الهيئات الحكومية بتفرق بين الموظفين فى المرتبات

كل عام وأنتم بخير
أحب أعرف رأيكم فى الموضوع ده :-
أغلب الهيئات الحكومية بتفرق بين الموظفين فى المرتبات حيث هناك :
1- علاوة اجتماعية : حيث يزيد مرتب المتزوجون عن الغير متزوجون .
2-و هناك البدل النقدى : حيث يأخذ المتزوجون بدل نقدى لهم و للاولادهم فيزيد المرتب زيادة كبير جدا عن زملائهم الغير متزوجين مع انهم يعملون نفس العمل مما يزيد من الاحقاد بينهم
(ده حتى المتزوجة بتأخذ اجازات كتيييير ، ثم ما الغير متزوج عاوز يجهز نفسه علشان يتزوج ثم ما ذنب الغير متزوج وخاصتا السيدات) مش كلهم بيشتغلوا نفس الشغل
لذلك يجب تحقيق العدالة و اعطاء كل الموظفين اللذين على نفس الدرجة الوظيفية نفس الاجر لا فرق بين متزوج وغير متزوج .
فالكل امام القانون سواء

أحب أعرف رأيكم فى الموضوع ده ,,,,,,,,,,.........
ولو أنت بتشتغل فى مكان ووجدت هذا يحدث وأنت غير متزوج مش ده هيخلى فى حقد بينك وبين من تعمل معهم ؟؟؟؟؟؟؟؟؟؟؟؟؟؟؟؟؟؟

الأخت الفاضلة

الموضوع عايز سعة صدر شوية , يعنى موضوع زيادة المرتب حاجة كده بسبب الزواج او الانجاب موضوع اصلا مضحك

يعنى انا كنت موظف ولسه خارج ع المعاش من سنة ومرت عليا كل الحاجات المضحكة المقرفة دى
تخيلى انا مثلا لما كان سنة 30 سنة كنت بقبض كام ؟ 38 جنيه واتجننت واتجوزت عارفة علاوة الزواج كام ؟؟؟؟ 4 جنيه ( اربعة جنيه )

وبعدين اتجنن تانى وخلفت خايزيد المرتب على المولود كام ؟؟؟ خمسة جنيه طبعا شوفى المولود ده بيكلف كام كل شهر يعنى بالتأكيد اكتر من كده بكتير
حتى العلاوة الدورية بتاعة يوليو اللى هى بتكون عشرة % من المرتب انتى عارفة بيحصل ايه ؟ البياعين حافظين الميعاد ده وبيروحوا رافعين الاسعار عشان متخيلين ان الموظفين اغتنوا وبقى معاهم فلوس كتير مع انها فى الحقيقة شوية ملاليم , ولما تيجى تحسبى الزيادة ( يعنى بالنسبة لواحد فاتح بيت وعلى دماغة المصاريف ) حتلاقى المرتب زاد عشرة % لكن الاسعار زادت بفرق يعمل معاه عشرين % وهنا بيطلع كل سنة خسران , ومن غرائب مصر حاجات زى مثلا ايجار البيوت القديمة , انا جدى كان عنده عمارة فى شبرا اجرها قبل سنة 1950 ايرادها فى الشهر عشرة جنيه , عارفة حضرتك العشرة جنيه دول ساعتها بيعملوا ايه ؟ ممن الواحد كان يتجوز بيهم , تخيلى النهاردة العمارة دى بقت بتاعتى , بروح شبرا آخد الإيجار كل سنتين لأن المبلغ ما ينفعش اركب عربيتى وادفع عشرة جنيه بنزين عشان اجيب العشرة جنيه الايجار , يعنى حاجات غريبة بتحصل فى البلد وللعلم انا رحت جميع دول العالم مصر البلد الوحيدة اللى تلاقى الخيبة دى فيها , والامل الوحيد اون الثورة تنجح والسرقة تتبطل وييجى ناس بتغهم يحكمونا ,
والإقتصاد يتصلح وربنا يكرمنا , يعنى هل تعلمى حضرتك ان مصر عندها موارد وكنوز اغنى من السعودية يعنى شوفى انتى ساعتها ممكن مرتبك يكون كام فى الشهر مش اقل من 12 الف جنيه اقل حاجة قولى يارب بس
مع اطيب تحياتى

شكرا على ردكم
هوه المبلغ تافه بس لازم يكون فيه عدالة .

