إيه رأيكم في الكلام ده كمان؟

صرّح د. سعد أستاذ فقه مقارن وهو أحد شيوخ السلفية يوم الاثنين ببرنامج "سهراية مصرية" والمذاع على القناة الأولى بالتلفزيون الرسمي للدولة: بأنه على النصارى أن يتسامحوا ويفوتوا الفرصة على السلفيين، مستكملاً: وسيقف معكم عقلاء المسلمين ولكن تسامحوا حتى لا نحرق الوطن!!
وأشار أن شريعة النصارى قائمة على المحبة وأعلى مبدأ عندهم هو "الله محبة" واستشهد قائلاً: عيسى عليه السلام أمرهم "مَن لطمك على خدك الأيمن فحوّل له الآخر".
وقال د. إن السلفية هي أرقى جماعة في اسمها ، فهم يريدون أن نتبع السلف الصالح، وبرّأ الجماعة السلفية من ارتكاب أي أعمال عنف نافيًا أن تكون هي المسئولة عن تلك الأحداث الطائفية منها قطع أذن قبطي بقنا أو هدم كنيسة أطفيح.
وأرجع د. المشكلة بالاحتقان الطائفي إلى الكنيسة حيث تعنتها في إظهار بعض المتحولين للإسلام واحتجازهم –على حد قوله-!!
وعلى الجانب الآخر أوضح الشيخ خالد الجندي أن ما يحدث من فتن هو بأيادي خارجية تريد العبث بأمن الوطن واستقراره، وأن النظام السابق هو مَن استخدم فزاعة الإخوان المسلميين والسلفيين.
وأوضح الجندي بأنه لابد من الوقوف جوارًا مع المسيحيين حتى لا يحترق الوطن، وأي إنسان يملك ذرة من الإنسانية عليه تحريم الإتيان بمثل هذه الأعمال التخريبية.
متساءلاً إن كان الله ذاته يترك أصحاب الديانات المختلفة دون أن يدمرهم أو يُفني الملحدين، فكيف لنا كبشر أن نبيح قتل الآمنين؟! واستشهد بآية من القرآن الكريم: ولو شاء ربكم لجعلكم أمة واحدة.وقال الجندي أن المسيحيين كافرين ولكن عليهم ألا يسيئوا الفهم حين يلقبهم القرآن بالكافرين، فالكافرين هنا المقصود بها أنهم لا يؤمنوا بعقيدتنا الإسلامية ولكنهم مؤمنون بعقيدة أخرى.وأختتم أن المسيحيين هم جماعة من المسالمين ولا يجوز مهاجمتهم شرعًا لأن الله نهانا عن قتل ومهاجمة المسالمين آيًا كان دينهم أو معتقدهم.
وفي سياق آخر أكد هاني عزيز أن مزاعم السلفيين بإخفاء سيدات أو أسلحة داخل الكنائس هي إشاعات لا أساس لها من الصحة.
وأضاف أن 99% من المتحولين للإسلام لم يقرأوا القرآن بل يذهبون للإسلام لأغراض جنسية أو مادية.
وحول مزاعم احتجاز مسيحيين داخل الكنائس أجاب عزيز: أتحدى أن يثبت أحدكم أن الكنيسة تحتجز أيًا من رعاياها داخلها لأي سببًا كان، وإن وجدتم هذا حاكموني أنا وأعدموني في التحرير. وأيضًا مزاعم وجود أسلحة.
نافيًا عزيز أنه مستشار للبابا قائلاً: لست مستشار لقداسة البابا والبابا ليس له أي مستشارين أو متحدثين باسمه.
وأختتم عزيز: ما حدث بإمبابة هو منتهى الخطورة ويجب وجود رادع قانوني حتى لا يتكرر المشهد.
وأختتم د. سعد أستاذ الفقه المقارن بقوله: نظرية المؤامرة هي نظرية فرضية لإراحة الضمير ، وأنا أصدر الآن فتوى للمتحولين في العقائد من الطرفين بألا يعلنوا تحوّلهم وذلك وئدًا للفتنة، ومَن يسلم أو يتنصر فليفعل ذلك بينه وبين ربه والله سيتقبل.
وأختتم الشيخ خالد الجندي: مخزي أن يتحول الشيخ إلى مرشد للحكومة ومخزي أن تحتجز الكنيسة مواطنين بداخلها.
جدير بالذكر أن مقدم البرنامج "علاء أمين" كان يلقب المسيحيين طوال الحلقة بالنصارى وكذا الضيوف د. سعد والشيخ خالد الجندي!!

