عبر عن احساسك بكلمة

الله يكرمك يا أ/ أمير

حمد الله علي السلامة استاذ محمود

بس عندي استفسار هما ليه مش بيخليكم تعرفوا اللي بيدور في البلد في الجيش

الله يسلمك يا مروة

والإجابة على سؤالك هيا إنهم مش بيمنعونا من متابعة الأحداث الخارجية بشكل مباشر وإنما دا غصب عننا

يعنى مثلاً إحنا حالياً معسكرين فى قلب الصحراء الغربية وسط حقول الألغام ، بنمشى كل يوم فى الصحرا

والجبل مايزيد عن 15 ألف خطوة لمسح المنطقة وتطهيرها (طبعاً كلام فاضى كله ) ، تخيلى واحد بيمشى 15 ألف

خطوة يومياً بيعدهم خطوة خطوة ، يعنى حوالى 10 _ 11 كم وسط الرمل والصخور والتلال من 6 الفجر وحتى

2 الظهر كل يوم ، أكيد بيرجع مش شايف قدامه ، وياريت بيرجع ينام ، لأ طول ما الشمس لسه طالعه

بيخترعوا شغل للعسكرى ، نيجى بقى بالليل نروح الكانتين (دا طبعاً اللى لسه قادر يفتح عينيه) علشان

نشترى أى حاجه ونحاول نسمع أى حاجه فى التليفزيون ، طبعاً بنلاقى الإخوة العساكر العادة والمتوسطة

اللى هما أقدم مننا (ويلعن أبو اللى إخترع الأقدمية فى الجيش) مشغلين أغانى شعبية حقيرة أو أفلام خنيقه

طب يا اخواننا هاتوا كدا الأخبار نشوف الدنيا فيها ايه الرد بيكون واحد من :

1. إنت عسكرى مستجد وأنا أقدم منك وأسمع اللى أنا عاوزه

2. يبصلك بقرف ويسكت وميعبركش

3. يقولك أخبار ايه ، يلعن أبو المظاهرات

4. مش إنتوا اللى خربتوا البلد يا بتوع الفيس بوك

بالمناسبة هما مسميين دفعتى علشان معظمها عليا دفعة الفيس بوك ، هما بيعتبروها شتيمة وإحنا بتعتبرها شرف !!!

علشان تكمل الصورة هما عندهم فيس بوك دا يعنى شويع العيال الفرافير اللى بياكلوا نايتى وكيك .... إلخ ، وعلشان

الصورة تكمل أكتر أسماء الدفع هناك زى دفعة الرجالة ، ودفعة الفراعنة ، وطبعاً الدفعة الموكوسة ، الفيس بوك

وربنا يسهل والدفعتين دول يخلصوا جيش ويطلعوا علشان نبقى أقدم ناس فى الكتيبة ونترحم بقى من أم الذل ده

فوق دا كله الكتيبة فيها عصافير (عصافير يعنى حاجه كدا زى المخبر السرى ، وطبعاً اللى فى كليه فيكم يعرف المصطلح دا كويس )

فلو فرض إنه وصلت التقارير إن العساكر بقت متابعة أخبار وكدا أعتقد هايكون فيه رد فعل من نوعيه إنه هايمنعك إنك تتابع أخبار

وبإختيارك ، إزاى ؟ ، تشتغل ليل ونهار فتيجى تتخمد تنام واللى تنام فيه تصبح تلاقيه + المحاضرات المعنويه التوضيحيه اللى هيا

طبعاً بالضبط زى مؤتمرات اللواء عادل عمارة كدا ، بل أسوأ كمان

5. لو نقحت عليهم حته الوطنيه وكان فيه مظاهرات جامده أو أحداث تستاهل فى البلد بيجيبوا أخبار من نفسهم (الشهاده لله)

بس هوا فيه حاجه صغيرة بس ، إنهم بيجيبوا قناة المصرية !!!