الأخت الفاضلة
اولا ادعى لربنا ان البلد حالها يتصلح وييجى حد يحكمها بعدالة
العدالة مش فى اللى انتى بتقوليه بس ده حاجة صغيرة , لكن المصيبة الكبيرة فى الفساد اللى فى البلد و طبعا بتكلم عن خبرة وشفت كل كلمة بقولها , كان من اهم مظاهر الفساد ان الكبار كانوا بيسهلوا لأصحابهم التربح ازاى ؟
يعنى حاجة اسمها المستشارين فى كل وزارة , يعنى يحطوا فى كل وازارة اكتر من 100 مستشار وكل واحد بيقبض من 40 الف جنيه الى 200 الف جنيه , يعنى عندك مثلا بنت عاطف عبيد بكالوريس تجارة , حطوها مستشارة فى المجلس الاعلى للآثار بعقد خاص 60 الف جنيه فى الشهر مع انها ماتعرفش ولا كلمة فى الآثار و يعنى كل 3 ايام تيجى تقعد تشرب قهوتها وتمشى , يعنى بتاخد المبلغ ده على انها تتكرم وتيجى تشرب القهوة , لأنها طبعا لو كتبت اى كلمة ممكن تعمل مصيبة لأنها مش بتفهم طبيعة المكان, وغيرها نص مليون واحد بالطريقة دى يعنى كمان بيبقى طالعين ع المعاش من زمان واهم ملحوظة انهم بيكون المكان ما يفهموش فيه اصلا , وعدى بيقبضوا كام وفيه كام واحد متخرج مش لاقى شغل , طبعا غير الوظائف الل كانت بتيجى عن طريق الوزرا , يعنى انتى موظفة شوفى بتاخدى كام وواح قدك فى المؤهل ومدة العمل لكن اقل منك فى الكفاءة وبيبقض ربع مليون جنيه
يعنى البلد لسه فيها بلاوى بس بقول لك ادعى لربنا حال البلد ينصلح والحشرات والصراير دى كلها تبان والبلد تنضف
مع اطيب تحياتى

يا رب حال البلد يتصلح بس بسرعة لان المفروض أن البلد فى حالة ثورة والمفروض يكون هناك قرارات تشعر الناس بالعدالة وأن الثورة قامت للقضاء على الفساد ولو الفساد استمر اكثر من كده وخاصتا بعد الثورة,...........استطيع أن أقول لك ان الثورة فشلت فى اهم مطلب لها وهو تحقيق العدالة و القضاء على الفساد مش كده ولا ايه ؟؟؟؟؟؟؟؟؟؟؟؟؟

العدل الان اصبح فريضة علي كل مصري

اهم حاجة ان العدل يتحقق وده مش هيحصل الا لما الا بيحكموا بالعدل يتغيروا كلهم في كل المؤسسات وكل المناصب

