لف وإرجع تاني ...

أؤمن بثقافه الحوار وأتقبل الرأي الأخر ، بس لو حضرتك مقتنع إن العسكر مش ضد الثوره وقاموا بأروع ثوره مضاده في التاريخ إن دلت فإنما تدل علي عبقريه العسكريه المصريه فلو سمحت متكملش قراءه الموضوع لإننا عمرنا ما هتكون بينا ثقافه حوار وأنا لو وقفت علي راسك عمري ما هتقبل رأيك الأخر ، دا بس من الأول كدا وعلي بلاطه

حرب إستنزاف من الدرجه الأولي لوأد الثوره وخلاص تقريبا أتت ثمارها
ممنوش أي فائده دلوقتي إننا نقول مين اللي كان السبب في إننا نخسر الحرب دي ، يبقي دا كلام عبيط من شخص أهبل !
بكل أسف السيناريو الأسوأ في أخر بريق أمل حصل (حكم الدستوريه) !
إحنا قلنا ثورتنا محترمه وبعد ما نجحت قلنا لازم نكمل بإحترام ونحاكم الكفار بالقانون ونحترم أحكام القضاء والبقين الحلوين دول ، فقام اليهود ولاد عم الكفار قالوا جيتوا لنا في ملعبنا ، فقاموا مشربين الحكم شاي بالياسمين وأخدنا إحنا ال ...
فرق تسد كان سلاحهم الفتاك ضدنا وكنا نحن حينما تقزمنا بحثا عن مصالحنا الأنانيه الزخيره !
طب ايه دلوقتي ؟
دلوقتي إحنا رجعنا بالضبط ليوم 24 يناير !
طب والحل ؟
لف وإرجع تاني !
اه لف وإرجع تاني عدل ع الميدان بمطلب واحد وهو تسليم السلطه لمجلس رئاسي من المرسي وحمدين وأبوالفتوح
؟؟؟!!!
بصوا والله العظيم الناس دي أساتذه
المحكمه دلوقتي حكمت بأسوأ سيناريو ممكن ، والقوي السياسيه وفي مقدمتهم الإخوان لو راهنوا علي مسرحيه الإعاده هنخسر كلنا
؟؟؟
لو نجح شفيق يبقوا هما كدا إدوا شرعيه له ومش من حقهم ينزلوا يتظاهروا ضده لإنهم كدا هيبقوا بيتظاهروا ضد الشرعيه ، والقوي السياسيه اللي هتعلن مقاطعتها مش هتنزل تتظاهر معاهم وفي الوقت ده هيبقي عندهم حق
ولو مرسي نجح توقعوا الأتي
مواطن شريف هيقدم طعن علي دستوريه الإنتخابات الرئاسيه ؟
كتب وائل غنيم النهارده علي صفحته إنه فيه مرشحين للرئاسه كانوا مترشحين بتزكيه أعضاء بمجلس الشعب اللي طلع غير دستوري !
ايه رأيكم بقي ؟
كوبايه شاي بالياسمين وكله يبقي تمام والحكم يطلع ليكون عنوان للحقيقه !!!
حد هيقول طب مهو لو نجح شفيق نطعن ...
هيقولوا له إحنا بطلنا نشرب شاي أصلا !
يبقي الحل فين ؟
التحرير
هتقول لي الشعب خلاص زهق ومش هيتعاطف معانا أقولك لأ ؟
الشعب كان خلاص بيقول باقي كام يوم ويجي رئيس ونخلص بقي ، جه الحكم هد اللي هما بنوه ودا إداهم إحباط
يعني بعد ما عملوا مجلس شعب وكانوا خلاص علي وشك رئيس جت السلطه دمرت أحلامهم فمش هيبقوا معاك ولا ضدك هيبقوا محتارين وهنا هيجي الدور الكبير علينا إننا نتنيل نتوحد وننسي بقي أم مصالحنا الضيقه ، هدف واحد ، مطلب واحد ، إيد واحده ، هيرجع الناس يتلموا حوالينا من تاني
ولو دا حصل هيمثل ضغط رهيب علي العسكر وغصب عن أبوهم هيستجيبوا بس بشرط ....
نتنيل نتوحد بقي !

