قسم خاص للاستاذ / عادل صموئيل عازف الكمان الاول في الفرقة الماسية و عضو بارز في منتدي سماعي لاحياء التراث الموسيقي و الحفاظ علي موروث الطرب العربي الاصيل .

قسم خاص للاستاذ المحترم / عادل صموئيل عازف الكمان الاول في الفرقة الماسية و عضو بارز في منتدي سماعي لاحياء التراث الموسيقي و الحفاظ علي موروث الطرب العربي الاصيل .

خالص شكرنا و امتناننا للاستاذ المحترم / عادل صموئيل علي تفضله بقبول طلبنا للاستفادة من عالمه الرائع مع الفن العربي الاصيل و خبراته و حكاياته عندما كان يعمل مع الفرقة الماسية التي عزفت اجمل الالحان مع كبار نجوم الطرب امثال ام كلثوم و عبد الحليم حافظ و نجاة و جميع الكبار ..

هذا القسم هو مجال مفتوح لكل ما يريد ان يقوله لنا هذا الانسان الرائع و لكل عضو يريد ان يبحر معه في عالم من الجمال و العظمة ..

و ايضا هذا القسم لعرض اجمل معزوفاته علي الكمان فهي كنز لا يقدر بثمن ..

ونحن ننتظر ...

احبائى
اول شىء اتقدم بجزيل الشكر للمنتدى وللأستاذ أمير على طرحه الثقة الغالية فى شخصى المتواضع , وانا بكون اسعد انسان فى الدنيا لما اى انسان يتعلم منى شىء , وحكون سعيد اكتر لما تسكحوا وتسكعوا معزوفاتى المتواضعة على الكمان لأنها بتمثل كذاا قيمة يعنى خلاصة خبرتى فى سنين طويلة و وبالذات ان الفن ده اللى بيعزفوه ماتوا من زمان , واهم شىء انها معزوفاتى الخاصة فى بيتى مع نفسى يعنى ماعملتهاش عشان اتربح منها واكسب فلوس لكن عملتها لأحبائى اللى يحبوا يسمعوا الفن الجميل يضاف اليها اهم شىء ان معظم الاغانى او الموسيقى دى ربنا اكرمنى انى عزفتها مع اصحابها الاصليين . بس انا اتمنى انى اتعب عزيزى الاستاذ امير واسأله فى التقنية يعنى ينزلوا هنا فى المنتدى ازاى بحيث يكون سهل للجميع انه يسمعهم .
اول شىء احب اعرفكم بنفسى انا اسمى عادل صموئيل عندى بكالوريوس كلية تربية موسيقية وشوية دراسات عليا , بس انا طبيعتى كنت احب اتعلم كل حاجة بتتحرك قدامى او بتحصل على الكوكب اللى انا عايش عليه , واهم شىء عشان توصل لدرجة من الاتقان فى حياتك انك تكون محايد يعنى فى اى موقف تنسى انت مين وأصلك وفصلك ايه وانك مش طرف فى الموضوع , انا بحب اقعد فى مكان مظلم شوية وادخن شيشة وافكر .... بتخيل انى راكب سفينة فضاء وببص على كوكب الارض من بعيد , من مكانى بتشوف كل حاجة يعنى اى طرفين بيتصارعوا مين غلطان , لو ناس فكروا بالطريقة دى اكد كل المشاكل حاتتحل , اهم شىء افتخر بيه انى مصرى والكلمة دى كبيرة جداً , ولما نرجع للجذور ربنا اكرمنى بحاجة , انا اختى الوحيدة اسمها د / امال صموئيل وهى من كبار علماء الآثار وعشان انا اشطر منها فى الكمبيوتر بجميع خواصه كنت بكتب لها شغلها ورسائل الماجستير والدكتوراه وما فيها من لغات هيروغليفية ولوحات وكل مايخطر على بالك , طبعا عشقى للتعلم وحب الاستطلاع خلانى اقرأ واتمتع بالتاريخ والتحليل بالطبع , اكتشفت ان المصريين القدماء كان اكتر شعب فى العالم عنده النزعة الدينية ... يعنى كانت موجودة جذورها قبل الديانات السماوية بألاف السنين , آمنوا بالبعث والعالم الآخر وده واضح من المقابر واللى كانوا بيحطوا فيها كل الاشياء اللى بيستعملها الانسان عشان يوم البعث يستعملها وحتى حطوا له أكل وحبوب واوانى وكل شىء , وعلى المقابر رسموا كل شىء عن الحياة اليومية حتى للإنسان العادى يعنى طرق الزراعة والسلاح كل شىء كل شىء , وهنا اتوقف وأحلل يعنى هل هم كانوا متوقعين ان المقابر دى حاتتفنح فى يوم بعد آلاف السنين وحد حايشوف الكلام ده ويتعلم منه حضارة تذهل العالم ؟؟؟ وده بعكس مفهومنا عن المقابر اليوم انها الفناء يعنى ...
وداخل المقابر الاسرار يعنى سر الالوان اللى باقية الاف السنين واللى ماحدش توصل للسر ده وطبعا التحنيط يعنى كل العلماء حاولا وفشلوا , وانا بحثت كتير جداً اكتشفت ان جدودنا القدماء داخل المقابر كتبوا كتير من اسرارهم لكن فيه اسرار اخفوها , منها سر التحنيط واسرارخطيرة كتير منها السراديب الخفية داخل هرم خوفو , وانا حللتها تخيلت انهم احسوا بحواسهم السادسة والسابعة والثلاثين ان بعد الاف السنين حاتيجى حضارات غربية تظن انها متقدمة وتيجى هنا قدام اسرار علومنا وتعرف شوية وتحتار قدام الباقى لأنها مش ممكن حاوتصل له , يعنى تعامد الشمس على وجه الملك رمسيس الثانى مرتين فى السنة فى معبد الملك رمسيس الثانى فى ابوسمبل , ووجه الملك بعيد جداً عن الابواب يعنى سر مستحيل حد يتخيل بيحصل ازاى وفى زمن محدد والعالم كله بيحضر اللحظات دى , معجزة فلكية ومش طبيعية لأن المعبد بنوه اجدادنا وماحدش يتخيل حسبوها ازاى , وازاى المواصفات الهندسية , بإختصار انت لو شفتها حاتتجنن , من اهم الأشياء اللى تخليك تحس ان المصريين كانوا متدينين جدا المعابد الباقية .. يعنى اكيد كان فيه مبانى ومنازل لكن كلها ضاعت مع مرور الزمن وبقيت المعابد شامخة ليه ؟؟؟ لأن اهتمامهم بالمعبد كان بيخليهم يبنوه هائل الحجم ومن احجار ضخمة مصفحة عشان يقاوم الزمن وعوامل التعرية , انت النهارده لما بتبنى اى عمارة لها عمر افتراضى , لكن هم لما بنوا المعابد اول شىء انم كانوا بيتحدوا كلمة عمر افتراضى دى .... كانوا بيتخيلوا نظام الحساب بعد ما الانسان يموت ان حيكون فيه ميزان للحسنات والسيئات والكفة اللى اثقل هى اللى تحدد حايروح الجنة ولا النار , ومن أهم السيئات تلويث ماء النيل ... يعنى ممكن واحد بيعمل حسنات وبيرمى مخلفات فى النيل ,, راح النار حدف ... وكله كوم والإشاعات يعنى اشاعة عن وجود الزئبق الاحمر فى مومياوات قدماء المصريين و والأساطير عنه وانه بيستعمل فى القنابل النووية والمافيا وافلام رعب , والمضحك ان مفيش اصلا حاجة اسمها الزئبق الاحمر وإن وجد فى الكيمياء لكن مالوش علاقة اطلاقاً بالمومياوات وده كلام علماء آثار طبعاً , القصة المثيرة عن لعنة الفراعنة ... طبعا عندكم حب استطلاع ؟؟ احكى لكم , مقابر الملوك كان بيبقى فيها اطنان من الذهب بتكون مقتنيات المرحوم يعنى حتى العرش بتاعه والسرير الذهب وكل حاجة , وطبعا المصريين القدماء ما كانوش بالهبل اللى يخلى دخول المقابر سهل , يعنى اللى يحاول يدخلها لازم يدفع عمره , بس من وجهة نظرى ان كان عندهم احساس ان فى يوم حد حايدخلها والدليل كمية الحضارة اللى جواها والكتابات اللى ممكن تتعلم منها علوم كتير جداً لحد دلوقتى مطلوبة ولها قيمة , لعنة الفراعنة دى تخص لصوص الآثار فقط , يعنى انت لو اكتشفت بوابة المقبرة ( وطبعاً دى حكاية صعبة جدا يعنى تحتاج بحث لسنوات ) اول ماتفتح البوابة الحجرية الضخمة والمسدودة جداً تلاقى قدامك سرداب طولة مش اقل من 200 متر , السرداب ده بيحوى على الاقل عشر شراك خداعية من اعلى ماوصل اليه العلم , يعنى اقلها الواحد يلاقى الارض منبسطة يمشى يلاقى نفسه من حيث لايدرى وقع فى بير سحيق مالوش مخرج او يضغط على حاجة هو مش شايفها اصلاً تنزل عليه حجارة من حيث لايدرى تدفنه فى السرداب , وحتى لو تخطى كل الشراك دى ووصل لباب المقبرة الحقيقى , هنا الحرامى بيبقى مستعجل يدخل عشان يسرق الدهب اول ما بيفتح بيستنشق هوا فاسد فيه الموت وبكتيريا سامة بتعمل عنده مرض مش ممكن يعيش اكتر من اسبوع , ودى حاجة معروفة حتى فى المقابر اليوم يعنى لما حد بيتوفى لازم حد من الاسرة بيروح قبل ميعاد الدفن بساعات يفتح المقبرة تتهوا ,,, لكن علماء الآثار بيفتحوها بطريقة علمية وفنية وباجهزة بتتحدث على طول واول ما يوصلوا للمقبرة بيفتحوا فيها جزء ليتم اخراج السموم بطريقة علمية .
فيه معلومة مهمة احب تعرفوها الديانة اليهودية ماظهرتش فى مصر ولكن اليهود بعد ما اعتنقوا اليهودية اتوا الى مصر .. وعاشوا فيها فترة اكتر من 100 سنة ومش محددة لأنهم كانوا بيشتغلوا الوظائف الدنيا يعنى الخدم والعمال , والفترة مش محددة لن ماحدش فيهم عمل اى حاجة تتكتب او تتحسب فى التاريخ , بس الملحوظ ان كانوا حرامية يعنى الخادمة بتسرق صاحبة البيت يعنى اخلاقهم كانت مش ولابد ولكن نظراً لأن الدين المعاملة ( والكلمة دى قديمة جداً ) يعنى دينك ايه ؟ سلوكك ومعاملتك مع الناس بيحكوا عن دينك , ومع ان المصريين كانوا متعطشين للدين لكن الديانة اليهودية مادخلتش دماغهم لسلوكيات اليهود اللى مش هى ,,, وماحدش من المصريين اعتنق الديانة اليهودية , لكن لما ظهرت الديانة المسيحية المصريين كلهم اعتنقوها , ولما ظهر الإسلام وجاء عمرو بن العاص مصر , وبفضل اعمال جليلة وجميلة عملها الخليفة عمر بن الخطاب كتير جدا من المصريين اعتنقوا الإسلام يعنى لقوا فيه معانى جميلة وسامية , والملحوظ هنا والتاريخ مش بيكذب ومش بيخبى حاجة , يعنى العائلة الواحدة ابناءها ممكن واحد اعتنق الإسلام وواحد فضل مسيحى لكن عمر ما حصل ان حصل بينهم لا اختلاف ولا حرب ولافتنة , لأن الدين لله ومصر للجميع وحرية العقيدة مكفولة للجميع والكلام ده من 1400 سنة يعنى مش لسه حانقوله دلوقتى ... ده احنا لما بنقوله بنضيع وقت ثمين لأنه امر مفروغ منه .
التميز الخطير فى مصر انك فى منتصف الكرة الارضية ... يعنى انا دلوقتى قاعد على الكرسى بتاعى فى منتصف كوكب الارض مش مصدق هات مازورة وقيس الكروة الارضية من فوق لتحت ... والتميز ده كان اللى جاى من الشرق للغرب بيفوت على مصر ومن الشمال للجنوب لازم يفوت على مصر ... دى خلت مصر ملتقى كل الحضارات , يعنى اللى جاى من الصين اكيد بيجيب معاه حاجات صينى واكيد كنا بنتعلم منه ويتعلم مننا , لكن لو رجعت الى فجر التاريخ تلاقى مصر هى اللى ابتدت كل حاجة عملنا الورق من البردى والحبر والالوان والآلات الزراعية وادوات المطبخ والزجاج والكبريت يعنى صعب الحصر حتى الآلات الموسيقية ومع ان الغرب اخدها وطورها لكن احنا الاصل , حتى العربيات اول من اخترع عربية كانت العجلة الحربية بتاعة أحمس , بإختصار فيه اغنية وطنية لأم كلثوم اسمها طوف وشوف بتقول فيها : كان نهار الدنيا ماطلعش وهنا عز النهار ... الله يرحمك ياست وشوفوا الكلام الجميل يعنى كل اغنية ممكن تاخد منها اقوال مأثورة تتغلق على الحائط او شعارات !
اتمنى ان كلامى يعجبكم ويحوز رضاكم وانا نفسى تشتركوا معايا فى الحوار ونعمل المكان ده واحة جميلة وانا احب الاسئلة
مع اطيب تحياتى

