هل يجوز استبدال جدي ميدان التحرير بجدي مولد السيد البدوي

أولا اود تذكيركم بقاعدة استبدال كذا ب كذا وهي من القرآن الكريم في الايه " اتستبدلون الذي هو ادني بالذي هو خير " معنى ذلك انه عندما اقول انني استبدلت اللون الاحمر باللون الاخضر فإن معنى ذلك ان الاصل هو اللون الاخضر وانني اشتريت اللون الاحمر ليكون بديلا . دعوة الافطار في ميدان التحرير الجمعة القادمة 12 اغسطس 2011 تجد انقساما كبيرا فقوى كثيرة قاطعت وقوى اخرى اصرت على الاحتفالية وخصوصا هؤلاء الذين يعتقدون انها ستكون بمثابة رد على جمعة الانقسام التي تبناها الاخوان المسلمين واستخدموا فيها السلفيين ليفاجأوا بأن السلفيين ايضا يعرفون قواعد اللعبة اكثر منهم وهم ايضا يلعبون لمصلحتهم فقط ، وللاسف فقواعد اللعبة عند الاخوان او السلفيين هي الحشد على اساس وجود عدو للاسلام وكأنهم ذاهبين للدفاع عن الدين الاسلامي ، فمن السهل جدا حشد المسلمين تحت راية تطبيق الشريعة الاسلامية وأن الموجودين في ميدان التحرير هم علمانيين وليبراليين لايريدون تطبيق شرع الله وبالتأكيد يريدون شيء اخر ضد الاسلام ، اذن فالشحن لابد ان يكون بوضعك بين اختيارين لا ثالث لهم وهم "نعم" فأنت تنتصر للاسلام و "لا" فأنت تنتصر للشيطان وهو ما اراهن شخصيا علي استخدام هذا الاسلوب في انتخابات مجلس الشعب القادمة ، اذن اسلوبهم الوحيد لحشد الناس هو جعل الاسلام في خطر ويوجد عدو يتربص بالاسلام ويجب ابادته وهو اسلوب يمكن من خلاله حشد جميع الناس حتى من لا يواظب على الصلاة منهم ، اما ان تحشد الناس للدستور اولا او الانتخابات اولا او المباديء الحاكمة للدستور فهي امور لاتعني الكثير للناس الطيبين في القرى والكفور ، وذلك لعب بالنار التي ستحرق الجميع واول من سيحترق بها هم من صنعوا هذه اللعبة ولنا في السادات مثال جيد لذلك فهو من لعب بالجماعات الاسلامية وفي النهاية اغتالته ، يعني من الاخر لو جابوا الحزب الجمهوري ببرنامجه من امريكا سيخسر امام السلفيين . اعود لعنوان المقال وهو الصوفيين ودعوتهم للافطار في الميدان ، يجب أولا ان نعرف من هم الصوفيين ، وفق ما رأيته في قريتي من احوال الصوفيين هو طيبتهم وحبهم لآل البيت ، ومن منا لا يحب آل البيت و عند الصوفيين هو حب فطري لآل البيت ومن يحكى عنه من اولياء الله الصالحيين . قد تجد فلاح فقير يربي جدي - وهو ذكر الماعز - وعندما تسأله يقول لك هذا جدي السيد البدوي ، ويقصد بذلك انه الجدي الذي سيأخذه معه لمولد السيد البدوي ليذبحه ويتصدق به على الفقراء من مريدي السيد البدوي ، ويواظب على ذلك سنويا مع فقره المدقع وحاجته الشديدة لكل قرش . اذن من وجهة نظري الصوفيين مسلمين يعبدون الله على فطرتهم وهم حالة وسط بين شيعة ايران وسلفية او وهابية السعودية ، وهكذا يقال عن المصريين بأننا نصف شيعة لحبنا الشديد لآل البيت .
سأكمل بعد الافطار ... اتفضلوا معي
الحمد لله " اللهم تقبل منا صيامنا وقيامنا "
عندما سافرت للسعودية لمده اربع سنوات لمست اشياء بسيطة ادركت منها الفرق بيننا في مصر وبينهم في السعودية ، فمثلا سألني مدرس تربية اسلامية عن سر اصرار المصريين على زيارة قبر الرسول "ص" فقلت له حب المصريين للرسول وحديث الرسول "ص" " من حج البيت ولم يزرني فقد جفاني " فتبسم المدرس السعودي وقال لي ان ذلك حديث ضعيف وان الحديث الصحيح هو " لا تشد الرحال إلا لثلاث المسجد الحرام والمسجد الاقصى ومسجدي هذا " لذلك نادرا ما تجد السعوديين في الروضة الشريفة ، هذا هو الفرق بيننا وبينهم وهو انهم يطبقون الاحكام بغلاظة وبدون حب ، اما نحن وخصوصا الصوفيين فعلاقتهم بالله يغلب عليها الطابع العاطفي لحب آل البيت ، ارجو من كل الفصائل السياسية عدم استخدام المصريين الطيبين وحشدهم لمصالح سياسية لا علاقة لها بالدين .
على فكرة انا معرفش يعني ايه علماني او ليبرالي ، ولكني انتمي لحركة كفاية وخرجت معها عشرات المرات في تظاهرات وكذلك انا من الذين خرجوا يوم 25 يناير وبات في الميدان حتى رحيل مبارك وكمان بيت يومين في الاعتصام الاخير ، تفتكروا انا علماني ولا ليبرالي ، اللي انا متأكد منه هو انني انا مسلم اصلي واصوم وحجيت بيت الله يبقى تصنيفي ايه عشان اعرف مع من اخرج في الجمعات القادمة