هننضرب وهنموت وهنندفن في غياهب السجن الحربي وبناتنا الرجاله اللي هينزلوا مش هيكشفوا علي عذريتهم لأ ، دول ها .......
مأفور أنا صح ؟
أصل نسيت أقولكم إن دا كله هيكون ببركه قانون الضبطيه القضائيه اللي عملوه علشان عارفين إننا هنتظاهر بعد الحكم علشان معدش فيه قانون طوارئ ولا محاكمات عسكريه فيكون ده البديل الجاهز واللي متوضب من أول شهر 6 وما أعلنوش عنه في جريده الوقائع اللي دلوقتي علشان المجلس يكون إتحل وميقدرش يعترض عليه والسلطه التشريعيه هترجع تاني لحضن ماما !
يا جدعان دي ناس دماغها عالي ، دي فلوس تعبوا فيها يا إخوانا ، إنتوا بتتكلموا في ايه ؟!
أنا كنت نازل أجازه الإسبوع اللي فات فحجزت نفسي علشان أنزل الإسبوع ده وأحضر الإنتخابات وأيد مرسي بس خلاص بلا إنتخابات بلا بتنجان يلا بينا ع الميدان
أنا زيكم مخنوق والله بس ...
متفائل جدا ، بل في قمه تفاؤلي !!!

متفائل علشان هيا إسودت من كله ، إتقفلت من كل ناحيه وساعه ما دا بيحصل بيبقي دا عنوان الفرج
ضاقب فلما إستحكمت .....
حتي إذا ضاقت عليهم الأرض بما رحبت وضاقت عليهم أنفسهم ....
حتي إذا إستيئس الرسل ...

دائما ماكان يسبق النصر شديد اليأس حتي إذا ما فرجت نعلم بأنه الله الفارج
أنا شايف إن جوله الإعاده لا تعويل عليها ودلوقتي الميدان هو الحل بس مش عارف ليه حاسس إن الإخوان زي ما إتمسكوا بإنتخابات 2010 وإنتخابات الشعب ما بعد الثوره وأخدوا الخازوق في الإثنين لازم يتأكدوا إن التالته تابته في جوله الإعاده !
يارب يخيبوا ظني يارب

أنا مقاطع ، أنا مع التحرير حتي التحرير
من تاني :
الشعب يريد إسقاط النظام ويسقط يسقط حكم العسكر

الاخ العزيز محمود عبد الكريم
طبعا انا متضايق جدا جدا من المرارة اللى فى كلامك
طيب عايز تنزل التحرير
ايه المطالب المحددة ؟
يعنى لو هتفت يسقط يسقط حكم العسكر وخلاص ده مش هدف
ايه الشىء المحدد المطلوب ؟؟
مشكلة الثورة ان الشباب هتف يسقط النظام ماحددوش ايه بعد مايسقط النظام
عشان كده الثورة اتسرقت
مه اطيب تحياتى