مرحبا

الاستاذ عادل صموئيل
كم ازداد الموقع سمو بوجودك معنا
فلنا ان نفخر بوجودك معنا
وأبدأ بأول سؤال
هل الكمان هى وسيلة لاخراج احساس العازف ام هى وسيلة لاخراج امكانياته ؟
مع العلم بأننى على دراية بأن الكمان من أصعب الألات الموسيقية
مع وافر تحياتى لشخصك الكريم ...

الاستاذ الرائع / عادل صموئيل ..

بداية راااااائعة من حضرتك جعلتني اقرأ ما كتبته اكثر من مرة و في كل مرة اشعر انني أهيم و ارتفع عن الارض و أسمو عن كل الماديات و أحلم و انا في مكاني بقدسية الفراعنة في جو من الرهبه و الاحترام ..

أتمني من حضرتك ان تحكي لنا عن مالا نعرفه عن العظماء الذين تعاملت معهم عن قرب أمثال أم كلثوم و عبد الحليم حافظ و غيرهم من الكبار في زمن الفن الاصيل ..

احبائى
اولا اشكر الاستاذ امير على اتاحة الفرصة للحوار , وثانيا للرد عن موضوع ام كلثوم ... ام كلثوم مش مجرد مطربة ولكن ثورة او عصر , يعنى نقدر نقول قبل ام كلثوم وبعد ام كلثوم وعشان الكلام ياخد حقة حاكتب مقال الاول عما قبل ام كلثوم للتوضيح
اما الاخ العزيز المواطن الصالح سؤالك قيم جداً , يعنى الشباب دلوقتى مش بيشوف غير الاورج والجيتار والطبول مش بيعرف ايه قيمة الكمان لأنه مش بيشوفه بطريقة صحيحة , يعنى مفيش تركيز عليه زى زمان وعازف زى الحفناوى مثلا والناس تصقف له بتخلى الطفل يحب الكمان ونفسه يتعلمها , والكمان اصبح حاجة فى الفرق من ورا ماحدش يعرف قيمته ,
لما نتكلم عن هل الكمان وسيلة لإخراج إحساس العازف ام هى وسيلة لإخراج امكانياته , الجواب طبعاً الاتنين , بس محتاجة شرح ... يعنى الكمان فى مسكتها بتكون تقريباً متصله بكل كيان العازف , ولازم عازف الكمان يكون احساسة مرهف جداً جدا وبيطلع كل احاسيسه فى العزف , غير أى آلة تانية , اما عن اخراج امكانيات العازف هنا مشكلة يعنى محتاجة مع الامكانيات ذكاء وحس وتفهم , يعنى انا شخصيا لما بعزف لحن انا بقدم لك لحن الملحن بحاول اعزفه فى احسن صورة ولكن لحن الملحن بنسبة 95% وبصمتى الخاصة بنسبة 5%
لكن لو حاولت اتفزلك وابين انى جامد ممكن اللحن يتشوه , انا بعزف بتواضع وبساطة دلوقتى المشكلة الشباب فاهمين ان الكمنجة استعراض عضلات بيطلع كل امكانياته , بس لو انت حافظ اللحن اصلا حاتلاقى اللحن اختلف , وهنا عدم امانة فى نقل التراث , زى لما انت تقول بيت شعر لأحمد شوقى , ممكن واحد ضليع فى اللاغة العربية يغير كلمة فى البيت ممكن بنفس المعنى وحتى ممكن احلى من كلمة احمد شوقى لكن هنا دمر التراث , يعنى لو ضليع وعايز يتفزلك ويطلع مهارته يعمل هو لحن جديد لنفسه , الكمان ده كائن انا بحس انه حى مش جماد يعنى بيتفاعل معايا , الفرق بين عازف الاورج وعازف الكمان ايه مثلا , كل يوم بيخترعوا اورج جديد فيه امكانيات اعلى , تلاقى عازف الاورج يبيع القديم ويشترى الجديد , لكن الكمنجة وصلت لقمة تطورها فى عصر الباروك ( ايام باخ ) ماتطورتش تانى لكن الموسيقى والعزف عليها هو اللى تطور , الكمنجة الثمينة بتبقى يدوية الصنع يعنى الصانع بتاخد منه الكمان الواحد سنة كاملة عشان تطلع كمنجة عليها القيمة , بعدها لازم يشيلها فى مكان دافىء لمدة خمسين سنة عشان تتعتق وتبقى صالحة الاستعمال وغالياً اللى بيبعوها اولاده , وكل ماتمر السنين بتغلى انا كمنجتى عمرها 270 سنة , ولا تقدر بأى تمن لأن اللى بيعملوها ماتوا , وحتى لو اتوجد لسه حد فى اوروبا ممكن يعملها ثمنها حايكون رقم مفزع لأن لو حسبت الاجور فى اوروبا اللى واقف على عربية سندويتشات فى الشارع ( وهى شغلة اى حد مش متخصص فى حاجة ) لجره فى الساعة من 10 ـ 15 دولار والسباك او الميكانيكى يعنى الصنايعى المتخصص اجره 50 دولار فى الساعة , وصانع الكمان اللى بيكون واحد كل كذا مليون نسمة شوف اجره فى سنة كام ؟
بالنسبة لعوبة اكمان فى العزف , لو فيه اورج واى شخص عادى ممكن انا اقول له مكان دو رى مى فين يعنى اصابع حايضغط عليها ممكن بعزفهم فى دقيقة ( مش لحن طبعا ) لكن نفس الحروف محتاجى على الاقل سنة مع الكمان يعنى الفرق بين الجمال والنشار فى الكمان شعرة , بس بتحتاج انسان بيكون عنده حاجة داخلية ممكن ينفع يتعلم يعزف كمان مش اى شخص عادى , كان زمان اقل غناء فى الافراح فوق السطوح تلاقى مطرب وفرقة صغيرة , ان ما كانش المطرب مطرب يعنى والعازف عازف كان المعازيم يرموهم من فوق السطوح النهاردة تلاقى فرح فى صوان واحد واقف بيغنى زى اللى متشبعبط ع الميكروباص بيقول مطرية مطرية او امبابة وراه واحد على اورج ما يعرفش واحد % من الاورج ولا الموسيقى لكن بيستغل امكانيات الاورج الاليكترونية والدوشة والنقطة والليلة تتكلفت وسبوبة وخلاص
حتى بقوا يستعملوا دى جى مش حاتفرق , حتى القوس بتاع الكمان شعر ديل حصان , سلالة مخصوصة تتميز بغزارة شعر الديل وبتتربى فى اوروبا مخصوص عشان ياخدوا منها الشعر ده لأقواس الكمان زى خراف الصوف , النهارده الصين حلت المشكلة يعنى فيها مصانع الخشب بيدخل من ناحية يطلع من الناحية التانية كمنجات , هى شكلها جميل ككمنجة لكن عملياً هى قبقاب , ثمنها 300 بتنفع للتلاميذ , حاجة مهمة الكمنجة اليدوية كل كمنجة حتى لنفس الصانع لها طعم يعنى العازف ما يقدرش يغيرها طول عمره , يعنى انا لومسكت كمنجة تانية غير كمنجتى اللى معايا من اكتر من 40 سنة مش حاعزف عليها زى كمنجتى بيبقى فيه علاقة خاصة .
مع اطيب تحياتى

راااائع .. رااائع .. رااائع ..

االاستاذ عادل
كثيرا من ابناء جيلي يعتبرون ان التقنيات الصوتية هذه الايام هي افضل بمليون مرة من ايام زمان ولكن ارجو أن تشرح لنا وهذا أمر سبق وتناقشنا به ليفسر للبعض هذه التقنيات ومدى تشويهها للذوق العام ومدى أخفائها للعيوب الصوتية مع الاعتقاد بأن من واجب هذه التحديثات أن تثري الموسيقا لا أن تمسخها

