هل اضر مشهد مبارك داخل القفص بالثورة المصرية والثورات العربية ؟

الثورات تحدث نادرا في عمر الشعوب ، لذلك لا يمتلك احد الخبرة في ادارة الثورات ، واعتقد اننا جميعا اخطانا في ادارة الثورة المصرية سواء المجلس العسكري او الشعب او الاحزاب او التيار الاسلامي ، جميعا اخطأنا وارتجلنا مواقف غير مدروسة ، كان لابد لنا ان نتناقش اولا ونستخدم ما يسمى brain storm او عصف الذهن كما تم ترجمة المصطلح ، وهذه الطريقة في التفكير تطبق في حالة عدم وجود خبرة في موضوع معين فيجلسون جميعا ليتناقشوا ويعطي كل منهم اي خبرات قد تكون في حالات مشابهه ، المهم ان نتناقش جميعا لاننا لم نعش ثورة حقيقية من قبل .
سوف اتحدث فقط عن ارتجالنا في موضوع محاكمة الرئيس المخلوع ، فقد تغلبت علينا جميعا روح الانتقام وهذا من حقنا بعد كل ما فعله مبارك على مدى ثلاثون عاما من افساد وسرقة فقد كان بحق لص وزعيم عصابة وليس ديكتاتورا ، فلقب ديكتاتور يمكن ان نطلقه على الرئيس السابق عبد الناصر لانه كان منفردا بالقرار ولكنه لم يكن يوما لصا ، نعود الى موقفنا بعد الثورة من حتمية محاكمة المخلوع على جرائمه وقبولنا على مضض ان يحاكم المخلوع امام القاضي الطبيعي مع اننا من داخلنا نريد ان يحاكم امام محاكم ثورية ، ورفضنا اي تلميح بخصوص رد بعض الاموال التي نهبها هو واولاده في مقابل العفو عنهم ، فهل افاد هذا الموقف الثورة المصرية ام اضر بها ؟
اعتقد ان مشهد المخلوع داخل القفص ارعب جميع من بيدهم السلطة واضر كثيرا بالثورة المصرية وسوف ندفع مقابل هذا المشهد مزيداً من الشهداء والدمار لهذا الوطن ، اذ كيف يطمئن المجلس العسكري إلى اننا لن نحاكمه بعد ان يسلم السلطة لرئيس منتخب ، نحاكمه على جرائم لم يكن لاحد منهم وقت ارتكابها ان يظن ولو للحظه انه يقع تحت طائلة الفساد ، من منا كان ومازال يمكنه ان يرفض تخصيص اراضي له بسعر بخس او عمولات صفقات سلاح اعتقدوا انها سليمه قانونيا وليس اخلاقيا ، افسد مبارك ضمائرنا جميعا واصبحنا لا نعرف الحلال من الحرام واعتقدنا جميعا ان الحلال هو كل ما هو قانوني وبورق رسمي ، فمثلا اذا كنت موظف بالدولة واستطعت ان تضع اسمك في كشوف كثيرة للمكافآت حتى دون ان تقوم بعمل يستحق هذه المكافأت فإن ذلك حلال ، الفيصل بين الحرام والحلال هو تظبيط الاوراق ليكون الوضع قانونيا ، بعد ذلك لا يعد جريمة .
مسكين شعب ليبيا واليمن وسوريا ، يدفعون ثمن خطأنا ، كيف يسلم رؤسائهم السلطة للشعب بعد ان شاهدوا المخلوع داخل القفص ؟ وهم يعلمون جليا انهم حتى لو فروا إلى اقصى بقاع الارض سيتم تسليمهم يوما ما للشعب ليحاكمه ، لذا فهؤلاء الرؤساء سيقاتلون للنهاية مهما كانت النتائج .
عندما تهاجم عدوا حتى ولو كان قط ضعيف اترك له مخرج ليهرب منه ولا تغلق عليك وعليه باب الحجرة لانه مهما كان ضعفه عندما يشعر بالنهاية سوف يقفز في وجهك مسببا لك الاذى .
اذا علينا الان ان نبحث عن طريقه نطمئن بها المجلس العسكري من عدم محاكمته بعد نقل السلطة ليساعدنا في نقل السلطة لنا بدلا من التسويف واطالة الوقت والتسبب في المزيد من الفوضى لاضاعة الوقت ، هذا اذا صحة فرضيتي وكانوا هم ايضا من اصحاب المليارات .
اهم ما نحتاجه هو المصارحة والشفافيه ، يمكننا ان نسامح لو اعترفوا بذنوبهم وهذه رسالة لجميع من كانوا بالسلطة فلتعترفوا وتعيدوا ما نهبتوه ونحن سنسامحكم .
الحل هو تكوين لجان قضائية للمصارحة مقابل العفو على غرار ما قامت به جنوب افريقيا ، وإلا سيظل الفاسدين يحاربون الثورة إلى ان يجهضوها ليهربوا بجلودهم .