أهلا بحضرتك أ/عادل
المطلب واضح ومحدد يا أستاذي وأنا ذكرته في نص موضوعي

إحنا دلوقتي أصبحنا نعاني من نفس نظام ما قبل 25 يناير

يبقي أنا باقول يسقط حكم العسكر
الشعب يريد إسقاط النظام
إسقاطا علي نفس النظام المباركي القديم والحالي المتمثل في حكم العسكر
طيب حضرتك بتسأل سقط النظام وبعدين ؟
أقولك دي الغلطه اللي وقعنا فيها بعد 11 فبراير اللي فات ودلوقتي خلاص إتعلمنا
ما بعد إسقاط النظام هو تسليم السلطه إلي مجلس رئاسي وليس فريق رئاسي ، مكون من أعلي 3 من مرشحي الثوره حصلوا علي أصوات ، وهم :
صباحي ، أبوالفتوح ، مرسي
يدار هذا المجلس بالقرار التوافقي فيما بينهم وليس له رئيس
يتولي هذا المجلس الرئاسي إداره المرحله الإنتقاليه وكأن اليوم هو 12 فبراير
دستور ، شعب ، رئيس ، محاكمه الفلول ، فلوسنا اللي بره ... إلخ
أي تفاصيل من النوعيه دي بقي نتكلم فيها بعدين بينا وبين بعض ، زيتنا في دقيقنا زي ما بيقولوا ، قوي مدنيه ثوريه مع بعضنا من غير عسكر
وبكدا تبقي الثوره حكمت لش حكم بدالها حد طلغ كداب وقاتل !
ويبقي لدا الثوره نجحت بجد

يبقي دلوقتي يسقط حكم العسكر (ثوره من جديد علي نظيف)
وما بعد إسقاطه محدد ، مجلس رئاسي
أطيب المني ،،،

الاخ العزيز
المشكلة فى حاجة واحدة : التفاهم والتوافق
يعنى هل الاسماء اللى قلت عليها ممكن يتفقوا مع بعض على كده
يعنى ممكن مرسى يقبل يبقى ثلث رئيس وابوالفتوح ثلث رئيس وصباحى ثلث رئيس ؟؟؟
عارف لو هم قبلوا ممكن لو حصل توافق شعبى عليهم المجلس العسكرى يقبل
لكن المشكلة اولا مش حايقبلوا وثلنيا ممكن بعد ما يقبلوا يتخانقوا يعنى بينهم وبين بعض مين فيهم حايبقى المعلم الكبير ؟؟ فاهم قصدى ؟
انا لما بتكلم اولا ببص كويس على المواضيع من 200 سنة فاتوا لحد امبارح
موضوع المجلس الرئاسى مش انطرح 500 مرة بس ماحصلش توافق بين اللى ممكن يبقوا رؤساء ؟
وجدير بالذكر ان حصلت قبل كده فى العراق ان بعد عبد الكريم قاسم حصل مجلس رئاسى بين اتنين صدام حسين واحمد حسن البكر
وبعد اسبوع ابتدت تحصل المشاكل بينهم يعنى مين فيهم البيج بوص وبعد شهر حصلت ان البكر ركب طيارة وماتعرفش ازاى الطيارة الهليوكوبتر وقت ومات
علما بأن الطيارات الهايوكوبتر عادة ( وبالذات لما تكون بتاعة الرئيس او اى حد كبير ) بتبقى طيارة محترمة ومتجربة وغير قابلة للأعطال اللى ممكن تعطل ويحصل لها حادث بمعنى ان الهليوكوبتر العادية كل مجموعة من الطيارات لها طاقم صيانة , اما طيارات الاكابر اوى بيبقى لكل طيارة واحد كذا طاقم صيانة يعنى مستحسل يبقى فيها الهوا طبعا .. ومن هنا لو حصل لها الاحتمال الواحد فى المليون دى هليوكبتر يعنى ممكن تعمل هبوط اضطرارى لكن لما تنفجر او تقع بيبقى اكيد حد ضربها .... والحاكة دى بالذات بتخلى اى حد ما يقبلش يدخل فى مجلس رئاسى
على فكرة انا بقول وجهة نظرى وانا للعلم محايد جدا جدا ... وبعدين عندى 62 سنة يعنى ماشى بس خايف ع البلد اللى حاتبقى بتاعتكم
مع اطيب تحياتى

أساسا التلاتة اللى انت قلت عليهم دول يا محمود لازم يتعاقبوا على الأقل أدبيا مننا .. لأنهم جزء من اللى حصل

