أحزان في «كنيسة العذراء»

أحزان في «كنيسة العذراء»

هنا إمبابة.. زحام وكتل بشرية ومناطق سكنية متلاصقة.. أنت الآن على فرع صغير للنيل.. تشاهد من الناحية الثانية برجى التجارة القابعين على كورنيش النيل وتشاهد منطقة الزمالك الراقية.. كلما تتعمق فى إمبابة تضيق الشوارع وتقترب شرفات المنازل وتشعر بأن «الجيران معاً» فى سكن واحد.. لا يغيب عن عينيك منظر القمامة ومخلفات البناء والطرق والشوارع غير الممهدة.. والتوك توك من حولك فى كل مكان وتنطلق أغانيه لا تتوقف وأبرزها «حنروح المولد» والسيارات عكس اتجاه.

بين شوارع إمبابة المكتظة بـ«ناسها وطرقها الضيقة وحاراتها العتيقة وسياراتها التى دون أرقام» يوجد هناك وبالتحديد فى منطقة المنيرة الغربية شارعان رئيسيان.. هما «الأقصر والمشروع».. الشارعان تجاريان فهذه مكتبة وهنا سنترال وبه أكثر من مقهى.. ومحال بقالة يرقى البعض منها إلى كلمة «سوبر ماركت».. وتجد محال أيضاً لبيع أفلام الفيديو.. وفى الشارع نفسه أيضاً تعرف أسماء بائعى المواد المخدرة.. حشيش.. بانجو.. برشام.. معروفون بالاسم.. يسقط البعض منهم ويدخل السجن ويخرج آخرون للمواصلة ويولد جيل ثان وثالث ليواصل المهمة.

أنت الآن على بعد خطوات من كنيسة مار مينا.. مبنى مرتفع تجد من يشير إليه: «ده معمولها خرسانة بعمق 25 متر»، ولا تجد منطقية لكلامه فهو شاب فى العشرين وبنيت الكنيسة عندما كان صغيراً.. صغيراً لا يعرف «العمق أو الارتفاع».. الشارع تقطعه شوارع بـ«الطول» وعلى بعد 20 متراً من الكنيسة تجد شارع الأقصر.. وهو شارع كبير أيضاً مواز لشارع بشتيل الذى دخلته قبل قليل.. شارع تجارى أيضاً.. يستقبل سيارات تسير فى الاتجاه الصحيح وأخرى عكس الاتجاه وبه «خرابة» كانت مصدراً لإطلاق الرصاص والمولوتوف.

ما تسمعه من روايات لا يتوقف.. تجد حواراً بين صبيين: إيه اللى بيحصل ده ياعم؟! ويأتيه الرد: مشكلة يا أخى بين مسلمين ومسيحيين. هو إيه اللى «جنن الناس».. يعنى واحدة اتجوزت ولا اتطلقت عادى.. ويتواصل الحوار: المهم يا زميلى إننا هنطلع بمصلحة.. يعنى ممكن تقع فى إيدك حتة سلاح ويا سلام ولو كانت آلى.. وتسأل أحد الصبيين فيه إيه؟ ويرد عليك: «أنا لسه جاى وبصراحة أنا باتفرج».

العدد كان كبيراً وبالآلاف.. تسمع من يتألم: «والله حرام اللى بيحصل ده والبلد مش ناقصة وكدة عيب».. وتسمع أيضاً: «دول ولاد كلب».. ولا تعرف «دول مين». وتسمع أيضاً من يقول: الساعة 5 حصلت المشكلة وكان فيه «حوار» كده وكبر.. والدنيا ولعت.. ورابع يقول: «والله أنا كنت نايم وجيت اتفرج».. وخامس يقول: «السلفيين معملوش المشكلة».. هم حضروا للتفاوض وحصل اللى حصل وأنا شفتهم وهم بيصلوا المغرب قدام الكنيسة ومعاهم شباب ومعرفش ليه صلوا مع إن المسجد جنب الكنيسة على طول ومش بعيد.. وسادس يهتف بقوة.. الله أكبر.. ويردد خلفه آلاف.. الله أكبر.. ويصمتون قبل أن يعود الهتاف مختلفاً: «إسلامية.. إسلامية».. ويردد الهتاف الجميع بمن فيهم شباب «زى الورد» وشباب يبدو أنه «متعاطى مواد مخدرة» وآخرون ملتحون.. وتتحرك قوات الأمن.. ويصرخ شاب: «وسع يا جدع رجالة العادلى وصلوا»، ويجد الرد يأتيه: «ياعم انت مش عايش.. ده اتحبس».. ولا يتركه الأول ويقول له: «أنا عارف بقول إيه.. لكن أقصد إن دول بتوع العادلى اللى كان بيستخدمهم فى فض المشاكل».. ويصمتان.. الصافرات لا تتوقف.. كأنك فى مباراة لكرة القدم.. ويشيرون لضباط الشرطة وعساكر الشرطة العسكرية.. أهو واحد فوق ومعاه سلاح آلى وهيضرب نار.. أهو فى البلكونة.. ولا ترى ولا يرى أحد من شدة الظلام.. ولا تتوقف الأصابع عن الإشارة ولا الحناجر عن «أهو بص أهو».. وفجأة تسمع صوت إطلاق الرصاص ولا يتحرك أحد..لا أحد يهرول أو يصرخ.. فالرصاص الذى أطلقه الطرفان جعل الأمر عادياً.. الوضع يستمر.. هذا حضر للمشاهدة وهذا يهتف والآخر يتابع والرابع يشير.. وتترك المكان وتستقل «توك توك» ينقلك إلى اتجاه الكورنيش.. وأنت تسأل: «من وراء ذلك؟!».. من يحرك هؤلاء؟! لماذا الآن.. ما هذه الحرفية.. لماذا لا نستقبل الآخر؟! وتبحث عن إجابة.. ولا تجد.. لا تجد وكأنك تبحث عن المتهمين والمحرضين فى أحداث صول وقنا.. وأخيراً إمبابة.. تبحث ولا تجد.
http://www.almasryalyoum.com/node/428793

