قسم خاص للاستاذ / عادل صموئيل عازف الكمان الاول في الفرقة الماسية و عضو بارز في منتدي سماعي لاحياء التراث الموسيقي و الحفاظ علي موروث الطرب العربي الاصيل .

استاذ عادل كنت اقرأ ما استطيع اثناء الامتحانات والمذاكرة ومن ثم انشغلت بعمل الموقع في الفترة الاخيرة وقد كان متتالي لم استطيع ايضا المتابعة الكاملة

وها اليوم اصبح هناك لدي متسع من الوقت للتجول والابحار مع حضرتك في روائع الفن والعالم الجميل يرويه فنان راقي ومحترم زي حضرتك

امتعنا يا استاذ اعادل اكثر واكتر
Very Happy

جددت حبك لأم كلثوم و عاشق الروح لمحمد عبد الوهاب ..

الله .. ربنا يخليك يا استاذنا الجميل .. الف الف شكر ..

اشكرك الف شكر يا آيات وانا بكون سعيد جدا لما الشباب يتعرف على الزمن الجميل والفن الجميل , لأنى حاسس انهم انظلموا مع الدوشة والخبط اللى بيتسمع اليومين دول واتمنى لكى من كل قلبى النجاح واكبر مجموع , وانتى مثال للقيادات الشجاعة مش بس اللى تقود المنتدى ولكنهم القيادات الواعدة اللى بعدين حاتقود البلد وتخليها اعظم بلد فى الدنيا , ومصر من 7000 سنة كانت اعظم بلد فى الدنيا يعنى القمة مش حاجة جديدة عليها ,
واشكرك اخى العزيز أ / أمير على تشجيعك واللى بيخلينى احاول اقدم لكم احلى ماعندى
مع اطيب تحياتى

ايييييييييييوة يا استاذ عادل الخبطة والرزع بتاع اليومين دول صعب اوي وان كان هناك البعض منه يجيد الي حد ما الموسيقي السريعة

الحقيقة دي تاني مرة تقريبا اني احاول اقترب الي العالم الجميل ده مع عشقي لمطربين رائعين من هذا الزمن ولكل زمن

بس افتكر اني حضرت الصيف قبل الي فات ثلاث ندوات متتالية لاحد مؤرخين الغناء اسمه ( وجيه ندي ) ومعروف باسم سندباد الفن الجميل

وقد اهداني كتابه الاخير قريت فيه عن ليلي مراد ومغنيين كتير وقتها بس بعد كده قطعت الحقيقة ودلوقتي مع حضرتك هبدأ اعيد هذه اللحظات الجميلة الي لاحظت فيها وجود معلومات كبيرة تاريخية عند حضرتك مش فن وبس

