ما اكثر الشخصيات لاتحب التعامل معها

[

شكرا يا مروة على الموضوع الجميل
وشكرا للمنتدى الجميل اللى اتاح لكل الشخصيات الجميلة دى انها تسعدنا بالحوارات البناءة والمفيدة وانا سنى 60 سنة بستفيد من الشباب الصغير , يعنى اصغر واحدة فى المنتدى بنت العرب انا معجب جدا بالشخصية دى وبستفيد منها و ومروة من النماذج الجميلة اللى حايحكموا البلد بعدين
نرجع لموضوعنا و اكتر الناس اللى مش بحب اتعامل معاهم هو الالى لابس ثوب خروف لكن جواه ذئب , واكتر الناس تخافى منهم اللى عايزين يغغيروا الطبيعة يعنى مثلا لو وقفنا على كورنيش النيل ووقفنا على كورنيش بحر اسكندرية لاحظوا اوى حركة الماء فى اسكندرية فيه حاجة فى البحر اسمكها المد والجزر , يعنى تلاقى الماء ييجى على الكورنيش ويرجع يعنى حركتين جاى علينا وراجع ربنا خلقه كده لحكم كثيرة , وتعالوا نركز فى حركة مياه النيل
حا تلاحظ ان الماء متجه بحرى , يعنى النيل جاى من اسوان رايح فى اتجاه واحد ناحية اسكندرية ومش ممن وعمره مايحص وفى اى ظروف او رياح او اى حاجة تلاقى النيل يمشى فى عكس الاتجاه , لما تحس ان واحد بيتكلم على تغيير الاتجاه او الطبيعة دى ويحط اسباب كلها غلط فنيا وعلمياً , ويقاوح والمشكلة انه بيتكلم بصوت عالى مع انه بيتكلم غلط , ودايما الشخص اللى تحسى انه شخص حلو هو اللى يكون عاجب 90% من الناس بدون مؤثرات
اقول كلمة بس ما حدش يحس انى مجنون عارفين الموز المفروض اننا بنرمى القشر وناكل اللى جوا وربنا اكيد خلقه كده بدليل ان القرود فى الغابة اللى بيتصرفوا بالفطرة بيقشروا الموز وياكلوا اللى جوا , مع الاسف بحس ناس كتير بتاكل القشر وترمى اللى جوا الموز ( تصرفاتهم كده يعنى )
وربنا يستر
مع اطيب تحياتى

اشكرك جدا يا شيماء ده بس من ذوقك الجميل
وبجد الفانوس اللى انتى منزلاه كانه حقيقى ومنور فعلا وبيدل على ذوق عالى اوى حتى فى اختيار الصور
واضيف كمان على تعليقاتكم الجميلة حاجة
الإنسان الى يتميز بأحلى الصفات هو اللى محس انه جميل الصفات على المدى البعيد
يعنى فيه ناس تلاقيها مدهونة بوية , يعنى تحس صفاته كلها بينتحلها ومش فيه اصلا , يعنى الانسان الجميل اللى انا احس النهارده انه جميل وبعد عشر سنين احس انه اجمل بكتير , زى اغانى الزمن الجميل وفن الزمن الجميل اللى سمع اغانى عبد الحليم وام كلثوم فى وقتها زمان كان بيحس انها جميلة اوى والنهاردة بيحس انها اجمل الف مرة
زى التحف اللى فى المتحف , لما تشوفها اول مرة تقول ايه الروعة دى , وكل ماتشوفها اكتر تحس انها اروع
والإنسان اللى داخله جمال بيحس كل حاجة جميلة , يعنى عايز تحط وردة جميلة قوى حطها وسط شوية ورد جميل يعملوا بوكيه ورد جميل لكن مش معقول نحط الوردة الجميلة وسط قشر التين الشوكى , عارف لما تلاقى عربية تين شوكى وشوف الراجل لما بيقشره ويجمع القشر , قشر التين ده شىء تتامل فيه ازاى يخرج من التين اللذيذ القشر الردىء ده وكمان فيه شوك يعنى لو شوكة جت فى صباعك مش حاتنام طول الليل , وفيه مثال ماننساهوش ابدا حامل المسك ونافخ الكير , حامل المسك ده معاه عطور لو لمسته بس وانت ماشى يفضل العطر الجيد رائحته الحلوة فى ملابسك اسبوع , لكن نافخ الخير تبعد عنه لأنه بيطلع شرار ولو جه ع الملابس يحرقها , والخلاصة انا بتامل فى الحياة اوى لقيت كل حاجة بتوصل لبعضها , اما الانسان اللى داخله قبح بيبقى عنده مركب نقص بيشوف كل شىء قبيح وبيغير لما يشوف شىء جميل , ودايما بيختار الطريق الغلط يعنى بدل ما يصلح نفسه ويبقى زى الناس الحلوين بيحقد عليهم ويعمل لهم مشاكل وربنا يكفينا شرهم
وفاصل ونعود