أصل الجزيرة والعربية ومن على شاكلتهم ولاد كلب كدابين عاوزين يولعوها ويخربوا البلد

سؤالك خلانى رغيت كتير يا مروة رغم إنى عرفت بلاوى سودا لما دخات الجيش محتاجه كتب ، إحمدى ربنا إن أخوكى أخد تأجيل

والله يا بنتى اللى إحنا فيه ده مهو الجيش المصرى دا جيش طنطاوى ، العسكرى دا أحقر وأوضع حاجه ، هذة عقيدة جيشنا الحالى

الدلائل على كدا بلاوى بتحصل لا يتسع المجال لسردها فضلاً عن أننى أعانى حالة نفسية بشعة مما يحدث فى الداخل والخارج

طبعاً الكلام شكله كبير حبتين ، هاقول على واقعة واحده ع السريع من غير تفاصيل ، من حوالى 10 أيام توفى أحد زملائنا

هناك نظراً لتردى حالته الصحيه وإهماله وتأخير علاجه لدرجه أن أخاه جاء للكتيبة وكاد أن يقبل رجل القائد ليسمح له بعلاج

أخاه فى الملكى وكتب له تعهد على نفسه بحياة أخيه فلم يوافق ، مات زميلنا بعدما أجرى العملية ميرى لأن علاجه تأخر كثيراً

زميل أخر كاد يلقى حتفه من حوالى الثلاث أسابيع لنفس السبب وعندما حن قلبهم وذهبوا لعلاجه أخبرهم الدكتور بأنه لو كان

قد تأخر ساعتين فقط لكان قد مات !!!

إحنا مرميين فى قلب الصحرا وياريت بنعمل حاجه مفيده للبلد تستاهل التضحيه ، البطولة الحقيقة هناك إنك تحافظ على حياتك

لك الله يا مصر ، لك الله يا مصر ، لك الله يا مصر

يانهار ابيض ايه دا بجد ايه اللي انتو فيه دا انا تنحت قدام الكلام بجد حاجة تدايق ربنا يعنكم يارب وتخلصوا منها علي خير
بس ابقي خلي بقالك من المصرية دي علي طول المصرية زمان المصرية ودلواقتي المصرية وشكلنا هنفضل مصرية علي طول بالشكل دا
اكيد بتحسدوا دلواقتي صح هههههههههههههههه ((انا بهزر والله))
بس هو انت 3 سنين هو كان هيبقي 3 سنين بس كتير اوي مش بيحسوا بالشباب والمفروض انه لسة هيخرج يدور علي شغل ويشتغل ويجهز نفسه علاشان يتجوز وكدا

بس للدرجادي بيسيبوا المجندين يموتوا لا وقال ايه اللي وطني بجد يروح يطوع في الجيش بس الحمد لله انك مش بتنزل الشارع كانت هتبقي اكبر واكبر الناس كانوا هيشفوكوا انكم خربنها وانتو اصلا معاهم بس للاسف متقدروش تتكلموا
بس صحيح دا بيحصل اخويا مرة حكالي ساعة الانتخابات كان فيه

ان ساعتها كان الجو هدي والناس قلت فا الجنود راحوا يستريحوا شوية واللي يشرب شاي واللي يشرب سجارة وكدا سمعوا القائد جاي كلوا اتلبس ووصلوا عند المدرسة في ثواني
للدرجادي ياعني ولا عادي

معلش إتأخرت فى الرد يا مروة

1. بالنسبة لجزئية إننا بنتعب التعب فى حد ذاته مش مشكلة على الإطلاق ، المشكلة إنك تتعب وعارف إن تعبك فى الفاضى

يعنى مش بنفيد البلد بحاجه ، كله شغل تقضيه أوامر وخلاص ، طب لزمته ايه التعب بقى ، لو فيه فعلاً حاجه مفيده ى مقابل

تعبنا مكنش هايكون له قيمة أو كنا هانحس بيه أصلاً ، لكن فى الوضع الحالى التعب مضاعف لإن نفسيتك فى الأرض !!!!!

ومش هاسترسل فى سرد شواهد عن النقطة دى لإن فيه بلاوى ، إتصدمت لما عرفتها ويمكن كلكم تفتكروا مشاركاتى هنا فى

الموقع وقبل ما أخش الجيش ، كنت سعيد جداً ومبسوط وحاسس إنى رايح أدى واجب وطنى ، طلع كله فشنك بلغه العسكر !

