ازاي تبقي شخص رخم ورزل وخنيق وعاوز الضرب

السلام عليكم ورحمه الله وبركاته ..
انا قلت احنا في حاجـه الى شويه رخامه .. نظرا لان الجو
(( لطيف جدا )) ومفيهوش غتاته ولا تناحه
.. فقلت ان احنا لازم نغير من النظام ده شويه .....

نبدأ رخامه بقي

قول نكته طويلة أوى وتعالى عند أخرها وأعمل نفسك نسيتها

• هات بخاخة مطهر و أمشى ورا واحد و كل مايلمس حاجة تروح راششها بالمطهر على طول

• لما حد يشكى لك من حاجه قوله أنا عندى مشاكل أكتر منك

•فى مطعم بص للناس اللى على التربيزة اللى جنبك وهى بتاكل ودقق أوى
التقيل جاااااااااااي بقي
• كل ما حد يقولك حاجه عيدها بس على هيئة سؤال مثلا هايقولك "مش أنا اتجوزت" قوله "أتجوزت؟!" هايقولك "اه الشهر اللى فات" قوله " الشهر اللى فات؟!" ..... و هكذا

• و انت بتتكلم مع واحد متبصش فى وشه خالص

• واحد تانى بقى دقق فى ملامحه بص لودانه وشعره وكده

• و أنت فى المول ماتمشيش عادى لأ أفضل نط لحد ماتوصل للمكان اللى رايحه

• مش كده وبس أى حاجة تقابلك فى سكتك طبل عليها

• فى المترو امضغ أمضع لبانة بصوت عالى و أنت واقف جنب حد بيقرا مجلة او جرنان و أنت بتقرا معاه طبعا

• أعزم ناس تعرفها ملهاش علاقة بمناسبة عيد ميلاد حد تعرفه وياسلام لو معزوم على الفطار لازم تاخدلك مش أقل من أتنين فى إيدك

• لو قاعد بتتفرج أنت وصحابك على فيلم وفاضل 5 دقايق قوم غير القناة شد الفيشة أعمل أى حاجة لحد الفيلم مايخلص وميعرفوش النهاية

• سيب إاشارة العربية الشمال شغاله لمده 5 كيلو متر من غير ماتلف و بعدين اطفيها و كمل طوالى

• لو فى مناسبة فيها دى جى أستلم بتاع الدى جى بأغنية يشغلهالك ولوشغلهالك أستلمه يكررهالك علطول عشان بتحبها

• لو واقف جنب حد بيعد فلوس و فى وسط ما هو بيعد قول اى رقم عشوائى زى 423

لو واحدة بقي عايزة تدايق اخوها مثلا وهو بيحب المتش ومندمج تروح جايبة المكنسة وتشتغل بقي
طبعا هتتشتم تروحي ايلاله الله منظفش ياعني

ملحوظة : لو اتضربت أنا مليش دعوة ههههههههههههههههههههههههههه

هههههههههههههههههههههههه
يارب تكون عجبتكم

قول نكته طويلة أوى وتعالى عند أخرها وأعمل نفسك نسيتها

انا اخويا مرة قعد يحكلنا نكته بتاع نصف ساعة وبعدين قال انا مش فاكر رحت قمت اضربه
بدل ما هو اللي يجري رحت انا اللي جريت علاشان استخبه شوفته اللي انا فيه
هههههههههههههههههههههههه

اشكرك جدا يامروة علي المعلومات الغالية دي .. بس انا محتاج نصيحتك .
ازاي اتعامل مع السيدات في محل ملابس جاهزة خصوصا لما يرخموا في الفصال علما بأن مفيش فصال بس هما بيرخموا . اعمل اية ؟

هههههههههههههههههههه
كل الستات كدا مش عرفة
في حل حلو ممكن تطردهم
او ترخم زي مهم بيرخموا عادي ياعني
ههههههههههههههه

ههههههههههه حلوة يا مرمر بس
عارفة يا مروة انا نفسي نفسي اعمل مقلب فاخواني بس هما علي طول الي بيعملو فيا affraid

بس بردهلهم طبعا بطريقة او بأخري afro

انا عندي فكرة ممكن حضرتك ترفع الاسعار ولما تيجي واحدة تفاصلك قولها عشان خاطر حضرتك زبونتنا هنزلك السعر ونزل السعر الي سعرة الاصلي وبكدة تكون انت الي كسبان Idea