وتحياتى للأبنة العزيزة بنت العرب
انا كل ما بشوف صورة ام كلثوم اللى انتى حطاها ببقى عايز اقول لك حاجات
ولما اتكلمتى هنا عن التفاخر , لو قارنتى ام كلثوم بحد من الغجر اللى بيغنوا دلوقتى
ام كلثوم واحدة جت مرة على مستوى الكرة الارضية يعنى معجزة فى كل حاجة ومش ممن تتكرر تانى وكانت متواضعة جدا انا رحت معاها كذا دولة عربية وكنا كل دولة لازم الملك او الرئيس يعزمنا ع العشاء فى قصره ونعمل له حفلة خاصة هو واسرته وكان كل ملك او رئيس عارف كويس ان ام كلثوم اكبر منه مقاماً يعنى ام كلثوم هى امك كلثوم من خمسين سنة فاتوا وكان هو فى تانية اعدادى وام كلثوم حاتفضل ام كلثوم طالما البشرية موجودة والملك ده مش موجود اما مات وما حصل عليه انقلاب واما راح مزبلة التاريخ زى اخواننا البعدا , انا مرة كنت فى الاذاعة مع ام كلثوم وقالت لى تعالى معايا شارع فؤاد عايزة اشترى حاجة ركبت معاها العربية بتاعتها ونزلنا عند دار القضاء العالى سبنا السواق فى العربية ومشينا اشترت شنطتين ,كانت بتلبس نظارة سودا كبيرة , ولبسها عادى جدا مش ملفت للنظر , يعنى اللبس بتاع سنها , تخيلى نزلنا من العربية ومشينا للمحل واشترينا الحاجة ورجعنا العربية من غير ماحد حس انها ام كلثوم , اما الشاب دلوقتى اولا لازم يركب عربية ملفتة للنظر ونفسه يكون فيه ميكروفون يقول انا فلان الفلانى عشان الناس تتلم وبعدين التفاخر ع الفاضى لأنه اصلا فاضى يعنى اى واحد منهم ممكن انزل مدرسة ثانوى اجيب لك 1000 زيه لأن حواليه هالة زائفة
مع اطيب تحياتى

ياااااااه يا استاذ عادل بجد انا نفسي امسك فيك وتحكيلي قصصك مع ام كلثوم لاكن لو حضرتك جربت غلستي هتشد في شعرك فضل كل لما اشوفك في المنتدي اقولك احكيلي قصة يعني من الاخر هتنتحر
هههههة الحمد الله انا بردة كنت حسة ان ام كلثوم متواضعة وده باين علي لبسها ونظرتها الكبيرة دية
عارف يا استاذ عادل انا يعني في احد المواقع الشبابية اي حد يتكلم معاية في موضوع يحس اني كبييييرة في السن ولاكن الاشخاص الي بيتكلموا معاية علي طول بيقلولي يا بنتي غيري الصورة دية كل الناس فكراكي
كبييييييرة ورخمة وانا اعد اضحك واقول معلش مهو انتو مش عارفين مين الي في الصورة لغاية لما عرفة المنتدي كله تقريباً مين هي ام كلثوم طيب عندي شؤال لو سمحت يا استاذ عادل هي ام كلثوم كان وجهة نظرها اية في الي بيحصل في فلسطين؟؟
ويارب مكنش بتعب حضرتك بس انا بجد بحب ام كلثوم وعايزة اعرف عنها اكتر عشان اعرف صحابي الي
جننوني بتامر حسني وعمر دياب واغير وجهة نظرهم عنها

