أسرائيل تحمل مصر مسئوليه تفجيرات أيلات وبئر سبع

كالعاده ألقى عدد من المسئولين السياسين الاسرائلين مسئوليه التفجيرات التى حدثت فى مدينتى ايلات وبئر سبع صباح اليوم الخميس على عاتق السلطه المصريه مؤكدين على ضعف التواجد الامنى المصرى فى سيناء بعد الثوره مما أدى لحدوث فوضى
هذا وقد كان قد حدث تبادل لأطلاق النار بين القوات الأسرائليه وعدد من المسلحين قال عنهم التلفزيون الأسرائلى أنهم مسلحين جائوا من قطاع غزه
وقد قاموا بأطلاق النار على حافله أسرائليه قرب منتجه أيلات الساحلى وجرحوا أكثر من 10 وقتل 2
والجدير بالذكر أن وزير الدفاع الاسرائيلى أيهود باراك قد تطاول بشكل سافر على السلطات المصريه حيث أتهمهم بالفشل فى السيطره على شبه جزيره سيناء وتأمينها بشكل جيد من العناصر الارهابيه وتوعد أيضا باراك قطاع غزه بحرب دمويه ورد عسكرى عنيف
فهل يا ترى ستصمت السلطات المصريه على هذه الاتهمات والتطاول السافر من وزير الدفاع الاسرائيلى أم أننا بعد الثوره أصبحنا ذو كرامه لا تسمح لنا بالصمت

احبائى

فيه مشكلة خطيرة مش كل الناس فاهماها
ان اسرائيل لما بتحب تعمل حاجة مش بتعملها على طول , ولكن عندها عقول عبقرية خبيرة فى الصياعة السياسية , يعنى بيفكروا ازاى الجريمة اللى عايزين يعملوها انها تبان قدام الالم كله دفاع عن النفس وانهم غلابة ومساكين والعرب هم اللى والى بيعتدوا وعليهم وبيدبحوهم مش العكس , يعنى اى حادثة ولو تافهة بتحصل الاعلام عندهم فيه جهاز بيكبرها وتتذاع على العالم ان هم غلابة ومساكين ومن حقهم يدافعوا عن نفسهم من العرب الارهابيين اللى عايزين يقطعوهم , وايهود باراك ده صايع قديم وانا عارفه , يعنى زمان لما كان رئيس وزراء اى عملية بيعملها الفلسطينيين كان بينزل بالبيجاما وينزل وسط الحفرة ويبهدل هدومه وممكن كمان يخلى حد يركب له حتتين بلاستر انه آل اتعور , عشان يبين للعالم ان حتى رئيس الوزراء مش فى امان علما بان الحادذة لما حصلت هو كان بعيد عنها ب 200 كيلو , والمشكلة النهاردة عندنا , يعنى لما ييجى شوبة شباب متطرف ويعمل مشاكل فى سيناء , والاسبوع اللى فات اتذاع فى اسرائيل ( وممكن كذب ) بس اتذاع انهم اعلنوا سيناء امارة اسلامية , يعنى دولة تانية غير دولة مصر , وحساسية سيناء انها ملاصقة لإسرائيل فى جزء وملاصقة لغزة فى جزء , وهنا الشباب ده دخل منطقة سيناء فى مشكلة يعنى تخلى كل انظار العالم تتجه ناحية سيناء بترقب , يعنى لو حد رمى طوبة على اسرائيل وانا سبق قلت انهم بيتلككوا ممكن يقولوا ان جه عليهم عدوان وممكن يعملوا مصيبة طالما ان التواجد الامنى المصرى لسه مش كافى فى سيناء , ووممكن اسرائيل تستغل الفرصة وتدخل وتقول انتم مش قادرين تحكموا حدودكم احنا من حقنا نحمى نفسنا , وممكن تدخل بشكل تانى , تعمل فيلم على العالم وتخلى الناتو يتدخل وتبقى سيناء ضاعت , يعنى المفروض اننا دلوقتى حانجنى مكاسب الثورة وسيناء فيها كنوز لسه ماحدش طلعها .... كنوز تخلى مصر من اغنى دول العالم , لما ييجى ناس ماعندهمش لاوطنية ولا انتماء لمصر , ويعملوا قلق يخلينا بدل ما نطلع الخيرات الكتير من سينا نرجعها تانى منطقة حرب او منطقة عليها اسلاك شائكة وتبقى محرمة على المصريين , يعنى احنا حاربنا وعملنا كل افلام الدنيا من اتفاقية سلام وغيره عشان نرجع سيناء ييجى شوية شباب مش مسؤول ويضيع منا سيناء تانى ؟؟؟؟؟
والمشكلة الأخطر ان حاندى فرصة لإسرائيل انها تنفذ اى مخطط وحتى لو غلط اى تصرف مش مسؤول بيدى اسرائيل الحق او الإستهبال انها تخليه يبان قدام العالم انه صح , وماحدش ينسى ان حلم اسرائيل اقامة دولة اسرائيل الكبرى من الفرات الى النيل , وما تكون مصر قلعة حصينة متماسكة الحلم ده عند اسرائيل حايبقى بعيد اوى ومستحيل , لكن لما مصر تتقطع وتتفتت وتتفكك , ويطلع من ولادها ناس تكسرها زيادة هم هنا بيخدموا اسرائيل ويخلوا حلمها يبقى قريب اوى وفى المتناول مش كده ولا ايه ؟
مع اطيب تحياتى