الاستاذ الفاضل / احمد بكري
هوه احنا في العصر البائد كنا ممكن نسمح بزواج الشواذ ؟؟؟ طبعا لا فهل معنى ذلك اننا كنا دولة اسلامية والان نريد ان نجعلها علمانية ؟!!!!
في اي دولة في العالم دستورها وقوانينها بيناسب طبيعة شعبها ، يعني في مصر عندنا لمسة التدين سواء مسلمين او مسيحيين كل واحد متدين في دينه ، ايه اللي بيحصل اليومين دول ويقال ان العلمانيين عايزين الحرية وضد الاسلام و....و...... ، ماهذا الكلام ، الدولة نظرتها للدين لن تتغير من النظام البائد للنظام الذي ننشده ، " الشريعة الاسلامية هي مصدر التشريع " من منا لا يتفق على ذلك هل قال احد العلمانيين الوحشين انه عايز يغير في هذه المادة ويبيح الفجور لا سمح الله ؟
لو التيار الاسلامي عايز تطبيق الشريعة الاسلامية يعرفنا أولا الحدود في الشريعة الاسلامية ستكون وفق اي مذهب ويكون الاكلام واضح في برامج احزابهم سواء الحرية والعدالة بتاع الاخوان او حزب النور السلفي او اي حزب ديني جديد يقول لنا بصراحة في برنامجه هوه عايز ايه والناس تختار ، اما ان يتم صناعة عدو وايهام البسطاء بأن الاسلام في خطر ونستثير الركن الديني فيهم للحصول على مكاسب سياسية فهذا ما لا نتمناه ، يعني في الاستفتاء كان فيه شحن ديني سواء اسلامي او مسيحي ، يعني اكاد اجزم انه لايوجد مسيحي صوت بنعم بينما المسلمين ممن يقال عنهم علمانيين وليبراليين صوتوا ب لا ، والله وانا في الصف ورايح اصوت بلا وشاهدت الحشد الديني الاسلامي والمسيحي وتصريح الشيخ محمد حسان حسيت وانا بصوت ب لا انني ارتكبت سيئة ووجب عليه الكفارة عنها ، هل هذا هو ما نريده ان يكون الرأي واحد ولا يوجد تعددية وان من يخالف هذا الرأي هو خارج عن الاسلام ؟؟؟؟
اخطر ما في الموضوع هو ان نسأل نفسنا من المستفيد من هذه الانقسامات في الوقت الحالي ؟ والاجابة ببساطة من وجهة نظري ان المستفيد هو المجلس العسكري لانه لن يسلم السلطة وخصوصا بعد ان حصل على دعم الدول الغربية وامريكا في عدم تسليم السلطة ، لان الرسالة التي وصلت للخارج كانت واضحة وجلية وهي ان الاسلاميين المتشددين هم من سيصلون للسلطة عن طريق صناديق الانتخابات مثل حماس ، فشكرا لتيار الاخوان والسلفيين على حسن تعاونهم مع المجلس العسكري ونلقاكم في الثورة القادمة
مش صعبان عليه غير الشهداء والمصابين في الثورة فهم دفعوا ثمناً غاليا لبضاعة تسلمناها طازجة ولكن بطمع بعض الفئات ستفسد هذه البضاعة وستعود هذه الفئات لسجونها من جديد