احنا علي العموم مسامحين لكن اللي حرقوا بيت من بيوت ربنا وحرقوا معاه قلب كل قبطي في مصر ربنا هايتصرف معاهم ومش هايسيبهم
وهايظهر الحق

واضح جدا من موضوعات حضرتك كمية التسامح و المحبة !!!

و بس توضيح و خلينا نجيب م الاخر فى الكلام اللى حضرتك ملوناه بالازرق .. عمرنا ما هنغير قرآننا عشان نرضى حد و الكلام اللى حضرتك اشرتى له فى رد عليكى "المقصود بها أنهم لا يؤمنوا بعقيدتنا الإسلامية ولكنهم مؤمنون بعقيدة أخرى " و انا هسأل حضرتك .. المسلمين فى نظر المسيحين ايه ؟؟

طبعا المناقشة فى الكلام ده هتجرنا للتعمق فى مواضيع دينية و ده عكس قوانين المنتدى ... كمان هو مش وقته

نصيحتى لحضرتك .. جربى أن تعرفى الآخر ..

المسلمين في نظر المسيحيين مش كفار لأنهم بيعبدوا ربنا
الكافر ده هو اللي مايعرفش ربنا وهو اللي مش مؤمن بوجود الله
لكن باقي الإيمانيات المختلفة بيننا ربنا وحده هو اللي يحاسب كل واحد
وماعتقدش ان حضرتك تقبلي ان يطلع واحد مسيحي أو أي قسيس ويقول احنا انجيلنا بيقول ان المسلمين كفار يعنى المفروض أي كلام بيثير حفيظة أي طرف آخر ماكانش يتقال خصوصا في هذه الظروف
وانا موضوعاتى ماكانش فيها أي شئ ضد التسامح ومش معنى اني بعرض بعض الأسباب اللي أدت للكارثة اللي مصر فيها عشان نقدر نحلها يبقي انا ماعنديش تسامح
لكن فكرة قبول الآخر فبالنسبة لي عمرى ما حاسبت حد علي إيمانه
وجميع أصدقائي والذين أئتمنهم علي أسراري من المسلمين ومافيش مرة حصل خلاف بينى ومابينهم بسبب الدين
وعلي فكرة قلب كل قبطى في مصر اتحرق مع حرق كنيسة امبابة واتحرق قبل كدة مع هدم كنيسة أطفيح اللي ماتحاسبش فيها ولا واحد
وكل اللي أقدر أقوله لحضرتك ان ربنا وحده أعلم ما في القلوب
وبطلب من ربنا انه يعزى الجميع في فقدان ذويهم سواء كانوا مسلمين أو مسيحيين

نرجو من الجميع عدم الدخول في العقائد الدينية

اولا نحن كلنا في النهاية مصرين
ثانيا يقول الله عز وجل (لكم دينكم ولي دين)
ثالثا ارجوا وادعو الله عز وجل ان تعبر مصر الي بر الامان وان نتوقف عن اشاعة الفتن الطائفية
رابعا الدولة لاتنجح ولا يستقر امنها الا بتكاتف كل القوي الشعبية (بالشعب بالشرطة بالجيش تحيا مصر)

الحقيقة انا مش حابة اتكلم فى جزئية العقائد لأن ده ضد قوانين المنتدى و حتى لو مش ضده الوقت ده ما ينفعش فيه اثارة الحوارات دى .. و للاسف حضرتك اللى فتحتى الموضوع

بالنسبة لاول جملة فى مشاركتى السابقة الحقيقة انا بعتذر عنها لانها اكيد ضايقتك .. بس برده اتمنى من حضرتك يا دكتورة ننوسة انك تراجعى مشاركاتك هتلاقى انك بتعرضى الاسباب اللى ادت للمشكلة من وجهة نظر واحدة بس و فى نفس الوقت بتكذبى اى خبر او كلام يكون فيه مجرد تلميح انه ممكن يكون من اسباب اللى حصل حد قبطى ... و ده فى حد ذاته شئ مستفز لانه غير عادل ـ على الاقل بالنسبة لى

فى النهاية أكيد كلنا يهمنا فى الاول و الاخر مصر .. يا رب نقدر نعدى الازمة دى على خير

