ااحبائى
طبعا انا اولا اشكر الاخ العزيز روثمان لأن واضح من كلامه انه بيفهم فى الفن وسميع جامد اوى وده مع الاسف شىء بنفتقده فى معظم الاجيال اللى جت بعد جيلنا .. يعنى العزيزة مروة لو سألأتى بابا او جدو لو موجود قلتى له بتحس بإيه لما تسمع اللى بيغنوا دلوقتى اول حاجة حايقول لك بيجى لى مغص وده لأنهم اتولدوا سمعوا عبد الوهاب وام كلثوم وعبد الحليم
فيه 3 كوارث بتحصل دلوقتى فى الغناء : اول كارثة الصوت الحلو مابقلش مشكلة يعنى غالبية الاصوات لو تقارن الرجالى بعبد الحليم تحس انك بتسمع زبالة او اصوات طالعة من بلاعة او اصوات مش نقية يعنى تحس فيها عفار وعادة كل الاصوات اما الصوت عامل زى الفتلة او جهورى يعنى مش بتاع غنا ولكن بتاع واحد واقف فى السوق بينادى على بضاعة ويقول ب 2 ونص وتعالى بص او اصوات تصلح للغنا فى الحمام مع نفسه او اصوات يعنى واحد بيغنى مع اصحابه فى رحلة بدون مسؤولبة او ارتباط .. لكن الموضوع الخطير ان اللى يغنى امام الميكروفون للناس لازم تتوافر فيه 3 شروط
اول واخطر شرط ان تكون اذنه موسيقية .. يعنى النغمات الموسيقية زى الحروف يعنى تخيل لو انت بتسمع واحد بيتكلم عربى وكل جملة فيها كذا حرف غلط .. ده لو اتكلم كتير قدام الناس حايطلع جيل كامل بيقرا غلط نفس الحكاية اللى بيغنى لو بيغنى حروف غلط حايطلع بعده جيل يغنى حروف غلط
يعنى انا ليا شغلتين غير انى عازف كمان انا متخصص فى التدوين الموسيقى يعنى بسمع الموسيقى واكتبها بالنوتة وبتعامل مع ناس فى كل الكرة الارضية وهم شايفين انى متميز اوى فى الموضوع ده .. اهم حاجة بالنسبة لى انى لما اسمع مطرب بيغنى انى اكون فاهم الحروف اللى بيقولهاايه زى ما انت تسمع واحد بيقرا عربى لازم انك تكون فاهم كل حرف بيقولوا يعنى مش تسمع حرف مش عارف ده سين ولا شين ولا ط ولا ف
ودى اهم شرط فى المطرب وللعلم العيب ده موجود فى كل اللى بيغنوا دلوقتى واولهم محمد منير .. وده اول اختبار بيتعمل للى عايز يدخل اى معهد او كلية موسيقسية يعنى لو بيقول النغمات غلط حتى لو بنسبة واحد % ماينفعش مطرب اصلا ..
الشرط التانى انه يكون صوته حلو اوى يعنى متميز .. ودى موهبة الله بيعطيها لواحد كل مليون شخص على الاقل .. يعنى فى الكرة الارضية كم طن ذهب ؟ وكم طن حديد ؟؟ وليه ثمن طن الذهب اغلى كتير اوى من الحديد ؟؟ لأن ربنا لما حط المعادن على الكرة الارضية حط الحديد بنسبة والذهب بنسبة وده اللى خلا شوفوا الدهب سعره كام .. لذلك فى زمن الفن الجميل .. شوف عبد الحليم ؟ وقول لى مين منهم صوته وحش ؟ او خامة نادرة مش متكررة كانت الاصوات كلها ايامها ناعمة وحلوة زى العسل .. كان عبد المطلب صوته بالنسبة لعبد الوهاب خشن شوية لكن كان فيه كمية طرب وشجن يعنى لو جمعت كل اللى بيغنوا دلوقتى كلهم ما يطلعوش واحد فى المليون من عبد المطلب .. ومن الامثلة العجيبة كان فيه مطرب خطير جدا جدا اسمه عادل مأمون ولم يتكرر ولن يتكرر بس ما اخدش حظه كما ينغى او على قد ما موهبته تساوى لسبب ان كان صوته شبه صوت عبد الوهاب والجمهور ماتقبلوش لأن عبد الوهاب الاصل واعتبروا عادل مامون تقليد .. كان زمان يقول لك فلان صوته رخيم يعنى عبارة عن حزمة من كذا حاجة وهو لوحده على الطبيعة وماكنش لسه فيه مصيبة اسمها المؤثرات الصوتية .. يعنى كان صوت المطرب فيه كل الحاجات اللى فى الاكويلايز يعنى فيه الباص والتريبل منو فيه دلوقتى اللى بتسمعوه 80% مؤثرات والباقى صوت اللى بيغنى ..