2. تصحيح للمعلومة اللى ذكرتيها أنا جيشى سنة واحدة بس مش 3 سنين ، العسكرى العادة(اللى متعلمش) جيشه 3 سنين

والمتوسطة(اللى معاه دبلوم) جيشه سنتين ، والعليا(اللى معاه كليه) جيشه سنة واحدة ، كان يبقى 3 سنين فى حالة واحدة بس

لو كنت إتجندت كضابط إحتياط مش كعسكرى ، والحمد لله إنى دخلت عسكرى

3. بالنسبة لنقطة الإهمال دى بترجع لقائد الكتيبة لو راجل محترم بيحافظ على العسكرى وبيجيب له حقه ، ومش كل الأماكن

كدا فى أسلحة مرتاحه جداً وفيه أماكن فيها خدمات ، بتختلف حسب السلاح بتاعك والمكان اللى بتخدم فيه والقائد بتاعك

بس حوالى 80% من عساكر الجيش بيعانوا زى حالاتى ، لإن العسكرى فى عقيدتهم شىء وضيع وحقير للأسف !!!!!!

نسيت بس أوضح لك إن فكرة موت عسكرى مش سهلة ، الدنيا كلها بتنقلب ، بس صاحبنا (الله يرحمه) إتوفى فى البيت

بعد ما عمل العملية وأخد أجازة شفاء فعلشان كدا القائد حمد ربنا !!!

4. بالنسبة لسؤالك الأخير ، للدرجة دى يعنى ولا عادى ؟

هارد وأقولك وأكتر ، وقد تكون معاملة القائد للعساكر أمام الملكيين فيها نوع من التورع بعض الشىء من معاملتهم معاملة سيئة

هاحكى لك موقف يوضح لك الصورة أكتر ، لما رجعت الأجازة دى حكى لى صديق أصدقه كما نفسى أنه فى أثناء وقوفه فى الطابور

للإدلاء بصوته رصد الموقف الآتى :

عسكرى (يبدو على وجهه أنه من صعيد مصر )راح يملىء زجاجه مياه وفور رجوعه شافه الصول ، فناداه وسأله إنت بتمشى من

إستئذان ليه ؟ ، وراح خبطه قلم محترم ، فلم يتمالك العسكرى نفسه وإنفجر باكياً !!!

اه العسكرى غلط علشان لم يستئذن ، لكن الجرم اللى إرتكبه لا يستدعى أبداً أن يتم صفعه أو حتى إهانته باللفظ ، هذا كان أمام

الملكيين فى الشارع فما بالك بنوع المعاملة داخل الكتيبة العسكرية ، كله جيش فى جيش وكلهم عساكر مفيش حد غريب

القانون الميرى أساساً مفيهوش لا ضرب ولا شتيمة إطلاقاً ، بس طبعاً دا صول حيوان بيطول إيده على عسكرى غلبان زى ده

تلاقيه متعلمش أو معاه دبلوم ولا حاجه فعارف إن ميعرفش حقه وحتى لو عرف حقه مش هايقدر يطالب بيه ، لإن البيه الصول

رتبه أعلى من العسكرى وهايطلع تييييييييييت أهله لو إتكلم أو إشتكى ، الوضع مختلف بالنسبة لعساكر العليا لإنهم عارفين إن

معظمهم (وخلينى أكون صادق ودقيق) مش هايرضى بالإهانه ، وعلشان كدا 90% من صولات الجيش بيكرهوا عساكر

العليا وبيطلعوا .......... أهلهم بس بالميرى بقى من غير تجاوزات ، يعنى لما يبقى فيه شغل يصطادك إنت الأول ، كدا يعنى

للإنصاف برضه أقول إن مش كل صف ضباط الجيش سيئيين لكن أغلبيتهم حيوانات ، هما لو مكنوش عربجيه بره الجيش

مع إحترامى للعربجيه والله ، مكنوش راحوا إتطوعوا فى الجيش ، وإوعى تصدقى حته خدمه الوطن والكلام الفاضى ده

هما واخدينها وظيفه بياكلوا منها عيش ، بس كل كبير فيه الأكبر منه برضه ، يجى ضابط إحتياط فى سنى وفى سن عيال

الصول ، ويوقف الصول قدامه إنتباه من حديد ، ويبقى الصول عنده 40 ، 45 سنه ولما ينده عليه الضابط يجرى بالخطوه

ضابط فى سن عياله بيمسح بكرامته الأرض ، هوا دا الجيش المصرى ، صدق من قال مبنى على الظلم ، تفتكرى دى عقيده

عسكريه صحيحه تخلينا نقول جيشنا جيش قوى ، قولى يارب وأنا معاكى وخلى الشعب كله يقول ، إذا كان الفساد فى أى مؤسسه

مدنيه أو وزارة أو أى مكان 10 فالفساد فى الجيش 100 بلا أدنى مبالغه ومقنع بسلطة الأمر العسكرى ، ملكش تناقش أو تسأل

صباح الفل ......