خالص تحياتي لحضرتك وكل مستمعين هذا المجلس الرائع

احبائى
اولا اشكركم كلكم على التشجيع , انا عندى عادة دائما بهتم بعدد المشاهدات زى اهتمامى بالرود , لما بحس ان فيه اعضاء كتير دخلوا وشاهدوا الموضوع بحس اولا بالسعادة وثانيا , بترفع روحى العنوية انى اكتب لكم اكتر و انا اكتر سعادتى بالشباب , لأنى بحس اهم جيل اتظلم يعنى بالرغم من كل التكنولوجيا اللى فى ايديهم دلوقتى واللى كانت على ايامى وايام اللى قبلى احلام بعيدة او خيال , وفيه حاجات لو الواحد فكر فيها زى عباس ابن فرناس زمان اللى كان نفسه يطير , بس زمان الزمن كان جميل اوى , وكانت الناس سعيدة وقنوعة , اما بالنسبة للفن , انا بحب الشباب اللى بيقدر الفن الجميل مع ان معظمه اتولد لقى الخبط والرزع على رأى آيات , وانا هنا نفى اتكلم قبل الفن الجميل عن الزمن الجميل , دايما على مر التاريخ ومش فى مصر بس لكن فى العالم كله لما بتزدهر الحياة كل حاجة بتزدهر ومن ضمنها الفن , ولما نتكلم عن الزمن الجميل , انا بحدده من 1930 ـ 1975 بعد كده اتدا كل شىء ينزل لتحت , طيب اشمعنى من 1930 ؟ وللعلم سنة 1830 كانت الحياة برضه اجمل من 2006 لكن من 1930 كانت مصر ابتدت تتطور تطور مذهل , يعنى زمان عشان يحصل اختراع أو شىء جديد كان كل 200 سنة مثلا , لكن فى العصر ده , ظهرت التليفونات والراديو والكهرباء والمطابع والمجلات والسيارات ابتدت تبقى جميلة ومريحة ثم الثلاجات والمرواح والباقى انتم عارفينه , يعنى ايه زمن جميل او يعنى ايه شىء جميل ؟ يعنى حاجة كل شىء فيها جميل , يعنى مثلا عربية جميلة يعنى لما تشوفها من اى زاوية تلاقيها جميلة , مش حلوة من ناحية ومخبوطة خبطة من الناحية التانية , بعدين العربية الجميلة لما تيجى تدورها تدور على طول مش تقول والنبى عايزين زقة , او عايزين نروح بيها فسحة القناطر تيجى ف وسط السكة تعطل وتضيع علينا الفسحة , زمان كان اهم مايميز القاهرة ( وتشوف ده فى الافلام القديمة ) ان سكان القاهرة على اد مساحتها الجغرافية , يعنى مثلا كان شارع فؤاد او قصر النيل تلاقى بالكتير 3 عربيات , والناس قليلة عشان يتمتعوا بالحياة النهارده مشكلة القاهرة ان عليها اد حمولتها عدد سكان اكتر من عشر مرات , يعنى تخيل زى اتوبيس فيه 20 راكب , واوتوبيس فيه 350 راكب , كمان فيه ملحوظة غريبة جدا مش ممكن تتخيلوها , يعنى دلوقتى حلم اى شاب انه يحصل على عقد عمل فى اى دولة زى اليونان او ايطاليا , مش حاتص\قوا يا احبائى ان آلاف من اليونانيين ( وكنا بنسميهم الجريج أو الإجريج ) وآلاف من الايطاليين , ( وكنا بنسميهم الطلاينة ) كانوا بييجوا يعيشوا فى مصر ولعقود طويلة وللعلم كانوا بيكسبوا دهب , شوفوا الصورة اتعكست ازاى ؟ بخلاف جاليات كتير جدا شوام ( من اهل الشام ولبنان ) وروس ويهود ( بس مش وحشين زى الصهاينة بتوع اسرائيل ) , يعنى عدد كبير جدا من الجاليات الاجنبية كانوا بيعيشوا فى مصر وامتزجوا مع المصريين , ادخلوا فى مصر تجارات وصناعات وللعلم كانوا خبراء , كان زمان كل واحد يتعصب لمهنته , ويحس ان قيمته كإنسان انه يعمل شغله على اكمل وجه وانك تحس انه عمل شىء جميل جدا , يعنى الإيطاليين هم اللى علموا المصريين اصلاح السيارات والاجهزة عموماً , والجريج دول اول دولة فى العالم متخصصة فى البقالة , وعشان بيتعصبوا لصنعتهم كانوا بيستوردوا كل بضاعتهم من اليونان , وبيعملوا فى مصر كل اللى ينفع يتعمل من الخامات المصرية , كان جنبنا واحد اسمه الخواجة جورج والنهارده بعد خمسة وخمسين سنة , مش ممكن انسى الزيتون الاسود بتاع الخواجة جورج , والذى لاعلاقة للقرف الموجود دلوقتى ولا الكلاماتا ابو 50 جنيه , ولا البسطرمة ... يعنى لو قارنتها باللى بناكله دلوقتى كان البقال حاطط على الماكينة رجل كرسى خشب وبيقطع منها شرئح , انا لما بشوف الافلام القديمة بتاعة الاربعينات , مش بس بشوف واتحسر ولكن بشم , يعنى لما تشوف قهوة بلدى ... وتشم رائحة البن طالعة منها , وطبعا كلمة بن يعنى موضوع تانى مش اللى بنشربه دلوقتى واللى واحد انجليزى فى رواية لأجاثا كريستى بالطين المغلى , البن زمان كان مواضيع تانية , يعنى بيستورد من احسن اماكن بتنتج بن فى العالم , والمستورد عندنا كان بيختار احسن حاجة ومش مهم مكسبه , وجدير بالذكر ان المستورد دلوقتى بيروح الصين مش بيختار احسن حاجة , ولكن