إيه رأيكم في الفيديو ده؟

ده فيديو للدكتور محمد سليم العوا لما اتسأل هاترشح نفسك رئيس للجمهورية ولا لأ

أنا شخصياً كنت متفاجىء من ترشحه لرئاسه الجمهورية ، بس الفيديو ده مش إدانه جامده له ولا حاجه

الراجل دى كنت وجهه نظره قبل كده ، ايه المشكله لما يغيــــرها ؟

رجل الشارع بقى يحكم عليه ؛ هل طامع فى السلطة ؟

أو قاصد يخدم البلد ؟

الشعب هو من سيحكم فى النهاية ، ولا راد لحكمه إلا الله

أتمنى أن تكون المنافسه شرسه ومحترمه وأنيقه ، أتمنى

كل الإحترام لرأيك أ.محمود ولكن هو بيقول في الفيديو انه مايقدرش يدير بلد ده أولا
ثانيا د.سليم العوا كدة دايما بيغير كلامه يعنى قبل كدة قال ان الكنائس مليئة بالأسلحة وعمل فتنة وبعد كدة قال ان الكنائس مافيهاش أسلحة وهنا قال أنا مش هارشح نفسي وبعدين رجع رشح نفسه كدة بقي فين المصداقية؟

بصى يا دكتورة أنا مش هاخش فى تفاصيل موضوع الكنائس ده لأنه الراجل وضح وجهه نظره فيه

فى برنامج العاشرة وقتها وأيضاً تم إستضافه أ/ سمير مرقص لو تذكرى ، ود/ العوا (ومن غير تعصب والله)

تاريخه وفكره وكتبه تشهد له بأنه كان دائماً ينصف الأقباط ويدافع عن حقوقهم من منطلق أن الإسلام يأمرنا بهذا

ومعظم المفكرين الاقباط شهدوا بهذا ، من أول أ/ سعد هجرص مروراً بـ د رفيق حبيب ، و أ / سمير مرقص

وغيرهم الكثير ، بل وفى تقديرى أنه ما من أى عالم مفكر مسلم أنصف الأقباط ودافع عن حقوقهم كما فعل هو

ولك أن تسألى عنه المفكرين الأقباط وكذلك المعتدلين لديكم من القساوسة ، ولا تقيسى على حلقه صورت وشوهت

بشكل متعمد ، وهذة الحلقة الخاصة بموضوع الكنائس هذة موجودة فى أرشيف قناة الجزيرة لمن يريد التحقق

مما قاله الرجل ، أما بخصوص كلامه فى السابق والحالى فالذى يحكم عليه هو الشعب ، وفى تقديرى كما ذكرت

أنه ليس بالحجه الدامغه على عدم قدرته على رئاسه البلد وإن كنت شخصياً لن أنتخبه فى المقام الأول ، بل هناك

قبله شخص أو إثنين على الأرجح بالنسبة لى ، أنا بس حبيت أوضح لك لو أن الاقباط متخوفون من الإسلاميين

فسيلجأوا إلى هذا الرجل ليصوتوا له ، لأن تاريخه الأقباط يعرفونه جيداً ، وأهلاً بحضرتك متفقه أو مختلفه Smile

الدكتورة / ننوسه

أجابة سؤالك ستجدبنها فى مشاهدة حديث الدكتور الكبير والعالم الجليل الدكتور / محمد سليم العوا مع منى الشاذلى عندما استضافته كمرشح لمنصب الرئاسة فى حلقة يوم الأحد الموافق 19/6/ 2011 والتى شرح فيها الأسباب التى دفعته للترشح لمنصب الرئاسة وحديثه عن المشروع الأسلامى الحضارى , أما فيما يتعلق بموضوع الأسلحة بالكنائس فراجعى جيدا حديثه بقناة الجزيرة عن هذا الموضوع فالدكتور الجليل ربط بين حادثة فى هذا الوقت وهى ضبط أحد ى السفن المحملة بالأسلحة والتى تبين انها تخص أحد الأشخاص (قسيس أوشماس) وثيقى الصلة بالكنيسة وربط بين هذه الحادثة وبين مايتداوله عموم الناس من أن الكنائس تبنى كالقلاع وأن بها مخازن للأسلحة دون أن يؤكد هذا القول بل طلب من السلطات أن تؤكد أوتنفى هذا الخبر خاصة وأن الكنائس عادة ماتكون مغلقة على شعب الكنيسة ولاتخضع للتفتيش كما تخضع المساجد .