ربنا يحفظ مصر و يجنبنا شرور الفتن

كامل احترامى للجميع

بصي يا أ.فرحة أنا عارفة ومؤمنة ان الحقيقة بتبقي في أوقات كتير مستفزة وموجعة بس صدقينى انا مش برفض اي شبهة اتهام للاقباط ولكن بستنكر ان كل مرة يحصل فيها اعتداء علي أقباط أو علي كنيسة لازم يخترعوله مبرر ومافيش حادثة اعتداء علي أقباط واحدة حصل فيها حكم عادل حتى حادثة نجع حمادى باقي المتهمين أخدوا براءة والكمونى أخد إعدام لأنه قتل الجندى المسلم وعلي فكرة ده مش كلامى ده اللي كان مكتوب في حيثيات الحكم وقبلها حادثة الكشح وبعدها حادثة القديسين اللي اتقفل ملفها تماما علي أساس انها كانت قبل الثورة والناس اللي تناثرت أشلاءهم مش مهم وبعدين حادثة كنيسة صول
واحنا مش عاوزين غير العدل ولو العدل شايف ان فيه أي مبرر لإحراق كنيسة مفيش مشكلة
وانا شايفة ان أهم حاجة المحرضين علي اقتحام وحرق الكنائس هم اللي يتحاسبوا وإلا هايفضل فيه إحساس بالظلم عند جميع الأقباط والمسلمين العقلاء أيضا
وكل الإحترام لرأي حضرتك

الحقيقة مستفزة لمن يرتضيها على هواه فقط

بالنسبة لكل الاحداث اللى حضرتك ذكرتيها ما حدش ابدا يرضى بيها .. كلنا متفقين على كده و بنطالب بتحقيق العدل فيها .. هو ده اللى يرضى ربنا سبحانه و تعالى

بس اللى قبل الثورة غير .. لان كلنا كان بيقع علينا ظلم .. و اللى كان بيحصل للاقباط ده ممكن كان يكون شئ مقصود عشان يفضلهم كارت يلعبوا بيه

و مش معنى كلامى اننا نقفل نهائى ملفات الظلم قبل الثورة لا بالعكس .. بالقانون و فى ظل مناخ حر بعد 25 يناير لن يضيع حق ورائه مطالب

بالنسبة لقضية الكمونى حقيقى اخر شئ عرفته فيها و ظنيت انه انتصار للحق حكم الاعدام .. بس اكيد لا حضرتك و لا انا قرينا حيثيات الحكم عشان نقول انه بس اتحكم عليه لانه قتل مسلم .. افتكر الكلام ده مش منطقى انه يتكتب فى حيثيات حكم .. و فى كلام كتير بيتكتب و يتقال فى وسائل الاعلام و المواقع بيكون مبالغ فيه أو مش صحيح

.. عموما ما حدش فينا يختلف ان العدل هو المطلب الاساسى و المرضى لنا جميعا .. بس افتكر الفترة دى لازم كلنا يلتزم و يرتضى التهدئة و الحكمة حتى نستطيع أن نقيم العدل

ربنا يحفظ مصر و يجنبنا شرور الفتن

كامل احترامى لحضرتك و للجميع

مسيحي + مسلم = مصر

صح يا أ.أمير والمعادلة دى معناها ان ماينفعش الاستغناء عن أحد أطراف المعادلة
يعنى الاتنين مكملين لبعض بس ياريت كل الناس تتيقن من ذلك

ممكن سؤال للجميع

كلنا على المستوى الشخصى كمسلمين لنا اصدقاء و جيران مسيحيين .. و كمسيحييين لنا اصدقاء و جيران مسلمين ...
لو اى واحد منكم تذكر فى يوم من الايام انه تعارك و تشاجر مع جاره ده على اساس اختلاف العقيده يقولى
لان معظم من حولى و هم من مدن مصريه مختلفه و طبقات مختلفه و مهن مختلفه لم يحدث معهم ذلك
فلماذا اذن الشحناء و البغضاء ؟؟
و احداث الاعتداء على كنائس و اختلاق الفتن كلنا على يقين انها كانت من تدبير النظام السابق و اجهزته حتى يظل الاحساس بعدم الامان و اللجوء لقانون الطوارئ ضرورى
و حتى بعد الثوره معظمنا يعلم ان من ضاعت سطوتهم و سلطتهم بالثوره يريدون افساد البلد حتى يرجعوا مرة اخرى
يا ريت نفكر فى كلمنا كويس اوى اوى اوى قبل ما نقوله علشان ما نجرحش بعض و بعدها نزود الجرح ده و بعدها نضغط عليه ثم يحدث الانفجار الذى سيطال الكل بلا تفريق و لا هوان
شكرا

شكرا جزيلا د.عصام

» إيه رأيكم في الكلام ده؟
» إيه رأيكم في الفيديو ده؟
» خلي مشاركاتك انت كمان تتعرض يوم الاربع في فقرة الانترنت ..فقط لاعضاء موقعنا
» ما رأيكم أن تضحك بعضنا البعض بلم كل النكت و الطرائف العربية هنا؟
» هات ودنك واسمع الكلام