تحياتي للجميع

الأخت الفاضلة روز

اتمنى تكونى فهمتى كل الكلام اللى قلته , المشكلة كانت ايه فى ال30 او ال50 سنة اللى فاتوا ؟ البلد فيها موارد اكتر من السعودية بس كان بيتسرق منها اكتر من 85% من الموارد دى , انتى عارفة مرة نور الشريف قال فى فيلم : انا مش عارف البلد دى بقى لها خمس الاف سنة بتتسرق وازاى الشعب ده لسه لاقى يلبس وياكل .....
انتى عارفة قبل الثورة سنة 1950 كان اللى متخرج من الجامعة بيقبض كام ؟ سبعة جنيه وكان بيعيش بيهم ملك , ومنهم بيتجوز ويأجر شقة ويجيب كل اللى نفسه فيه لن الجنيه كان يساوى اكتر من 800 جنيه دلوقتى , لكن لما قامت الثورة بتاعة يوليو حصل لخبطة وابتدا الاقتصاد يتدهور والسرقة تزيد انتى عارفة زمان انا سنة 1970 كان الدولار ب خمسين قرش شوفى دلوقتى بحوالى 6 جنيه وده يبين لك الجنيه نزلت قيمته اد ايه , المهم ان ندعى لربنا ان يحكمنا ناس قلبهم على البلد وتبطل السرقة , ده اولا وثانيا , ييجى ناس تعرف ازاى تستفيد من موارد مصر اللى اكتر من السعودية ساعتها حا تكتر الفلوس فى الدولة واكيد كل واحد حياخد حقه او مرتبه اللى يخليه يعيش عيشة كريمة , انتى عارفة حضرتك عيشة كريمة يعنى ايه ؟ يعنى تاخدى مرتب تجيبى كل اللى فى نفسك ولازم يفضل ثلثه تحوشيه , عشان بعد عشر سنينتحسى ان عندك كل حاجة وعندك مبلغ محترم فى البنك للزمن
بس المشكلة ان ده مش حاييجى النهاردة , يعنى بعد ماينصلح الحال الامور بتتاخد وقتها فى السوا والتظبيط يعنى مثلا انتى لو زرعتى شجرة حتاكلى منمها بعد إيه , فى حاجتين , لو زرعتى ملوخية او جرجير حتاكلى منه بعد شهر ونص لكن لو زرعتى شجرة خوخ لازم تنتظرى خمس سنين , بس المشكلة ان لازم ييجى ناس قلبها على الشعب ماتسرقوش , وربنا يستر مع شوية صبر
مع اطيب تحياتى

يا استاذ عادل البلد دي فيها موارد متجددة مابتخلصش

بس عايزة اللي يعرف يديرها صح عاوزه زي ما قال هاني رمزي في فيلم عايز حقي

حضرتك اكيد جيت اسوان او الاقصر او شرم الشيخ هععد لكم موارد الدولة اللي مابتخلصش بس المسؤلين لازم

يهتموا بدة

1- اول حاجة جمال الطبيعة في كل مكان في مصر دة ممكن نستغلة في الدعاية للسياحة والمنافسة بدون منازع اول دول العالم في السياحة ودي لوحدها تعيش شعب مصر في نعيم

2-تاني حاجة نهر النيل فية خيرات كتير اولا المياة ثانيا الاسماك ثالثا وسيلة مواصلات رابعا في الرحلات النيلية السياحية ما بين الاقصر واسوان خامسا في الزراعة .. تماسيح نهر النيل اللي ذادت وتغولت ممكن كمان نصصطادها ونستثمر جلودها ونعمل من وراها معارض ..

3- الشمس عندنا وخصوصا في الشتا لوحدة مورد هام جدا لجذب السياحة واجانب كتير يتمنو يناموا تحت اشعته الدافئة هروبا من البرد القارص في بلادهم وكمان لوعاوزين ممكن تبقي من اكبر مصادر الطاقة في البلد ونصدره برة كمان

4-قناة السويس وبور سعيدكمدينة حرة

5- سيناء لوحدها كدا كنز

6 الموارد البشرية لو مافيش بطالة وعرفوا يشغلوا الناس دي كل واحد في مجالة

7-الاراضي الزراعية الرهيبة والمياة الجوفية اللي مستنية حد يستغلها ويستخرجها

8- المواهب اللي عندنا والعلماء والفنانين ثروة لا تقدر بمال

9- التاريخ والاثار
10- الثروات الحيوانية

» شكوى من الموظفين المؤقتين على باب الصناديق ..
» أنقذوا المصالح الحكومية
» طبالو الصحف الحكومية يهاجمون مني الشاذلي .... كلام حلو في صفها ...