وبما انك تتحدثين عن الفتنة هل أجد عند موقع المسيحى الحر المنقول عنه الفديو الخاص بالدكتور الجليل / محمد سليم العوا هل أجد الفديو الخاص بالأنبا بيشوى الذى ذكر فيه أن المسلمين ضيوف على أرض مصر وأن اصحاب مصر الأصليين هم المسيحيين
بالله عليك اعرضى لنا هذا الفديو لنعرف من أين تأتى الفتنة .

لأ أنا مش معاكى أ/ أروى إننا نبحث عما يجمعنا ولا يفرقنا ، وإذا كان هناك بعض الشطط لدى البعض

فهو حالة لا يجوز تعميمها على الكل ، ولا داعى مطلقاً للتنابز بالفيديوهات فنحن لسنا فى حاله سجال

بل نحن نبحث عمن يجمع ولا يفرق ولا نتغاضى ونغض الطرف عن بعض من شططــــوا هنا او هناك

بل من الواجب الأخذ على أيديهم وعدم تركهم يعيسون فى الأرض تفريقا ، هذة عقيدتى ، أطيب المنى ،،،

أعتقد يا محمود أن هذا الكلام يجب أن يوجه للدكتورة التى عرضت الفديو وتعليقها عليه بإشارتها لحديث الدكتور الكبير/ محمد سليم العوا لقناة الجزيرة وعلقت قائلة :
د.سليم العوا كدة دايما بيغير كلامه يعنى قبل كدة قال ان الكنائس مليئة بالأسلحة وعمل فتنة

وبالتالى أنا طلبت عرض فديو الأنبا بيشوى لكى نعرف من يصنع الفتنة
ملاحظة : حديث الأنبا بيشوى عن أن المسلمين ضيوف على أرض مصر كان سابقا لحديث الدكتور / العوا على قناة الجزيرة

طب ما كل طرف يجى على نفسه وما يفحرش ورا التانى

إبدأ بنفسك وبلاش نقول أصل التانى قال كذا ، مادام اللى

قال مش هو الحالة العامة ، أليس كذلك ؟؟؟

أ. أروي أولا بالنسبة للفيديو بتاع الأنبا بيشوي هو موجود وانا أصلا لا أتفق بأي حال من الأحوال مع كلام الأنبا بيشوي ولا أتفق معه في كثير من آرائه وبعدين الرد علي كلام الانبا بيشوي مايكونش ان فيه أسلحة في الكنائس وانا بقول ان الموضوع ده عمل فتنة لأن من ساعتها لحد الآن مازال الكلام ده بيرددوه ناس كتير ان الكنائس فيها أسلحة
والفيديو ده انا مش جايباه من صوت المسيحي الحر انا جايباه من اليوتيوب ممكن يكون الموقع هو اللي حاطه لكن انا جايباه من اليوتيوب
وانا برفض لهجة حضرتك في الكلام لأن حضرتك دايما بتتكلمى عن المسيحيين علي انهم مش مواطنين زى ما انتقضتى قبل كدة مدام منى الشاذلي انها بتلبس اسود في حوادث المسيحيين وبقول لحضرتك اننا جميعا مواطنين مصريين
واذا كنت اتكلمت عن الدكتور سليم العوا فمن حقي لأنه واحد مرشح للرئاسة يعنى ممكن يحكمنا وانا فيه مواصفات معينة حطاها لرئيس الجمهورية
وعلي كل الأحوال كل الاحترام لرأي حضرتك
وأشكرك شكرا جزيلا أ.محمود لرأي حضرتك الغاية في الاحترام

نقطة نظام لو سمحتم ..