احبائى
اولا اشكر كل من تفضل بالرد , وسؤال الاخت جيهان على درجة كبيرة من الاهمية , يعنى مثلا اليوم لو قارنت بفيلم قديم فى الخمسينات وفيلم معمول السنة دى والفرق بين التقنية الصوتية اليوم متقدمة الف ملرة عن تقنية زمان , تجد الصوت فى الفيلم القديم اروع الف مرة من صوت الفيلم الحديث رغم فروق التقنية الرهيبة , والسبب يرجع لمشكلتين , اولها دخول متطفلين على الفن وثانياً الكلفتة , يعنى زمان كان الفيلم بيتعمل فى سنة لأنه عمل فنى للذكرى والتاريخ ولازم يتعمل كما ينبغى , اما اليوم الفيلم بيتعمل فى اسبوع عشان يلموا الفلوس , كان زمان فيه حاجة اسمها صناعة السينما , يعنى لو مشهد بيتصور مثلا فى سوق الخضار فى وسط الزحام , كان المشهد بيتصور واثناء التصوير هناك مهندس مختص بيقوم بتسجيل الصوت للممثلين , بعدين المشهد بيتحمض ويطبع ويتعمل له مونتاج وكل ده من غير ما يكون عليه صوت اصلاً , لأن الكاميرا بتصور صورة فقط , بعدين فى استديو تسجيل صوتى على شكل سينما مصغرة , يحضر الممثلين ويشاهدوا المشهد على الشاشة , ثم يسمعوا من التسجيل اللى اتسجل اثناء التصوير صوتهم اللى اتكلموه عشان يحسوا الانفعال , يعدين يعرض المشهد تانى ويسجلوا بصوتهم على شريط صوتى جديد , بعدين الشريط ده يضاف عليه المؤثرات الصوتية يعنى الزحام فى سوق الخضار واصوات العناصر اللى انت شايفها على الشاشة يعنى حتى صوت عصفور على شجرة من بعيد لكن المهم ان يكون صوت الممثلين 80% من قوة المسموع عشان يبقى فيه تسمعه وسط الضجيج , بعد ذلك يتم تركيب الصوت على المشهد السينمائى , دى صناعة السينما وبتاخد وقت طويل لكن فى الآخر بيطلع منتج محترم الانتاج , دلوقتى عشان يوفروا الوقت بيصوروا ويسجلوا الصوت فى نفس الوقت طبعا ضجيج الشارع والمكان بيطلع فى التسجيل , كان زمان التصوير كله فى استديو يعنى بلاتوه بيتعمل فيه الحجرة التى مفروض التصوير فيها والبلاتوه بلا سقف عشان الاضائة تيجى من فوق جداً , وزوايا لوضع الكاميرا , دلوقتى بيصوروا فى شقة عشان التوفير وطبعا غير مجهزة فى التصوير , يعنى الإضاءة عشان فى الواجهة مش من فوق بتعمل خيالات للمثلين على الحوائط دائما وده المصور لو عمله فى امتحان التصوير فى معهد السنما حاينصحوه يشتغل على عربية كبدة لأن ده يثبت انه مالوش فى التصوير اصلاً , ده السنما لكن لما تيجى للغناء المصيبة اكبر بكتير , يعنى ايه واحدة جميلة , يعنى تقاطيعها جميلة خلقة ربنا من غير ماكياج , يعنى ايه مطرب يعنى صوته جميل على الطبيعة بدون اى مؤثرات , وإلا ماينفعش يبقى مطرب , يعنى مرة انا كنت مع عبد الحليم فى استوديو , وكان صدى الصوت لسه طالع جديد , المهندس قال له احط لك شوية صدى على صوتك ؟ عبد الحليم اعترض بشدة قال له لو انت حطيت لى صدى هنا تسجيل الاستديو لما اغنى فى حفلة الناس مش حايعرفوا صوتى , علما بان كل اللى بيغنوا اليوم بيطلبوا صدى الصوت وبدرجة عالية , المفروض ان الفنان ده بيبقى انسان موهوب ربنا حط فيه موهبة بتميزه على مليون شخص عادى المفروض ان مايبقاش فيه عيب زى فص الماس النقى , والمشكلة الخطيرة ان المؤثرات اللى شغلتها إضافة تحسين , اليوم شغلتها الاساسية انها تدارى العيوب الخطيرة فى الاصوات يعنى هل هذا منطق ؟ يعنى تسمع اليوم مطربة عملت 26 عملية تجميل طيب كان اصلها ايه ؟ يعنى 26 عملية تجميل ممكن تحول معزة إلى فرخة , وهذا ما يحاولون الوصول اليه اليوم , يعنى اتفرج على ام كلثوم تلاقى على المسرح 3 ميكروفونات وشوف درجة الصوت , واليوم تلاقى 60 ميكروفون ومش سامع غير ضجيج , حتى صوت المطرب مش باين او على الإصح مقصود انه يكون بعيد عشان ماتحسش بالرداءة , يعنى شوف ام كلثوم او عبد الحليم كان صوته كام % من المسموع , فيه ظاهرة لما مطرب بيغنى فى فيلم اليوم تحس ان الصوت اللى بيمثل بيه حاجة واللى بيغنى بيه حاجة كانه وقع فى بلاعة وصوته جاى من تحت الأرض , انا مرة كنت مع عبد الوهاب بنتفرج على تطوير استوديو فى الإذاعة لأحدث حاجة فى العالم ,,, عبد الوهاب تأمل فى الديسك ( اللى بيحتوى على آلاف الأزرار ) وتأمل وحط ايده عليه وقال : ومن العلم ماقتل .......
يعنى كان زمان فيه مهندس تسجيل صوت شهير اسمه نصرى عبد النور .... وشوف حلاوة تسجيلاته يعنى هو اللى مسجل كل أغانى الافلام القديمة ,كان الجهاز اللى بيسجل بيه يشبه بابور الجاز ,,, والديسك بسيط جدا تحس كانه عامله على ايده .... لكن شوف الفرق بينه وبين تسجيلات اليوم ... عبد الوهاب لما ققال ومن العلم ماقتل تنبأ ان الاجهزة الحديثة دى حاتقتل الفن ... لأن الاجهزة البدائية زمان كان لازم اللى يتعامل معاها يكون فنان لأنها حاتكشفه ... لكن الاجهزة الحديثة ممكن على اى صوت لايصلح انها تضيف عليه مؤثرات تغطى على عيوبه ... حتى لما تشوف حفلات زمان إضاءة ثابتة والطرب اكبر تركيز عليه عشان تسمعه ... النهاردة اضاءات متحركة وليزر ده عشان ياخد عينك ويعمل لك جو من القلق ماتحسش بالفراغ اللى بيعمله اللى بيغنى , كان زمان الحفلة هدوء وصمت .. والعيون مركزة على المسرح على المطرب والفرقة , والناتج النهائى قيمة اعمال زمان الكبيرة وتفاهة اعمال دلوقتى , وعايز اقول كلمة خطيرة جدا بإختصار الفن ده مهارة من الانسان ذاته , يعنى بآلة بدائية زى العود مش بالتكنولوجيا , يعنى مثلا عندنا فى خان الخليلى كان زمان فيه اطباق نحاس وفيه فنان بيمسك الطبق , ومعاه شاكوش وازميل دقيق بيحفر عليه رسم من اروع روائع الإبداع , او فنان بيلزق صدف على علبة خشب , النهاردة فى الصين فيه مكبس تحطى عليه الطبق وتدوسى على زرار يطلع منحوت هل ده يسمى فن ولا اليدوى , والصدف بقى استيكر بيتلزق جاهز على العلبة الخشب يعنى ممكن اى حد يعمله , يعنى هنا فيه فرق بين الفنان والانسان العادى المؤثرات بإختصار بتشبه الإنسان العادى بالفنان وده مش مكسب ولكن خراب للفن نفسه
مع اطيب تحياتى

معلومات جميلة وقيمة جدا جدا
شكرا جزيلا لك أ.عادل صموئيل الفنان الرائع فالكمان من الآلات المريحة جدا للأعصاب خصوصا في ظل توترات هذه الأيام
وشكرا جزيلا للأستاذ أمير الذي أتاح لنا هذه الفرصة الجميلة من خلال هذا الموضوع المتميز

معلومات لا تقدر بثمن ..

الف تحية للاستاذ المحترم عادل صموئيل ..

الاستاذ الراااائع / عادل صموئيل ..

هل نطمع من حضرتك ان تختار لنا بعض من روائعك الشخصية التي عزفتها علي الكمان ..

لو وافقت حضرتك - و لك كل كامل الاختيار - و أذنت لنا بهذا الشرف الكبير نطمع ان تضع حضرتك روابط هذه الكنوز ..