الاخ محمد عبد الحليم أرى مع احترامى لك و لكل العابرين من هنا عبر سطورك هذه... أقول أرى انك رجل يحب بلبلة الوضع أكثر من بلبلتها ان صح التعبير و أرى فى رأيك التطرق الى موضوع محاكمة المجلس العسكرى بعد تسليمه السلطه الى سلطه مدنيه نوع من الدعوه مزيد من الانفلات و تأجيج الوضع فى الشارع المصرى ... هل نسيت من قام بمساندة الثوره ؟؟ هل نسيت من حمى مصر بعد الله ؟؟؟ هل نسيت من هم الذين ساهموا فى اجبار مبارك على التنحى ؟؟؟ من قام بأعادة الامن نسبيا الى الشارع المصرى بعد الفوضى العارمه ؟؟؟
و أسئله كثيره أخرى .. انا ملاحظ فى كل كتاباتك انك بتحاول تأجيج و اشعال فتن لا داعى لها فى الوقت الحاضر و لا فى الوقت اقادم .. أنصحك لوجه لله تعالى ان تتقى الله فى نفسك و فى أهلك اللى هم الشعب المصرى .. الى متى سنظل فى هذا المشهد السخيف مشهد المحاكمات و الاعتصامات و الانتقام الذى تتطرقت اليه اليس لك فى رسول الله قدوه ؟؟ الم تقرأ سيرة الرسول الكريم عندما من الله عليه بالفتح العظيم الم تسمع ماذا قال رسول الله لكفار قريش (قال لهم اذهبوا فأنتم الطلقاء ) و كان بيده صلى الله عليه وسلم ان ينتقم منهم اشد انتقام و لكن ليعلمنا من أدبه و علمه رب العرش الكريم على يد رسوله و مبعوثه النبى الامى الصادق المصدوق ان العفو عند المقدره هو من اعظم الاخلاق .. ومن كرم الاحرار و من شهامة الرجال ..

أرجو منك ان تكتب مواضيع بنائه تساهم فى بناء مصرنا الحبيبه و تهدئة الرأى العام
عاشت مصر حره مستقره أمنه من شر الفتن .

