احبائى
قد تستغربوا من العنوان هو مجنون شوية لكن خدوا الحكمة من افواه المجانين ,,
من ساعة ما الحكومة مسكت الحكم وانا اولا حاسس انى ممكن اقف فوق برج القاهرة وعايز اكلم واحد مسؤول فى البلد اولا بيسمع ويفهم بعدين يحل ويربط ... مفيش , حسيت ان الحاجة الوحيدة اللى ماشية فى البلد معادللات علم الجبر , فى علم الجبر فيه معادلات
مثلا اثبت ان س2 + ص 2 + 13 = صفر
او س ع + 12 ص ع + 12 = صفر
المهم عشان ما ادوشكوش يعنى كل اللى بيحصل زى الجبر
يعنى قانون + قانون = صفر
اجتماع + ندوة + قرار = صفر يعنى من كا شهر مش بناخد غير اصفار
لما طلع قانون البلطجة والاحكام المغلظة كل الناس فالت اكيد البلطجية حا يستخبوا تحت الارض , وكانت النتيجة العكس التنفيذ صفر , والبلطجية اصبحوا اقوى بكتير , قانون تجريم حمل وحيازة السلاح الى 25 سنة , ولا حصل حاجة و والسلاح الابيض والنارى بقى اكتر من السكاكين اللى عندنا فى المطبخ , كل حاجة فاشلة وبننهار كل يوم حتة اكبر , كان فيه فيلم للمرحوم علاء ولى الدين اسمه الناظر , واحد مسكه رنه علقة قال له كله ضرب مفيش شتيمة , وانا بقول للحكومة كله جبر مفيش كيمياء ؟
والكيميا معادلات لكن بتطلع ناتج مش صفر زى الجبر , يعنى لازم يطلع ناتج
اكسجسن + ايدروجين = ماء
صوديوم + كلور = كلوريد صوديوم اللى هو ملح الطعام
يعنى حاجة + حاجة يديك حتى ورنيش جزم , أو زفت من بتاع الشارع المهم ان فيه ناتج
بقول للحكومة وحياة ابوكم كفاية جبر وادونا شوية كيميا .. نفسنا نشوف منكم حاجة .
فيه موضوع تانى من المواضيع اللى ماحدش مقتنع انها حتاخد سنين , متخيلين انهم لو فضلوا معتصمين اسبوع حيصدر حكم الاعدام على اللى نفسه انه يتعدم ... ولو حد بيفهم فى القانون يشرح لهم ان العملية دى فى القانون المصرى تاخد سنوات ... عامل زى عربية السرعة القصوى فيها واحد كيلو فى الساعة , والمثل الاعلى عنده الزحلفة ...
المحاكمة بتاع مبارك اول جلسة اتأجلت كذا شهر والجلسة الجاية حاتتأجل ست شهور وهكذا
التأجيل ده فكرنى بعم حجا , كان بيعيش فى عصر الطاغية تيمور لنك ويحكى ان جحا راح يزور الحاكم ده لقاه اشترى جمار جميل جدا وقاعد يفتخر بجماله , حجا حب يهبش من الحاكم شوية فلوس قال له انا مستعد اعلم الحمار ده القراءة فى خلال عشر سنوات بس ادينى الف دينار , الحاكم كان اهبل قاله ماشى بس انت عارف اللى يكذب عليا رقبته بتطير , جحا قال وانا حكذب عليك برضه يا ولى النعم ؟
وهو خارج واحد صاحبه قال له : انت اتجننت ياراجل انت مش عارف ان رقبتك حاتطير ؟ قال له اولا انا اخدت الاف دينار , ثانيا بعد عشر سنين حلنى بقى . يعنى ام يكون الحمار مات او تيمورلنك مات او انا اموت .. هم بالنسبة لمبارك مستنيين لما تيجى من فوق عشان تعفيهم من الاحراج ... والاخ الفاضل فريد الديب والمتخصص فى الدفاع عن الجواسيس وماشابه مش حايتأخر ممكن يخلى القضية تطول عشرين سنة وابقوا قابلونى .
نفسى ابلغ رسالة لأهالى الشهداء ... العملية فيها لخبطة ومعقدة جداً محتاجة ضبط نفس اكتر , يعنى بتوع السويس واحد من اهالى الشهداء يقول لوالضابط فلان ما اتعدمش فورا انا حاقتله بإيدى وعلى الهوا .. والباقى عايزين يقطعوا قناة السويس , والعصبية اللى هم فيها دى هى اللى دخلت عليهم ناس استغلوهم وعملوا احدادث الثلاثاء الماضى الدامية , والناس الى اتدمرت سياراتهم واتحرقت محلاتهم ذنبهم ايه ؟
الناس اللى ماتوا فى احداث الثورة قسمين الاول شهداء وفيه عدد كمان بلطجية اتقتلوا وهم بيقتحموا اقسام الشرطة عشان يسرقوا السلاح ويحرقوها ودول ماينفعش يتحسبوا شهداء , المشكلة ان قرايب البلطجية عايزين يحسبوهم على الشهداء بالعافية , وفيه شىء خطير , ان شهداء التحرير والشباب اللى شافهم وهم بيستشهدوا ماشوفوش مين اللى بيضربهم وحددوه بالإسم , لأن اللى اطلق النار مانزلش الميدان بشخصه وإلا كان المتظاهرين قطعوه زى ما ضربوا بتوع موقعة الجمل , ولكن كان الضرب من مكان بعيد وهنا مايقدروش يحددوا التهمة على حد معين , إلا وزير الداخلية شخصيا , اما مدير الامن او اللى بعده ممكن يهربوا من التهمة ويقولوا اوامر ... لما نيجى للأسر واللى بتشتكى ضباط محددين بالإسم , دول كانوا فى محيط الاقسام ,وانتم فاكرين امين الشرطة الهارب اللى اتحكم عليه بالإعدام , لو لا ان فيه كذا فيديو بيبن انه بيضرب على ناس مش بتتهجم على القسم وعزل من السلاح لما اتحكم عليه بالإعدام , وكل الضباط لو مفيش دليل زى ده مع الاهالى حتكون القضايا صعبة جدا وتحتاج لوقت كبير , وممكن جدا يطلعوا براءة لو المحامين بتوعهم ركزوا انهم كانوا بيدافعوا عن اقسام الشرطة من البلطجية ولاحظوا ان عدد كبير من الشرطة مات فى نفس الاحداث مين قتلهم ؟
من كلامى يظهر ان القضايا معقدة جدا , والقاضى بيحكم من الورق اللى قدامه , والورق اكيد فيه كمية عك للصبح وتزوير تقارير تشريحية من الطب الشرعى , يعنى العملية محتاجة سنوات , ولما نقف دلوقتى وعايزين الاحكام فورا , ممكن السلق ده القضايا كلها تطلع فشنك ,
مع اطيب تحياتى
النوع
موضوع: الحكومة ومادة الجبر 
الثلاثاء يوليو 12, 2011 12:01 am