وصف تفصيلي ساخر
يجعلك تعيش الحدث
وياليتنا لم نعشه
فأنا أبحث كما يبحث 85 مليون مصري عن السبب
وكأن الحدث يأتينا من خارج الوطن
ربما يكون انفلات أمني
ربما يكون تطرف فكري
ربما يكون رواسب زمني
ربما يكون ..............
ربما وربما وربما
ولا اجابة تشفي
شكرا للفاضلة فرحه

ربما ..

ربما ..

يا رب اللى جاى يكون افضل و يكون فيه الخير لمصر

ألف شكر لحضرتك استاذ ابو اسامة

أعتقد أننا جميعاً نقر بأن هناك مشكلة ، بل مصيبة سودة وحطت على دماغنا كلنا

طيب خلينا نبدأ من حيث إنتهى أ/ أبو أسامة وقال ايه السبب ؟؟؟

ببساطة السبب عند اللى عمل الحاجات دى ، يعنى لو عرفنا مين المتهم المدان الأول هانعرف السبب

ونعرف مين هو المتهم المدان إزاى ؟؟؟

ندور على المستفيد من اللى حصل

نلاقى 3 أطراف مستفيدة :

1. أعداء الثورة سواء كانوا من الفلول أم لا

2. الجماعة السلفيين اللى كانوا مكتومين غصب عن أبوهم وبعدين فجأة بقت لهم كل الحرية فانتهزوها فرصة
سانحة لن تمتد طويلاً لأنه بعد رجوع نظام الدولة الكامل الطبيعى لن تظل هذة الحرية ممنوحة لهم بشكلها الكامل
الحالى ، فاستغلوا الفرصة للإنتصار لقضاياهم التى كانوا يريدونها سابقاً ولكن دائماً ماكان القط يكشر لهم عن أنيابه

3. بعض المسيحيين اللى خايفين من مستقبلهم مع هؤلاء السلفيين وفى صالح تخوفهم تصب نتائج هذة الأحداث

طيب إذا إفترضنا إن الطرف الأول ده سيىء القصد والنية والعمل والطرفين التانيين حسنى القصد والنية وفى العمل
يتساوون مع الطرف الأول زعماً منهم أن هذا العمل هو الوسيلة الأجدى لوصولهم إلى مبتغاهم

يبقى بلغة الكيمياء ايه المعادلة اللى ممكن تلم مجموعة العناصر السابقة دى علشان يكون الناتج هو ماحدث ؟؟؟

لو ركزنا شوية هانلاقى إن مفيس عنصر أساسى قامت عليه المعادلة لكن كل العناصر كانت عناصر حفازة [ مساعدة]

السلفيين فى الفترة الأخيرة مهتمين بموضوع كامليا ويقومون بأعمال من شانها إشعال فتنه من دون جدوى