ما حدش منهم قدر يتنازل عن طموحه عشان مصر .. رغم ان المشهد كان واضح جدا للجميع

و بعدين 12 فبراير اللى بتقول نرجعله كان لسه عناصر الحزب الوطنى مستخبيه فى جحورها مش عارفة ايه اللى جاى .. لكن النهاردة هما جاهزين بقوة و راجعين أبجح م الاول

كان لسه المجلس العسكرى بيعمل حساب للثوار و بيداديهم

كان الناس وقتها شعلة أمل

حاجات كتيير اتغيرت

لازم نعيد حسابتنا صح

بس رغم أى حاجة أحييك .. ما شاء الله عليك لسه عندك أمل

لف وأرجع تانى

الثوره لن تنتهى ألا بتحقيق أهدفها حتى ولو طال الأمد هكذا حكى لنا التاريخ

أ/عادل

هما فعلاً مش متوافقين دلوقتى ن بس لو حصل السيناريو اللى بقول عليه

فى الوقت ده الميدان هيمثل عليهم ضغط ولازم يقبلوا ، لإن ده مش هيكون

فريق رئاسى من رئيس ومساعدين ، دا هيكون مجلس رئاسى بالتوافق لإداره

المرحلة الإنتقاليه ، وحتى لو فيه حد فيهم مش موافق دلوقتى وقتها م هيقدر

يرفض لإن دا مطلب شعبى بناء على تصويت الشعب لهم واللى هيرفض وقتها

هيفتضح أمره إنه بيدور على مصلحه شخصيه ومش بيضحى لأجل البلد

مجلس رئاسى قراراته توافقيه من أجل إدارة المرحلة الإنتقاليه بس !!!

تحياتى إلك

أ/ فرحه

أنا موافق جداً على كلامك إنهم لازم يتعاقبوا ، بس دلوقتى إحنا فى وقت مينفعش فيه

العتاب ولا مين غلط ولا مين السبب فى اللى وصلنا له ، إحنا فى وقت تجميع قوتنا

وتوحيد مطلبنا علشان نعبر المرحلة المنيلة دى ، والعقاب الأدبى هوا إن التاريخ هيذكر

لكل واحد ما قدمه ، التاريخ لا ينسى أو يتغافل

أنا قلت إننا دلوقتى رجعنا ليوم 24 يناير يا أ/ فرحه ، فعلشان كدا بقول يبقى ثورة من تانى

ونرجع بقى لمطلب تغفلناه بعد 11 فبراير وهو المجلس الرئاسى ، أقصد أقول نفس الواقع

حداث دلوقتى وبأرجو تقوم ثورة ونوصل ليوم 12 فبراير بس بفرق إننا إتعلمنا من غلطنا

أطيب المنى ،،،

shaymaa kafaga كتب:: لف وأرجع تانى

الثوره لن تنتهى ألا بتحقيق أهدفها حتى ولو طال الأمد هكذا حكى لنا التاريخ

ويا سلام لما التاريخ يحكى

ويا سلام لما التاريخ يحكى

Very Happy

أولاً مبروك للإخــوان نجاح د/ المرسى ومبروك لكل قوى الثورة خساااااااااااااااااااره شفيق الكـ .. !!
ولكن .....
بعد الخوازيق اللى العسكر حطوها لنا فى الطريق دى ، الحل دلوقتى فى الشارع من تانى ، علشان :

1. نرفض الإعـــــــــــــلان الغير دستورى
2. علشان نطالب برجــــوع مجلس الشعب
3. علشان العسكر يسلمـــــــــــوا السلطـــه

كدا معتدش لهم حجه ، من النهارده باين أوى كدا إننا كل ما نبنى خطوه يرجعوا هما يهدموا
اللى قبلها علشان ما يسلموش ، كلنا ننزل بكره والمطلب واحد ؛ تسليم السلطة وإلغاء الإعلان
الدستورى الباطل ورجوع مجلس الشعب ولو حبكت وطلبت معاهم شويه قانون وشـــــــرعيه
يعملوا إستفتاء على وجود مجلس الشعب ، والشعب هو أعلى السلطــــــــــــات بنص الدستور