حبيبتي مروه
انتي ياااااااااااامه حتشوفي نفوس غريبة في الدنيا
مثلآ استحالة اتعامل مع
1ـ صاحب الضمير النائم الذي لاتوقظه أية اخلاق او قيم انا اعتبره انسان فاقد الروح
2ـ صاحب كلمة ( وانا مالي )الذي لا يشعر بمن حوله ، فاقد الاحساس (بحجة الدنيا عايزة كده)
الشخصية هذه بالذات اكرهها
3ـ الاناني مدعي الفضل الذي ينسب كل نجاح من حوله لنفسه
4ـ الحانق ، نجده دائمآ الذي لايرضى ولايشعر بأي نجاح

الأعزاء شيماء وبنت العرب
اشكرك على كلامك الجميل واللى بيدل على عقليات جميلة متفهمة , فيه حاجة بيتميز بيها الشباب وهى عيب فيهم مش ميزة , يعنى لما يمسك الريموت كنترول ويمر على القنوات الكتييييييييير , ممكن يلاقى محطة فيها رقاصة , ومحطة فيها راجل محترم لابس بدلة وكرافتة , بيقول ايه القرف ده ويروح على المحطة اللى فيها الرقاصة , او محطة فيها اى حاجة تافهة , وماتفهموش غلط انا مش معقد بالعكس انا متفتح جدا و وبحب الرقص لكن فيه حاجة مهة اسمها الثقافة العامة , يعنى ممكن اتفرج على الرقاصة شوية لكن لازم اشوف الراجل المحترم ده بيقول ايه برضه , لسبب , ان القناة اللى جايببنه مش واحد لقوه قاعد على القهوة راحوا مطلعينه فى التليفزيون , ولكن اكيد راجل بيقول حاجة او عنده فكر فى اى مادة من مواد الحياة واكيد لما تسمعيه حاتستفيدى من حاجة جديدة عليكى , وانت لو اتعملتى عشر حاجات غير مهنتك الاصلية ( يعنى انتى دلوقتى طالبة ) او لما تتخرجى ده بيديكى فرصة تكونى اولا متميزة عن غيرك وثانيا بيبقى عندك سعة افق يعنى ممكن اى حاجة ماتعرفيهاش تتخيليها , يعنى اقول مثل ( وانا دايما احب اقول حاجة توضح الى حقوله ) اتنين عندهم عربية , واحدة ما تعرفش غير تدور المفتاح والدريكسيون , وواحدة فاهمة كل حتة فى العربية الميكانيكا والكهربا وكله , الاولى لو العربية عطلت ممكن يكون عطل بسيط جدا يعنى سلك كهربا اتخلع او مش واصل كويس , ومعظم الميكانيكية اما حمير او حرامية , ممكن على حسب شكل العربية او شكل صاحبتها يحدد هى غنية اد ايه ويقول لها كلمة بالانجليزى مش حاتفهمها , يعنى الكربراتير او الرادياتير او سير الكتينة ( يعنى اى اسم من الاسماء الكتيرة فى العربية واللى ماتعرفهمش من بعض ) ويلهف ممنها 400 جنيه , لكن اللى بتفهم بتكون عارفة العيب فين بتروح للميكانيكى شوف لى الابلاتين او بك السيلانسيه , هنا الميكانيكى حايعرف انها فاهمة وما يقدرش يضحك عليها وياخد منها خمسة جنيه بس , وده طبعا فى كل حاجة , وانا من ضمن خبرتى بحس باللى بيسمعونى فاهمينى ولا مش فاهمين , وزى ما انتم بتحبوا كلامى انا بحب اتكلم معاكم والدليل شوفوا بكتب لكم كتير ازاى ... ممكن حد تانى ما يفهمش او مايقدرش اللى بقوله بيكون ردى بالكتير نص سطر , وناا من مميزاتى بحب اتعلم كل يوم حاجة زيادة , يعنى انتى لو تعرفى كل اللى اعرفه دلوقتى الاسبوع الجاى حاتلاقى اتعلمت حاجات جديدة , بعمل تحديث لمخى باستمرار , من ضمن المدارس اللى اتعلمت فيها العمالقة اللى اشتغلت معاهم يعنى كمية الفكر والثقافة اللى عندهم ماتعديش , تانى حاجة العمالقة دول لما تصاحبيهم اكيد حاتصاحبى اصحابهم اللى بيقعدوا معاهم وهنا بقى العمالقة حايصاحبوا مين ؟