احبائى
اشكر الأستاذ امير على إتاحة هذه الفرصة لكى اسمعكم بعض اعمالى
وأبدأ بالمجموعة الاولى من عزفى المتواضع على الكمان اتمنى ان يعجبكم
وان شاء الله لو عجبكم العزف انزل لكن الباقى
1 ـ من احلى اغانى عبد الوهاب همسة حائرة
http://www.mediafire.com/?v7x76rfx45boes0

2 ـ ليالى الشرق عبد الوهاب
http://www.mediafire.com/?bya95qpnash5f2p

3 ـ ودارت الأيام كاملة لأم كلثوم
http://www.mediafire.com/?6g8n4lbkv92nk90

4 ـ يا مالكا قلبى عبد الحليم
http://www.mediafire.com/?441ha2gzbsknzxe

اتمنى من كل قلبى ان تعجبكم المعزوفات وان شاء الله انزل لكم كل ماعندى
مع اطيب تحياتى

[color=cyan]t=Arial]]ملحوظة
بعد الضغط على الرابط تظهر لك صفحة فوق على اليمين يقول لك انتظر خمس ثوانى
ثم تظهر كلمة skip aid اضغط عليها يظهر الرابط[/size][/font]

الاستاذ الرااااائع / عادل صموئيل الفنان الاصيل ..

سمعت ال 4 معزوفات اكثر من مرة و سرحت معها لأتذكر ايام الفن الاصيل الراقي المحترم ..

تحية كبيرة لحضرتك علي هذه الروائع التي لن تنتهي ابدا و لن تنسي مهما مرت الايام و السنين ..

الف الف شكر لحضرتك ..

الأخ العزيز أ / أمير

اشكرك من كل قلبى على ردك الكريم
وان شاء الله سأنزل معزوفاتى تباعاً هنا على المنتدى
مع اطيب تحياتى

معزوفاتك رائعة أستاذ عادل ونريد المزيد
حضرتك فنان رائع

احبائى
اولا اشكر الاستاذ امير والدكتورة ننوسة
واقدم لكم كلمتين ومعزوفة
كل ثقافة او حضارة او اختراع او فن , بيكون نابع من جذور قبله لأى انى شىء لا ينبع من فراغ , وللحديث عن الجذور , لو انت شاهدت خريطة العالم وتنظر ناحية شبه الجزيرة العربية , المنطقة الصفراء الصحراوية المترامية الاطراف , ونشوف الحياة فيها قبل ظهور الإسلام , كانت صحراء واسعة مافيهاش انهار , كانت مجموعة من القبائل وبيسودها قانون الغاب , يعنى القبيلة القوية تهجم على الضعيفة وتأخذ اموالها وابنائها وبناتها وتبيعهم فى سوق العبيد , والحياة كانت شوية رعاة غنم وشوية نخيل وشوية خيل , وكانت التجارة بينها وبين الجوار محدودة لأن الطرق لم تكن آمنة , يعنى كان فيه قطاع طرق والقوافل كان معظمها بيتنهب , وكانت القافلة تضطر ان تستعين بعدد كبير من المقاتلين لحمايتها مما جعل التجارة مكلفة جداً , وبالرغم من التأخر الحضارى الكبير , كان فيه تقدم عكس ده تماماً , يعنى كان فيه مايسمى بالشعر الجاهلى وكان متقدم بدرجة كبيرة جداً , وبالرغم من تفشى الأمية إلا ان العرب كان معظمهم بيحفظ الشعر ده ويردده , يعنى كان واحد أمى لكن حافظ آلاف الأبيات ,
والشعر العربى اللى احنا نعرفه الآن خرجت بدايته من المكان ده , والغريب ان النهاردة لو استاذ دكتور فى كلية الآداب مسك قصيدة من دول وفحصها باقصى ما وصل اليه العلم مش حايلاقى فيها غلطة علمية , يعنى االاوزان والبحور والقوافى والجناس والطباق والتشبيه والكناية وكل ما يزخر به علم الأدب متوافر فى القصائد دى , وكان الفضل لظهور الإسلام انه جعل المنطقة دى دولة , ولولا ظهورة لبقيت المنطقة دى على حالها الى اليوم , لأنها المنطقة الوحيدة فى العالم اللى الغزاة لم يلتفتوا اليها , لأن الصحراء معناها الجيوش لو دخلت فيها حاتموت من العطش , لكن ظهور الإسلام وجعلها دولة , ودخلت المجتمع الدولى , نقل الفنون دى للعالم كله , من أهم الفنون اللى اتنقلت العمارة الإسلامية , وبعض الفنون الأخرى والتى لم يعرفها العالم إلا عن طريق المسلمين فنون الخشب والتى تسمى الأرابيسك , ولما دخل الإسلام مصر اتى الفنانون العرب وبدءوا فى بناء المساجد , وعادة الفنان بيتأثر بالفن يعنى العمارة كانت زمان مش مجرد مبانى ولكن طابع فنى ودليل على عصر يرجع اليه فيما بعد , ولو تلاحظ لو زرت مصر القديمة وجود كنائس ومساجد وقد تأثر الفن القبطى بالإسلامى والعكس يعنى فى الكنائس دخل فن الأرابيسك وده ماخوذ من الفن الإسلامى ,
لما نرجع للأدب والشعر الجاهلى كان فيه خطورة على الفن الرائع ده لأن اى فن أو فكر بيحتاج حفظ للزمن , والحفظ يعنى الكتابة , ونظراً لإنتشار الأمية كان القصائد بتتداول بالتلقين يعنى الناس بتسمعها وترددها وتتناقلها , والتلقين ممكن القصيدة مع التداول يطير منها ابيات او ممكن تندثر كلها .
انت اليوم لو حبيت تروح فرنسا بتركب طيارة بعد 4 ساعات بتكون فى فرنسا , لكن قبل 500 سنة كنت بتسافر المشوار ده بالراكب الشراعية يعنى تاخد 6 شهور , المركب تطلع من مصر ولازم تقف اسبوع فى كذا ميناء للمؤن , وطبعا الراكب بينزل يتفرج على بلاد الدنيا ويتعلم , كانت الحياة بطيئة جداً ولكم يكن البطء ده ممل , ولكن كان جميل لأن الانسان كان بيستفيد من الوقت .
