوتنا وعدم مشاركتنا في وقت كان مسموح وممكن للجميع انهم يشاركوا في صنع مستقبلهم

انا عضوة جديدة لي بعض الافكار لحل مشكلة الامن :

1 - فتح باب المعاش المبكر للرتب والضباط الكبار الذين يجدون صعوبه في التعامل مع الشعب في الوضع الحالي حتي لو كان معاش اجباري .

2-تخريج دفعات جديدة من كليات الشرطة بصورة تأهيل سريع ( ينطوا السنة الدراسية ) مع اعطائهم دراسات في علم النفس وكيفية التعامل مع الفئات المختلفة ثقافيا في المجتمع بصورة سريعة علي ان يعاود دعمها وزيادتها مع الوقت .

3- رفع درجات الالتحاق بكلية الشرطة بحيث يكون الملتحق بها ذو سمعة خلقية ودينية طيبة يتم التحري عنةا في محل السكن ومن خلال المدرسة وان يكون ذو هواية فنية او رياضية لان الهواية دليل علي التزام الفرد وجديتة في العمل لانها بمثابة مشروع صغير يعمل علي تنميته من صغرة فمدي نجاهة في هوايتة هو بمثابة نجاح لشخصيتة .

4- تغيير المناهج الدراسية بالكلية حيث تعتمد علي رفع ثقافةالفرد والاعتماد علي تدريس علم النفس وكيفية التعامل مع الفئات الثقافية المختلفة في المجتمع ورفع قوة التحمل والسيطرة علي النفس .

5- رفع حس الانتماء للمجتمع والشعب وحب العطاء لخدمة الوطن والمجتمع والشعب عند طلبة الكلية .

6- واخيرا للقلة التي تندس لرفع الفجوة بين الضباط والشعب يتم محاكمتهم بالاحكام العسكرية بالسجن المشدد لرفع وعودة هيبة الضباط (لمن يسبت علية العتداء علي ضابط) حتي ول كانت حالة واحدة لكي يردع كل من تسول لة نفسة.


والله الموفق والهادي
مقدمتة :هبة بكري ام تخشي علي بناتها من السير في الشارع

هبة شكرا على تعليقك واقتراحاتك

يا ريت تقولي رأيك في المقترحات السبعة اللي فوق

يا أدمن برجاء أخذ الأصوات على أي اقتراح من أي حد

يا جماعة من فضلكم شاركوا باقتراحاتكم و آرائكم.. فاضل 8 أيام على استفتاء تعديلات الدستور

يا أدمن فاضل 3 أيام على تعديل الدستور
برجاء ابداء الرأي باستفتاء على المقترحات السبعة اللي فوق والمقترحات الستة اللي تحت للسيدة هبة بكري

الاقتراح الثانى جميل جدا اما الرابع ازاى كل ست شهور المفرض فى اى وقت يشعروا فيه انه لا يؤدى ما عليه او ثبت عليه تلقى رشاوى وفى نفس الوقت تشديد العقوبات على البلاغات الكيدية اما الخامس فهو ممكن نقول انتخاب برنامج المرشح وليس المرشح بحيث يدرس قضايا دائرته ويقدم حلول عملية انا كان عندى دكتور جغرافيا عامل رسالة الدكتوراة عن القضاء على البطالة فى الشرقية بدون ميكلف الدولة شىء وبروح الجامعة اسال عليه عشان ااقوله وقتك جه انك تخدم بلدك بس للاسف يبدو انه كان منتدب وعاد لجامعته الاصلية عموما اقتراحات جميلة لكن هل تعتقد ان الشعب او المرشحين مؤهلين لهذه الحياة المثالية للاسف ان مصر بتتغير ومع ذلك انا لسه بشوف ناس بتجيب وسايط عارف واحد دافع مبلغ كبير جدا امبارح لواحد فى منصب كبير عشان يعمل مشروع ولما تقول للناس حقوكو هيجى من غير الواسطة يقولك اسكتى انتى مش عارفة حاجة كمان المرشح هياخذ ايه نظير كل هذه الشروط اذا كان المواطن مش هيسمحله بالخطا هيعوض منين الدعايا والمصاريف اللى كانت بترجعله دهب من خلال التسهيلات والتاشيرات والمجاملات والعلاقات اسفة طولت عليك