بيختار الزبالة بتاعة الصين , وكمان بيبحث على زبالة الزبالة عشان يكسب اكتر واكتر مش مهم رأى الناس , او ان حد يشترى حاجة ب 80 جنيه وتبوظ فى نفس اليوم ويدعى عليه , هو بيفكر انه ملا جيبه فلوس وخلاص , لما نرجع للطلاينة كان من ضمن مهامهم انهم يعلموا المصريين التصليح , يعنى كان كل صاحب ورشة بيحرص ان الصبيان عنده يكونوا على اعلى درجة من المهارة , لأن انتاج الورشة فى وشه , ومحسوب عليه وهم دول اللى بعدها اسسوا كبرى شركات الصيانة , حتى اليهود , اسسوا عندنا المحلات اللى زى عمر افندى وصيدناوى وشملا وشيكوريل وخلافه , كان عمر افندى اللى عمله اسمه اوروزدى باك وكان عنده محلات مشابهة فى كل دول العالم كانت كلها صورة واحدة , انا امى الله يرحمها كانت زبونة عندهمن ايام ماكانت بنت صغيرة , كان عنده كتالوج 600 صفحة بالصور فيه كل قشاية بتتباع فى المحل وسعرها , يعنى بيدوه للزباين المستديمين هدية عشانفى البيت يذاكروه وييجوا يشتروا اكتر ( ودى العقلية اليهودية فى التجارة ) انى افوت لك 2 جنيه وانت تيجى تشترى بخمسين جنيه .
الشعب المصرى بطبيعته عشرى اوى , يعنى بيحب الوافدين , وبيعمل معاهم علاقات قوية ,
والجاليات دى تداخلت مع المصريين واصبحوا مصريين من داخلهم , يعنى حتى الستات الاجانب بقوا يندهوا عليها يا ام جورج مش يا مدام اليس او جوليا زى فى بلدها , واللى بينادوا بإسم الابن هم العرب فقط على فكرة , لما تطلع فى الاحياء المتوسطة زى شبرا مثلا , تدخل العمارة تلاقى كل الشقق ابوابها مفتوحة , الرجال فى الشغل والستات عايشين مع بعض , يعنى تنين او تلاثة يجهزوا الاكل مع بعض , تيجى واحدة معاها صينينة فيها بامية والتانية تقور كوسة والثالثة بتحشى محشى , ويقعدوا مع بعض , مفيش مسيحيين ولا مسلمين ولا اجانب , كان الكل مصريين , بل فيه ظاهرة اكتر , كانت ام محمد وام جرجس لسة والدين محمد وجرجس , كانت ام جرجس تنزل تجيب الخضار والطلبات ليها ولم محمد , وام محمد تقعد تاخد بالها من الطفلين , وساعتها كان جرجس يعيط تاخده ام محمد ترضعه , والعكس , كان زمان كل ابناء شيرا اخوات فى الرضاعة مسلمين ومسيحيين , وفى المطاهرات عشان الانجليز , شعار الهلال مع الصليب والشيخ يوعظ فى الكنيسة والقس يوعظ فى الجامع , وعلى فكرة من مميزات الفن الجميل انه بيكون صادق وممكن ترجع له لما تحب ترجع للتاريخ , يعنى النهاردة لما فى برنامج عايزين يجيبوا مشاهد من مظاهرات زمان , بيجيبوا مشاهد من الافلام اخراج حسن الامام , لأن طبعا صورتها احلى وفيها اخراج احسن بكتير من كاميرات الزمن الاصلى كانت بدائية وصورتها وحشة , وخارج التكنولوجيا الحديثة يعنى الفيلم بينط والصورة بتتهز وخلافه , كان الشعب المصرى متذوق جيد جداً للطعام , واللى كده تلاقيه بالتأكيد طباخ شاطر , يعنى النهاردة شوف واحد بيقلى طعمية واٍاله كنت بتشتغل ايه قبل كده يقول لك قهوجى , تسأله وقبلها يقول لك عجلاتى , وهنا تلاقيه فاشل فى كل حاجة , يعنى الطعمية دى فى حد ذاتها علم وصنعة مش اى حاجة على اى حاجة , انت زمان كنت لما تشم الطعمية تتجنن , وكانت بتعمل لنا مشاكل دبلوماسية , يعنى كانت من حلاوتها السائح ( واللى لازم يجرب كل حاجة وبالذات المأكولات ) كان مش بياكلها بالعيش زينا حتة حتة , كان بيحطها فى بقه مرة واحدة ويلاقيها لذيذة جدا يروح واخد كمان خمسة ستة , وبعدين يروح الاوتيل .... وتبتدى الضلمة والطعمية تشتغل .. كان زمان الاختراع العجيب اللى اسمه سفن أب لسه ما وصلش مصر , كانوا بيعالجوه بالمذيبات الكيماوية والفوارات العملاقة , بس كان السائح مش بيتعقد , لكن بيتعلم كل حاجة بتتاكل صح ازاى , زمان كان اللى بيعمل طعمية بيتعلمها اباً عن جد , وكل الصنعات كده , وكلمة قلتها وحاككرها الاعتزاز بالمهنة او الصنعة دى كانت سبب كل حاجة جميلة زمان , وهى سبب كل الحاجات الغلط اللى بنشوفها دلوقتى , يعنى مثلا كل شم نسيم تسمع ان الحكومة ضبطت اطنان من الملوحة والفسيخ الفاسد , الكلام دع عمره ماحصل من ايام الملك مينا , لأن الملوحة كانت بتعملها عائلات تتوارث الصنعة من الاف السنين , الملوحة دى بتتعمل من نوع سمك واحد مش موجود غير فى جنوب الصعيد , لها ذيل فيه علامة حمراء , السمكة الانثى اسمها راية والذكر سمه كلب لأن كان ليه اسنان مستفزة , ولها طريقة فى التخليل ان تغيرت ممكن