موظف طماع للشاعر المصري / رشاد هويدي ( شاعر الوادي )

موظف طماع للشاعر المصري / رشاد هويدي ( شاعر الوادي )

********************************************

موظف طماع للشاعر المصري / رشاد هويدي ( شاعر الوادي )
استكمالا لمسلسل المحليات في الأرض وبعد قصيدة المحليات خارج الحسابات
أتقدم بهذا النداء إلى السيد رئيس الجمهورية والسيد رئيس مجلس الوزراء
والسيد وزير الدولة للتنمية المحلية والسيد وزير المالية والسيد وزير الدولة
للتنمية الإدارية والسيد رئيس الجهاز المركزي للتنظيم والإدارة أن يتم إعادة
النظر في مرتبات موظفي المحليات والجهاز الإداري للدولة وتقليل الفرق
الشاسع غير المبرر بين مرتباتهم ومرتبات باقي الجهات والنظر إلى موظفي
الجهاز الإداري للدولة على أنهم لا يريدون فقط إلا أن يحيون حياة كريمة
وحق موظف المحليات أن يتساوى بزميله في المالية وغيرها ولا ذنب لموظفي
المحليات أنهم يعملون في جهات خدمية فهم وزملاؤهم مصريون يعملون في وظيفة
عامة يحكمهم قانون واحد وموازنة واحدة والفرق بين مرتباتهم ما بين السماء والأرض .
إنني فقط أريد النظر إلى موظفي المحليات بعين الرحمة .
وأنا أعلم أن موظف المحليات والجهاز الإداري للدولة موظف طماع بيحلم يعيش !!

موظف طماع
للشاعر المصري / رشاد هويدي
شاعر الوادي
********

ابني اللي في تانية حضانة
قال نفسي في اللحمة يا بابا
ضربت دماغي وقلت آه يانا
وكمان صابني شعور بكآبة
أصلي موظف دخلي صغيّر
وعندي تلاتة رب يخلي
واللي يدوخ واللي يحيّر
إني موظف حكم محلي !!
كل الناس بتزيد في دخولها
وأنا ثابت دايما في محلي !!
عشت الدنيا بعرض وطولها
ومرارها بالصبر باحلي
وان زدنا تزيد الأسعار
والناتج تحصيل للحاصل
بنزيد ملاليم والأخبار
تفضحنا فضايح بجلاجل !!
وتقول زاد راتبك يا موظف
اتحزم وارقص صبّاحي !!
لكن لو عاوز تتعرف
على وضعي وتعيش في جراحي
هاحكــي وبعقلك تسمعني
وتحكم قلبـــك وضميرك
وكمان من حقك تراجعني
وتوضح بحيــــاد تفسيرك
أنــا راتبي ميّة وخمسين
جنيه مصري مش استرليني
لو خبرا كمان دوليين
يقولوا لي ازاي هيكفيني ؟!
مش عاوز حافز وعلاوة
يا أسيادنا أنا عاوز أعيش
ما أفطرش جاتوه ولا بقلاوة
فطّرني لـــو ملح وعيش
واتغدى لـــو كـل يومين
واتعشى لا ما اتعشاش
وطقم كمان في السنتين
من أرخص وأقل قماش
وجزمة لـــو نعلها داب
أعمل لها نعل واتنين
والبسها بــدون أي شراب
أهو حتى عشان أخزي العين !!
واروح الشغل كمان ماشي
دا حتى المشي رياضة
اتناشر كيلــو ما يجراشي
يوميــــا وهتصبح عــادة
وشقة صغيرة تتاويني
لو أوضة واحدة وحمام
لا صالون ولا مطبخ ولا صيني
والسفرة إسراف وحرام
وبلاش غسالة وبوتاجاز
وكمان مش عاوز تلاجة
هنوفر أنابيب الغـــــاز
وطبيعي ما بيتبقاش حاجة !!
ولا راديو ولا تليفزيون
علشان بيضيعوا أوقاتنا
ونشوف ميت شكل ولون
يتعكر بها صفو حياتنا
والمكواة كمان إيه لازمتها
وهنعمــل إيه بالخلاط ؟!
والمروحة نبعــــد دوشتها
وبلاش سخان ولا شفاط
ولا داعي كمان للدواليب
وكفاية المسمار شماعة !!
لو اتعب ليه أروح لطبيب
إيه يعني أما اتحمل ساعة ؟!
واوفر كشف ومصاريف
وعلاج وأشعة وتحاليل
وانا لما يكون جسمي ضعيف
اتقوى بشربة من النيل
وهاصوم تلات أرباع عمري
لاجل أبقى خفيف وعلى كيفي
وهاحاول إني أموت بدري
وأوفر أكلي ومصاريفي !!
***************************
رشاد هويدي
شاعر الوادي

رائع جدا
اشكر حضرتك على هذه القصيده الرائعه مع الاسف اصبح هذا هو حال الغالبيهالعظمى من هذا الشعب المسكين وكل هذا لصالح مجموعه قليله جدا من لصوص الاقوات هؤلاء الذين يزدادوا غنى من دم هذا الشعب لكن اطمئن حضرتك بقول الشاعر
ضاقت فلما استحكمت حلقاتها فرجت وكنت اظنها لن تفرج


فما طار طير وارتفع الا كما طار وقع والنهايه اوشكت وقريبا ان شاء الله ستعود مصر للمصريين

شكرا على المرور الكريم والتعليق
لكل من الإخوة الأفاضل
الأستاذ / سامح المصري
والأستاذ / خالد المسيري
وتقبلوا تحياتي
رشاد هويدي

لو كنا بنتكلم على فئه معينه من الشعب المصري رواتبهم معدومه فمش لازم نتكلم على فئه واحده لان الشعب كله بيطالب بزياده مرتبه وعيشه كريمه ثم انا مش معاك فى كلامك ان بدل الشقه اعيش فى اوضه وحمام والجزمه اركبلها نعل واتنين وبلاش شراب عشان تغزى العين ليه كل دا من حقنا نطالب بحقوقنا كامله ولا نعتمد على سياسه انصفاف الحلول واربعها واتمانها اللى ورثتهالنا الحكومات الفاشله ونعيش طول عمرنا على طلب الصدقه من الحكومه خلينا نعيش بكرامه حتى بطلب حقوقنا واحيك على القصيده