قصة مناضلة من ثورة 25 يناير ذهبت الي الاستوديو مع زوجها في برنامج العاشرة مساءا و علي الهواء مباشرة و امام مني الشاذلي حدث شئ غريب جداااااااا ..

قصة مناضلة من ثورة 25 يناير ذهبت الي الاستوديو مع زوجها في برنامج العاشرة مساءا و علي الهواء مباشرة و امام مني الشاذلي حدث شئ غريب جداااااااا ..

سنية والمحروس ع الهوا !!!!

بقلم : عمرو عكاشة

الوفد

مش عارف إيه اللي جرى للولية مراتي المجنونة اللي اسمها سنيه.. من ساعة الثورة وهي فاكره نفسها مناضلة مع إنها قبل 25 يناير مكانتش بتفهم في السياسة من أساسه.

الهانم كل يوم تفتح التلفزيون على "العاشرة مساء" ومن قبلها "90 دقيقه"، وكل شوية تقلب على أي قناة تانية.. اشي برنامج عمرو عبد السميع على التلفزيون المصري.. واشي برنامج رولا خرسا على الحياة.. وكمان برنامج يسري فوده، والألعن إنها بتابع برنامج "ناس بوك" بتاع هالة سرحان..

تسالي سياسية

وكل دول كوم وضيوفهم كوم تاني، الهانم فاكره نفسها محلله استراتيجية وعماله تفتي وتقول "ازاي منى الشاذلي تجيب واحد زي المستشار ده، الراجل ده مالوش في القانون".. بعدها ألاقيها ماسكه قرطاس اللب والفول السوداني وشغالة قزقزة وهي بتقول "الست اللي طالعة في 90 دقيقة ما بتفهمش دي عماله تتكلم على المجلس القومي للمرأة وهي مش عارفه دوره أصلاً.."

رحت رادد في سري "يعني انتي اللي فاهمة أوي يا بعيدة؟" قالت "بتقول ايه يا منيل على عينك؟" رديت بسرعة "أبداً يا حياتي.. بقول برافو عليكي يا سنية!!!"

المصيبة انها كل يوم تكلمني في الموضوعات دي لغاية ما زهقت.. وفي يوم طلبت مني أنزل معاها عشان تشتري حاجات من الأوكازيون.. طبعا هي تشتري الهدوم بالكيلو زي ما تكون بتشتري خضار.. وانا أشيل الحاجه ولا أجدعها حمار!!

نزلنا نشتري الحاجة من هنا واحنا بنتفرج ع المحلات لقينا واحد ماسك مكرفون وبيتكلم مع الناس.. ووراه واحد ماسك كاميرا وبيصور.. لسه هيبص علينا.. لقيت سنيه هجمت عليه هجمه صاروخية مرتدة.. وبصيت لقيت سنيه بتصرخ في الراجل وهو تحتها " أيوه ياأستاذ.. عاوزني اسجل معاك؟"..الراجل المسكين عشان يخلص قال لها " طبعاً طبعاً.. بس سيادتك قومي من عليا الأول احسن عندي عيال ومش عاوزهم يبقوا يتامى من بدري"..

بعدها راح قايل لنا.."أنا معد في برنامج العاشره مساء وممكن استضيفك انتي والاستاذ مع منى الشاذلي وتتكلموا عن الثورة".. طبعا الست هانم ماتت من الفرحه وصرخت وقالت.."لولولولولي ي ي..يا سعدك يا هناكي يا سنية يا بنت زكية.. هتطلعي مع منى الشاذلي وتبقي نجمه مشهوره".. طبعا في ساعتها قلت في سري "مشهوره؟؟..جاتك داهيه وانتي شبه كمبورة!!!!"

وجه اليوم الموعود.. يوم التسجيل، طبعا الولية سنية بنت المجنونه جت لابسه الحته اللي ع الحبل وحاطه على وشها 2 كيلو بودرة و5 كيلو أي شادو.. ومعلقتين أي لاينر وبرطمان "زبده"..أقصد أحمر شفايف، المهم أول ما دخلنا لقيت الولية سنية بتزغدني وتصرخ بصوت عالي.." إلحق يا زنكلوني يابن بهيه..الست منى الشاذلي أهي..زي القمر..زي ما بنشوفها في التلفزيون بالظبط!!"

لب وفول وفلول

قعدنا وسلمنا عليها وابتدى التسجيل.. ومنى الشاذلي قالت.." النهارده معانا ضيفه مناضله من التحرير.. ضيفه عملت كتير عشان بلدها.. رحبوا معايا بالست سنية"..

"عاوزينك تقوليلنا يا ست سنية إيه دورك في الصفوف الخلفية مع الثوار؟"..هي قالت كده من هنا وانا لطمت، صفوف خلفيه إيه ونيلة إيه.. سنية كانت بتقزقز لب طول أيام الثورة ونزلت التحرير بعد الثورة ما خلصت بيوم عشان تتصور!!!