مش معقول حايصاحبوا ناس اى كلام , يعنى لما اقعد مع ام كلثوم اصحابها مين نجيب محفوظ وانيس منصور وماتعديش اسامى كبيرة ,
اما العزيزة بنت العرب طبعا كلامك خلانى احترمك اكبر , قيمة الانسان مش فى سنه ولكن فى عقله , والانسان لما يكون سنه صغير وعقله اكبر كتير من سنه احلى حاجة لأنه خلال عمره حايتعلم عشر كميات اكتر من واحد تانى , وزى ماقلت ان ام كلثوم فلتة لن تتكرر يعنى على كوكب الارض مرة واحدة و كان من اهم صفات ام كلثوم انها وطنية اوى , وجه على ايام ام كلثوم احداث كبيرة جدا فى تاريخ مصر , اولها حرب فلسطين بعدها 23 يوليو بعدها تأميم القناة وحرب 1956 بعدها السد العاللى ثم حرب 1967 وبعدها ازالة آثار العدوان وحرب الاستنزاف ثم حرب 73 , يعنى ثورة 23 يوليو مثلا , كانت اغانى ام كلثوم وعبد الحليم طول الفترة مؤثرة بكتير عن خطب عبد الناصر او بتدعمها الف مرة لأن النشيد مانت بتعمله ويقعد يتذاع مليون مرة بيعمل شغل , لكن خطبة عبد الناصر كانت بتتذاع مرة او مرتين , لكن الاغنية بتفضل , لدرجة ان الافكار اللى عايز عبد الناصر يوصلها للشعب كان بيخلى ام كلثوم تقولها يعنى يقول لها افكار والمؤلف يحطها فى الاغنية , وام كلثوم غنت كتير للقضية الفلسطينية , وكلنا كنا عارفين الحل بس الحكام العرب كلهم خايبين , يعنى حتى لما يجتمعوا بيتخانقوا ( شفتى فيلم شورت وفانلة وكاب ؟ ) انتى عارفة لو 16 دولة عربية اتحدوا كان حصل ايه , كانت اسرائيل اخدت ديلها ف سنانها وهربت من فلسطين , يعنى اسرائيل عندها مثلا 300 طيارة ونص مليون عسكرى , لو الدول العربية كل ها عملت وحدة عسكرية مع بعض , يبقى مجموع القوات كلها تحت قيادة واحدة تخيلى ممكن يكون عدد مجموع الطيارات 30 الف طيارة , وعدد العساكر مش اقل من عشرة مليون وجاهزين كان ممكن اسرائيل تقعد لحظة واحدة ولا حتى امريكا لأنها حاتخاف لأنهم حايبقوا قوة ضاربة ماحدش حايستجرى ينتحر ويدخل معاها وللعلم ماكنوش حايضربوا, وجودهم بس حايخوف , اقول لكم على سر فى موضوع التخويف , عمركم رحتم او شفتم مدرب الاسود بتاع السيرك ؟ بيبقى معاه كرباج بيطرقع بيه فى الهوا اى واحد يفتكر انه بيضرب بيه الاسد , ولكن هو بيخوفه بيه بس يعنى الكرباج معمول من نوع مخصوص مش زى كرباج العربجى الكارو , اهم حاجة فيه ان لما تطرقعى بيه فى الهوا يعمل صوت مفزع , ولازم المدررب طول عمره يخلى الاسد يترعب منه بس اوعى يدوق طعمه , يعنى مش ممن يضربه لأنه لو انضرب حايبقى داق طعمه وتأثيره حايقل , زى الحصان والحمار شوفى بياخد كام كرباج فى اليوم وعادى خلاص جتته نحست وبقى مش بيحس
مع اطيب تحياتى وتحت امركم فى اى اسئلة فى اى حاجة او اى موضوع

