كل إعلامي وله طريقة في التشجيع!

كل إعلامي وله طريقة في التشجيع!

دعاء فاروق

أحاول أن أتخيل مع نفسي طريقة التشجيع الخاصة بكل إعلامي مصر وزي ما كل إعلامي له طريقته التي تميزه عن الآخرين سواء كان يكتب أو يظهر علي الشاشة زي ما أكيد طريقته في التشجيع هيكون فيها شخصيته وبصمته وطريقته في الكلام وهذه هي بعض تخيلاتي وتوقعاتي لما قاله بعض الإعلاميين بعد جول متعب في الدقائق الأخيرة من ماتش مصر والجزائر في استاد القاهرة... قد يري البعض تخيلاتي هذه إن فيها مبالغة وقد يراها البعض إن فيها تجاوزًا وقد يراها البعض الآخر إن دي قلة أدب ع العموم حقكم علي راسي بس مش قادرة أمنع تخيلاتي وحبي للتقليد من صغري، كما إنني لا أستطيع أن أغفل أننا وكل هؤلاء الإعلاميين بقينا عشرة،

لقد أصبحوا جزءًا من الأهل والأصدقاء والخلان فالعالم دي بتجيلك يوميا البيت تزورك من غير إحم ولا دستور وتقعد معاك ييجي تلات أربع ساعات وتتكلم في كل حاجة حتي المجاري باللي فيها ولا مؤاخذة بيتكلموا فيها من غير أي مراعاة لواحد ممكن يكون حاطط صينية العشاء قدام التليفزيون ولسه بيقول بسم الله الرحمن الرحيم يلاقي باكبورتات مصر كلها طافحة في ست قنوات.... ياللا حصل خير وهذه هي بعض الأسماء التي أقدرها إنما هذا لا يمنع إنني سوف أستعين ببعض لازماتها وأتخيلها ماذا قالت بعد جون متعب...

عمرو أديب: جووووووون يا متعب يا ضكر ده واد ماجابتوش ولاده والله ياللا.. تستاهلو ياللي في بالي، إتنكدوا وموتو بغيظكم ربنا استجاب لدعواتي ووراني فيكو يوم.

محمود سعد «بتداخل الحروف والكلام وبسرعة»: جون حلو حلو.. حلو.... الحمد لله مبروك مبروك لأ حلو جون حلو مبروك حلو ده حلو.

تامر أمين «رئيس تحليل مراجيح كرة القدم»: «بتناكة» هو ده، من الأول بقة، كان لازم الباكات ييجو جنب الظهير الأيمن في ضهر متعب مع رجلين أحمد فتحي ونفس موقع سيد معوض ودخول بركات في خط الوسط مع الأمبالاج اللي عامله أبو تريكة حيث الانعكاس المهموزي في الأمان يا للاللي... تحليل حتي الثمالة!

معتز الدمرداش «بمنتهي الذهول»: معقووووووووله دي «مع رفع الحاجب الأيمن» ده جوووون «مع رفع اليدين في الهواء تزامنا مع رفع الكتفين والحاجبين» غرييييبه قوي دخل إزاي ده؟!!

وائل الإبراشي «بمنتهي الهدوء»: جون... لماذا تأخر هذا الجون إلي الآن... نحن نريد الحقيقة وسنحقق وراء تأخيره بالتأكيد..

إبراهيم عيسي: جووووووون يا ساتر هو مفيش حاجة بتيجي غير بطلوع الروح خلاص دي بقة سمة الشعب المصري المتكاسل المتخاذل اللي عاوز حد يحطله حتي الجون بدلا منه....

مي الشربيني «بمنتهي الرقي»: أعتقد إن ده ده ده ده.. إيم.. إآآ.. يباغتها خالد صلاح بحماس: ده جون يا مي، فترد مي بابتسامتها الرقيقة: بالظبط كده.

شريف عامر «شخصية علمية معملية فذة»: أنا قريت في مجلة أوروبية وبعد بحث علي مواقع الأسوشييتد بريسس والسي إن إن والتايمز إن ده جون.

لبني عسل: حاجة تفرح والله.

إنجي علي: «ترفع يدها لفوق وهي تصرخ» ييس أنا مبسوطة قوي قوي قوي وحياة ربنا بجد.

الكاتب جمال فهمي: جون أخيرا بعد ما المرحومة اللي كان هيبقي اسمها المرحومة دبت فيها روح التشجيع الأخوي الكروي الممزوج بدعاء اللا حزبيين وطنيين حيث التانيين مشغولين برفع الأيادي طلبا للثروات العزية الرشيدية ونشجع بكره.

الكاتب ممتاز القط: 80 مليون مصري بيشكروك يا ريس علي تكريمك للمنتخب بالزيارة المباركة المبروكة التي لولاها ما كانت أم متعب اتجوزت أبو متعب وجابوه للدنيا من أصله.

أحمد المسلماني: يا سلام كان ناقص يقولولنا إحنا هنطلع مهزومين ربنا بيحبكم إنكم عديتوا.

مني الشاذلي: مرحي مرحي وااااهدفاااه.. إنه هدفن.... عفوا... هدف بديع..

ملحوظة: أنا فيا العبر علي فكرة بس الجدع اللي يطلعها.

المصدر : جريده الدستور

ههههههههههههههههههههههه
و الله جامدة رغم اني أعتقد ان مني في حياتها العادية مش formal خالص زي البرنامج ..
لكن الشغل هو الي بيتطلب تبقي كده و أنا عارفة ان الناس الطيبة أوي دي بتبقي من جواها أطفال بريئة بتبان وقت الفرحة...

لا بجد طريفه أوى والتعبيرات لكل اعلامى شبيهه بيه جدا
شكرا يا أستاذه ايمان

هههههههههههههههههههههههههههههههههههههههههههههههههههه

جامدة جدا و الله، واضح انها بتعرف تقلد بمهارة و عندها قوة ملاحظة

ههههههههههههه فعلا!
شكرا يا ايمان

شكرا يا ايمان .. حلوة قوي قوي ..

هههههههههههههههههههههههههههههه

جامدين جداااااا اللى فعلا لايق عليهم معتز ولبنى وعمرو اديب ومحمود سعد
شكرا يا ايمان

يخرب بيت عقلك ده انتى مشكلة مرحى مرحى ده انا هعمل حملة ضدك على المنتدى عشان اطالبك بأعتذار زى الجزائر وشعارنا معا ضد ايمان بس انا معاكى كده وكده بجد جامدة يأيمان وكل يوم بتكون اجمل

حلو اوي يا ايمان بس مني بتقول مرحي و الكلام الفصحي دة مش عارفة بس هي بتقول كلمة بديع كتير

» منى الشاذلي أجمل وجه إعلامي وأكثرهن مراساً
» أبسط طريقة لرد الجميل الى صوت الحق( منى الشاذلى)
» اهتمام إعلامي واسع بلقاء ماضي بلجنة الأحزاب .. وكيل المؤسسين لبرنامج العاشرة مساء ..
» الان تستطيع تصفح الموقع من الهاتف المحمول بسهولة وسرعة عن طريقة التقنية الجديدة
» أتفرج على طريقة تحضير البيبسي وأشرب بالهنا والشفاء؟؟؟!!!!وكمان(نعناع+كوكاكولا = وفاة شاهد بالصور)