الف شكر يا شيماء علي الخبر ..

أشكرك يا استاذ عادل على التعقيب الرائع
أستاذ أمير وحشتنا جدا وأنا ألى بشكرك لأنى يمكن أكون قضيت سنه وحضرتك كنت فيها المشرف وأتعلمت منك كتير بجد شكرااااااااااااااااااا

اسمحى لى يا شيماء أن أهمس فى اذنك.ما حدث فى عام67 لن يحدث مرة أخرى.ومصر قادرة على صد أى عدوان عليها.ورد مصر لن تتخيله اسرائيل.مع خالص تحياتى .محاسب يحي بالأنتاج الحربى.

الأخ العزيز يحى المطراوى
اشكرك على تعليقك ولكن فيه حاجة , سنة 67 مع اننا اتهزمنا هزيمة منكرة مالناش يد فيها لأننا ماحاربناش , لكن كان الملحوظ ان الشعب المصرى كله عن بكرة ابيه كان ايد واحدة , والخونة والعملاء كانوا فئة لاتذكر , والدليل ان مصر تجوزت النكسة بسرعة وخرجت منها بنصر عظيم شهد له الاعداء قبل الأصدقاء , لكن الخطورة دلوقتى ان الخونة والعملاء بقوا كتير , يعنى تحسن ان فيه آلاف بيحاولوا يخربوا البلد او يفتتوها , او يدمروا الجبهة الداخلية عشان الجيش ما يبقاش متفرغ انه يبص على قدام ناحية الاعداء المحتملين , ولكن بيحاولوا يضربوا الجيش من ورا ومن جميع الإتجاهات عشان الجيش يتشتت , لأن وظيفة جيش مصر الاساسية مش الهجوم على الاعداء , ولكن انه يبقى قوى اوى بحيث ان الاعداء مايفكروش ييجوا عنده , لكن لما تيجى عناصر تبتدى تضربعلى الجيش طيب خلينا ايه لإسرائيل , دول عاملين زى اللى بيقشروا الموزة عشان اسرائيل تاكلها ع الجاهز ,
مع اطيب تحياتى

انا بصراحة حاسة اني مش فاهمة حاجة خالص في الموضوع دا
مين اللي بيضرب حاسة ان مش مستوعبة
هل دول فعلا مجهولين ولا هتبدأ حرب بس الحرب مش معادها دلواقتي خالص
ارجوكم اللي فاهم يحاول يفهمني

مشكوره مروه
دي تلاكيك فاضيه
لانهم عاوزين يظهروا بمظهر الغلبان ويضربوا غزه
يعني بالعربي
جر شكل مصر

كنا ممكن نقبل انها تعدى لو جت على قد التطاول بالكلام لكن قلة أدب و قتل ولاد مصر على الحدود ده اللى ما يعديش ابدا
http://www.youm7.com/News.asp?NewsID=476723

صعب قوى نقبل تانى ان الدم المصرى يراق على الحدود و لا تهتم الدولة المصرية و لا تنظر حتى إلى هذه الدماء البريئة زى ما كان بيحصل قبل الثورة