عزيز ى محمد
المشكلة الخطيرة دلوقتى ان زى مايكون فيه قدامك تليفزيون عليه عشر قنوات كل قناة منهم من بلديعنى مالهمش دعوة ببعض كل واحد بيتكلم فى ناحية والتسعة التانيين بيتكلموا فى حاجة تانية
الفرق بين ثورة 25 يناير وحركة 23 يوليو ان اللى عملوا الانقلاب كانوا من الجيش يعنى فى ايدهم كل القوة واستعملوها وخلصوا الموضوع فى ساعة 100% .. يعنى الدباات تحاصر القصر الملكى والاماكن الحيوية فى نفس الوقت البيان اللى اتذاع فى الإذاعة يعنى الموقف كان مبرمج ومضبوط بالشعرة لن اى غلطة كان ممكن الانقلاب يفشل
الحاجة دى مش موجودة فى ثورة 25 يناير لأن الشباب اللى عملوها مافيش فلا ايدهم قوة ( فاهم قوة يعنى ايه ؟ ) يعنى جهة واحدة تسيطر على كل حاجة زى حركة 23 .. وبالطبع هم قعدوا يهتوفا بس والثورة اتخطفت منهم
المشكلة ان الثورة ليها طريقتين يعنى الشعوب اللى زينا بتنجح فيها النوع بتاع 23 يوليو
انا النوع بتاع 25 يناير ده ينفع فى بلاد ديمقراطية اصلا والشعب جاهز للتفاعل وبيفهم اللى بيتقال يعنى مين البكاشين ومين اللى بيستغلوه ومين اللى ممكن يركب على الثورة وخلافه .. والنوع ده ينفع فى بلاد زى المانيا او فرنسا ... دلوقتى المطلوب اننا نبقى بعقلية البلاد دى
يعنى كل واحد يبقى عارف المصلحة فين ويتحدوا على الحاجة الصح
انت لما تنزل الميدان وتهتف ميلون مرة يسقط كذا حايصل ايه ؟؟؟ هل اللى انت عايزة يسقط ده حايتكسف على دمه من كلامك ويسقط او يرحل ؟؟؟
مش حاتصل لأن بقى ماحدشعندو دم اصلا محتاجين العين الحمرا ... وبس برضو ماتنساش العين الحمرا مش حاتنفع معاهم لأنهم اقوى
المشكلة ان بقى مالهاش حل واضح على الأقل عشان التفرقة اللى احنا فيها
بس من كلامكم انا حسيت انكم عايزين مجلس الشعب يرجع هو المجلس ده كان عاجبكم ؟؟؟؟
مع اطيب تحياتى

علي فكرة انحلال مجلس الشعب لعبة من المجلس العسكري لخرجهم بأمان
بعد ما خربواها

أ/عـــــــــــادل

تحياتـــــى أولاً

أنا هـــــــــــــــرد على النقاط اللى حضرتك ذكرتها فى رسائل سريعه

# حضرتك معجب بثورة 23 يوليو علشان كان معاها القوة اللى بتحسم

أنا مبهور بثورتنا لإن قوتها كانت فى إرادتها وسلاحها كان سلميه !!!

# حضرتك شايف إننا قعدنا نهتف وثورتنا فشلت ، أنا شايف إنها إنتكست

بس فى الأخر مينفعش غير إنها تنتصر !!!

# حضـــــــــــــــــرتك شايف إن شعبنا ما ينفعش معاه غير ثورة مسلحه معاها القوه ، أنا

شايف إن عظمه ثورتنا إن غيرت المفهوم ده ، إحنا بقينا شعب متحضر وبيفهم كويس أوى

وقدر يختار مرشحى الثورة بنسبه 70% ويعزل الفلول الملعونين فى الأول والأخر !!!!

