المذيعه : مساء الخير عزيزى المواطن .. تحب حضرتك
تشترك معانا فى البرنامج ؟
المواطن : على حسب الاشتراك بكام ؟
المذبعه : آه ده شكله هيتعبنا ..يافندم انا قصدى تشترك
معانا برأيك .
المواطن : والله يا فندم انا لو كان عندى رأى احب أحتفظ
به لنفسى .
المذيعه : حضرتك مكبر الموضوع ليه ..ده برنامج اذاعى
بنحتفل فيه بذكرى الثوره
المواطن : يا فرج الله ..هى الثوره قامت أخيرا ؟ والله
ما حد قال لى
المذيعه : لا حول الله يارب ..عزيزى المواطن احنا بنتكلم
عن ثوره يوليو بتاعة الزعيم جمال عبد الناصر
المواطن : ايوه عارفه ..جمال عبد الناصر مبارك .. شاب
أمير وربنا هينصره علينا ان شاء الله
المذيعه : لا مش هينفع كده خالص .. شوفوا لنا مواطن
تانى ..والنبى علشان اليوم المجيد ده يعدى
معد البرنامج : باقولك ايه يا هانم ..ده المواطن المتاح
دلوقتى ..مشى حالك بيه لحد مانلاقى غيره
المواطن : يافندم حضرتك متعصبه ليه ..انا بهزر معاكى
حد ما يعرفشى ثورة يوليو ..مش ده الثوره اللى
اطلقها جمال واحنا حفرنا القنال وبعدين حررناه وبنفكر
نبيعه دلوقتى ؟انا راكب معاكى فى البرنامج اتفضلى
المذيعه : الصبر من عندك يارب ..حضرتك ممكن نبتدى
نسجل بس من فضلك الاجابه تبقى على قد السؤال
اعزائى المشاهدين كل عام وانتم بخير ..فى هذا اليوم المجيد
نزلنا الى شارع الثوره لننقل فرحة المواطنين بهذا اليوم
التاريخى الذى غير وجه مصر ..التقينا باحد المواطنين
وسألناه عن رأيه فى مبادىء الثوره ؟
المواطن : هى الثوره عندها مبادىء والله ما كنت اعرف
المذيعه : ايوه يا فندم ثورة يوليو عندها ست مبادىء
المواطن : يااااا عينى ده الواحد مننا بيبقى عنده مبدأ بيطلع
عينه فى الزمن ده ؟ وهى عندها سته الله يكون فى
عونها
المذيعه : ايه اللى حصل للناس بس يارب ياسيد يا محترم
مبادىء يعنى اهداف
المواطن : والله ..يعنى الثوره عندها ست أهداف زى
الاهلى كده ..وياترى جابتهم فى مين ؟
المذيعه : ماهو ده السؤال يا فندم فى رأيك كابن من أبناء
مصر بعد مرور 58 عاما على الثوره ما الذى
تحقق من أهداف ؟
المواطن : انتى مش بتقولى انها جابت أهداف وخلاص
المذيعه : يا بنى آدم افهم الثورات غير الماتشات .. الثوره
بتيجى باهداف وبعدين تحققها
المواطن : ايوه فهمت ..حضرتك قولى الهدف وانا أعلق
على طول
المذيعه : معقول برضه ..بص ياسيدى أول هدف القضاء
القضاء على الاحتكار وسيطرة رأس المال على الحكم ؟
المواطن : من فضلك انا وافقت أسجل على أساس ان ده
برنامج تاريخى ..ومش هتجيبوا سيرة احمد عز
باشا وحديد عز ..انا عندى عيال وعايز اربيهم
المذيعه : ايه علاقه احمد عز باشا وحديده بالموضوع ياأخينا
المواطن : مش بتقولى احتكار ؟عايزه تخلينى أقول الكلام
اللى بيقولوه بتوع المعارضه انه محتكر الحديد علشان
هو صاحب جمال مبارك أمين تنظيم الحزب الجامد أوى ؟
المذيعه : بلاش يا سيدى الهدف ده ..عندك مثلا هدف
القضاء على الاقطاع ؟ايه رأيك فى الهدف ده كمان ؟
المواطن : انتى عماله تقوليلى القضاء على الاقطاع وتحقيق العداله الاجتماعيه بين الطبقات ..انتى مش عايشه معانا فى البلد ؟..انا حاسس انك بتتبلى على ثورة يوليو وبتلزقى لها أهداف من وراها ..اصل يعنى لو كلامك مضبوط ماكنتش قعدت 55 سنه من غير ماتحقق أهدافها
المذيعه: طب خلاص انا هختار لك هدف تانى ..هى بتهدف الى اقامه حياه دستوريه وديمقراطيه سليمه ..
المواطن : ههههههه ..هههههه والله ضحكتينى يا شيخه
المذيعه : ممكن حضرتك توضح لى انت بتتضحك أوى كده
كده ليه ؟؟؟؟
المواطن : اصل افتكرت انها سليمه ..سليمه ..فاكره لما الكافر فى فيلم فجر الاسلام قال شُلت يدى وبعدين ضحك عليهم وقال سليمه ..سليمه
المذيعه : طيب نكتفى بهذا القدر مع المواطن الكريم
كفايه كده انا مش مكمله مع الراجل ده
دة هيودينا فى داهيه .. انت يا أخينا ماتتوكل على
الله وتمشى من هنا .. واقف ليه
المواطن : <<< أصلى أنا مستنى اعادة الاهداف>>>
النوع
موضوع: مواطن زهقان وقرفان ومضايق 
السبت أغسطس 21, 2010 4:40 am