احبائى

الموضوع كله واسمحوا لى ان اتدخل هو سوء فهم للمواضيع , يعنى انا لاحظت ان كل من يتكلم فى الحوارات وفى السرادقات بيتكلم فى موضوع هو غما مش فاهمه اصلا او فاهم وبيتعمد انه يتكلم بس بيتحول 180 درجة , انا كمسيحى الموضوع محرج ومش عايز اتدخل لكن لما وجدت الكلام جاب سيرة الدول الاوربية ومواضيع العلاقة الجنسية بدون زواج حسيت انك يا استاذ محمد بكرى انك فاهم ان الدين المسيحى فيه عادى العلاقة الجنسية بدون زواج , ولكن كما هى حرام فى الاسلام هى حرام جدا فى المسيحية , يعنى قول السيد المسيح مشدد : من نظر فمرأة ليشتهيها فقد زنى بها قى قلبه وهنا كانها زنى بها عمليا والزنا فى الدين المسيحى خطية كبيرة جدا جداً , يعنى يكفى ان الدين المسيحى لايسمح بالزواج إلا بواحدة فقط , ولا تستطيع ان تطلقها إلا فى حالة علة ثبوت عليها علة الزنا , يعنى الدين المكسيحى لم يحل للمسيحيين ان يتزوجوا ماشاءوا من النساء ولكن واحد فقط ,
اما الشواذ جنسيا انت حددت صفتهم بإنهم شواذ يعنى لكل طائفة شواذ , والشواذ بيكونوا بشر شاذين يعنى مش طبيعيين وزى ما اسمكهم فى مصر شواذ اسمهم فى اوروبا شواذ وهم قوم الناس بتقرف منها فى اوروبا زى ما بتقرف منهم فى مصر , والقاعدة ان هناك اسوياء وواحد فى المليون , واذا تكلمنا عن الاسوياء بصفتهم اعضاء صالحين فى المجتمع , الحديث عن الشواذ انهم زبالة المجتمع , ومش معنى ان احد الشواذ فى مصر قال كلمة يبقى ان كل الناس اللى مش من التيارات الدينية بتؤيد هذا اللكام النجس , ومش معنى ان كل الناس اللى مش من تيارات دينية بتؤيدالعلاقات الجنسية بدون زواج , لنها تعتبر زنى سواء عند المسلمين وعند المسيحيين , ثم اسألك ما قولك عن شرب الخمر ؟ مع الاسف بعض المنغلقين على نفسهم فكريا ولا يخالطوا الآخرين بيتخيلوا ان كل المسيحيين بيشربوا الخمر , ولكن الذى لاتعرفه حضرتك ان المسيحيين عندهم الخمر حرام ونسبة ال واحد فى الالف اللى بيشرب خمر من المسيحيين دول شواذ وبيعملوا شىء حرام , وموجود ايضا نسبة قلليلة من المسلمين بيشربوا خمر وانتم بتعتبروهم شواذ او خطاة او بيعصوا الدين , يعنى مش عشان واحد منحرف يبقى الكل منحرفين , انا نفس كل واحد يسأل نفسه سؤال لو الانبياء اتوا فى سنة 2011 وكانت المدنية موجودة هل كانوا سيطلبون الرجوع للعصر الحجرى ام ستكون تعايمهم التعامل مع المدنية ؟
وكل التيارات الموجودة اين الازهر ؟ يعنى انا سمعت الشيخ الجليل شيخ الازهر كثيرا واستمعت الى شيوخ الازهر الاجلاء , وكلهم قاولا اقوالا تخالف من تقوله التيارات , يعنى شيخ الازهر قال الدولة فى الإسلام كانت مدنية , والدولة الدينية تلك كانت فى اوروبا فى القرون الوسطى واثبتت فشلها الذريع لأن رجال الدين عندما تدخلوا فى السلطة بقوة بالتدريج نسوا الدين وكان كل تفكيرهم فى مطامعهم الشخصية لدرجة وصلت لإرتكاب اقذر وابشع الجرائم مما جعل الثورات ترجعهم الى مكانهم الاصلى وتعود الدولة مدنية , فيه كلمة نفسى االها لأخوتى واحبائى المسلمين