# حضـــرتك شايف إن أنا لما أنزل الميدان وأهتف يسقط مفيش حاجه هتحصل ، أنا شايف

إن أنا عملت الصعب وسقطــــــــــــت مبارك بالهتاف ده وطول ما فيا نفس هفضل أهتف

وغصب عن أبوهم هيستجـــــــــــيبوا ، أى حد درس سياسه يعرف يعنى ايه معنى الضغط

الجماهيرى ، وأى حد جرب ده مش محتاج يدرسه ، أنا بقى درسته وجـــــــــــــــــربته !!!

# حضرتك مكنش عاجبك مجلس الشعــــــــــــــب ، ولا أنا ، بس أنا مؤمن جداً بما يلى :

لا يمنعنك من إنصاف أحداُ أنه خصمك !!!

مجلس الشعب مجلش شرعى منتخب أيأ كانت تركيبته ، المهم إن الشعب إختاره وأنا

بحترم إراده الشعب وحتى لو جاءت الفرصه سانحه كى أنال من هذا المجلس ، ضميرى

لا يسمح لى بان أفعل ، عفواً المبادىء لا تتجزأ !!!

ملحوظة أخيرة /

أحب أوضح لحضرتك ليه إحنا بنفكر(إحنا الشباب) بالطريقه دى وحضــــــرتك بعيد كل البعد

عن طريقه تفكيرنا ؟! ، ببساطه يا أستاذ فرق السن ، حضرتك لك قناعتاك وتجربتك فى الحياه

ونحن جيل خرج وتربى على عالم التكنولوجيا ، جيل ليس فى قاموسه كلمه مستحيل ، أضف

إلى هذا أننا شباب ، وهمه الشــــباب وطموحاتهم دائماً ما تسبق من يكبروهم سناً ، هذة سنه

الحياه ولم أسمع عن بلد تقدمت بخبره كبار رجالاته ، لكننى سمعت كثيراً عن بلاد نهض بها

شبابها ، نحن المستقبل يا سيدى ، ما تراه أنت صعب نراه نحن سهل ، وما تراه أنت

مستحيل نراه نحن ممكن ، وما تراه أنت أحلام نراه نحن طموح !!!!!!!!!!!!!!!!!!!!!!

إحنا اللى غنينا مهو يا الأمل يا مفيش بديل ، مستنى مننا ايه ؟

هننتصر يا أ/عادل برغم أنف فلول العالم كله ، وبرغم أنف كل المنافقين ومدعى الوصل بالثورة

هننتصر ، والله العظيم هننتصر وبكره أفكر حضرتك بس وقتها يا ريت ابقى اسمع منك إن إحنا

كنا صح !!!
Very Happy

marwa magdy كتب:: علي فكرة انحلال مجلس الشعب لعبة من المجلس العسكري لخرجهم بأمان
بعد ما خربواها

طبعاً يا مروة واضحه جداً ، واللى مش بيشوف من الغربال يبقى يستاهل اللى يجراله !!!