الشرط الثالث : ان يكون المطرب دارس الموسيقى بتمعن اما دراسة اكاديمية مع موهبة كبيرة وحافظ كل اغانى التراث والزمن الجميل يعنى ممكن يقعد يسمعك عشر ساعات اللى حافظه ما يخلصش بس بشرط انه يقول الاغانى صح لأن الاغانى دى محفوظة ومحفورة فى اذهان الناس اللى بيحبوها يعنى حافظينها بالحرف ولازم المطرب يقولها كما ينبغى
طبعا انا آسف للإطالة لكن انت سألأت اسئلة عشان اجاوب عليها لازم مقدمة
صوت كارمن دى اروع من الوعة وادئها فى منتهى الجمال ... يعنى من زمان اوى ما سمعتش واحدة حلوة كده وللعلم الفرقة اللى معاها فى لبنان كانت مبوظة ادائها يعنى انت لو تابعتها فى البرنامج كل حلقة الفرقة فيها كذا اورج وبتعزف الاغانى تقريبا غلط او مش 100 % عشان متعودين على الاغانى الحديثة .. واحلى حاجة حصلت فى حلقة منى الشاذلى انها جابت فرقة شرقية وده شىء بنفتقده دلوقتى الفرقة الشرقية لأن الغنا الشرقى لازم بيحتاج فرقة من نوعية فرقة ام كلثوم او الفرقة الماسية لكن الارجات والجيتارات الخبط والرزع عامل زى ماتحط على الملوخية مايونيز وكاتشب .. والمئرات الصوتية للعلم نقصت من حلاوة صوتها
المؤثرات الصوتية دى بتستعمل بغشومية مطلقة وهى عاملة زى ايه ؟ عارف لما تروح مطعم وحاطط على السفرة مايونيز وكاتشب وهوت صوص
طبعا الحاجات دى تنفع لماكولات غربية الاصل زى البيتزا مثلا او الهامبورجر .. لكن ما ينفعش تحطها على مأكولات مصرية يعنى ينفع تحطها على طبق فول او ملوخية او مسقعة ؟؟؟؟
المؤثرات الصوتية دى حاجة زى الماكياج والمؤثرات اللى بتتحط على الست الوحشة عشان تحلى شكلها .. يعنى لو سألتنى ما معنى ست حلوة اقول لك اللى لما تغسل وشها تبقى قمر من غير اى اضافات .. وزمان كان اهم حاجة فى المطرب ان ده صوته على طبيعته
طبعا طول الحلقات كانت كارمن احلى مطربة فيهم يعنى كانت المنافسة شوية البنت المغربية بس برضو كان بيفوت منها حروف موسيقية كتير
اما السؤال ان مدام منى لم تعطى الفرقة الموسيقية حقها : انت سألت على حاجة بتوجعنى انا شخصيا بس مش ذنب مدام منى ولكن دايما اللى بيغنى بيبقى هو النجم والفرقة بتبقى حاجة كده فى الخلفية مع ان الفرقة عليها نص نجاح المطرب
وفكرتنى بأيام الفن الجميل كانت ام كلثوم بجبروتها الغنائى بتعتبر ان نص اللى بتقدمه من الفرقة .. وكانت لازم قبل الحفلة تشوف المسرح وتشوف الفرقة حاتقعد ازاى .. ولازم الصف التانى من الكمنجات يتحط له حاجة اسمها بارتاكابل يعنى حاجة زى سلمة او درجة اعلى عشان يبقى باين للجمهور وهى بتعمل كده عشان العازف لما يكون مش باين مش حايدها زى ما يكون باين .. وكان لازم الاذاعة تقرا اسماء الفرقة عشان الناس تعرفهم وكان لما عازف منفرد زى الحفناوى ولا محمد عبده صالح بيعمل صولو ولو الناس صقفوا اوى تخليه يعيد تانى ,, اما عبد الحليم كان بيقدم الفرقة للجمهور بنفسه واحد واحد .. طبعا هنا انا اقدم العذر لمدام منى .. لأن لو كان عمل فنى فيه فرقة بس اكيد كانت حاتبروز الفرقة
اما صوت ام كارمن ده انا بعتبروه المصدر اللى جت منه كارمن .. يعنى لو لم تكن ام كارمن لما كانت كارمن
والنقطة دى مرت عليا كتير .. يعنى فيه طفل بيبان عليه الموهبة وممكن اهله يحاربوه عايزينه يركز فى المذاكرة عشان يطلع دكتور .. لكن الاقلية اللى بيحسوا ان عندهم فلتة فنية وبيبقى همهم الاول ازاى يعتنوا بيه ولولا كده ماكنا شفنا كارمن .. يعنى النجاح ده نصه لأم كارمن ..
يعنى اللى بتغنى ام كلثوم ووردة بالحلواة والطلاقة دى اكيد كانت امها بتخليها تسمع الحاجات الحلوة دى من زمان وتشجعها تحفظ وتسمع لها
اما لقاء كارمن ده تاج على رؤوس كل المصريين
يعنى تخيل لما بقالنا سننة واربع شهور بنسمع اخبار تسد النفس وتجيب احباط وبلطجة وخط ومستقبل مش باين
لما تطلع من مصر واحدة زى دى يعنى موهبة فذة كمبتدءة .. وبرضه كمان ده ليكم انتم عشان تحسوا ان مصر ام الدنيا ومازالت مصر هى اللى علمت العرب كل حاجة واولها الفن .. يعنى نجاح كارمن ده كان بارقة نور وسط ظلام شديد اوى
اما عن رأيى الشخصى ؟؟؟ شفتم كاممطربة مشهورة جابوها تغنى فى حلقات اراب آيدل ؟؟ بدون مجاملة كارمن برقبتهم
يعنى كارمن دى لولقت بيئة صالحة تستلمها من دلوقتى اقول بكل ثقة انك حاتطلع مطربة مش اقل من وردة او فايزة احمد
وكلمة بيئة صالحة يعنى تدخل معهد الموسيقى العربية عشان تتعلم صح .. وتحوال تعمل زى فنانين الزمن الجميل تختار الكلام واللحن .. بعدين اهم ميزة فيها انها لما غنت على الفرقة الشرقية ابدعت اكتر من اللى عنتو فى لبنان يعنى لوتستمرعلى كده ؟؟؟
مع اطيب تحياتى واتمنى رأيى يعجبكم
النوع
موضوع: لا يفتي و الاستاذ عادل صمويل معنا في الموقع 
الخميس مارس 29, 2012 6:21 pm
