باب الحرية

كلمات : صفاء عبد المرتضى

شبابنا شهداء الثورة .. فتحولنا باب الحرية
لأرواحهم الغالية الطاهرة .. تعظيم سلام والف تحية
أحمد بسيوني أنا عارفاه .. أستاذ في تربية فنية
وسالي زهران تالته آداب .. سابت دروسها الجامعية

وإيهاب ع المتحف راح يجري .. يحمي آثارنا المصرية
عمرو ومحروس وشهيرة .. راندا ومحمود وأميرة
أسماء كتير راحت تهتف .. وتقول مظاهرة سلمية

إسلام محمد قال هنزل .. أمه قالتله بلاش تنزل
قال يامه غلو علينا العيش..والفول وحتى الطعمية
ده كل حاجة الغلا طالها ..وناقص الهوا والميه
يا ابني خـايفة تتعور ..معيش أجـبلك أدوية
ودعتله يا ابني في حفظ الله ..ياضي قلبي وعنيه

قناصة م الشباك رقماهم .. جوه وزارة الداخلية
تتشل إيد اللي أزاهم .. برصاصة وبطلقة نارية
محمد البطران ضحى .. وما كنش طالب ترقية
وكم شريف ف الهوجة خدوه .. في ظل فوضى أمنية

حبيب وعز وجرانه ورشيد..افتكروها حاجة مُسلية
الشـر جـواهم بيزيد .. ولخــير بلدنـا حــــرامية
أخبارهم كلها وصلانة .. من الجزيرة والعربية
وشاشتنا كانت خجلانة ..وللحقيقة مخبية
حسبنا الله ووكيلنا أكيد .. عليكو دعياها ولية

وإوعوا ننسى أي شهيد .. رفع الكرامة المصرية
دي روحه في السما مش بعيد .. وربي قال رزقه عليه
شايفك يا مصر ف يوم العيد .. زغاريد وصواريخ ضوئية
يا رب صون مصر الغالية .. وخـليها م العدو محمية

الله علي الكلام الجميل ده ,
يا رب ارحم جميع موتانا وشهدائنا , وتقبلهم عندك في عليين , اللهم آمين ,