أعداء الثورة يشوفوا كده يقوموا يشجعوا حبايبنا السلفيين بإننا معاكم وبعد شويه يخترعوا قصة وهمية عن إسلام
فتاة وهى محتجزة فى الكنيسة [وتيجى تدور على الأصل بالضبط متلقيش ، طب مين أول واحد إتكلم عن الموضوع ده متعرفش] يقوم السلفيين متجمعين حول الكنيسة ومعاهم مجموعة أعداء الثورة يقوم يجى شاب عادى خالص يلاقى فيه
شباب زيه مش مربيين دقونهم ولا حاجه وشويه شيوخ وعلى ما يسأل عن القصة وما فيها وتوصله القصة تكون بقت
قصص ، فالحماسه تخده ويقف معاهم على هذا الأساس وتيجى ناس تالتة تتفرج ، وفجاة هبا ضرب نار مين بدأ الله أعلم
حبايبنا اللى مع الناس والسلفيين يقولوا بيضربونا من الكنيسة ، وإخوانا اللى فى الكنسية يقولوا دول هايموتونا ، وهبا
شويه إتصالات يجى شباب متعصب جداً من هنا ومن هناك وتبدأ المعركة وكل شويه حبايبنا أعداء الثورة يسخنوا
ويبقى من مصلحة السلفيين الإنتصار فى المعركة ضد قمع الكافرين للحرية ! ، والمتعصبين من المسيحيين يقولك من مصلحتنا إن الكل يشوف قد أيه إحنا مظلومين وع هاتك ياضرب برضه ، ومن مصلحة أعدء الثورة إستمرار الوضع وتفاقمه

إذا الأطراف الثلاثة أصبحوا أطراف أساسية ويصبح بعض الجهله من هنا ومن هناك من الناس العادية جداً اللى إتضحك
عليهم بسبب جهلهم هما العوامل المساعدة دون أن يدروا ، وهكذا تستمر المؤامرة

الحل فى كلمتين بس ، نبعد عن الحاجات دى وننصح الناس بكده ، والدولة تطبق أقصى عقوبة على هؤلاء

لك الله يا مصـــــــــــر

ممكن يكون تحليل مقبول

لكن أكيد تحقيقات النيابة هى اللى هتقول كلمتها فى الاخر و نتمنى ان يكون ذلك قريبا

بس يا محمود رايك فى ان الحل اننا نبعدعن الحاجات دى و ننصح الناس بكده مش منطقى لأن "الحاجات دى " بنجر اليها جرا رغما عنا و لو كانت النصيحة بتنفع ما كانش حد غلب

و تطبيق اقصى العقوبة ايضا اختلف معاك اذ المفترض ان تطبق العقوبة العادلة .." الردع العادل " المصطلح اللى اتقال النهاردة من استاذ خالد صلاح أو استاذ عصام سلطان
"الردع العادل" و ليس اقصى عقوبة

.. العدل و مصارحة كل طرف نفسه بما عليها .. ده حل المشكلة فى كلمتين من وجهة نظرى

لكن بالتأكيد وجهة نظرك تحترم و تقدر

ألف شكر ليك يا محمود

كل الإحترام لوجهه نظرك بالطبع يافرحه ، بس أنا شايف إن العقوبه العادله تكون فى ظل أوضاع عادية

أضيفى إلى ذلك أننى أقول أقصى عقوبة يعنى مش حاجه جديدة فى القانون ولا حاجه لأ دا نص موجود

لمواجهه مثل هذة الحالات ، وهل هناك شىء يهدد أمن الوطن أكثر من فتنه داخليه تكاد تأكل الأخضر

واليابس إن إشتعلت ، وها نحن نجد لها شرارات أصبحت متكررة وتوشك ان تتحول إلى نار

ومعظم النار من مستصغر الشرر !!!

"أقصى عقوبة عادلة"

متفقين ..

تقبل كامل احترامى

خالص العزاء لاسر جميع المتوفين ..

30سنة من الفقر والجهل والمرض والجوع وانهيارات في التربية والتعليم والصحة والكورة والبحث العلمي والفن والاخلاق هي السبب فيما حدث وكل ما سيحدث الي ان ننتقل الي الافضل الي مصر الجديدة لابد من تنظيف هذة الزبالة النتنةوهذا سياخذ وقت ليس طويل ولكنة سياخذ وقت
وهنا بجد ساكرر ما قولة دائما اننا نحتاج الي برامج توعية مكثفة حتي نتخلص من هذة الجاهلية التي لحقت بفئات معينة من الشعب المصري
انا خريج البكالوريوس وعملت في شرم الشيخ فترة ولدي الان عملي الحر احيانا كثيرة اكون غير قادر علي مواجهة اعباء الحياة الثقيلة وغيري كثيرون وفي مصر صدقوني الشعب قابل للتحريض من اي شخص قد يراة اويري فية سمات ومظاهر دينية مغشوشة بدون وعي
ربنا يرحمنا
واللي قال مبارك شعبي مصر هيبارك شعب مصر

» اكتشاف سر تفجير كنيسة القديسين ومن قام به
» كنيسة إمبابة وأرض الواقع
» "جروب" قبطى يتهم منى الشاذلى بالتعصب لإنكارها ظهور العذراء بالوراق..
» زيـــــارة الموقع الي كنيسة مار جرجس ...هذه رسالة لمن يفشلون دائما في هدم الوطن
» بالصور بالزغاريد الأقباط يحتفلون بتدشين القداس الأول بكنيسة العذراء بإمبابة بعد ترميمها والمسلمون يشاركونهم فرحتهم واحتفال رسمى الثلاثاء بحضور المسئولين .