دنيا ومين هايخلد فيها.. طب ليه نقتل بعض عليها؟

أم وحاضنة ضناها بحرقة و بتبكى من نار الفرقة
جسمه متلج جتته زرقة و بينزف وما فى إسعاف
قبل ما يكتر و يذيد ألمه كان فى الفصل و ماسك قلمه
فجأة المريلة شربت دمه مات و لا حد سمع و لا شاف
مش فاهمين أحنا هناخد ايه من الدنيا غير شبرين
يعجب مين ليه فى ناس مظلومة و ناس تانيين ظالمين

دنيا و مين هايخلد فيها طب ليه نقتل بعض عليها
حتى كفنّا مالوهش جيوب
ياللى ماتنعس و لا بتنام ده العمر اللى مافوهش سلام
عمر و ضايع مش محسوب
يا مولانا أسمع لدعانا فى جوانا سواد و ذنوب
يا سيدنا ساعدنا أسندنا وأنجدنا و كفاية حروب

و الأم دى ماتت من جوعها جف لبنها أديتله دموعها
لكن ماتت حاضنة رضيعها ماتت حاسة بنار و دمار
طفل بيصرخ و يقول آه و أبوه بيصرخ وياه
أصل منين هايجيبله دواه و على الدوا و الأكل حصار
حد يحوش حد يحن دى ناس بتأن و شعب حزين
أحنا و حوش و لا بننسي إن أحنا أساساً بنى أدمين

أصوات إنفجارات ومدافع ناس بتهاجم ناس بتدافع
أ أنا ما بعرف إيه الدافع إيه اللي يخلى الدم يسيل
أو ليه تبدأ بالعدوان لو انسان طب مأنا انسان
أنا من حقى أعيش فى أمان من غير خوف و دموع و عويل


سيبنى أعيش ماتقربش لبلدى و بيتى ماترهبنيش
سيبنى أعيش عايز أنام بالليل فى أمان ماتهددنيش

مين هايوقف ضرب النار حرب و دايره ليل و نهار
و بيوت تتهد و تنهار و جناين تصبح خرابات
صواريخ و قنابل و رصاص ناس من ناس تانية بتنداس
إيد مرمية و جنبها رأس و جسد بقي أجزاء و فتات

ذنبهم إيه ناس أبريا بتموت أنا بأسأل غلطوا فى أيه
كل ده ليه ناس بتموت و مانلقاش قبر نشيلهم فيه

ليه بقى فى أسلحة نووية صراعات و حشية و دموية
و مافيش فى الكورة الأرضية حتة مافيش جواها خصام
أرحمنا يا رب أرحمنا هات من تانى يا رب سلامنا
داوى جروحنا و أشفى آلامنا أحنا فى محنة كما الأيتام


فين يا ضمير فين يا ضمير العالم صوتك ساكت ليه
حمل كبير فوق ضهرنا شايلينه ودايماً ماشيين بيه

يا ألهنا علشان أنت معانا و أيديك ساندانا و شايلانا
علشان واخد بالك منا وسط العنف سلام يملانا
لينا فى قلب العالم ضيق و مافيش حاجة تبل الريق
بس العالم انت غلبته شقيت لنا فى العتمة طريق

وقت الخوف مابنخاف داخلنا إيمان عاطينا أمان
مهما نشوف مهما نقابل عتمة هاييجى النور و يبان

يا رب أحنا كتير دمعنا وحزنا و كترت أوجاعنا
عن حب يا رحمن جمعنا خضر تانى الأرض البور
نشف دمعتنا على خدودنا دافع عنا و أحمى حدودنا
خلى سلامك أنت يسودنا مشى الضلمة و أبعت نور

مد أيديك مالناش غيرك و قت الضيقة بنهرب ليك
مد ايديك أحنا تعبنا و جينا و سيبنا حمولنا عليك

دنيا و مين هايخلد فيها طب ليه نقتل بعض عليها
حتى كفنّا مالوهش جيوب ياللى ماتنعس و لا بتنام
ده العمر اللى مافوهش سلام عمر و ضايع مش محسوب