مصر فيها 85 مليون نسمة , منهم قول 15 مليون مسيحى يفضل 70 مليون دول دينهم إيه ؟ بالكتير لو فيه منهم بهائيين ولا اى تيار آخر مش ممكن بأى حال من الحوال حايزيد عن مليون يفضل 69 مليون مسلم , وهذا العدد يعنى الدولة اغلبية من المسلمين وهنا تعتبر دولة اسلامية ومنذ 1400 سنة مصر دولة إسلامية , يوم الجمعة لما تلاقى كل المسلمين فى صلاة الجمعة وكام واحد من ال 70 مليون بيصوم رمضان , لما اسمع الدعايات الانتخابية الاسلام فى خطر وانقذوا الاسلام وان الليبراليين والعلمانيين عايزن يلغوا الدين , مش عارف يعنى ال 70 مليون مسلم من السهل انهم يلغوا دينهم ؟؟؟؟؟؟؟؟؟
فيه مشكال بالنسبة للوثيقة الفوق دستورية والشعب مش فاهم معناها او فحواها لأن الشعب اتعود انه يخلى زيد من الماس يفهم له مش هو يفهم بنفسه ويقرر
, لقيت التيارات الاسلامية بتعترض عليها اعتراض شديد والمسلمين الوسطيين موافقين عليها انا لقيت ان اهم مافيها ان ما يبقاش تيار واحد يسيطر على الحكم يعنى مجلس الشعب والشورة وصنع الدستور , يعنى كل طوائف الشعب معارضة وموافقة يتفقوا على قوانين طب ايه المشكلة فى ده ,
الثورة قامت ليه مش عشان دكتاتورية الحزب الواحد او التيار الوحد اللى ه الحزب الوطنى ؟ هل انتم عايزين نخرج من مصيبة نقع فى مصيبة اكبر ؟
الشعب يا احيائى وانا انسان اقسم بالله العظين محايد وانا بتكلم بنسى انتمائى إلا لحاجة واحدة هى مصر , والملحوظ ان فيه ناس عايزة تسقط هوية مصر وشخصية مصر وشكل مصر وتخليها لادولة او شبه دولة تانية لدرجة انهم رفعوا اعلام دولة تانية عشان يحرقوا اسم مصر , وهؤلاء الناس نسوا ان مصر اهم دولة فى المنطقة ولو انك عايز تلغى اسمها وشخصيتها وتخليها شبه دولة تانية او نسخة ممسوخة من دولة تانية اقل منها قيمة وحضارة تبقى جريمة فى حق الوطن , يعنى اقول لكم على حاجة انا بعتبرها انكار للجنسية المصرية , يعنى واحد غلبان راح السعودية واشستغل وجاب عربية يقوم يحط على الزجاج الخلفى علم السعودية , ولما تتكرر كتير تلاقى كل الف عربية فى الشارع على 600 منهم علم السعودية ده معناه اننا جعانين يعنى لولا السعودية ما كنا حنركب عربيات ؟ واللى بيحط علم دولى تانية ده هل هو مكسوف يقول انا مصرى , ماخدش باله اننا احنا اللى علمنا كل الدول دى ؟ واذا كانوا بيتنططوا علينا دلوقتى عشان علموا ولادهم بس مش حاينسوا ان المدرسين المصريين هم اللى علموهم
مش قادر اكمل ......