من 500 سنة كانت فيه نهضات فنية يعنى كان عندنا فى مصر موسيقى وغناء وشعر وأدب وكل الفنون , ولكن كانت المشكلة احنا النهاردة مانعرفش موسيقاهم كانت إيه , لأن الموسيقى عشان تحتفظ بيها لازم إما التدوين الموسيقى أو التسجيل الصوتى , والميزتين دول ما كانوش موجودين , وجذور حضارتنا المصرية الموسيقية بدات من أوروبا , من 500 سنة فى عصر الباروك , وسمى بهذا الإسم لأن كانوا بيلبسوا باروكة زى الطرابيش عندنا , فى هذا العصر حدث تطور كبير جدا فى الموسيقى الاوربية , وحدث إرتقاء فى تطوير الآلات الموسيقية , انت لما تشوف النهارده اوركسترا سيمفونى فى الأوبرا كل الآلات دى وصلت للدرجة دى من الإتقان فى عصر الباروك ولم تتطور بعد ذلك لأنها وصلت للكمال , لكن كان المشكلة فى التدوين الموسيقى , لأن مع التطور ظهر التوزيع يعنى خطوط لحنية مع اللحن الأصلى , يعنى انت لما تسمع موسيقى كلاسيكية , بيكون لحن اصلى وعليه مجموعة متناسقة من جمل موسيقية بتتركب عليه , وده صعب جدا تنفيذه لما يكون العازفين بيعزفوا سماعى , وظهرت الحاجة الشديدة للتدوين الموسيقى , وبدأ العلماء فى اختراع عدد من الطرق فى التدوين , إلى ان وصلت وبسرعة طريقة التدوين واللى احنا بنستعملها اليوم ( من 500 سنة ) , والتميز الخطير فى االنوتة الموسيقية انها لغة زى أى لغة لكن تميزها ان اللغة دى بيستعملوها فى كل دول العالم يعنى انا ممكن مطرب هندى انا ما أعرفش هندى يدينى النوتة انا اعزف اللى قدامى وهو يغنى براحته , وكان من اهم مميزات التدوين تبلور علم الموسيقى وظهور النظريات الموسيقية , والإحتفاظ بكل المؤلفات الموسيقية كما عملها اصحابها , يعنى النهاردة انت لما تسمع سيمفونية لبيتهوفن معمولة من 350 سنة , كل اللى حاتسمعه زى ما كتبه بيتهوفن من 350 لايزيد او ينقص حرفاً والفضل للتدوين الموسيقى , وأغرب معلومة ممكن تتخيلها ان بيتهوفن فى منتصف عمره بدأ يصاب بالصمم التدريجى حتى وصل إلى الصمم الكامل والمعجزة هنا ان هذا العبقرى الفذ الف نصف اعماله وهو فى درجة الصمم , ولوا التدوين وانه كان بيدون اعماله بنفسه , لما ولدت تلك الاعمال اصلاً .
واستمر الاوربيون يدونون اعمالهم واحنا نعزف سماعى وبالتلقين إلى نهاية القرن التاسع عشر , بدا الموسيقيين الناشطين فى مصر يحسوا ان الموسيقى ممكن يتم تدوينها , وللعلم كان عندنا علوم موسيقية خطيرة لايعرفها الغرب , يعنى نغمات عندنا ( تسمى الربع تون ) ومقامات كثيرة جداً ولكن كلها كان يتم التعامل معها بالفطرة , إلى أن حدثت المعجزة وبدأ الفنانون المصريون يسافرون إلى إيطاليا لتعلم الموسيقى والتدوين , وعادوا إلى مصر حاملين معهم كل الفنون والعلوم ليطبقوها على موسيقانا , ومنذ اول القرن العشرين بدأت تدب فى الموسيقى المصررية حياة جديدة , وهى التقنين والحفظ للتراث من الضياع , وهذا ما اوصلنا لما نجن فيه اليوم , يعنى انت تسمع اسماء موسيقيين عظام مثل عبده الحامولى , ومحمد عثمان وكامل الخلعى وسلامه حجازى , كا العظماء أولئك لولا التدوين ما كنا سمعنا عنهم اليوم إلا أسمائهم فقط , والأسماء بالطبع لاقيمة حقيقية لها بدون ذكر الأعمال .
لكن بقيت مشكلة يعنى الموسيقى زمان فى مطلع القرن العشرين كان ليها طابع , يعنى بالبلدى اكن زى ماقلت الوقت بطىء والاغانى كانت مرحرحة , يعنى كان زمان قالب غنائى اسمه الدور كان المطرب يغنى الدور ده فى 3 ساعات , والدور ده كان بإختصار زى اغنية ياللى سامعنى قول يانور عينى بتاعة عادل مامون , هى مش دور بالتحديد لكن يعنى بتقول الدور كان شكله كده , طبعاً احتاج العصر الأحدث لتطوير , لكن نفد من الإندثار عدد كبير جدا من الاغانى الشعبية المصرية لن كلامها كان جميل والحانها احمل وسهلة مش معقدة , من الأمثال : آه يازين العابدين ياورد مفتح جوا البساتين واللى سما شهداء الثورة الورد اللى فتح فى الجناين اكيد كان متأثر بالجملة دى , وجاء العظام الجدد امثال محمد عبد الوهاب والسنباطى وزكريا احمد عملوا الاغنية الصغيرة والسريعة نسبياً وسميت الطقطوقة ,
لكن فيه عنصر مهم جداً , فى التطور يعنى لازم يكون التطور مقنن ومحدود جداً وأهم شىء مراعات الهوية , والهوية دى شخصيتك وطابعك امام العالم , الملحنين العظام امثال عبد الوهاب والسنباطى ومن عاصرهم طوروا الموسيقى العربية وخلقوا لها هوية وشخصية بدأت من تطوير الفرقة الموسيقية , يعنى قبلهم كانت الفرقة عبارة عن تخت شرقى بيتكون من خمس آلات كمان وناى وعود وقانون ورق , لكنهم كبروا الفرقة وصارت اكتر من 10 كمنجات و3 شيللو وكونترباص والملحوظ هنا ان الكونترباص كان بيعزف بالنبر يعنى بيعطى إيقاع منغم , والإيقاع طبلة ورق , كانت دى سمة الموسيق المصرية فى اول الأربعينات ,
كانت الاغانى اربع انواع يعنى اغنيى دينية واغنية وطنية ونشيد وطنى واغنية عاطفية , والشىء الجميل ان الاربع انواع كانت فى نفس القمة ونفس الجمال , ونفس القيمة والقوة , يعنى ما كانوش بيركزوا على الاغنية العاطفية ويهملوا باقى الانواع , والجيل الجديد ما كملش اطريق ده بدليل انك ماسمعتش خلال ال 20 سنة الماضية اغانى دينية أو وطنية لها نفس القيمة , فيه حاجة مهمة عازف الآلة الوترية بيخرج كل احساسه فى العزف , يعنى انا لما اعزف اغنية دينية بتتملكنى ؤوح غير اللى بعزف بيها اغنية عاطفية وهكذا , ايام العدوان الثلاثى مثلا كانت اناشيد حماسية مثل : انا النيل مقبرة للغزاة ... انا الشعب نارى تبيد الطغاة ... انا الموت فى كل شبر إذا ... عدوك يامصر لاحت خطاه ... كان الجنود بيسمعوا الاناشيد دى بتتملكهم قوة من فوق بيدخلوا على الاعداء ياكلوهم , والشعب بتكون الجبهة الداخلية مشحونة زى الجبهة الأمامية , الآلات الكهربائية مش بتدى الاحساس ده والفرق واضح عندك فى الثورة لما بتشوف الاناشيد الجديدة المعمولة للثورة تحس الموسيقة هفتانة يعنى عندها انيميا , يعنى المظاهرات والدبابات الصورة حاجة والصوت مش راكب على الصورة , بخلاف لما يجيبوا اغنية لأم كلثوم أو عبد الحليم أو عبد الوهاب تحس ان الصوت بحجم الدبابات والمظاهرات ...
واقدم لكم من معزوفاتى الاطلال كاملة لأم كلثوم اتمنى تسعدكم