رجاء خفض وتيرة النقاش و الهدوء ..

احبائى
يعنى انتم كلكم ناس مثقفين جدا وانا بحبكم كلكم عشان بحس انى بتناقش او اقرأ حوار من نخبة منتقاة من الشباب , المشكلة يا احبائى ( وابنائى ) ان كل طائفة من طوائف الشعب يعنى مش شرط مسلمين ومسيحيين ولكن يعنى طائفة الاطباء او طائفة المحامين , وده قصدى بكلمة طائفة , كل طائفة فيها وفيها يعنى حتلاقى خلاف فى الرأى فى الطائفة الواحدة ممكن يوصل ل 180% , وهنا دور الناس المثقفين الحلوين اللى زيكم لأنهم بيشغلوا مخهم ويوزنوا الكلام ويحسوا الكلام ده مضبوط ولا يجانبه الصواب , وفيه ملحوظة فى معظم اللى بيتكلموا فى الفضائيات , يعنى ممكن تسمع منه حديث فى مرة مايعجبكش مش معنى ده ان كلكلامه مش مقبول , ولكن انا بختار الكلام اللى يعجبنى وما اسمعش الباقى , وده الفرق بين المثقفين والجهلة اللى بينساقوا زى الخراف ورا الكلام من غير ما يفكروا وعادة بيكون الكلام مدمر , وموضوع ان المسيحيين عندهم سلاح او عند معظمهم سلاح ده كلام اهبل لأن اولا الدين المسيحى مافيهوش اى إشارة لحمل السلاح اصلا , يعنى اللى يشيل سلاح عندنا شخص خارج جداً على الدين واحنا لازم نردعه ونزجره , والدليل اقول لكم حاجثة واحدة فاكرين احداث امبابة ؟ الضحاية كام ؟ 13 من الجانبين يعنى توفى 6 مسلمين مع الاسف طبعاً , طيب ممكن يكون كام سلاح عشان يقتل ال 6 دول ؟ بالعقل يعنى ممكن خمس او 6 اسلحة ولو حسبت كانت المعمعة فيها كام مسيحى مش اقل من 5000 آلاف ولو الغالبية منهم معاهم سلاح زى ما بيطلعوا علينا الكلام ويظلمونا يعنى الغالبية 300 من ال 5000 كان 3000 سلاح ممكن يقع 3000 قتيل , والمهاجمين اللى جايين عليهم لو عارفين ان حيكون 3000 سلاح على الال كانوا جابوا معاهم 4000 سلاح وقان وقع من الجانب المسيحى 4000 قتيل صح كلامى ؟ اما موضوع الانبا بيشوى انا ارفض كلامه رفضاً باتاً , وكلامه يدل على انه مش بيفهم او بيعرف فى التاريخ اللى اصغر طفل عارفه , ولو عارف وبيفهم فى التاريخ يبقى المفروض يمنع اصلاً من الكلام لأنه بيتكلم غلط , يعنى مصر من 1400 سنة نعم كانت كلها قبطية لكن مع دخول الاسلام مصر اسلم عدد كبير من المصريين , يعنى من ولاد البلد الاصليين وخلال ال 1400 سنة طبعا خلفوا اولاد وتكاثروا واصبح عددهم خمس اضعاف عدد المسيحيين على لاقل وربنا يزيد ويبارك فيهم , وطبعا واضح هنا كلمة اولاد البلد اللى جذورهم تمتد الى 1400 سنة .... وكمان الاقباط اللى جذورهم تمتد الى آلاف السنين جت منين كلمة ضيوف دى ؟ يعنى حتى المسلمين اللى بيروحوا اوروبا وبيخلفوا وولادهم بياخدوا الجنسية هناك مش بيعتبروهم ضيوف يبقى ازاى اللى جذورهم هنا تمتد الى 1400 سنة وجذور اجدادهم تمتد الى اكتر من 5000 سنة حد ممكن يعتبرهم ضيوف صح كلامى ولا حد ممكن يغلطنى ؟؟؟؟؟؟
ونيجى للمرشح الرئاسى مهما كان شخصه عايز اقول لكم حاجة خطيرة جدا .... انا من جيل قديم يعنى مولود من سنة 1950 , طول عمر مصر كان بيتحط عليها حاكم والشعب غصب عنه او بمزاجه بيشربه , يعنى لحد الملك فؤاد واتوماتيكيا جه بعده فاروق عشان نظم التوريث , بعده قامت الثورة وهم حطوا محمد نجيب بعدها حطوا جمال عبد الناصر وعمل نائبه السادات , اللى بدوره عمل نائبه حسنى مبارك , وبعد مقتل السادات حطوا لنا مبارك كالعادة ...... يعنى كل الحكام اتحطوا علينا وشربناهم حلوهم ومرهم .... ام المرة دى تختلف عن كل مرة فى تاريخ مصر ان اى رئيس حاييجى ولو طلع مش اللى قاله على طول الشعب حاينزل ميدان التحرير , بس الخوف تبقى الثورة الجاية دموية لأن لو واحد عايز يمسك الحكم لأغراض مش اللى قال عليها اصلا ولمصلحة شخصية مش حايسيبه بالساهل وربنا يستر وربنا يحمى مصر
مع اطيب تحياتى

