عزيزى الاخ محمود العياط
انت لو قرأت فى علم نفس الحيوان لوجدت الاعاجيب
احنا مشكلتنا اننا بنتعامل مع الحيوان بطريقة خاطئة .. يعنى مثلا العربجى ينزل ضرب بالكرباج فى الحمار او الحصان وهو مش فاهم ان الحيوان ده عنده مخ وبيفهم يعنى لما يعاشرك اسبوعين تلاثة حتلاقيه بيفهم انت عايز ايه وبيحفظ مشاويرك .. والحمار من كتر الضرب ربنا خلق له حاجة ان جتته بتنحس يعنى مكان الضرب الاول بيؤلم الحيوان بعد كده الجلد بيموت والحيوان مش بيحس
انت لو ليك صديق دكتور بيطرى من بتوع مصر الجديدة او الزمالك تلاقى 99% من زبائنة من القطط والكلاب بييجو عنده لأمراض نفسية مش امراض عضوية بمعنى ان الجيوان المدلل بيتطعم مرتين او 3 فى السنة ضد جميع الامراض التى ممكن يخطر على بالها تصيبه ومش بتصيبه لأنه اولا مش بيخرج من البيت ويتعرض للعدوى من حيوان آخر وثانيا انو بياكل اكل مخصوص
الامراض النفسية ان صاحبة الكلب او القط تحس انو من يومين مش بيبتسم او بيتدلع او اكلته مش اللى هى
ولو دخلت الى عالم القطط لوجدت الاعاجيب ... يعنى فيه قط عندك فى البيت يسؤق اللحمة وقط تانى بيحرس لك اللحمة
يعنى هو بياكل حتة جى الوجبة بتاعته وممكن يقعد جنب طبق اللحمة يحرسه لحد مايبرد لحسن قط تانى طفس ييجى يسرق منو
وفيه قطط طفسة يعنى مرة زمان كان صابح عيد ميلادى وامى الله يرحمها بالليل اوى سلقت دكرين بط وطلعتهم من الحلة عشان يبردوا كان عندنا قطين اكلو دكرين البط وصحينا الصبح لقيناهم ميتين من التخمة
والحديث عن القط بسبع ارواح مش سحر ولا شعوذة ولكن حسب الخواص اللى ربنا حطها فى تركيب القط الجسمانى
يعنى لو كلب وقع من سابع دور حايتهبد فى الارض ويتكسر لكن لو قط وقع من سابع دور عنده خاصية انه فى مسافة السقوط بعمل حركة زى الباراشوت بتفرمل السرعة وبيعدل نفسه بحيث ينزل بمنتهى الخفة على رجليه ولما بيلمس الارض عنده خاصية انو بيبقى وزن الريشة بحيث رجلليه ماتتكسرش من الصدمة
نفس الحكاية عند انمور وهى من نفس الفصيلة شوف رشاقة حجمها فى تسلق الاشجار زى القرود مع تقل وزنه وكبر حجمه
والعلاقة بين القط والانسان دى علاقة ودية جدا من قديم الازل يعنى ممكن القط او الكلب وصاحبه بيقعدوا مع بعض صامتين ساعات لكن بينهم حوار يعنى كل واحد منهم بيفضفض فى سره ... يعنى انت فى صمتك بتشتكى لنفسكبتتخيل القط بيسمعك وانت بتحب بنت الجيران وهى مش معبراك والقط فى صمته بيفكر فى ورك فرخة نفسه فيه ... ومع ان الحوارين فى اتجاهين مختلفين بس تحس ان فيه كلام صامت
زمان ايام الفراعنة كان القطط ليها شغل جامد اوى مع الكهنة وتلاقيها يمكن من اكثر الحيوانات المرسومة على الجدران وكانت لما تموت بتتحنط ولها مقابر خاصة بالقطط
على فكرة قبل ما انسى فاكر الكلام عن السلعوة ... انا من وجهة نظرى انا بتنتمى بطريقة ما للفصيلة القطيية اكتر من فصيلة الكلاب والذئاب
لسبب انت لو فيه فى الحتة اللى انت ساكن فيها كلاب تلاقى الكلاب بالليل بتعمل مؤتمرات يعنى تسمع هوهوة بشكل ملحوظ ,, اما القطط بنونو لما تتعرض للإعتداء او تكون فى خطر ..الحاجة التانية ان الكلاب حجمها تقيل .. يعنى الكلب ممكن ساعات يستحلى عربية واقفة يحب يطلع فوق سقفها يدمرها لكن القطط وزنها خفيف وحركتها رشيقة .. الإستنتتاج ده انا استنحته كمان لأن الذئاب بالليل بتعوى والثعالب بتعمل اصوات تخليك تحس ان فيه حيوانات من دى .. عندك فى الغابة تعرف ان فيه اسد قريب انو بيزأر اما النمور التى تنتمى للفصيلة القطية بتستخبى فوق الشجر بدون صوت وتنقض على الفرائس ... السلعوة انا بشبهها بمترو الانفاق يعنى فجأة تلاقيه وقف قدامك غير القطار العادى بيكسر الدنيا وهو جاى من بعيد واخدل المحطة معلش انا آسف للإطالة لأنى مش عايز اتكلم فى السياسة اليومين دول
وطبعا الله اعلم مع اطيب تحياتى
النوع
موضوع: عندما تكلم القط 
الخميس يونيو 28, 2012 7:48 pm