الاستاذ احمد
ممكن حضرتك تعطي لي اسباب منطقية لعدد من الاسئلة
1- ليه المجلس الموقر مش عايز يقول مين هم القناصة ؟ ولا همه ميعرفهمش بجد
انا اقول لحضرتك مين هم القناصة : هم ميلشيات جمال مبارك والعادلي من الداخلية كانوا يأتمرون بأوامر من جمال والعادلي ، طيب ليه المجلس الموقر مش بيقدمهم للمحاكمة ؟ ببساطة لان المجلس الموقر له ملفات عند جمال مبارك وطبعا انت عارف فيها ايه الملفات دي ، لو عندك اجابة منطقية يا ريت تقولي
2- شهادة المشير اللي صرح بيها وان مفيش اوامر صدرت بأطلاق النار على المتظاهرين ، طيب ممكن حضرتك تقولي الجيش حمى الثورة من مين ؟ ولو حضرتك كنت في الميدان يوم موقعة الجمل كنت شفت الدبابات وهي بتوسع وتفتح الشارع لمرور الجمال والخيول ، وطوال 14 ساعة متواصلة من معارك الطوب والمولوتوف لم يفكر جندي واحد اطلاق رصاص في الهواء لحماية المتظاهرين من البلطجية ، تقدر تقولي حضرتك ليه المجلس الموقر كان ده تصرفه
3- مين اللي حاول يغتال عمر سليمان ؟ وليه عمر سليمان نفسه ساكت ومبيصرحش عن هذه المحاولة ؟ ولا مدير المخابرات ميعرفش ؟
4- ليه مبارك جعل المشير قائد للقوات المسلحة 20 عام ؟ ببساطة عشان ضامن ولاء المشير له ، ولو مبارك شك لحظة واحدة ان المشير كان ضد التوريث زي ما بيقول الان طبعا انت عارف مبارك كان هيعمل فيه ايه
يا عزيزي انها كانت مرحلة العصابة ، تفتكر فيه عصابة هتضع بين افرادها شخص شريف ؟
حضرتك عارف اقتصاد الجيش اد ايه ؟ حوالي 40% من اقتصاد مصر ، تقدر تقولي الفلوس دي بتروح فين وفلوس المعونة والاراضي اللي الجيش واضع يده عليها وبيبعها وهي تقريبا كل اراضي مصر
ليه المجلس مش عاوز يطهر البلاد من الفاسدين وسايب كل شيء كما هو ؟
سؤال اخير حضرتك شاركت في الثورة متى ؟

الاخ محمد عبد الحليم

موضوع الثوره و القناصه و الشعب -- عند قيام اى ثوره فى اى مكان فى العالم ماذا يفعل عادة النظام الحاكم ؟ من الطبيعى جدا ان يواجه الثوار على انهم شويه مشاغبين أو متمردين على نظام الحكم -- ماذا كنت تتوقع عند خروج الشعب الى الشارع و يعلن تمرده و اتفاضته ضد النظام الحاكم ماذا كان توقعك ؟؟ ان النظام يضبضب عليهم ؟؟ من الطبيعى ان يواجههم بكل الوسائل لاضفاء نار الثوره و غضبها .

لذلك وجود قتلى بين الطرفين أمر طبيعى جدا جدا .. خلينا نكون عادلين فى كلامنا ... الم يكون فى القتلى رجال شرطه منهم من و اجه الثوره و قتل سواء بأوامر و لا حتى مرجله منه المهم انه قتل .. فى ضباط و جنود قتلوا داخل اقسام الشرطه على يد عصابات مش ثوار لان الثوار لم يكن فى نيتهم اى عمل مخل بالامن و انها ثوره سلميه .. و على الرغم من كده قتل من قتل ..

بخصوص القناصه و وجودهم على اسطح المبانى نعم كان هناك قناصه و الكل معلوم لديهم من هم ... الا ترى ان من كان يقود هؤلاء القناصه حكم عليه فى قضيه و احده 12 سه و لسه بيتحاكم على باقى الجرائم (حبيب العادلىو أعوانه هو المسؤول الاول و الاخير عن حالة الامن الداخلى ) و انشاء الله ياخد اعدام و ترتاح ..


بخصوص الجيش حضرتك بتشكك فى نزاهة الجيش ؟؟؟ الجيش هو من اجبر مبارك على التنحى ... و حمى الثوره من زيادة اراقة الدماء المصريه .. ماهو كان ممكن يمشى على هوا النظام زى ما انت شايف كده فى سوريا . اليمن . ليبيا .. بس حقيقتا يشكر على اللى عمله و اللى عمله محل تقدير و احترام فمافيش داعى لمعادة الجيش لانه فى الاول و الاخير هو اللى بيحمى مصر كلها بعد الله.

طبيعى جدا ان يعين الحاكم من يثق فى ولائهم و لا حضرتك عاوزه يعين و احد يعمله قلق كل شويه ؟؟
و العبره بالنهايه.. و النهايه حضرتك شفتها و ما زالت قائمه ..

لو جمال له ملفات ضد الجيش ما يعلنها بدل رميته فى السجن ايه اللى جابره يترمى الرميه السوده دى .. الجيش مش لعبه عشان يفرض ملفاته بالسهوله دى الجيش المصرى مش مهزله عشان يجى هلفت و يخترق صفوفه ..