Mahmoud.Abdalkarim كتب:: معلش إتأخرت فى الرد يا مروة

1. بالنسبة لجزئية إننا بنتعب التعب فى حد ذاته مش مشكلة على الإطلاق ، المشكلة إنك تتعب وعارف إن تعبك فى الفاضى

يعنى مش بنفيد البلد بحاجه ، كله شغل تقضيه أوامر وخلاص ، طب لزمته ايه التعب بقى ، لو فيه فعلاً حاجه مفيده ى مقابل

تعبنا مكنش هايكون له قيمة أو كنا هانحس بيه أصلاً ، لكن فى الوضع الحالى التعب مضاعف لإن نفسيتك فى الأرض !!!!!

ومش هاسترسل فى سرد شواهد عن النقطة دى لإن فيه بلاوى ، إتصدمت لما عرفتها ويمكن كلكم تفتكروا مشاركاتى هنا فى

الموقع وقبل ما أخش الجيش ، كنت سعيد جداً ومبسوط وحاسس إنى رايح أدى واجب وطنى ، طلع كله فشنك بلغه العسكر !

2. تصحيح للمعلومة اللى ذكرتيها أنا جيشى سنة واحدة بس مش 3 سنين ، العسكرى العادة(اللى متعلمش) جيشه 3 سنين

والمتوسطة(اللى معاه دبلوم) جيشه سنتين ، والعليا(اللى معاه كليه) جيشه سنة واحدة ، كان يبقى 3 سنين فى حالة واحدة بس

لو كنت إتجندت كضابط إحتياط مش كعسكرى ، والحمد لله إنى دخلت عسكرى

3. بالنسبة لنقطة الإهمال دى بترجع لقائد الكتيبة لو راجل محترم بيحافظ على العسكرى وبيجيب له حقه ، ومش كل الأماكن

كدا فى أسلحة مرتاحه جداً وفيه أماكن فيها خدمات ، بتختلف حسب السلاح بتاعك والمكان اللى بتخدم فيه والقائد بتاعك

بس حوالى 80% من عساكر الجيش بيعانوا زى حالاتى ، لإن العسكرى فى عقيدتهم شىء وضيع وحقير للأسف !!!!!!

نسيت بس أوضح لك إن فكرة موت عسكرى مش سهلة ، الدنيا كلها بتنقلب ، بس صاحبنا (الله يرحمه) إتوفى فى البيت

بعد ما عمل العملية وأخد أجازة شفاء فعلشان كدا القائد حمد ربنا !!!

4. بالنسبة لسؤالك الأخير ، للدرجة دى يعنى ولا عادى ؟

هارد وأقولك وأكتر ، وقد تكون معاملة القائد للعساكر أمام الملكيين فيها نوع من التورع بعض الشىء من معاملتهم معاملة سيئة

هاحكى لك موقف يوضح لك الصورة أكتر ، لما رجعت الأجازة دى حكى لى صديق أصدقه كما نفسى أنه فى أثناء وقوفه فى الطابور

للإدلاء بصوته رصد الموقف الآتى :

عسكرى (يبدو على وجهه أنه من صعيد مصر )راح يملىء زجاجه مياه وفور رجوعه شافه الصول ، فناداه وسأله إنت بتمشى من

إستئذان ليه ؟ ، وراح خبطه قلم محترم ، فلم يتمالك العسكرى نفسه وإنفجر باكياً !!!

اه العسكرى غلط علشان لم يستئذن ، لكن الجرم اللى إرتكبه لا يستدعى أبداً أن يتم صفعه أو حتى إهانته باللفظ ، هذا كان أمام

الملكيين فى الشارع فما بالك بنوع المعاملة داخل الكتيبة العسكرية ، كله جيش فى جيش وكلهم عساكر مفيش حد غريب

القانون الميرى أساساً مفيهوش لا ضرب ولا شتيمة إطلاقاً ، بس طبعاً دا صول حيوان بيطول إيده على عسكرى غلبان زى ده

تلاقيه متعلمش أو معاه دبلوم ولا حاجه فعارف إن ميعرفش حقه وحتى لو عرف حقه مش هايقدر يطالب بيه ، لإن البيه الصول