المنتج يبقى سم , المصيبة لما بيدخل الدخلاء فى المهن , يعنى الملوحة لازم تتخلل فى براميل من خشب معين عشان يبقى لها مسام السمك يتنفس , ممكن يحطوها فى براميل بلاستيك , ودى بينمو فيها بكتيريا مع الوقت بتبقى ضارة جدا , كمان ممكن يستخدموا اى نوع سمك تانى عشان يوفروا فلوس ويكسبوا اكتر , والمفروض ان من قدماء المصرين نوع السمك ده فقط هو اللى ممكن يتعمل ملوحة لأن فيه حاصية انه لو اتخلل واتملح صح , مش بيحصل له عملية التعفن والتحلل اللى ممكن بعدها يصبح ضار , كان كل عامل اوصانع بيفتخر انه بيقدم لك خدمة او منتج 100% , كان زمان الاجهزة المنزلية زى التلاجات والبوتاجاز والغسالة , المحل اسمه محل سلع معمرة , معناها ان لما تيجى عروسة بتجهز بتشترى تلاجة , التلاجة دى بتفضل لأولادها , يعنى حاجة متينة جدا وكفائت ها عالية جدا , وموتور عمره الافتراضى 100سنة مثلا , لذا كنا بنحتاج بتاع صيانة عنده ذمة , بحيث ان اى عطل صغير يرجعها زى ماكانت , النهاردة الثلاجة عمرها الافتراضى 3 سنين , لو جبت لها بتاع صيانة ممكن يجيب لك اجلها ...
كان زمان محلات التصلليح بتاعة الخواجات غى مصر , لو وديت له ساعة او كاميرا قسمة مثلا , لو ما يعرفش فيها مش عيب يقول لك ماعرفش , لكن بيوصف لكمحل بتاع واحد تانى بيفهم فى النوع ده , احكى لكم قصة , طبعا ى وسط عملى الفنى كنت بروح الخليج كتير , المواطن الخليجى له شكل كده يعنى لازم فى الجلابية يحط قلم فى جيبه , حتى لو مش حايستعمله خالص , بس من التقاليد لازم يحط القلم , مرة واحد صاحبى سألنى هم فى السعودية لازم يحطوا قلم ليه ؟ قلت له ممكن لو هو سايق عربيته والبنزين خلص , ينزل بالقلم يخرم اللارض يطلع بترول يملا العربية , ومن طبائع الخليجيين لازم يمسك سبحة , لكن لما يحب يهاديك هدية بتكون دائما ساعة فاخرة , يعنى انا كنت لما اعزف لأمير او ملك بيدينى هدية ساعة دهب محترمة يعنى ( قيمة الملك طبعا ومعمولة مخصوص عليها شعار العائلة المالكة ) المهم واحد صاحبى اخد ساعة هدية من دول بعدين عطلت قلت له روح محل كذا ده احسن محل فى القاهرة , راح هناك صاحب المحل بيصلح الساعة العادية بعشرين جنيه لما شاف الساعة الفاخرة دى قال له آخد 200 جنيه صاحب وافق , الراجل مسك الساعة وراح فاتحها خرت سائل احمر , الراجل اتخض افتكر الساعة خرت دم , راح مسك الغطا بتاع الساعة اللى فكه لقى مكتوب عليه محظور فتح الساعة دى غير فى المصنع , لأنها بتشتغل مش بالحجر ولا الزمبلك زى اى ساعة عادية , ولكن بضغط الزيت , يعنى حاجة معقدة جدا وماحدش فى مصر يعرف فيها , وليك اما ان ترميها او تشوف محل محترم يبعتها المصنع بس طبعا حاتكلف .... لما نرجع للجاليات الاجنبية , كان ليهم فى كل حاجة يعنى الموسيقى والفن والتمثيل والسينما وكله كله , لما تشوف افلام ليلى مراد , لما تكون بنت باشا , وتشوف البنات اللى حواليها المفروض بنات باشوات , كان البنات الاجانب هم اللى بيتصوروا معاها , يعنى دلوقتى لما بيكون كومبارس بيجيبوا ناس من قاع المجتمع مش شكلهم باشوات خالص , حتى لما بيجيبوا دكتور اجنبى اسمه كاراماليدس , بيكون فعلا واحد اجنبى واسكمه حاجة زى كده , دلوقتى حتى لما بيجيبوا واحد اجنبى بيبقى من الدويقة , غير طبعا البنات اللى بترقص فى الاستعراضات كانوا معظمهم اجانب , ولو معاهم مصريين بيتطبعوا بعاداتهم وشكلهم , واليهود خرج منهم ليلى مراد ومنير مراد وراقية ابراهيم وكلهم اسلموا واصبحوا مصريين 100% ونسيوا انهم يهود , اما الموسيقى موضوع تانى , عندنا فى مصر من زمان اوركسترا القاهرة السيمفونى وكورال الاوبرا , كانوا كلهم اجانب , وطبعا دى شغلتهم , يعنى انا عازف كمان ( يعنى بيقولوا عليا شاطر شوية ) انا طبعا دراستى الموسيقى الكلاسيكية الغربية , بس متخصص فى الموسيقى الشرقية , يعنى لو حبيت اعزف سيمفونية لبيتهوفن اكيد اى واحد اجنبى اصلا حايبقى احسن منى لأن ماتروحش تبيع المية فى حارة السقايين , لكن فى الموسيقى الشرقية لما يموت مايقدرش يعمل زيى لسبب , ان عندنا فى موسيقانا حاجة اسمها الربع تون , ومقامات موسيقية وإيقاعات شرقية يعنى هم ما يعرفوهاش اصلا , وبتبقى فى الدم, يعنى انا ممكن اقلدهم لكن هم مش ممكن يقلدونا , يعنى لو واحدة طباخة شاطرة راحت ايطاليا وحبت تعمل عزومة انصحها تعمل لهم ملوخية حايتعقدوا ويتجننوا , لكن انصحها او عى تفكرى اصلا تعملى مكرونة , لأن عندهم 490 نوع مكرونة حاتروحى فيهم فين ؟