كل انسان فى موقع حساس فى الدوله معرض للخطر . و اذا فى ما يستدعى شهادة الوزير عمر سليمان ممكن يستدعوه زى المشير للادلاء بأقواله و ما اعتقدش انه هيشهد زور عشان ينقذ انسان فى الدنيا و يروح فى دهيه فى الاخره ...

سؤالى لك من قام بأنهاء موقعة الجمل اذا كان الجيش زى ما حضرتك بتقول فتح الطريق امام الجمال و اللى استمرت 14 ساعه من الضرب بكل الوسائل ؟؟؟ و لعت بنفسها و انضفت لوحدها ؟؟؟ مش هو الجيش اللى فصل بين الطرفين ؟؟ و بعدين دى كانت ثوره كان لازم يحصل اللى حصل هو حضرتك كنت متوقع تنتزع سلطه بالورد و الموسيقى ؟؟؟ لو اى انسان تعرض قى وظيفته لتمرد من طرف اخر و حس انه هياخد مكانه هتحصل اصابات فما بالك بسلطه حكم ..

ميزانيه الجيش فى اى مكان فى العالم هى الميزانيه الاعلى فى الدوله و غير معلنه فى ميزانية الدوله ده طبيعى و معروف عالميا مش مصر فقط .. الجيش يطلق عليه دائما حامى الحمى ... القوات المسلحه فى اى مكان فى العالم خط أحمر لا يسمح بتجاوزه مهما كان ..
ورينى برلمان و احد فى العالم الديمقراطى فى يوم ناقش ميزانيه جيشه .. مافيش ابدا .

سؤالك اللى قبل الاخير حقيقتا اضحكنى كثيرا عفوا مش استهتار و الله ابد ... لك منى كل احترام و تقدير يا سيد محمد لكن ما اضحكنى هو تخيلى ذهب بى الى تصورى فى حالة ان المجلس العسكرى قام بتطهير البلد من الفاسدين 80% سوف يدخل السجن أو يعدم .. عارف ليه ؟؟؟ لان الفساد مش فقط فى من حكموا البلد الفساد مستشرى فى قطاع عريض من الشعب ... أنظر حولك .. ماذا يفعلوا قبل الثوره و ماذا يفعلون بعد الثوره من تجريف اراضى زراعيه (فساد) تعلية مبانى بدون اساس (فساد) رشوه المسؤولين حاليا لانهاء امورك (فساد) سرقه بالاكراه (فساد) قطع الطريق (فساد) المعاكسات فى الشارع (فساد) رفع الاسعار التمونيه (فساد) التلفظ بافاظ بزيئه فى الشارع بصوت عالى (فساد) ممارسة البغاء المستشرى حاليا (فساد)
التعدى على أملاك الدوله (فساد) و لو حكتب لك انواع الفساد محتاج صفحات كتيره .. المهم ده كله بيعمله نسبه كبيره من الشعب فبالتالى مصر هتفضى من الناس هههههههه ارحمنى يا الله

سؤالك المعتاد لكل من ينتقد ما تسطر فى المنتدى -- هل شاركت فى الثوره و أين ؟؟؟ يا أستاذى محمد أنا و العياذ بالله من كلمة أنا -- كنت موجود فى بورسعيد لانى عايش فيها -- فيها مدان على قد مساحتها اسمه ميدان المنشيه اذا سمعت عنه هو تقريبا الميدان الوحيد فى البلد يدوبك يتحمل تواجد 500 الى الف كحد أقصى ... كنت هناك كل يوم لحد يوم التنحى و بعدها شاركت فى اللجان الشعبيه لحماية البلد او بالاصح منطقتنا من البلطجيه و الحراميه و غيرهم ..