رتبه أعلى من العسكرى وهايطلع تييييييييييت أهله لو إتكلم أو إشتكى ، الوضع مختلف بالنسبة لعساكر العليا لإنهم عارفين إن

معظمهم (وخلينى أكون صادق ودقيق) مش هايرضى بالإهانه ، وعلشان كدا 90% من صولات الجيش بيكرهوا عساكر

العليا وبيطلعوا .......... أهلهم بس بالميرى بقى من غير تجاوزات ، يعنى لما يبقى فيه شغل يصطادك إنت الأول ، كدا يعنى

للإنصاف برضه أقول إن مش كل صف ضباط الجيش سيئيين لكن أغلبيتهم حيوانات ، هما لو مكنوش عربجيه بره الجيش

مع إحترامى للعربجيه والله ، مكنوش راحوا إتطوعوا فى الجيش ، وإوعى تصدقى حته خدمه الوطن والكلام الفاضى ده

هما واخدينها وظيفه بياكلوا منها عيش ، بس كل كبير فيه الأكبر منه برضه ، يجى ضابط إحتياط فى سنى وفى سن عيال

الصول ، ويوقف الصول قدامه إنتباه من حديد ، ويبقى الصول عنده 40 ، 45 سنه ولما ينده عليه الضابط يجرى بالخطوه

ضابط فى سن عياله بيمسح بكرامته الأرض ، هوا دا الجيش المصرى ، صدق من قال مبنى على الظلم ، تفتكرى دى عقيده

عسكريه صحيحه تخلينا نقول جيشنا جيش قوى ، قولى يارب وأنا معاكى وخلى الشعب كله يقول ، إذا كان الفساد فى أى مؤسسه

مدنيه أو وزارة أو أى مكان 10 فالفساد فى الجيش 100 بلا أدنى مبالغه ومقنع بسلطة الأمر العسكرى ، ملكش تناقش أو تسأل

صباح الفل ......

انا اللي اسفة اني بدايق حضرتك باسئلتي

اه ياعني بتمشوا وبتشيلوا الغام وخلاص لا اكتر ولا اقلل بس ممكن علاشان لو حد مش في المنطقة دي ميبقاش يدمر ويموت بس انتو اصلا بتعرفوا منين ان المنطقة دي فيها الغام

اه ماهو كان هيبقي ضابط احتياطي كانو هيبقو 3 سنين كتير اوي بس الحمد لله خد تأجيل بس كويس ان حضرتك خت سنة واحدة بس كانوا بجد هيبقوا كتير اوي واهوا هانت واحب اقولك علي حاجة المستر قالهالنا قبل كدا ((حب الجيش علاشان يكرهك وتخرج منه ))بس طبعا كان بيوصهالنا بدا قالنا ((حب الثانوية العامة علاشان تكهرك لاكن لو كرهتها هتحبك وهتفضل فيها كتير))

س صاحبنا (الله يرحمه) إتوفى فى البيت

بعد ما عمل العملية وأخد أجازة شفاء فعلشان كدا القائد حمد ربنا !!!
بالنسبة لانه حمد ربنا حمد ربنا علي ايه بقي ان شاء الله حمد ربنا علي انه هيتحساب علي روح راحت بسبب اهماله بجد حضرتك خلتني اغير فكرتي عن الجيش خالص بجد بس برده زي مافي ناس مش كويسة اكيد هتلاقي الكويس بس للاسف مش كتير

بالنسبة للعسكري دا كفاية بس اهانته قدام الناس ياريت قدام صحابة لا دا قدام الناس

كل كبير فيه الأكبر منه برضه ، يجى ضابط إحتياط فى سنى وفى سن عيال

الصول ، ويوقف الصول قدامه إنتباه من حديد ، ويبقى الصول عنده 40 ، 45 سنه ولما ينده عليه الضابط يجرى بالخطوه

ضابط فى سن عياله بيمسح بكرامته الأرض
يا اه والله دا اخويا دا عبيط علي كدا كان زمانوا هايص دلواقتي
ههههههههههههههههههه يانهار ابيض لو سمعني

بس بجد ربنا معاكم ويعنكم علي اللي انتم فيه يارب واجازة سعيدة ان شاء الله

بصى أنا إجابتى على سؤالك الأول هاتكون مختصرة جداً لإن شرحها طويل والدلائل والوقائع كتيرة