http://www.mediafire.com/?hlb3qpz55h988px

مع اطيب تحياتى

الاستاذ المحترم و المثقف جدااااا / عادل صموئيل ..

عندما أقرا كلام حضرتك أتوه و أسبح في عالم من الخيال و الروعة و أهيم في عالم ساحر يندر أن يكون فيه شخصا مثل حضرتك ذو ثقافة عالية جدااا و روحك السمح يتجلي في كل جملة تكتبها ..

جاري الان تنزيل معزوفتك الراااائعة قصيدة الاطلال ..

شكرا يا استاذ عادل على الوجبة الثقافية الممتعة دى

و فعلا اللى يدرس شعر جاهلى أو يقرا فيه و فى فنونة يستغرب الناس دى ازاى كانوا بيظبطوا أوزان الشعر و القافية بالصورة العجيبة دى .. القصيدة ممكن تبقى ألف بيت و ما فيهاش حتى حرف بره الميزان .. و سبحان الله من جعل تحديهم بالقرآن الكريم

بس كنت حابه أعلق على جزئية حفظ الأدب أو الشعر الجاهلى بالتدوين :
"لما نرجع للأدب والشعر الجاهلى كان فيه خطورة على الفن الرائع ده لأن اى فن أو فكر بيحتاج حفظ للزمن , والحفظ يعنى الكتابة , ونظراً لإنتشار الأمية كان القصائد بتتداول بالتلقين يعنى الناس بتسمعها وترددها وتتناقلها , والتلقين ممكن القصيدة مع التداول يطير منها ابيات او ممكن تندثر كلها ."