كانت الفلوس زمان موضوع تانى يعنى الجنيه المصرى كان سنة 1930 بيساوى اكتر من خمسة دولار ... كان الجنيه 100 قرش والقرش عشرة مليم والمليم زمان بيعمل شغل ... ليا خالى الاله يرحمه كان بيحب يحتفظ بالمجلات القديمة سنة 1941 كانت العربية الباكار اغلى حاجة ب 290 جنيه ع الزيرو , ولما تشوف العريبات يعنى العربية الكاديلاك , اللى اتصورت فيها شادية فى اغنية حبيبى اهه خطيبة اهه شفتوها ؟ دى كانت عربية العظماء والأكابر كان تمنها 2000 جنيه , كانت 8 سلندر ووزنها على الرض يساوى وزن عشرين عربية زلمكة من بتوع دلوقتى , تخيل الوزن ده ممكن تكون العفشة يعنى السوست والمساعدين اللى تشيلها قوتها اد ايه ؟ ام كلثقوم عندها عربية منهم كانت زى الغول السايب , لما تركبها تحس كانك راكب فلوكة على النيل , وبجد ولا ولا ولا اى عربية فى السوق دلوقتى ركوبة تشابه العربيات دى كانت حاجة تانى ..... وقتها كان لتر البنزين ب قرشين صاغ , يعنى الصفيحة ب 40 قرش , وكيلو اللحمة سنة 30 ب قرشين صاغ والخروف من 3 جنيه وانت طالع ,,,, انا حضرت كيلو اللحمة بعشرين قرش والبيضة بقرش ....
كان فيهحاجت دلوقتى تعتبر جنان , يعنى انت لو نزلت رحت اى مشوار اكتر حاجة حتشوفها كلمة شقة للأيجار , كانت الشقة ال 4 اوض فى شبرا تبدأ من جنيه ونص , وفى الزمالك ال 6 اوض و2 حمام وفاخرة يعنى شغل زى شغل اوروبا مش ممكن تعدى 6 جنيه , وكلمة 6 جنيه يعنى تعجبك تدفع 6 جنيه وتاخد المفتاح , طبعا مفيش خلو ولا الكلام ده اللى ظهر فى اوائل الستينات , عرفين لما واحدة آنسة تحب تشترى جزمة بتعمل إيه ؟ بتدخل 75 محل وتقلب فى كل الجزم , كان زمان الآنسة تخرج مع خطيبها وتشوف الشققبنفس طريقة الجزم , يعنى تتلكك على كل شقة لحد ماتعجبها شقة , بل اغرب من كده , كانت اى أسرة لما تلاقى الحوائط بتاعة الشقة محتاجة بياض , كانوا بيختصروا الوقت ويعزلوا فى شقة تانية متبيضة جاهزة , وماتقولوش عليا مجنون لما اقول ان اصحاب العمارات كانوا بيبخروا الشقق عشان تسكن , طبعا اى حد من الشباب يشك فى كلامى يسأل الناس الكبار اللى عنده , حيحكوا لكم قصص جميلة عن زمان , وهم نفسهم حايسعدوا يفتكروا ايام زمان وخير زمان .
كانت الثقافة اساساً القراءة , والقراءة دى ادمان يعنى الاول بتبتدى قرا صفحتيت تلاقى نفسك بتخلص الكتاب كله فى قعدة , ودى كانت بتفرق كتيييييييييييير .... يعنى انك بتاكل الكتب اكل , وكان القراء ليهم طقوس , يعى الكتاب مهما كان .. كان تمنه 3 قروش , كان القارى بيخلصهم وينزل لمحل الكتب القديمة يديه قرشين يغيرهم بعشر كتب تانية وهكذا , وهنا ممكن الانسان يقرا فى مواضيع كتير بتخلى ثقافته عالية جدا وفى مواضيع مختلفة , بعدين طلع الراديو , الردايو لما بتسمع انت بتفكر وبتتخيل , يعنى تمثيلية بتكون مركزة جدا فى ربع ساعة انت بتتخيل المكان والشخصيات , غير دلوقتى المسلسل 30 حلقة وتطويل ومط لحد ما المشاهد ييجى له شلل اطفال , التلميذ لما كان بيقرأ كتير , كان بيمسك الكتب الدراسية قبل بدء الدراسة يخلصها فى 3ايام , يعنى مثلا يبدأ بالمواد الالى زى التاريخ مثلا يخلص منه عشان يركز فى المواد اللى محتاجة تمخيخ غير القراءة زى الرياضيات , النهاردة التلميذ اللى اتعود على التليفزيون لما يمسك كتاب التاريرخ بعد صفحتين حايحس انه بياخد حقنة , كان زمان بيمسك كتب التاريخ دى منذ بدء الخليقة لحد امبارح , ولما نيجى للتعليم تلاقى الجماعة مكانش فيه المجموع والكلام ده , يعنى الطالب بيختار الحاجة اللى بيحبها , يعنى انت ممكن تدخل طب ولكن بتختار الحقوق عشان بتحب المحاماه , طبعا هنا بيختلف الخريج اختلاف كلى انه بيحب المهنة , دلوقتى صراع الثانوية العامة وعايز يدخل كلية كذا , وييجى على ربع درجة تطير , ويدخل حاجة بيكرهها او مش طايقها , ده بيخلى المهندس مش بيدى العمارة حقها تقع , ولا المحامى ممكن قضية تاخد جلسة يطول فيها سنين ويبوظ القضية عشان ياخد فلوس اكتر , لأنه مش بيحب المهنة ولكن بيستغلها عشان الفلوس و ولا مستشفيات الاستثمار لو مريض بيموت يرموه فى الشارع عشان ما معوش مقدم دخول المستشفى الفين جنيه تحت الحساب , واما كلثوم قال عايزنا نرجع زى زمان ... قول للزمان ارجع يازمان
مع اطيب تحياتى