ببساطة ووضوح ومن غير شرح ، مفيش ألغام ولا يحزنون ، وفيه حاجات قصدى بلاوى كتير قوى

بس مش هاينفع أكتب عنها دلوقتى ، ونصيحه لأخوكى ولكل حد رايح يقدم فى الجيش بلاش لما

يطلبوا منه فى بعض الأوراق بيانات عن نفسه (بشكل ودى يعنى مش إجبارى ) بلاش يكتر فى المعلومات

وبلاش يكتب إنه بيمتلك إيميل أصلاً أو يكتب إيميل بديل مش إيميله الشخصى ، مش هاوضح أكتر من كدا

أعتقد المعنى المقصود وصل ، وإسألى مجرب وقع فى الفخ من غير ما ياخد باله

أخر حاجه جملة حب الجيش يكرهك دى ، هههههههههههه ، قالها لى والدى لما دخلت الجيش !!!!

وإبقوا إفتكرونا بدعواتكم على طول

أطيب المنى ،،،

ايه داياعني كانوا بيضحكوا علينا بالالغام واسرائيل والجو دا

هههههههههههههههههه
شكرا علي المعلومة والمعني وصل

وربنا معاك ويعينك Smile

عبر عن احساسك بكلمة - صفحة 2 331_e0b5093e80

أطيب التهاني القلبية لجميع الأخوة الأقباط بمناسبة عيد الميلاد المجيد 7 يناير

السلام عليكم
انا داخلة مخصوص علاشان اقولكم انا عندي امتحان بكرة ممكن تدعولي لاني فعلا خايفة Crying or Very sad

معلش هتعبكم معايا Smile

ان شاء الله يا مروي تجتازي الامتحان علي ألف خير ..

Engineer // Amir كتب:: ان شاء الله يا مروي تجتازي الامتحان علي ألف خير ..

ربنا يخليك يا استاذ امير يارب والحمد لله كان كويس
وشكرا لحضرتك

احساسي اليوم

انه مافيش احساس عند الناس !!!

يــــــــــــــــــــــــــــــــــــــــاه يــــــــــــــا تــــــــــــوتــــــــــا
بجد صعبة اوي قد ايه الانسان بيتعب لما يفقد حد
سبحان الله جعل في قلوب الحيوانات رحمة

سبحآن الله....

هموت وأعرف احولك....}ْ
هموت بس أسمع صوتك....

خبريني عنك....وش صآر لك

أنتٍ بخير يا غلآتي...!!ّ

وش فيكٍ لآ تجاوبي علي سؤالي

لآ لآ "لآ تقولي بروح"
أذا رحتي والله بروح وراكٍ

أرجوكٍ جآوبي أرجوكٍ
والله روحي معلقه بيكٍ

بالله عليكٍ لا تروحي

أرجوكٍ أرجوكٍ أرجوكٍ يـ"أختي وأمي وصديقتي"يا غلآتي

أرجوك لآ تروحي أنتٍ وعتيني أنك بتظلي معاي للنهآية

لآ تخلفي وعدك أرجوكٍ
قسم بالله "أحبك"وأذا روحتٍ بروح معآكِ

{لآ لآ لآ لآ تتركيني أرجوكٍ}

الله .. الله .. الله

الغضب والحب

عبر عن احساسك بكلمة - صفحة 2 16847818886380445827210

عبر عن احساسك بكلمة - صفحة 2 25122011e93b13248419562

اضحكلها تضحكلك Smile

الحمدالله الحمـــــدالله

داخل نت النهاردة مخصوص من موبايل إنترنت علشان أقول لكم كل سنة وإنتوا طيبين بمناسبه أغلي مناسبه في حياتي ، أغلي من عيد ميلادي لإنها عيد ميلاد مصر كلها ، كل سنه وكل مصر طيبه في ٢٥ يناير
ومتنسوش تدعو للشهداء ومتنسوش إن حقهم لسه ما رجعش .

اه نسيت أشكر أيات علي ستايل الموقع من خلال تصفحه من موبايل إنترنت ، دي أول مرة أدخله من الموبايل ومكنتش متصوره هايبقي كدا بصراحه رائع وسلس للغايه قياسا بمواقع تانيه جربتها .

» يبقي انت صحيح في مصر .. ادخل و شارك بكلمة حلوة ..