الاخ العزيز محمد
اول حاجة انا مش ضدكم يعنى دى آخر حاجة تفكر فيها
بس لو والدك موجود حتلاقيه بيفكر بنفس الطريقة
بمعنى نحب الواحد فى سكة اولها باين او نقطة بداية صحيحة
او بالمصطلحات الحديثة يوقل لك فلان بدء من الصفر
المشكلة فين الصفر ....
يعنى احنا دلوقتى يقالنا 17 شهر مش حاسين اننا ابتدينا الطريق الصح
يعنى لو تاجر عمال يخسر بعدين ابتدا يكسب .. مش مهم يكسب كتير فى الاول بس المهم انو ابتدا يكسب
المشكلة انى شايف دوائر مفرغة ... وبعدين الاسماء الثلاثة اللى انت قلت عليهم اتضح انهم بتوع كلام مالهمش قوة تأثير على صناع القرار
جميل جدا الدم الحامى بتاع الشباب بس لازم يكون مقترن بأكبر كمي من تشغيل المخ
انا ممكن اتفق معاك فى حاجات كتير لكن اختلف معاك فى مجلس الشعب .. ماينفعش فى دولة زى مصر ييجى مجلس اغلبية 85% من تيار واحد والتيار ده على الارض بيمثل كام من اغلبية الشعب ؟
وكل موضوع بيتكلموا فيه بيختلف تماما عن دماغ الشعب انا طبعا متابع جلسات مجلس الشعب من اول لحظة
يعنى ينفع عضو محترم بيقولوا لو دكتور يطالب بمنع اللغات من التعليم ؟؟ انت عارف دى معناها ايه ؟
يعنى البلد دى لو عايزة تبتدى واحد % اصلاح لازم ييجى مجلس جديد بيعبر عن جموع الشعب فعلا ويبقى فيه معارضة حقيقية مش معارضة اسمية
مصر دلوقتى 90 مليون على الاقل .. التيارات الدينية بتمثل كام منه ؟؟ يبقى التمثيل فى المجلس فى حدود العدد من الشعب
عارف ساعتها لما يكون عددهم مناسب حايحطوا من عندهم ناس بتتكلم حلو .. مش يحطوا عدد وخلاص .. ومايبقاش فى المجلس اغلبية كل ما تقول كلمة يقولوا اغلبية ولازم كلامهم يمشى .. فاكر مجلس فتحى سرور ؟؟؟؟ هو خرب البلد ليه عشان نس الحكاية
لو قال الشمس تطلع من الغرب بتوع الحزب الوطنى يرفعوا ايديهم ويقول موافقة من غير حتى مايشوف عدد الاصوات
بمعنى انه لما يعمل حاجة من غير ما يفكر حاتحصل ... لكن لو فيه مجلس متوازن هنا الكلمة الكويسة هى اللى حاتمشى يعنى انا لما المعارض بتاعى يقول ككلام كويس حوافق عليه لكن لما يخرف اكيد حاعترض
المشكلة الاخطر هى تكرار الاخطاء يعنى الدستورية الاولى فشلت ليه ؟ بسبب الاغلبية دى ومش معقول خمسة % من مجموع الوان الشعب تكتب لهم دستور على مزاج تيار واحد
والدستورية التانية الاعتراض عليها ليه ؟ لأنهم كرروا نفس الكلام بتاع الدستورية الاولى يعنى ايه ؟
انا للعلم كنت عايز مش يبطلوا المجلس كله ولكن المقاعد الفردية تبقى مستقلين زى ما القانون بيقول
مع اطيب تحاتى

عادل صموئيل كتب:: الاخ العزيز محمد

للتنويه فقط ، تصحيحاُ اسمى محمود عبدالكريم

عادل صموئيل كتب:: بس لو والدك موجود حتلاقيه بيفكر بنفس الطريقة

فعلاً كلام حضرتك صح ، وأنا مبقلش إن حضرتك لوحدك اللى مختلف معانا

لأ ، أنا قلت إن السبب هو فرق السن ، حضرتك مش هتعرف تفهم طريقه تغكيرنا

علشان فيه فرق فى الثقافات والخبرات وأيضاً فى طريقه التفكير ، بس الفرق بين

والدى او بين اى حد تانى وحضرتك او اى حد تانى هى إن نسبه إتفاقكم معانا أو

إختلافها بتختلف من شخص لأخـــر من حضراتكم ، ولكم كل الإحترام ولكن عليكم

واجب إعطاء الفرصه لغيركم ، وللمعلومه لقد أعطانى والدى الفرصه ، Very Happy

عادل صموئيل كتب:: جميل جدا الدم الحامى بتاع الشباب بس لازم يكون مقترن بأكبر كم من تشغيل المخ

أتفق مع جمله حضرتك وأضيف عليها ؛ وكم أكبر من الإراده !!!