هتفنا لحد ما صوتنا راح و عفنا من كتر جلوسنا فى الشارع و خسينا من قلة الاكل
يوم التنحى احتفلنا بيوم النصر و شغلت الاغانى الوطنيه فى الشارع بسماعات تسمع اخر بور سعيد و على فكره عندى مطعم يوميها وزعنا السندوتشات مجانا -- و الستات زغردة ههههههههه
لكن الخبر المش سعيد هو انى قفلت المطعم بعد الثوره لان الاساسيات أسعارها و لعت و الناس ظروفها اتنيلت بنيله و ماعدش بيع ففضلت ان اقفله لحين استقرار الوضع الامنى و السياسى
أرجو ان تكون مشاركتنا فى خلع المخلوع فى ميزان حسناتنا و ياكم
أخيرا لك و لكل مصرى حر كل تقدير و احترام و ياريت نلتفت لمصلحة مصر و نضعها فى مقدمة اولياتنا
أحمد عبد العليم

الاستاذ احمد
وجدت مفارقات كتيرة في رد حضرتك
مثلا يوم موقعة الجمل مش الجيش اللي فضها ، حضرتك اسأل لاني كنت هناك ، المعركة فضلت شغالة 14 ساعة متواصلة لغاية البلطجية نفسهم ما مشيوا فيه ناس سمعت اتنين منهم بيقولوا لبعض ال 500 جنية متستهلش اننا نموت بسببها ، وعلى فكرة طول الليل كانت الطائرة الهليكوبتر بتلف حول الميدان ، مش عارف كان ايها دورها وهل كانت معركة الجمل تدار من غرفة العمليات ؟؟؟ ده كمان حضرتك تشكيك جديد لان الجيش من البداية لو ضرب طلقتين في الهواء كان البلطجية مشيوا ، طيب تفتكر لو البلطجية كانوا نجحوا ودخلوا الميدان وبدأوا في قتل الثوار تفتكر الجيش كان هيعمل ايه
بخصوص ان جمال عنده ملفات للمشير وساكت ليه ، لان المحاكمة ماشية على كيف حضرته
حضرتك قلت انهم لو استدعوا عمر سليمان هيشهد الحق لانه مش هينقذ حد في الدنيا ويروح في داهية في الاخرة ، تفتكر حضرتك الانسان اللي يشرف على تعدذيب بشر كانت امريكا بترسلهم ليه عشان يتعذبوا ويعترفوا هيفرق معاه موضوع الشهادة ؟ هيخاف من ربنا يعني ؟ طيب انا ممكن افتي لحضرتك واتحمل الفتوى دي ان اي انسان يعذب انسان بالشكل اللي بنسمع عنه مش هيشوف الجنة ، يا راجل ده الكفرة مرضيوش يوسخوا ايدهم بالتعذيب وارسلوا الناس تتعذب عندنا
حضرتك قلت مفيش في اي دولة بيعرف ميزانية الجيش ، لأ حضرتك في امريكا بتناقش الميزانية في الكونجرس وعليها رقابة كمان ، حتى صفقات الاسلحة بيتوافق عليها في الكونجرس
على فكرة انا زهقت من الناس اللي بترضع اعلام حكومي ، نفس الكلام اللي كان بيقال ايام مبارك حضرتك وناس كتير بتردده ، العيب مش في حضرتك الظاهر اني انا اللي مريض وإلا ليه كنت بخرج في مظاهرات حركة كفاية من سنه 2005 وكنا احيانا بنكون 100 امام20000 عسكري امن مركزي وباقي مصر بيتفرجوا وبيقولوا كلام زي بتاع حضرتك ، ياريت حضرتك تحاول تحلل المواقف بتاعة الجيش اثناء الثورة
ملحوظة جديدة يمكن حضرتك مسمعتش عنها سامي عنان كان في امريكا يوم 28 يناير وسألته امريكا ايه موقف الجيش من الثورة قال مش هنضرب ، يعني عشان تكون عارف الامر بيد امريكا مش بيد مبارك ولا المشير وشكرا

ياسلام لو أعرف ان الرضاعه بتخلى عندى أفق واسع أستطيع ان أرى ماذا ممكن ان يحدث لو عملت كذا و كذا كنت رضعتها بالبرميل مش فى ببرونه ....

