الاخت الفاضلة فرحة
اشكرك على هذا الجزء المهم جدا من حوار الدكتور زويل
واهم ماجاء فيه : بعد خمسين عام ... مذا سيقول التاريخ عن هذه الحقبة السوداء من حياة مصر طول عمرها
مصر دى عمرها 7000 سنة وتمتد الى يوم القيامة , واللى بيعيش على مصر دلوقتى , احنا وحاييجى يوم ونمشى وييجى اللى بعدنا , زى ما مشى اللى قبلنا واحنا جينا
بس عيب جدا لما التاريخ بعد خمسين سنة يقول اننا الجيل اللى خرب مصر
ولو جينا نشغل شوية العقل الخامل من 11 شهر ... لو دخلنا جوا مخ زويل ... هو راجل عالم كبير وبيحب العلم ... يعنى لو عرضنا عليه كل المناصب التى يتصارع عليها الجميع مش حايقبلها , لأن مكانه جوا معمله , يعنى احسبيها كده : لو هو مسك رئيس جمهورية مصر كذا سنة , افضل له ولا انه يخترع حاجة العالم يفتكره به الى الابد , طبعا التانية بالنسبة له افضل , وطالما هذا الرجل مالوش مطامع سياسية يبقى لازم نسمع كلامه ونفكر فيه كويس
لو قلنا مصر فيها 85 مليون نسمة ... الناس الوحشين والمخربين والبلطجية والحرامية بجميع انواعهم من اول حرامية الغسيل إلى حرامية كراى الحكم كام ؟ مليون مثلا الباقى الشرفاء 84 مليون , ومش من المعقول ان مليون يضيعوا حياة ووطن ومستقبل اولاد 84 مليون
يعنى مش من المعقول ان 2 % فاسدين يدمروا حياة 98 % ناس كويسين
اهم حاجة جاءت فى خطااب زويل اننا نوقف الاعتصامات كلها فوراً .. لأن مش تعمل حاجة دلوقتى , ولكن بتدى فرصة ان يندس بينهم الناس اللى عايزين يخربوا الوطن , يعنى الاعتصام بيعمل بؤرة او مناخ ليدخل بينهم المخربين والمدمرين , والمدمرين مش للمنشئات فقط ولكن للعلاقات بين الشعب والجيش , وعمل حالات احتقان مش حاتخف بسهولة , زائد طبعا الخراب الاقتصادى واللى ماحدش عايز يقول وصل لحد فين بناء على عدم الشفافية المعتادة , الدولة دلوقتى عاملة زى مكان زحمة اوى ابتدأ يتملى حشرات من جميع الأنواع , لازم نفضى المكان شوية عشان نعمل عملية القضاء على الحشرات وتطهير المكان , والاعتصام اللى عاملينه عشان وزارة الجنزورى تمشى ( وهى كبيرها كام شهر يعنى لحد انتخاب الرئيس ) ممكن يجيب نتيجة عكسية , يعنى بعد شهر لما يكتمل المجلس الوضع القادم وان مش طايقين الوزارة ممكن يخلى فصيل واحد يتمسك بحقه فى تشكيل الوزارة , وتطلع وزارة احادية من جانب واحد وتتكرر ظاهرة الحزب الوطنى ... ووسط الزحمة ممكن يعملوا دستور يديسونا فيه يكون دستور حسب هواهم هم مش زى ما الشعب محتاج .... ولو حسبنا الاعتصام من اسبوعين كسبنا منه ايه؟؟؟؟ حرق مجمع المخطوطات , واللى لايقدر بمليارات المليارات , وعملية مدبرة ومحبوكة ومدفوعة الاجر , وللعلم المخطوطات دى مكتوبة بخط اليد بحبر , يعنى بمجرد استعال النيران لو جت المطافى .. الماء حايفسد فيها اكتر من اللى افسدته النار , يعنى كارثة علمية بكل المقاييس , والغرض منهاتشويه وتخريب صورة مصر قدام العالم كله اللى مش حايسكت على الجريمة الثقافية دى
وربنا يفتح العقول مع اطيب تحياتى
النوع
موضوع: رسالة الدكتور زويل للشعب المصري للخروج من الأزمة 
الإثنين ديسمبر 19, 2011 4:06 am