عايزنا نرجع زى زمان ... قول للزمان ارجع يازمان

الاستاذ الرائع جدااااااااا / عادل صموئيل

لا تتخيل حضرتك مدي شعوري و أنا باقرأ هذه الدرر .. شعور الظماّن منذ سنوات الي الماء الصافي السلسبيل و هو الماء الذي يكون في غاية من السلاسة وسهوله المرور في الحلق من شده العذوبة وينبع في الجنة .. شعور الغريق و هو يتعلق بيد حانية ترفعه لأعلي .. شعور المريض و هو علي فراش الموت و فجاة يشفي و يقوم و يعود للحياة مرة أخري معافا من كل مرض .. شعور الجائع منذ فترة طويلة ثم فجاة تضع أمامه مالذ و طاب من أشهي الاطعمة ..

بحق يا أستاذ عادل لقد أمتعتنا متعة كبيرة ..

خالص شكر و احترامي و تقديري لحضرتك ..

استاااااااذ عادل

اضطريت اكتب لحضرتك هنا في الموضوع

ياريت حضرتك تتفقد الرسائل الخاصة الي بعتها لحضرتك

للدخول علي الرسائل الخاصة

بالطريقة الاتية

قسم خاص للاستاذ / عادل صموئيل عازف الكمان الاول في الفرقة الماسية و عضو بارز في منتدي سماعي لاحياء التراث الموسيقي و الحفاظ علي موروث الطرب العربي الاصيل . - صفحة 2 7-11-201111-53-25PM

قسم خاص للاستاذ / عادل صموئيل عازف الكمان الاول في الفرقة الماسية و عضو بارز في منتدي سماعي لاحياء التراث الموسيقي و الحفاظ علي موروث الطرب العربي الاصيل . - صفحة 2 7-11-201111-53-25PM

استاذعادل

ليه الجمل الموسيقية لعمالقة الطرب الاصيل

لسه بنحبها ولما بنسمعها نشعر بفخامة

حقيقي انا اعتبر ان نهاية السبعينات هي نهاية الموسيقى العربية الرصينة

سؤال اخر من خبرتك الطويلة في الموسيقى ماهو السحر الموجود في الحان العملاق بليغ حمدي

تحياتي لك

الأخت الفاضلة صفية

اولا اشكرك على تشريف هذا الموضوع المتواضع بدخولك

يعنى انا اعتز دائما بكل مواضيعك لأنك بتفتحى مواضيع جميلة جدا ومش عادية وبتدى القارىء فرصة للتأمل