ممكن اختلف مع حضرتك يا استاذ عادل فى الجزئية دى .. يعنى معلوماتى ان العربى القديم كانت ذاكرته فولاذية بكل ما تعنيه الكلمة من معنى يعنى كانت تشبه الصحراء فى امتدادها و لا نهايتها فى البيئة دى .. فالحفظ فى الذاكرة فى هذا العصر كان أفضل وسيلة للحفاظ على هذا الموروث الأدبى خصوصا ان الكتابة العربية فى هذا الوقت لم تكن تحتوى على النقاط يعنى ب زى ت و س زى ش و هكذا .. فبالتالى كان الحفظ الشفوى فى العصر ده و حتى بعد كده يمكن للعصر العباسى كمان أفضل كتير من التدوين .. و اعتقد ده رأى كتير من الباحثين
و الدليل ان احنا وصلنا الشعر الجاهلى بدون غلطة لا فى ميزان أو قافية

بالنسبة للفرق بين أناشيد و أغانى الثورة زمان و اللوقتى فممكن نقول انها زى الفرق بين عبد الحليم حافظ و شادى شامل .. كل فرق بين زمان و اللوقتى فى الفن خصوصا زى تمام الفرق بين عبد الحليم و شادى شامل
عارف شادى شامل يا استاذ عادل ؟

الشكر كل الشكر للأخ العزيز أ / امير على رده الرائع

انت عارف يا استاذ امير ان من اهم اسباب نجاح فن الزمن الجميل اول حاجة الوعى العالى جدا عند الجمهور وهو اللى كان بيخلى الفنان يبدع كل مرة اكتر واكتر , لأن الفنان زمان كان بيفكر فى القيمة والذكرى والتاريخ والدليل شوف النهارده بعد ما ماتوا بكام سنة مازالوا متواجدين

اشكرك يافرحة على تعقيبك واللى بيدل على ثقافة عالية مع الاسف ما بقتش موجودة النهارده , اكيد العرب كان عندهم ذاكرة ذرية مش موجودة الايام دى لكن دايما خطورة اى فن من غير حفظ مادى اكيد بيكون فيه فاقد حتى ولو 10% , اما عن شادى شامل وعبد الحليم يعنى ممكن تسمعى وجهة نظرى الخاصة جداً , ايه الفرق بينى وبين اى مواطن عادى ؟ اولا انا خبير فى الموسيقى والغناء يعنى عبد الحليم ظاهرة فى الغناء لن تتكرر و والسبب الاول انه ظاهرة انه بجد مش ممكن يتكرر تانى يعنى فلتة من فلتات الزمن ( وكل فنان كبير فى عصره كان فلتة من فلتات الزمن ) ولو كان قابل للتكرار ما كانش حايبقى فلتة من فلتات الزمن , اما شادى شامل انا ممكن انزل مصر من اولها لآخرها اجيب لك نص مليون واحد اد شادى شامل , والسبب الثانى انا عشت مع عبد الحليم 7 سنوات يعنى كان صديقى وشفته فى حياته الخاصة ولما كان بيبقة فى غرفته ولما بيخرج يسهر ومع اصحابة و يعنى مسلسل العندليب انا بعتبره شىء فاشل , لأن تركيبة الفنان اللى زى عبد الحليم او ام كلثوم مش اللى بتشوفيه على الشاشة ولكن كله فى قلب بعضه , والمسلسل لخبط او شوه التركيبة دى , واكرر بخبرتى الموسيقية ان المقارنة بين عبد الحليم وبين اى حد بيغنى دلوقتى من الناحية الفنية زى ماتقارنى هرم خوفو بزلطة على الارض بجوار الهرم , او بقطعة غيار اصلية وقطعة غيار من تايوان , ممكن حد يقتنع بكلامى لكن اللى عاش عصر عبد الحليم وتعايش مع عبد الحليم شخصيا يحس ان المسلسلات اللى بتتعمل عنهم دى تعتبريها سبوبة وأكل عيش مالوش علاقة بيهم اصلا , بعنى انا لو مخرج وعايز اعمل عمل عن عبد الحليم , اعمل برنامج اجمع فيه نخبة من كل الافلام والبرامج والصور والفيديوهات عن عبد الحليم يعنى ساعة تشوفى فيها كل مايمكن عن عبد الحيليم الاصلى مش حد بيقلده , انتى شفتى مسلسل اسمهان ؟ يعنى الاهانة وصلت فيه لنهم خلوا واحدة تغنى كمان اغانى اسمهان , يعنى اللى عمل المسلسل ده انا بعتبره بتاع بطاطا مش فنان لأن احلى حاجة فى ااسمهان صوتها االنادر مش قصة حياتها اللى ماتهمش حد فينا
مع اطيب تحياتى واشكرك لتواجدك معانا فى الموضوع

الاستاذ المحترم / عادل صموئيل ..

حضرتك طرحت نقطة هاااامة جدا و هي ان مسلسل العندليب سئ جدا و لا يعبر نهائيا عن عبد الحليم حافظ الذي عشنا معه و الذي يعرفه جيلنا جيدا .. هذا المسلسل صدمني صدمة كبيرة جدا و انا اشاهده و كأنني اشاهد قصة حياة شخص اخر تماما غير عبد الحليم حافظ للاسف الشديد ..

الف الف الف شكر لحضرتك علي هذه الوجبة الدسمة ..

استمعت الي موسيقي قصيدة الاطلال لحضرتك و احب ان اقول انك استاذ كبير جداااا .. كأن الكمان تتكلم و تتحدث .. رااااااااااااااااااائعة جدااااااااااااااا ..

مش عارف أقول ايه و اشكر حضرتك ازاي علي هذه الرواااااااااااااااااااااائع ..

الف الف الف الف الف الف الف الف الف الف الف الف الف شكر لحضرتك ..

الأطلال

شعر : إبراهيم ناجي

غناء : أم كلثوم

يا فؤادي لا تسل أين الهوى
كان صرحاً من خيال فهوى
اسقني واشرب على أطلاله
واروي عني طالما الدمع روى
كيف ذاك الحب أمسى خبراً
وحديثاً من أحاديث الهوى
لست أنساك وقد أغريتني
بفم عذب المناداةِ رقيق
ويد تمتد نحوي
كيدٍ من خلال الموج مُدت لغريق
وبريق يظمأ الساري له
أين في عينيك ذياك البريق
ياحبيبا زرت يوما أيكه
طائر الشوق أغنى ألمي
لك إبطاء المذل المنعم
وتجني القادر المحتكم
و حنيني لك يكوي أضلعي
والتواني جمرات في دمي
أعطني حريتي أطلق يديا
إنني أعطيتك ما استبقيت شيئا
آه من قيدك أدمى معصمي
لم أبقيه وما أبقى عليا
ما احتفاظي بعهود لم تصنها
وإلام الأسر والدنيا لديا
أين من عيني حبيب
ساحر فيه عز وجلال وحياء
واثق الخطوة يمشي ملكاً
ظالم الحسن شهي الكبرياء
عبق السحر كأنفاس الربى
ساهم الطرف كأحلام المساء
أين مني مجلس أنت به
فتنتة تمت سناء وسنى
وأنا حب و قلب هائم
وفراش حائر منك دنا
ومن الشوق رسول بيننا
ونديم قدم الكاس لنا
هل رأى الحب سكارى مثلنا
كم بنينا من خيال حولنا
ومشينا في طريق مقمر
تثب الفرحة فبه قلبنا
وضحكنا ضحك طفلين معاً
وعدونا فسبقنا ظلنا
وانتبهنا بعد ما زال الرحيق
وأفقنا ليت أنا لانفبق
يقظة طاحت بأحلام الكرى
وتولى الليل والليل صديق
وإذا النور نذير طالع
وإذا الفجر مطال كالحريق
وإذا الدنيا كما تعرفها
وإذ ا الأحباب كل في طريق
أيها الساهر تغفو
تذكر العهد وتصحو
وإذا ما التأم جرح
جد بالتذكار جرح
فتعلم كيف تنسى
وتعلم كيف تمحو
يا حبيبي كل شيء بقضاء
ما بأيدينا خلقنا تعساء
ربما تجمعنا أقدارنا
ذات يوم بعدما عز اللقاء
فإذا انكر خل خله
وتلاقينا لقاء الغرباء
ومضى كل إلى غايته
لاتقل شئنا
فإن الحظ شاء