انا سعيد بكم كلكم وهذا الاسلوب المحترم من النقاش ، هيه دي مصر الحقيقية ، مصر 25 يناير ، والله لا يمكن انسي الناس بتوع 25 يناير ، صدقوني مفيش في العالم كله مثل هؤلاء ، دول كريمة المجتمع ، مسلم مسيحي ايد واحدة ، وعشان تعرفوا ان طبعنا واحدة احب اعرفكم ان الخمر يشربها قليل جدا من المسلمين والمسيحيين ، طيب تعرفوا ان الخنزير انا بيتهيألي ان قليل من المسيحيين بيأكلوه ، حتى آفة ختان الاناث موجودة عند المسلمين والمسيحيين ، انا واثق انهم لو حللوا جينات المصريين مش هيعرفوا مين مسلم ومين مسيحي

اتفضلي انا موافق ، وشكرا ليكي على ذوقك وحسك المرهف في تعليقاتك

الأخ العزيز ا/ احمد بكرى
طالما ان لك اصدقاء مسيحيين اسمح لى بان اتشرف واكون احد اصدقاءك

انت قلت احسن كلمة , وانا اقول ان الدين لله والوطن للجميع , الشىء الخطير اللى حيضيع هو مصر واللى لازم كلنا نحاول مانخليه يضيع , واكتر شىء ممكن يضيعه هو عدم التفهم والتطرف , واتمنى من الله ان الايام الصعبة تفوت على خير , عشان نطمئن على مستقبل اولادنا

وجدير بالذكر ان انت ماعجبتكش كلمة الشيخ يعقوب لما قال اللى مش عاجبه يمشى وانا كمان ما عجبتنيش كلمة الانبا بسنتى لما قال المسلمين ضيوف ولو اتيح لى انى اقابله حقول له حضرتك لما بتتكلم ممكن تعك فى الكلام ومن المستحسن ماتتكلمش فى الميكروفونات , يعنى اللى بيتكلم لازم ياخد بالة ان كلمة حتى لو خطأ لغويا مش عقائديا ممكن تعمل مشكلة , يعنى كلمة ضيف فى اللاغة معناها ايه , معناها واحد جاى من بلد تانية وعنده بيت وعائلة وجدود وجذور فيها وجاى يقعد عندنا كام يوم وساكن فى لوكاندة او شقة مفروشة وكام يوم ويرجع لبلده , لكن لو واحد اتدولد فى مصر من اب وام مصريين ولو ترجع لشجرة عائلته تلاقى جذورها 7 آلاف سنة فى مصر اكيد اللى يقول عليه ضيف (وهنا ماليش دعوة دينه ايه ) الللى يقول عليه ضيف يبقى مش بيفهم اصلا يتكلم ازاى , ده اقل شىء مثلا انا ليا جار راح انجلترا وكانت مراته حامل فى اشهر التاسع وهناك ولدت بنت وحسب القانون الانجيزى البنت دى اخدت الجنسية الانجليزية ولها كافة الحقوق , يبقى ازاى اللى جذوره من مصر يبقى ضيف ؟
مع اطيب تحياتى