وبالطبع انا قريت مشاركتك هنا بس اخدت وقت افكر ابتدى الرد عليكى منين لن انتى كتبتى عبارات قليلة لكن الرد عليها يحتاج صفحات كتير وححاول اختصر بقدر الامكان
انتى سألتى ليه الجمل الموسيقية بتاعة عمالقة الطرب الاصيل لسه بنحبها وبنشعر بفخامة كل مانسمعها
انتى قلتى كلمة عمالقة , واللى اظهر انهم عمالقة الاقزام اللى جم بعدهم , يعنى عايزة تحسى ان شخص طويل لازم يقف مع اقزام , وعايزين نحس بواحدة جميلة لازم تقف مع وحشين , يعنى كلمة زمن الفن الجميل ليه سموا الزمن كده لأن الزمن اللى بعده كان الفن قبيح لايمت الى الجمال بصلة , وانا كواحد من الموسيقيين اللى شاركوا فى الزمن الجميل يعنى عاشرتهم شخصيا وشفت ليه هم عمالقة , كان الملحن منهم اول حجاة امتداد لعملاق قبله , وكمل على اللى بناه اللى قبله , كانت الجملة الموسيقية عبارة عن تحفة مالهاش شبيه قبلها ولا بعدها , يعنى عبد الوهاب مثلا كان لما تديه كلمات يلحنها , اوعى تقولى له حاتخلص امتى يرميها ويقول مش فاضى , لنه بيحطها فى جيبه ويقراها مئات المرات لحد ما فى يوم يحس بلحن اول جملة , وممكن بعد ما يحسها يلاقيها مش اللى هى يمسحها من مخه , لحد ماتيجى جملة تانية , ولما تيجى ممكن بعد يوم او شهر او اكتر يزنها كتير تيجى اللى بعدها واول ما يحس ان الكوبليه معالمه ابتدت تكتمل يمسك العود ويتفرغ تماما انه يكمله بحرفيته , وبعد الكوبليه ما يخلص , مش خلاص يبقى خلص ولكن يقعد يحاول يبدع فيه ويحسن فيه وممكن يغير نصه , ولما تخلص الاغنية , لو لم كلثوم مثلا كنا بنعمل خمسين بروفة , الرؤية على الفرقة غير الرؤية على عوده ممكن يغير تانى فى اللحن ويشيل جزء ويضيف جزء , وتيجى عملية الاخراج يعنى عملية معقدة جدا المهم اللحن فى الآخر يطلع تحفة فنية مالهاش اخت , الاغانى زمان كانت زى التحف اللى فى المتحف , يعنى انتى لو دخلتى متحف فيه 500 تحفة , كل تحفة منهم بتكون موجودة فى المتحف ليه ؟ لأن لها قصة وان مالهاش مثيل وانها عمل رائع , وحاجة بتزيد قيمتها مع مرور الزمن لأن اللى بيعملوا التحف دى مش موجودين تانى , يعنى مشمعقول تلاقى فى المتحف مروحة كهربائية ماركة توشيبا مثلا لأن فيه منها ملايين , والكلام ده بينطبق على كل الملحنين وكل المطربين يعنى كل اغنية لها زونها سواء كانت طويلة اوقصيرة بل وصلت لدرجة ان لو حسبنا اغانى الزمن الجميل بعدد 2000 اغنية مثلا تلاقى الناس عارفاهم وعارفة اسمهم زى المسميات الموجودة مثلا لما اقولك عارفة ميدان التحرير او الشمس او برج القاهرة او انت عمرى او سيرة الحب او مترو الانفاق , يعنى الاغانى وصلت لدرجة الاشياء المشهورة اللى ما يختلفش عليها اتنين , كمان من اهم واخطر الحاجات اللى لاحظتها واحنا بننفذ الاغانى دى كان الملحن والمؤلف والمطرب اهم شىء عندهم الذكرى والتاريخ , ودى حاجة اخدوها عن قدماء المصريين , يعنى لما تشوفى الآثار من خمس الاف سنة , بتتحدى الزم مالهاش تاريخ صلاحية او عمر افتراضى يعنى حاجة قائمة طالما البشرية موجودة , لما تطبقى كل ده ونضيف ( وآسف للإطالة ) التنافس الجميل يعنى لما فريد الاطرش بيعمل لحن من المؤكد انه عارف ان عبد الوهاب والسنباطى والجميع حايسمعوه واكيد لازم يكون حاجة يتشرف بيها , ونضيف انهم استخدموا العلم مع الفن بحيث ان فى اى اكاديمية موسيقية ممكن انا ادى محاضرة على اى اغنية او موسيقى وتكون على اعلى مستوى علمى , زائد ان الفن كان بيتواكب مع الاحداث يعنى فيه غير الاغانى العاطفية اغانى وطنية فى حب الوطن اوقات السلم واغانى حماسية وانا شيد اثناء الحروب وقعها على المستمع اشد من وقع المدافع والقنابل كانت بتخلى الجنود يولعوا نار ويدخلوا على الاعداء , وحتى الجبهة الداخلية كانت بتبقى جبهة حرب , يعنى فى عدوان 1956 لما الاعداء دخلوا المدن كانت الاناشيد الحماسية اللى بتتذاع ليل نهار الفضل ان الشعب نزل على الاعداء وقطعوهم حتى الستات فى البيوت نزلت اللى معاها سكينة مطبخ واللى معها ايد هون واللى معاها غطاء حلة يعنى طحنوا الاعداء داخل المدن , ولا تنسى الاغانى الدينية الرائعة واللى تأثيرها على المستمع اكتر كتير من الوعظ المباشر , وبالطبع زى ماقلتى ان مهاية السبعينات ووفاة العمالقة ودخول الوسط الفنى للأقزام يعنى ناس دخلت لاتمتلك اى مواهب داخلة تعمل فلوس بس , يعنى انا لما اسمع اى اغنية منهم بيجى لى غثيان لأنها مش بس رديئة ولكن تخالف كل ما اتعلمته فى الموسيقى اصلا , يعنى انتى فى احد ردودك على احد المواضيع قلتى انك مهندسة يعنى فى اى علم فى الهندسة فيه ثوابت ونظريات واصول تخيلى لما ييجى واحد يتكلم فى الهندسة وبيقول عكس كل النظريات والاصول انتى تحسى بإيه , هى ممكن تحصل لو عالم يظهر جدي ويخترع نظرية جديدة تلغى نظرية قديمة بس يثبتها وممكن يقنعك لكن لما تحسى ان اللى بيتكلم ده مش بيفهم حاجة , وبيستغل الجهل والانحدار الثقافى اللى عند الشباب بيسحوا ان الموضة كده وبيمشوا وراها .... يعنى النهاردة عادى تسمعى واحد بيغنى وبيفتقد لكل اصول الغناء اللى اولها النغمات السليمة من اول محمد منير وانتى نازلة , يعنى محمد منير لو غنى عشر نغمات تلاقى منهم على الاقل 6 نغمات نشاز , وعادى كله كده , يعنى كان زمان واحد زى عبد الحليم مش ممكن يتكرر تانى ولابعد 300 سنة النهاردة اى نجم ممكن انزل مدرسة ثانوى اجيب لك 700 واحد زيه , واى واحدة بتغنى ممكن انزل جامعة عين شمس او القاهرة اجيب لك 5000 واحدة زيها , علما بأن ربنا خلق الشخص الموهوب واحد على كل مليون شخص على الاقل
اما العملاق بليغ حمدى يعنى اول حاجة ملفتة ان لحن لأم كلثوم اغنيتين كل ليلة وكل يوم وحب ايه وكان سنه 24سنة , وتخيلى المحيط اللى هو ام كلثوم بعد زكريا والسنباطى والقصبجى لما تختار ملحن شاب لازم يكون امكانياته ايه ؟ وبعدين اثبت جدارته مع كل المطربين , بس برضه النظرية ان طالما فيه عماقة لازم اللى يقف جنبهم ويستمر لازم يكون عملاق لأن مفيش مكان للأقزام بينهم
والخلاصة ان الحانهم ستبقى طالما بقيت البشرية بل قيمتها بتزيد مع مرور الوقت زى التحف الثمينة
مع اطيب تحياتى وتحت امرك فى اى اسئلة