لقيت سنية اتعدلت في قعدتها ورققت صوتها اللي زي صوت القطر وبربشت بعينيها ولا كأنها زيزي حبيبة بطوط وقالت " في الواكع يا جماعة أنا قمت بدور كبير مع ثوار التحرير.. كنت بعمل لهم الأكل وصواني البطاطس باللحمة.. وكمان كنت بعمل لهم محشي ورق عنب.. والحلو كان بسبوبة وقطايف"..

فجأة حسيت ان فيه دخان طالع من نار جوة دماغي وهي بتكمل.."بصراحة أنا تعبت أوي أوي.. ده أنا حتى كنت بجيب البرتقال والفراولة من سوق روض الفرج من عند الحاج ملواني عشان اعمل لهم عصير، وكمان كنت بعمل لهم صواني فراخ بالكاري، ودي اللي الحكومة السابقة كانت بتقول عليها كنتاكي.."

طبعا أنا مقدرتش أستحمل أكتر من كده ورحت صارخ بعلو حسي.."نضال ايه اللي بتتكلمي عليه ده يا ام نضال ، وأكل ايه اللي كنتى بتعمليه؟.. ده اليوم الوحيد اللي نزلتي فيه التحرير كنتي واخده معاكي حلتين محشي لزوم القزقزه، ولما لقيتي الناس جعانه بعتي المحشي الواحدة بجنيه..." لسه هكمل كلامي لقيت منى الشاذلي بتسأل سنية "هو مين ده يا ست سنية؟".. ردت وقالت "معرفوش يا ست منى، واضح انه من الفلول"..!!

طبعا كما هي العادة لقيت سنية وكل الناس اللي في الاستوديو ومعاهم منى الشاذلي نازلين فيا ضرب وهما بيقولوا.."يا خيبتك القوية بقى تعيب في الست المناضلة سنية ؟!"

رابط الموضوع : http://www.alwafd.org/index.php?option=com_content&view=article&id=64446:%D8%B3%D9%86%D9%8A%D8%A9-%D9%88%D8%A7%D9%84%D9%85%D8%AD%D8%B1%D9%88%D8%B3-%D8%B9-%D8%A7%D9%84%D9%87%D9%88%D8%A7&catid=124:%D9%87%D9%88%20%D9%88%20%D9%87%D9%89&Itemid=356#axzz1QmQuTP7h

حاجه تضحك فى وسك الهم اللى إحنا فيه أشكرك أ/ أمير

الف شكر يا محمود ..

ههههههههههههههههههههههههههههههههههههههه هي سنية مش هتبطل حركاتها دي بقي ؟؟؟؟

شكرااااااااااااا يا استاذ امير

كنت شويه وهنفجر لكن حاسه اني هديت شويه

ههههههههههههههه

شكراااا يا اياااااات ..

مشكور مستر أمير
حاجه تضحك بصحيح
والشكر موصول لكاتب الموضوع

لازم نضحك عشان نعرف نفكر و نكمل

هم دول المصرين
شكر استاذ امير

الف شكر لكم جميعا ..

ههههههههههههههههههه جامد اوى الحوار ده
فعلا المصريين احسن شعب يهزر فاصعب الاوقات
شكرا يا استاذ امير

الف شكر يا رنا ..

هههههههههههههههههههههههههههههههههههههههههه
بجد جامدة اوي حلوة لما ختي حلتين محشي وبعتي الواحدة بجنيه
تسلم ايدك ياستاذ امير علي الموضوع

لما شفت الكاريكاتير ضحكت
ولما قريت المقال ضحكت اكتر
شكرا استاذا مير
بس شدني كلمة دنيا رؤوف : لازم نضحك علشان نعرف نفكر ونكمل
ربنا يزيدك تفاؤل

ههههههههههههههه

الف شكر لكم جميعا ..

» اليوم الخميس . مني الشاذلي و جميع المذيعين و المذيعات في مصر في برنامج واحد علي الهواء مباشرة من امام الكاتدرائية المرقسية بسبب تفجير كنيسة القديسين
» نداااااء هااااام الي الأعلامية الكبيرة مني الشاذلي . من المهم ان تكون حلقة العاشرة مساءا اليوم علي الهواء مباشرة نظرا للأحداث المؤسفة التي تمر بها البلاد
» اليوم حلقة العاشره مساءا .. لقاء علي الهواء مباشرة .. مني الشاذلي مع النجمه / هيفاء وهبي .. شاهد اعلان عن الحلقه في جريدة المصري اليوم ..
» خبر عاجل .. مني الشاذلي و العاشرة مساءا صعدت خلاف مرتضي منصور و احمد شوبير امام النيابه و عرض سي دي لحديث مني الشاذلي مع زوجة شوبير للقاضي .. شاهد الفيديو
» اليوم السبت 20 نوفمبر 2010 حلقة معادة و تم التنويه علي شاشة التليفزيون ان غدا الاحد سوف تعود الاعلامية مني الشاذلي و برنامج العاشرة مساءا ..