حتى لو كان اللى نفذوا العملية دى عدوا من مصر مش من غزة مش من حق أى كلب اسرائيلى يضرب رصاصة تجاه الحدود المصرية ... لازم يعرفوا حجمهم الحقيقى بالنسبة لمصر

تركيا لغاية النهاردة رافضة اى عودة للعلاقات الا اذا اعتذرت اسرائيل و دفعت تعويضات لضحايا سفينة مرمرة التركية اللى كانت ضمن اسطول الحرية المتجه الى غزه

يا ريتنا نقدر ناخد موقف حقيقى يحجم هؤلاء القتلة و يرد الاعتبار لدماء شهداء مصر

شكرا يا شيماء على الموضوع

ودى أخر الاخبار http://el3sheranews.at.ua/blog/2011-08-19-60

ودى أخر الاخبار
http://el3sheranews.at.ua/blog/2011-08-19-60

اضم صوتى لصوت مروه
انا تايه ومش عارف هو منين بيودى على فين

كده كتيييييييييييييييييييييييييييييييييييييييير بقى وحتى الان لم نسمع من الحكومه المصريه رد
أخر الاخبار مقتل جندى سادس اليوم الجمعه2011/8/19

أعلنت مصادر طبية وأمنية مصرية أن مجندا مصريا قتل اليوم، الجمعة، وأصيب آخر فى رأسه وهو فى حالة غيبوبة، خلال تبادل إطلاق نار مع مسلحين مجهولين على الحدود مع إسرائيل.

وكان قد قتل خمسة مصريين بينهم 5 مجندين من حرس الحدود مساء الخميس، عندما أطلق قناصة إسرائيليون داخل طائرة إسرائيلية بالقرب من الحدود المصرية الإسرائيلية قد أطلقوا النار على مقاتلين كانت تلاحقهم بعد هجمات إيلات.

أسرائيل تحمل مصر مسئوليه تفجيرات أيلات وبئر سبع S11200812213257

مطار أسيوط فى أستقبال شهيد الشرطه بالنيران الاسرائليه

يستعد مطار أسيوط الدولى لاستقبال شهيد الشرطة الشهيد أحمد جلال عبد القادر، ضابط الشرطة الذى قتل على أيدى القوات الإسرائيلية على الحدود المصرية، والذى يسكن والدا بمحافظة أسيوط وتوجد عائلته بمحافظة سوهاج، حيث ستنقله سيارات الإسعاف من مطار أسيوط الدولى إلى مسجد ناصر بأسيوط لأداء صلاة الجنازة عليه.

وقال مصدر أمنى إن الشهيد سوف تقام له جنازة عسكرية بأسيوط وتشارك فيها كل القيادات الأمنية والعسكرية بالمحافظة وجموع شعب أسيوط، وبعدها يتم نقل جثمانه، حيث مقابر العائلة بمحافظة سوهاج، ليتم دفنه هناك.
نقلا عن اليوم السابع

أسرائيل تحمل مصر مسئوليه تفجيرات أيلات وبئر سبع S82011181541

"التوحيد والجهاد" تتوعد بتحويل سيناء إلى أرض للصراع مع إسرائيل

توعدت جماعة التوحيد والجهاد الفلسطينية بتحويل سيناء إلى أرض للصراع مع إسرائيل.

وقالت الجماعة، فى بيان تلقت اليوم السابع نسخة منه، إن أرض الكنانة وجبال الطور قد دخلت مرحلة جديدة ستكون من خلالها عنواناً بإذن الله الواحد الأحد فى المرحلة القادمة من الصراع مع أعداء الله اليهود وذيولهم.

وأصدرت الجماعة بيانا: "تبارك فيه عملية إيلات التفجيرية"، وقالت فيه: "نُبارك تلك السَّواعد المباركة التى دكَّت حصون العدو اليهودى الحاقد فيما يُسمى بمنطقة إيلات جنوب فلسطين المحتلة، حيث مرَّغوا أنف اليهود فى التراب، وأذاقوهم الويلات فى عُقر دارهم رغم كل التحصينات والتدابير الأمنية الواهية.

وطالبت الجماعة حكومة حماس بالإفراج الفورى عن كافة أسرى السلفية الجهادية من سجونها، وعلى رأسهم الشيخ هشام السعيدنى (أبو الوليد المقدسى)، لاسيما فى ظل التهديدات المتزايدة من جانب العدو الصهيونى بتصعيد العدوان على قطاع غزة.