احبائى
اولا اشكر الاستاذ امير على رده الجميل , انت قلت على مسلسل عبد الحليم انه سىء ولو شاهدت الفيلم اللى عمله احمد زكى وشفت كان بيقلد عبد الحليم ازاى يعنى احساس مقرف ومقزز , يعنى كان بيقلد عبد الحليم كأنه واحد متكهرب او عنده شلل رعاش وعبد الحليم مكانش كده , يعنى لو شفت عبد الحليم فى اى حديث تليفزيونى كان بيتكلم عادى جداً , والمشكلة انا عشت مععبد الحليم فترات طويلة جدا يعنى كانت تصرفاته غير الكلام ده خالص , والمشكلة ايضا الناس المهمين اللى كانوا حوالين عبد الحليم والللى انا شفتهم واعرفهم شخصياً ولا واحد منهم كان كده , انا فى حياتى الطويلة فى الوسط الفنى , يعنى لما تعزف مع العمالقة اكيد حتتقابل مع كل العمالقة من شعراء وكتاب وصحفيين , وممثلين ومخرجين وجميع العاملين فى الاوساط الفنية الأخرى , والعمل الدرامى كان زمان محترم , يعنى انا اتقابلت كتير مع نجيب محفوظ مثلاً ... كان بيكتب القصة ازاى ؟ من نماذج بيشوفها فى الحياة العامة بيختار نماذج وبيخترع لها حياة بكل سلوكياتها , يعنى انت لو شفت اى شخص فى الشارع او على القهوة انت بتشوف شكله الظاهرى , لكن المؤلف لما بيحطه فى قصة بيخترع له سلوكيات فى الشارع وفى البيت وفى الحياة عموماً , كمان المؤلف بيخترع له ضمير وعقل باطن , يعنى بيخليك تعرف اسراره , وعلاقته الخاصة جدا بكل ابطال الرواية ودى انت مش ممكن حاتشوفها فى الحياة العامة , والغرائب يعنى ممكن واحد محترم بالنهار زى السيد احمد عبد الجواد وبالليل كان صايع , وممكن يحط شوية فلفل وشطة فى القصة يعنى جريمة او مكائد او شوية كيد نسا , لكن فى الآخر هى شخصيات اخترعها المؤلف وبيحركها زى عرائس مسرح العرائس , لكن ما ييجى مؤلف ويعمل قصة عن حياة فنان مشهور والمجموعة اللى حواليه , حتى لو عنده فكرة عن شكلهم الخارجى لكن مش ممكن حايدخل جوا مخهم ويعرف كانوا بيفكروا ازاى , او بيعملوا ايه خارج الاضواء , وهنا الشخصيات دى كلها بتشوه , انا بسمى ده افلاس فنى , يعنى زى ما نجلاء فتحى اول ما ابتدت عملت إعادة لكام فيلم من افلام فاتن حمامة وشوهتهم , لأن فاتن حمامة من النماذج اللى مش ممن تتقلد وكمان الموضوع مش فاتن حمامة ولكن الكاست اللى كان معاها فى الفيلم يعنى محمود المليجى وعماد حمدى وفاخر فاخر ... الخ كل دول مش ممكن يتكرروا تانى , التميز فى الكاتب المحترم انك ماتقدرش تاخد عليه غلطة فى الكتابة , بمعنى انه فاهم بيكتب ايه .. لما كان نجيب محفوظ او انيس منصور بيكتب قصة فيها جريمة كان لازم يسأل اصحابة واحد ضابط وواحد محامى وخبراء فى علم الجرية عشان يديك فيلم عن جريمة محكمة , ويبين لك مهارة الشرطة وعدالة السماء فى كشف الجريمة المحكمة لأن ده درس , لكن المؤلفين بعد كده بقوا يعملوا جريمة هبلة , حاجة تانية لما يكون فى الرواية مشكلة طبية لازم يسأل طبيب متخصص بحيث تطلع الرواية مقنعة لو اى طبيب شافها , واسوأ شىء الاستخفاف بعقلية الجمهور , يعنى مثلا مقارنة بين فيلم امريكى وفيلم عربى فيهم اطفال , فى الامريكى اسم الطفل بيكون مكتوب وسط اسماء الممثلين الكبار عندنا بنكتب والطفل فلان , هناك بيتكلموا مع الطفل على اسا انه كبير عندنا بنتكلم معاه على انه طفل , ودى بتختلف لأنها بتخلى الطفل عندنا ينضج فى سن كبير جداً , وعندهم الطفل تحس انه راجل من سن 12 سنة , زائد ان خلال العشر نوات الماضية كان كل المسلسلات ابطالها عندهم شركات او مجموعة شركات وكلامهم بالمليارات طيب هى مصر كلها كده ؟ وفين مشاكل باقى المصريين ؟ طبعا ماحبيتش اجى بإيدى فاضية , اقدم لكم من اروع ماغنت ام كلثوم اراك عصى الدمع , من شعر ابو فراس الحمدانى وتلحين رياض السنباطى ( طبعا لو سألت تامر حسنى تعرف ابوفراس الحمدانى حيقول لك ده واحد على عربية كبدة فى باب الشعرية )
فى العصر ده كان الشباب بيغنى الاغانى دى وشوفوا فرق الثقافة بين الايام الجملة ودلوقتى ,
ويسدنى ان اقدم لكم هذا النوع الرائع من الفن واللى مش ممكن نسمعه دلوقتى لأنه صعب جدا واللى ممكن يعزفوا ماتوا من زمان
مع اطيب تحياتى

http://www.mediafire.com/?e1sbowf921euncf

.

فعلا الفيلم اللى عمله احمد زكى و كان بيقلد فيه عبد الحليم حافظ مقرف ومقزز جدااااا لاقصي درجة و لا يمت باي صلة للعندليب الذي عايشناه في كل فترات عمرة .. و ياريت التليفزيون يبطل اعادة المسلسل و الفيلم لانهم شئ مخالف للحقيقة ..

خالص شكري لحضرتك ..

جاري تنزيل المعزوفة ..

احبائى
اقدم لكم اتنين من معزوفاتى المتواضعة

جددت حبك لأم كلثوم

http://www.mediafire.com/?af1h5m1815cmbcj

عاشق الروح محمد عبد الوهاب

http://www.mediafire.com/?1h0cp64lw119mem

اتمنى ان يحوزوا رضاكم واطيب تحياتى للجميع

» ~~~~~~~((((((الموسيقااار الكبييير عادل صموئيل)))))~~~~~~~~~~~~
» الاستاذ المحترم / عادل صموئيل الذي اخفي عنا شخصيته الحقيقية لتواضعه الشديد حتي لا نعرف انه اهم و اشهر من اشترك معنا بالموقع منذ بدايته ..
» انا الفرعون المصري الاصيل....مش من جيل مبارك !! ايات
» أقتراح لجميع الأعضاء . الاستاذ المحترم الكبير / عادل صموئيل ثروة لا تقدر بثمن من الممكن الأستفادة منها هنا بالموقع و هذا من حسن حظنا . و يارب يوافق يااارب
» أحمد عز من عازف درامز لملياردير يهندس سياسات نظام