عادل صموئيل كتب:: انا ممكن اتفق معاك فى حاجات كتير لكن اختلف معاك فى مجلس الشعب

والله دى وجهه نظرك يا أ/ عادل وإنت حر فيها ، بس أنا أقدر أقول لحــــضرتك حاجه

إن دى سنه أولى ديموقراطيه ومن سمات الديموقراطيه أنها تصحح نفسها بنفسها ، يعنى

لو اتدخلنا للتعديل فى إختيار الديموقراطيه بدعوى إن إختيارها خاطىء(وأنا موافق إن

المجلس ده تركيبته مش صحيحه) فدى هتكون ضربه قاضيه للديموقراطيه فى أول نبتها !

عايز ديموقراطيه بعد كدا ، يبقى لازم تزرع دلوقتى حتى لو مكنش فيه حصاد ، ما دام هتعمل

نفسك وصى فى أول مرة ، إعرف إن دى هتكون أول وأخر مرة لما يسمــى بالديموقراطيه

لأن هيجى غيرك بعد كدا بوجهه نظر أخرى وله السلطـــــــــه وسيتدخل بدعوى فشل إختيار

الديموقراطيه ، زمان قالوا لنا من جد وجد ومن زرع حصد ، إزرع النهــــارده علشان تحصد

بكره ، محدش بيزرع لحد ، ومحدش بيلاقى ديموقراطيه بالساااااااااااااااااااااااااااااااااااااااهل

أطيب المنى يا أستاذ عادل ،،،

تحية من كل قلبى للحوار الراقى والبناء من كل الأطراف ولا سيما أ/ محمود ، أ/ عادل ..

أنا بانظر للموضوع من زوايا مختلفة .. وقد أكون مخطئا !!

الثورة برغم كل ما يعيقها ويسرق منها .. الا انها تاخذ طريقها حتما .. لحكمة يعلمها ربى .. بدليل نزاهة الصناديق .. وإستمرار حالة الإحترام بين الجيش والشعب .. و ( الشرطة ) والشعب !! ..

ومن مكاسب الثورة أيضا .. إنك تقدر تتكلم فى أى مكان من غير ما توطى صوتك .. أو ينتابك أي نوع من الإرتياب فيمن حولك !!

المجلس العسكرى بيحط إعلانات دستورية مكملة لقناعته بعدم إكتمال نضج التيارات الموجوده وعنده الدليل

تاخر تشكيل التاسيسية !!

وممكن يكون خايف على البلد من ان تجرها أي حماسة غير محسوبة لحرب لا داعى لها .. وخصوصا الحالة الإقتصادية التى لا تخفى على أحد .

بصراحة أنا شايف أن من قال بأن مرشحى الثورة أرتكبوا خطأ فادح بعدم إتحادهم من البداية : هذا الرأى على درجة كبيرة من الصواب .. من وجهة نظري على الأقل ..

ودلوقتى سامحونى لو قلت مش حاقدر الف وأرجع تانى .. لازم أكمل .. وأحاول أثبت أن الوعى والنضج بيزيد

ولازم نتوحد خلف هدف واحد .. عشان المجلس العسكرى ما يبقاش له حجة .. ويفضل يتحكم فى البلد واللى فيها ..

تحياتى للجميع

أشكر مشاركتك المحترمه أ/سيد

إختلافنا فى الرأى يثرى المعرفه

أطـــيب المنى ،،،

» عمرو أديب تاني يتحدث تاني عن منى الشاذلي !
» " الشعب يريد اسقاط النظام " كلاكيت تاني مرة
» تاني حاجة هتعملها بعد ماتقول صوتك بكره..تيجي تحكلنا تجربتك كانت ازاي