يذكر أن جماعة التوحيد والجهاد الفلسطينية هى جماعة سلفية مرتبطة بتنظيم القاعدة وتتواجد بقطاع غزة.
نقلا عن اليوم السابع

احبائى

انا اولا اؤيد كل حرف مما قالته الأخت الفاضلة فرحة ( وبالمناسبة انا برحي بيها لأنها من زمان مادخلتش المنتدى وحارمانا من ارائها الناضجة )
انا اؤيد كل كلمة ان دم المصرى كل نقطة فيه غالية جدا , ومش حتروح هدر , واذا كان الرئيس السادات عمل اتفاقية السلام وانا حضرت وقتها طبعا , قال وقيت اولادى شر القتال , يعنى احنا فى 67 اتهزمنا وخسرنا شهداء كتير اوى , وفى حرب 73 انتصرنا وخسرنا شهداء كتير اوى غير الجرحى والمصابين بعاهات مستديمة ولسه عايشين عاجزين لحد دلوقتى غير الخسائر الفادحة واللى بنسد فى ديونها لمدة 300 سنة لقدام غير مدن القناة اللى اتدمرت كلها بورسعيد والسويس والاسماعيلية ومدن كتير بينهم على نفس الخط , يعنى الحرب واللى بيدخل حرب مش جدعنة , ولكن خيبة , يعنى احنا فى اتفاقية السلام عملنا خط احمر بيننا وبين اسرائيل , الخط ده حد فاصل بين اننا انتصرنا واخدنا سيناء كاملة ونتفرغ نبنى البلد او اننا نفضل نحاربهم طول عمرنا ومش مهم التنمية والبلد تقعد مدى الحياة فى موقف لاسلم ولاحرب وكل شوية حرب تجيب عاليها واطيها , وحاجة كده زى المشكلة الفلسطينية الله يعلم حاتتحل امتى , واحنا اخترنا خيار السلام عشان نبنى البلد وعشان ولادنا اللى طالعين نحاول نعمل لهم مستقبل , وللعلم احنا المسيحيين بنكره اليهود اكتر من المسلمين ( دى حاجة عندنا فى ديننا ) يعنى مش عايزين اصلا نتحرش بيهم ولانتعامل معاهم يعنى نحب يكون فيه خط احمر بيننا وبينهم ماحدش يعديه لا احنا ولا هم , ولما نرجع لليهود انا نفسى اؤلف كتاب عن شخصية سيكلوجية دماغ اليهود ويتدرس فى الجامعة مش حبا فى اليهود ولكن قرفاً منهم , يعنى اول حاجة ان زى ما فيه طقوس من اركان الدين عند احبائى المسلمين مثلا انه لازم يصوم رمضان ووعليه فريضة الحج اذا استطاع اليها سبيلا إلى آخر اركان الدين , فى العقيدة اليهودية عندهم حاجة مهمة اسمها انشاء دولة اسرائيل الكبرى من الفرات الى النيل , وعشان اليهودى يحس انه كمل دينه من وجهة نظرهم ان يسعى جاهداً لإتمام الموضوع ده بكل الوسائل وبالذات القذرة ( لأنها اسهل الوسائل ولأن اسرائيل دولة دينية الحاخامات عندهم حللوا لهم ارتكاب اقذر الوسائل لإتمام اللى بيقولوا عليه ) وبالنسبة لهم جزء من الحلم اتحقق يعنى الفرات بقت سالكة , ناقص مصر واللى بين مصر والفرات دول سهلة يعنى سهل جدا يفتحوا الشقتين على بعض , بس العقبة مصر ..... ومصر طول ماهى قوية الحلم ده بعيد عليهم لكن مصر لو اتفتت وانهارت قوتها الحلم يبقى وارد جدا ,
ومن سيكلوجيات اسرائيل انها بتتلكك يعنى واحد اسرائيلى بينضرب بيقتلوا قصاده الف , طيب ندعى ربنا يكفينا شرهم ولا نتحرش بيهم ونتقبل اللى يعملوه , يعنى عملية ايلات دى ممكن اسرائيل يسكتوا ولا ممكن يردوا رد شديد , ومن سيكلوجية اسرائيل برضه ان مثلا نفسهم يدمروا نص مدينة زى غزة ينتهزوا فرصة زى دى ويعملوها والمدنيين بالنسبة لهم فراخ مالهمش حساب ونيجى للموضوع الأخطر التوحيد والجهاد اللى عايزين يحاربوا اسرائيل دول بيتكلموا بناء عن مين , يعنى واخدين توكيل من الجيش انهم يبقوا جيش خاص يحارب اسرائئيل ولا بيحاربوا مع نفسهم ؟؟؟
يعنى هل انتم توافقوا ان يبقى فيه جيش قطاع خاص يحارب لوحدة كده لما هو يحي , وهل اسرائيل لما ترد طبعا حاتضرب على الالى بيهاجمها فقط ولا حاتضرب علينا كلنا ؟ يعنى اسلوب اسرائيل ان اللى بيضربها فى مترين هى بتضرب على بعد 500 كيلو يعنى ممكن هم يضربوهم من سيناء وهم ييجوا يضربونا هنا فى القاهرة وعمولها فى لبنان قبل كده وارجعوا للتاريخ يعنى حزب الله شن حرب عليهم فى منطقة الجوب اللبنانى قامت اسرائيل ضربت كل لبنان من فوق لتحت ودمرتها ...... مش عارف
مع اطيب تحياتى

