احبائى
فى الوقت اللى من يوم ماقامت الثورة كل يوم نتنكد على خبر جديد ,, يعنى تحس ان فيه ناس شغلتها انها تخلق او تخترع مشاكل , وامور البلد كلها بتنهار .. اقربها امبارح تصريح نازل فى كل الصحف عن انشاء اول جماعة للامر بالمعروف والنهى عن المنكر .. ومع تضارب ردود الفعل بين الاستغراب وافنكار والإستنكار ,,, وطول الليل بنتكلم وماحدش اخد باله من امر فى منتهى الخطورة حصل فى اسوان :
حصلت هزة ارضية بقوة 4 واتنين من عشرة ريختر ومركزها بحيرة السد ... طبعا خبر تافه ولا حد اخد باله منه .. انتم عارفين ده معناه ايه ؟ فاكرين الزلزال اللى حصل فى مصر فى اوائل التسعينات وكانت قوته خمسة ونص ريختر واستمر 20 ثانية , وعمل تأثير على اساسات كل العمارات فى مصر ولو كان استمر عشر ثوانى كمان لضاعت نص مصر ,,, كان مركزه جبل القطرانى فى الفيوم .. الخطورة ان الهزة دى فى بحيرة السد يعنى جنب السد العالى .
والهزات الارضية دى حاجة فوق مستوى العلم يعنى ماحدش يقدر يتنبأ بيها .. او وظيفة العلم انه بيحكى لك عنها بعد ماتحصل .. والخطورة ان الهزات دى اما بتبقى تنفيسة صغيرة فى الكرة الارضية لتسريب الضغط الزائد جواها او بتكون انفجار شديد بيعمل زلزال قوى , وممكن اى هزة تبقى حاجة وتعدى او تكون تمهيد لزلزال اكبر , وله توابع طبعا .. المشكلة منطقة السد .. يعنى معلوم ان السد لو جرى له حاجة هو مخزن وراه كميى مرعبة من المياه , لو السد انهار وسابت حاتغرق مصر وحسبوها قالوا حتكون ارتفاع المياه فوق اسكندرية 8 متر ... يعنى حاتتدمر الحياة فى مصر لمدة عشر سنوات على الاقل ... طبعا حد يقول فال الله ولا فالك .... انا اقول وجهة نظرى
اللى حصل فى مصر خلال العشر شهور الاخيرة من فوضى وبلطجة وفساد واستعباط من حكام واستهبال , والأخلاق اتدمرت .. وانتشار الغوغاء , ويقول لك ايدى خفية ومستر اكس والرجل الغامض بسلامته , والمطامع فى الحكم حتى لو البلد تولع , وناس تقل حايعملوا مصيبة ف مصر يوم 25 يناير , وحتى محاكمة مبارك بيتحاكم على حاجة فى قضية ممكن تستمر 25 سنة وحايطلع منها براءة لعدم وجود اللى شد الزناد الاصلى ولما يتوجد يعترف عليهم وطالما مفيش اللى شد الزناد مفيش قضية .. يعنى تهريج ... والحاجات الحديثة زى القاضى لو حكم على مجرم اهل المجرم يكسروا المحكمة .. ولو الشرطة لتجدعنت ومسكت مجرم اهل المجرم يحروقوا قسم الشرطة غير الخطف وقطع الطرق واحتلال كل الارصفة والميادين .. غير بقى فيه 500 رأى يعنى لو قلت يمين تطلع مظاهرة فى العباسية ولو قلت شمال تطلع مظاهرة فى التحرير ولو قلت فوق تطلع مظاهرة فى روكسى والمصانع متوقفة , واللى يتخانق مع مراتو يقطع خط السكة الحديد ... تفتكوا ده ممكن يخلص فى اد ايه ؟؟؟
اللى عايز اقوله ان فوق فيه الله وهو شايف كل حاجة واكيد غضبان .. وغضب ربنا ده صعب اوى يعنى ماحدش عايز يتأدب انا حاعلمكم الادب
وغضب ربنا ده حصل كتير قبل كده على هيئة كوارث طبيعية واوبئة ,,, يعنى لما مكان يصعب فيه ان الناس تفوق بتيجى حاجة من فوق تشيل كله وبعدين بييجى ناس غيرهم .. احنا عندنا فى التوراه ( وجايز الكلام ما يعجبش البعض بس ده كتاب سماوى يعنى ما اعتقدش فيه كذب , واعتقد ان عندكم فى القرآن حاجاتكتير من اللى حقولها ) فاكرين قصة سيدنا موسى لما عبر البحر , ودخل وراه فرعون وجيشه والله قفل عليهم البحر وغرقهم
وقبلها بشوية المصريين اغضبوا الله ضربهم ضربتين الاولى قبل نهر النيل دم , والثانية حصل وباء قتل كل اطفالهم
وفى فلسطين ايام زمان كان يه مدينيتين اسمهم سادوم وعامورة , شعبهم اغضب ربنا اوى , ربنا قلبهام رأساً على عقب ولسه موجودين لحد دلوقتى ,, خرابة لا يجروءاحد يدخلها , ولاتنسوا قصة سيدنا نوح والفلك ... نفسى كلنا نفوق.... اى انسان مننا اكيد بيعرف ايهيغضب ربنا ... لكن لما تكون الحاجات اللى بتغضب ربنا حاجات فردية هو بيعاقبهم بطريقته ... لكن لما تكون كتير كتير كده العقاب ممكن يكون جماعى
نفسى نفووووووووووووووووووووووق
النوع
موضوع: رسالة تحذير ... من فوق 
الثلاثاء ديسمبر 27, 2011 12:46 pm