استاذ عادل دا انسان جميل جدا وطيب جدا وفنان جدا
ايه الجدانات دي كلها هههههههههههههه
بجد والله شخص جميل جدا ربنا يكرمه يارب

اشكرك يا مروة ده بس من ذوقك
واتمنى ان الشباب الجميل يرجع تانى يدور على اغانى الفن الجميل ويسمع الحاجات اللى تهذب الذوق وتملا الدماغ , وتحسوا ان يعنى ايه فن بجد
التلاتين سنة اللى فاتوا عصر مبارك جايز سابوا كل من هب ودب يعمل فن عشان يكملوا على قتل ثقافة الشعب , يعنى لو تامر ولا مش عارف مين طلعوا زمان كان الجمهور نفسه ولع فيهم , لأن الجمهور كان ساعتها ذوقه عالى اوى اوى وثقافته عالية اوى اوى , يعنى مايقبلش اى واحد وخلاص يضحك عليه
لكن مبارك وعابته سابوا الانفلات الفنى ده يحصل عشان يكملوا القضاء على الشعب , يعنى كان الشباب اللى بيغنى مش بيغنى ولكن بيتخنث ويتقصع ويترقص ويتنطط , يعنى قولوى مين فيهم شكله راجل او تصرفاته تصرفات رجالة ؟ كان زمان تشوفى راجل بيغنى يعنى عبد الحليم واقف محترم بيغنى وكل المطربين كده عمر ما حد منهم اتقصع ولا اتمايص , والبنات اهم شىء مش الغنا ولكن التعرى على قد ماتقدر , شفتى زمان المطربات كانوا محترمين ازاى ومحتشمين ازاى بيقدموا فن وبس , دلوقتى اللى عامل نفسه فنان اهم شىء عنده ازاى يتمنظر وكل سنة يعمل نيو لوك , واللى عاملة نفسها فنانة , يقول لك فلانة عملت 26 عملية تجميل يعنى تخيلى 26 عملية تجميل يعنى كان اصلها ضفدعة مثلا ولا ايه ؟
كان زمان لو انتى من عشاق فنانة معينة وتتابعى كل حفلاتها تلاقى فساتينها محدودة وبتتكرر كتير وتسريحات الشعر تقريبا واحدة , ليه لأنها عايزة الجمهور يسمع مش يتفرج , لكن دلوقتى اهم حاجة عندهم الفساتين وكل ماتكون صارخة كل مايكون احسن لأنها مش بتقدم فن اصلا , انا حسيت ان مبارك وعصابته بيجهزوا جيل من الشباب بيندغ لبان , كنا خايفين مرة لا اسرائيل تهجم والشباب اللى تربية تامر حسنى وعمرو دياب حايشوف الدبابات جاية يسيبها ويجرى , لكن ربنا برضه مانسيش مصر ويوم الثورة وما بعدها الشباب طلع لسه فيه رجالة كتير , والشباب اللى كان بيسهر طول الليل يحمى البيوت فكرونا بشباب زمان , كانت الوطنية عنده حاجة كبيرة اوى يعنى فوق كل حاجة , لو شفتوا الافلام اللى كان فيها المظاهرات ضد الانجليز , كان الانجليز بيفتحوا عليهم النار ويقتلوا مئات وهم واقفين ماجريوش , وربنا شاء ان تتكرر تانى فى ميدان التحرير , كان الشباب واقف فى الميدان وسط القناصة من فوق العمارات والبلطجية وزجاجات المولوتوف , وعربيات نقل محملة بطوب متكسر مخصوص عشان يضربوا بيه الشباب , ومع كل الاصابات ومع كل القتلى والجرحى لكن الشباب ما جريوش زى ماكان المتسلطين يضربوهم فاكرين ..... كانوا فاكرينهم شباب خرع هايف تربية تامر حسنى ومصطفى قمر , ولكن الشباب كدبوا ظنهم ... وادوهم المفاجأة اللى ماكانوش يتوقعوها ,,,, الشباب طلع تربية مينا واحمس الاول وطه حسين والعقاد ومصطفى كامل واحمد عرابى ..... لحد جمال عبد الناصر , وربنا يحمى مصر من كل شر يارب
مع اطيب تحياتى

اشكرك ..... ياعملاق

فعلا عملاق من زمن الفن الراقي الاصيل ..

احبائى
اقدم لكم من عزفى المتواضع على الكمان
كوكتيل من احلى الاناشيد الوطنية , اخترت فيه مجموعة من اجمل الانشيد والاغانى الوطنية
عزفتها فى حب مصر

اتمنى ان تحوز رضاكم
مع اطيب تحياتى
على الرابط التالى

http://qooy.com/files/SORK5ROWUI/____________.mp3

الاستاذ الفاضل المحترم / عادل صموئيل ..

سمعت جميع الاغاني .. راااائعة و في منتهي الجودة و كأن الكمان تتحدث و تتكلم ..

خالص شكري و احترامي لحضرتك ..

انا مرضيتش تتحمل معايا مش عرفة ليه

عزيزتي مروة .. اللينك شغال تماااااام .. انا الان لسه منزله مرة اخري لأتكد .. المشكلة عندك ..

اضغطي علي :

ثم ستظهر صفحة اخري فيها عداد تنازلي من 60 ثانية و حتي 59 ثم 58 ثم ................ حتي يظهر لكي هذه العلامة : regular download .. أضغطي عليها .. و فقط ..