ياااااااه زمن يا استاذ عادل عمرة ما هيتقرر ابداً فعلاً عارف يا استاذ عادل انا اول مرة سمعت فيها ام كلثوم
كانت بقلب القنوات ولقيتها في روتانا زمان طبعاً انا ابليها درستها في المدرسة وعرفة انها اسطورة بس مكنتش عارفة ان الناس بتحبها وبتقرها كدة ان الي زهقني في اغاني زمان الموسيقي طووووووووووووويلة جدا وناس يعيني لما بتصدق تسمع صوت ام كلثوم تعد تصقف تصقف وام كثلوم طبعاً مرجة يااااااااااه يااااااااه يااااااه بجد بجد حاجة جميلة كان نفسي اشوفها وحضرتك يا استاذ عادل بسم الله ما شاء الله اللهم لا حسد هتتحسد مني علي فكرة هههه ضرتك كلامك ذهب بجد طيب فاكر لما ام كلثوم اغمي عليها!! احكيلي شوية عن اليلية دية؟؟

هههههههههههههههههههه
كل دا كلام جميل فاتني بقي كدا يا استاذ عادل كل
الكلام دا تقوله لبنت العرب وانا مش موجودة ماشي
بجد حضرتك بتقول كلام حلو جدا وايام فعلا ليومكن ترجع تاني خالص

شكرا لحضرتك يا استاذ ابو اسنامة بجد حضرتك دايما بتدينا نصايح جامدة جدا
شكرا لحضرتك


شكرا لحضرتك لــــ "الطبيب الشاعر/د محمد رزق
بجد كلام حضرتك جميل جدا بجد شكرا لحضرتك

وشكرا للاستاذة الجميلة صفية
وفعلا زي مابيتقال اللي يعيش يا ما يشوف فا فعلا في ناس
بتجيب اللي بتتعامل معاه اكتئاب بجد
شكرا لحضرتك علي الجلام الجميل دا


اما انتي بقي يا بنت العرب ماشاء الله عليكي بصراحة بتقومي بدوري لما ببقي مش موجودة
شكرا ليكي ياجميلة

وشكرا ليكي يا شوشو انتي فعلا انسانة جميلة جدا


شكرا لحضرتك يا استاذ
Engineer // Amir


وطبعا للاستاذ الجميل عماد بجد حضرتك انسان جميل جدا

العفوا يا 000000
ايييه!!
مغرورة!!
سبوني عليها !!محدش يمسكنييييييييييييييييييي خدي هنا طيب ورحمة الميتين كلهم مانا سيباكي خدي هنا يا بنت تعالي بس لو مسكتك في ايداية هفروووووووووووووومك
خدي هنا خدي هنااااا متجرييييييييش خدي هنا خدي هنا
هو الموقع متر في مترهتروحي مني فين!!
ياااااااا محدش يمسكنييييييييييييي

ههههههه
بصراحة يا مرمر نهاااائياً انتي حبوبة وفرفوشة وعشرية ولاكن الي بيتعامل معاكي عن قرب اصدق مني

احبائى
انا احب ارد على مروة
بالنسبة للغرور
فيه ناس بتفهمه غلط لكن الحقيقة ان كل انسان بيعرف قدر نفسه وبيتعامل على كده , والتعامل مع الناس اكيد كل بنت بتحترم نفسها بتتكلم مع ناس معينة مش مع اى حد و خلاص , يعنى مثلا لو فى نادى او مكان عام المفروض انك بتتكلمى مع ناس محددين اللى تلاقى عندهم احتياجاتك , او من التيب بتاعك , لكن اللى بتتكلم مع اى حد وتهزر مع اى حد شكلها بيبقى مش حلو , يعنى انتى هنا زى ما انا شايفك بتهزرى مع اصحابك , يعنى مش شايف فيكى غرور اصلا , ومن اهم صفات الغرور ان بيبقى شخص تافه وغبى اصلا بيحس نفسه انه بتاع يعنى ويتعالى على الناس واكيد الناس بتكتشف انه حمار اصلا , يعنى انا شخص محترم واعرف قيمة نفسى لما اتكلم بتكلم مع المحترمين اللى زيى , مش بحب اتكلم مع الناس اللى مش محترمة وده ما يعتبرش غرور اكيد
مع اطيب تحياتى