جميع المرشحون للرئاسة لهم ما لهم وعليهم ما عليهم

المهم الخطوات القادمة ويجب ان يعوا انهم يحكمون شعب يستطيع ان يثور ويقول للحاكم انزل تحت

ثالثا لا اعلم من اين نتحدث عن مرشح رئاسة وينحرف الامر الي اصل المسحيين ؟

لا افهم غير امر واحد

حقي لا يصبح حقي ان تعدي علي حق الاخر

وحريتي لا تصبح حرية اذا تعدت علي حرية الاخر

و مكاني لن يدوم اذا فرقت بين الناس لنسبهم او جنسهم او عرقهم او دينهم

الكفاءة والجد والعمل هي المقياس

هذه حياتي ..هذا هو ديني

تحياتي للاراء المحترمة المشاركة

الأستاذ / عادل
كلامك جميل جدا وأتفق معك فيه 100% وياليت الجميع يعيه ويعلمه جيدا ليعرف الجميع أن الشعب المصرى بمسلميه ومسيحييه أصحاب لهذه الأرض منذ آلاف السنين .

أولا أشكر جميع الآراء وأحترمها كل الإحترام
ثانيا رئيس جمهورية مصر يجب أن يكون:
رجل سياسي من الدرجة الأولي
لا يخلط الدين بالسياسة ولا يعتدي بأي كلمة علي أي معتقد آخر حتى لا يفصل بين أطياف الشعب المختلفة
قيادى من الطراز الأول
يشعر بالشعب خصوصا بالفئة الفقيرة التى لا تملك حتى أن تعيش
ينهض بالتعليم في كل شئ
يهتم بصحة المواطنين خصوصا الغير قادرين
يمسك في يده كل الخيوط لينهض بهذا البلد ويكون عنده الثقة الكاملة أنه يقدر أن يقود هذه البلد العظيمةباختصار شديد يجب أن يكون هذا الرجل:
سياسي وغير سياسي.. فقير وغنى .. مسلم ومسيحي.. يضع نفسه مكان كل شخص في هذا الوطن
وأرجو أن تكون وجهة نظري واضحة

من الأخر رئيس مصر لازم يكون سياسى من الدرجه الأولى وأنسان من الدرجه الأولى لو أجتمع الأتنين فى واحد أعتقد أنه سيكون الأفضل

صح يا شيماء انتى كدة جبتى من الآخر

» إيه رأيكم في الكلام ده؟
» إيه رأيكم في الكلام ده كمان؟
» ما رأيكم أن تضحك بعضنا البعض بلم كل النكت و الطرائف العربية هنا؟
» تغطية حصرية وسريعة واولي للموقع : حضور الاعلامية مني الشاذلي منتدي الاعلام العربي
» يا سياده المشير ..... أنتى شفت الفيديو ده قبل كده