سالي شكرا على تعليقك و انتى ما طولتيش ولا حاجة
بخصوص اللي قولتيه عن المقترح الرابع أنا متفق معاكي فيه... و المقصزد من المقترح الرابع ان حتى لو كان النائب ماشي تمام يبقى عارف انه عنده موسم كل 6 شهور ممكن دايرته تشيله... ده حيخليه ينتج و يشتغل أكتر

رأيي ان المقترحات دي موش مثالية لكن عملية بالذات لما يتم تعويض النائب اللي يكمل مدته على خير بمكافأة نهاية خدمة محترمة ولو توصل لعشرات الملايين بشكل قانوني بدل ما النائب يلجأ لسرقتهم بشكل غير قانوني

رأيكم ايه؟

اتمني لو يتحقق جزء مما نحلم به 0 اتمني لو نستطيع النهوض بمصر كمانحب ان نراها جميعا
كل الاقترحات جميلة جدا 0 واتمني ان نستطيع ترجمتها الي قوانين وقواعد منظمة للحياة القادمة0

كيف نبني اقتصاد مصر
يمكن الاجابة علي السؤال باجابة مختصرة الان وهو مشروع ونواة الفكرة ويمكني متابعة التفاصيل مستقبلا
اذا وردتني ردودكم واقترحاتكم علي فكرة المشروع .

اولا : نقوم بتكوين مجموعات من الشباب وجميع فئات المجتمع سواء علي اساس ( مكان العمل - مكان السكن - النوادي والتجمعات السبابية....... الخ )

ثانيا : ان تقوم كل مجموعة تم تكوينها ولتكن 100 فرد ( عضو )

ثالثا : حيث ان لكل فرد في الحياة حلم ومشروع يتمني تنفيذة ليصبح عضو فاعل وعامل في المجتمع . فان اول العوائق التي يواجهها هذا الحلم هو التمويل وعلية .....

رابعا : تقوم المجموعة بتكوين شركة مساهمة بامولهم الشخصية البسيطة التي لايمكنها بمفردها تاسيس محل صغير - ومن منطلق مبدا توافر الثقة الكبيرة المتوفرة بين اعضاء المجموعة من حيث المعرفة الشخصية الذكورة سابقا في التصنيف ..... ومنة يمكن القول مايلي :


1 - يقوم كل فرد بتقديم حصة في راسمال الشركة . فلو افترضنا ان كل فرد قدم 10000 جنية فاننا بصدد تكوين شركة راسمالها مليون جنية

2 - ما هو نشاط الشركة ؟
بما ان كل فرد في المجموعة لدية حلم او مشروع وككن عاجز عن تحقيقة بسبب التمويل كما ذكرنا
فاننا بصدد 100 مشروع يمكن تنفيذة .

3 - يتم طرح المشروعات المقترحة علي افراد المجموعة . ويت اختيار المشروع الامثل منها الذي لابد ان تتوافر فية عدة شروط . اهمها ذو تكاليف راسمالية ضئيلة . وفير للعمالة . دوران سريع لراس المال

4 - بما اننا نملك شركة ولها راسمال جيد ولها مشروع ونشاط واهداف واضحة فلنبد العمل علي بركة الله

5 - ماذا لو قمنا في كل محافظة بتكوين 1000 مجموعة ( يعني الف شركة ) يعني ( مليار جنية في كل محاقظة) تعمل في كافة القطاعات المختلفة ... زراعية - صناعية - تجارية - خدامية

وفقا لمعطيات وموارد ومتطلبات كل منطقة او محافظة علي ما تحتاجة من مشروعات وما توفرة من موارد طبيعية وصناعية وغيرها

6- ماذا لو قامت الدولة بمساهمة بسيطة في راسمال هذة الشركات

7 - ماذا لو اسندت الدولة بعض اعمالها لهذة الشركات لدعمها وتثبيتها علي طريق الانتاج والعمل

سوف اكمل الموضوع بعد ومعرفة تعليقكم علي هذ الجزء