يا سيدى يا أستاذ محمد عبد الحليم -- حركة كفاية ايه و ابريل ايه -- انا كنت متابع الحركات دى كل يوم يخرجوا و يرجعوا - وما فيش حاجه زى ما قلت حضرتك من 2005 الى 2011 كم سنه ؟؟؟؟؟؟

يا سيد محمد خلينا واقعين مش دى الحركات اللى اسقطت النظام -- اللى فعلا اسقط النظام هم الاخوان المسلمين ..... و لا اى حد كان ممكن يعمل حاجه ... أكبر حشد و أكبر تأييد كان للاخوان المسلمين ..

ويكفى دليل ان المليونيه الاخيره ماشاركش فيها غير مئات فقط عارف ليه لان الاخوان مش فيها لولا الله ثم الاخوان كان الوضع اختلف كليا ...

من كلامك ان ميزانية الجيش الامريكى بتتناقش فى الكنجرس افهم انك رجل بسيط -- بقه ياراجل امريكا بتناقش ميزانية الجيش -- ؟؟؟؟؟ دى ميزانيتهم بلا حدود .. اللى بيتناقش هو زيادة الدعم المالى للقوات اللى بتخدم الاحتلال فى الخارج فقط دى خارج ميزانية الجيش الامريكى ...

لو حضرتك شايف ان عمر سليمان كان بيعذب الناس او المعتقلين و عندك دليل مادى قدمه للنائب العام ماهو احنا فى وقت المحاسبه و المسائله و المحاكمه ...و الاعلام الحر ممكن تنشر هذه المستندات ..

اما فقط لانه كان مسؤول مخابرات نقول انه عذب و قتل ...

اما بخصوص البلطجيه عليك ان تعلم ان الباطل عمره ما كان هينتصر ابدا هى كانت معركة و تم بحمد لله الانتصار فيها يبقى نصلح مش نخرب -- نعمل مش نعطل المصالح الحيويه -- ياراجل انزل الشارع و شوف و اسمع الناس بتكلم نفسها من سوء الوضع --

الثوره مش السبب -- لكن السبب ما بعد الثوره كثرة الاعتصامات و المطالبات و تعطيل الدوله أعطى فرصه لمن هم ضد الثوره فرصه كبيره لعكس صوره سيئه ضدكم انتم ... انتبه لان الوقت ينفذ و صبر الناس فى عد تنازلى

و لا رغبتك فى الانتقام جعلتك لا تسمع أنيين الناس و لا تبصر معاناتهم .؟؟؟؟؟

اما الجيش المصرى لا أشك فى نزاهته لحظه و احده و يكفى ان الجيش حماكم بعد الله و لا كان زمانكم فى قاعدين على .............................. اهدأ و فكر ان الله فضلنا على كثير من خلقه بالعقل .

و يكفى ان النبى الكريم قال جند مصر خير اجناد الارض و لا عند فيها شك دى كمان ؟؟؟

الاستاذ احمد
بما ان حضرتك قلت ان الاخوان هم اللي نجحوا الثورة ، يبقى مش هرد على حضرتك لان الاخوان لم ينزلوا يوم 25 يناير وان قالوا ان شباب الاخوان نزلوا يبقوا كذابين ، اللي نجح الثورة هو نجاح الثورة التونسية لانها ارسلت رسالة واضحة وبسيطة وهي ان الشعب يمكن ان يسقط النظام
وشكرا

و الله اذا مش عاوز ترد عليه فهى حريه شخصيه و انا احترم فيك هذا الرأى ... اما انك مش مصدق ان الاخوان مش همة اللى نجحو الثوره و من بعدهم الجيش يبقى و لا مؤاخذحضرتك مكنتش هناك و لو كنت هناك يبقى حضرتك من كتر الضرب اللى كان حاصل مش واخد بالك مناللى كانو ولك او انك كنت فى مكان فى الميدان مكنش فيه اخوان ....

[b]الاخوان هم من شد مبارك و رماه فى مزبلة التاريخ[/b

لك كل تقدير و احترام و أخيرا و ليس اخرا اقول لك نحن مصريين و الهدف كان واحد و الحمد لله تحقق الهدف و لا فى دى عندك اعتراض ... ؟