الأخ الفاضل الأستاذ عادل صمويل.مصر تعلم جيدا أن اسرائيل دولة عدوانية لا تريد السلام واذا جائت الفرصة ستنقض العهد الذى بينها وبين مصر لأن أحلام اسرائيل لن تنتهى الا بموت اسرائيل.وللتذكرة فقط جيش مصر قوة لا يستهان بها واسرائيل تعلم ذلك جيدا ويكفيه فخرا حرب أكتوبر بعد هزيمة منكرة عام 67 بعد فترة تدريب 6سنوات فقط.وليعلم كل مصرى وعربى ان قوة الجيش المصرى عام2011 تختلف تماما عن قوة الجيش عام73 فالفرق 38سنة تدريب.والله أكبر فوق كيد المعتدى.

الأخ الفاضل يحى مطراوى

انا ماعنديش شك فى قدرة الجيش المصرى , بس المشكلة زى ما انت قلت اسرائيل دولة عدوانية يعنى مافيش مايستدعى ان حد يجر شكلهم ويورطنا معاهم بسببه وبالذات لما يكون الحد ده خارج عن قانوننا

يعنى احنا فى الوقت الحالى عندنا 500 مشكلة فى نفس الوقت عمرهم ما اتجمعوا مرة واحدة بالكثافة دى , مش ناقصة حد يورطنا فى حرب
مع اطيب تحياتى

يمكن جة الموضوع دة عشان القوي السياسية المصرية كلها تتحد مع بعض بعد التفتيت

اللي حصل بعد التنحي وكل فصيل عايز ياخد قدر اكبر من التورتة

حان الان ان نحب مصر ونتحد حتي يسلم المجلس العسكري السلطة حان الان مصر ان تكون دولة ديمقراطية

مدنية حقيقية حتي يتفرغ الجيش لهؤلاء المرتزقة

انااعلم ان كل شيء في النهاية سيؤول للخير ( كل الاشياء تعمل معا للخير ..) حتي لو كان الظاهر شر .

لابد ان الجيش هيرد الرد المناسب ودمائنا نحن المصريين لن تذهب هدرا

اتمني ان ينتهي الموضوع في اسرع فرصة كمان عشان السياحة ترجع تاني لمصر لأن الل بيحصل مبدئيا

ممكن يطير السياحة في شرم الشيخ وتبق ضربة قوية للاقتصاد المصري و البلد مش ناقصة .

شكر يا شيماء

أنا بشكركم كلكم مش بس عشان الأهتمام بالموضوع أنما كمان لسعه الافق والاستفاده ألى أستفتها من كل رأى فى الموضوع حتى ولو كانت فيه أراء متضاده مع بعضها

» توضيح رسمي من ادارة الموقع نظرا لعدم توقف الاسئلة التي تحمل القلق
» صدق او لا تصدق .. امس الجمعه 24 ابريل 2009 كان فرح هيفاء وهبي . تكلفة الحفل اكثر من 9 مليون دولار و 150 طائره خاصه تحمل ضيوف الحفل.شاهد صورة العريس المصري