اشكركم اشكركم علي النصايح الغالية يا بنات
ولوافتكرتوا نصايح تانية يبقي كويس

العفوا يا استاذ عماد ولاكن النصايح دية مش ببلاش انا لية النص من المكسب ههههههههههههههه Smile

ههههههههههههههههههههه
بس هتعملي فيهم ايه دول مش عرفة
هفكرلك في واحد واقولك عليها

حتي دي عايزة فيها فلوس مبتعمليش حاجة لله كدا ابدا
اعوز بالله
هههههههههههههههههههه
انا بهزر

ماشي يا مروةوعلي فكرة انا مش كدة خالص
Sad

وانا زعلانة منك

انتي زعلتي وربنا بهزر متزعليش
خلاص اسفة ومش هرزل تاني ماهي رخامة بقي

ههههههههههههههههههههههههههههههههههههههههه
عليكي واحد يا امورة مش قلنا كل واحد يأخد باله من نفسة
انا قلتلكم هبدأ المقالب Cool

وعلي فكرة انا قلت مطولش عليكي عشان بس انتي حبيتي
لاكن المقلب الي جي مليش دعوة king

تحياتى الى كل الاحباء
وللعلم الموضوع ده لطيف جدا واشكرك عليه يامروة
وبالذات وسط الاخبار اللى تقرف طول الوقت وتجيب كل الامراض الضغط والسكر والاسقربوط وحمى الفنكيش , وماتسأليش عن حمى الفنكيش عشان دى حاجة جديدة لسه حاياخدوها فى كلية الطب
اما اغلس حاجة , او من اغلس الحاجات لما الستات تشترى ملابس او جزمة او برفان بصراحة , يعنى مقبولة لما ينزلوا مع بعض لكن لو واحدة مع جوزها او اخوها اكيد بتطهقه , لأن الراجل بيشوف قميص حلو يخش يشيله , او حزمة تعجبه بيدخل عليها على طول , اما الستا اعوذ بالله , عايزة تشترى فستان ممكن تدخل المحل تقيس اللى فيه كله بعدين تقول للبياع حاجيلك تانى وتدخل تقيييس وتقلب فى كل المحلات , او عايزة تشترى جزمة من مل من بتوع روكسى مثلا , فيه 30 محل كل محل فيه 6000 جزمة تقعد تقلب فيهم كلهم واحدة واحدة ماعرفش الصبر ده بيجيبوه منين , او الرفان تجرب 90 صنف , حتى انتى لما تيجى تشترى تلاقى الازازة ناقصة ربعها من اللى جربوها قبل كده , اما انت يا اخ عماد لما تيجى واحدة وتفاصل تشكر ربنا انها حاتشترى مش احسن من اللى تدخل وتقيس المحل كله بعدين تقول لك حفوت عليك وانا راجعة ؟ اما الحل اللى قدمته العزيزة بنت العرب هو بيحصل فعلا وخلى بالك اوى قبل الاوكازيونات بشهرين بيرفعوا الاسعار 30% , بعدين فى الاوكازيون بيعملوا حركة خبيثة , يكتبوا يافطة كبيرة خصم يصل الى 90%
طبعا الناس تقول معقولة الى 90% ايوه بجد بس على ايه ؟ يعنى نوع قماش الموضة بتاعته بطلت من 17 سنة ماحدش حايلبس منه تانى , ده ينزلوه الى 90% ويرضه ماحدش حايشتريه , او ممكن واحدة تشترى متر تعمله فوط مطبخ تمسك بيها الحلل , اما السلع اللى ارتفعت 30 % ينزلوها لسعرها العادى , وطرق النصب كتير يعنى محل يقول كل بيتسا عليها واحدة زيها هدية طبعا اخواتك يتجننوا ويهتفوا الشعب يريد ياكل بيتسا , روحى اشترى واحدة بعشرين جنيه وعليها واحدة هدية , وروحى محل تانى فيه واحدة ب 40 جنيهحتلاقى الواحدة اد الاتنين , يعنى بيضحكوا علينا بفلوسنا , بس المشكلة فيه ناس هبلة بتاخد من الكلام ده , اما البيع نفسه فن احكى لكم عن واحد غلس طالما الموضوع غلاسة ؟
زمان سنة 1976 كانت صناعة الملابس الجاهزة يعنى القمصان والبنطلونات الرجالى فى مصر زبالة , مكانش فيه المصانع الحلوة الموجودة دلوقتى كنا كلنا بنفصل عند الترزى , انا طبعا كنت بسافر بره كل شهر مرة مع الفنانين فى حفلات فى الخارج , فى المرة دى رحت سوريا مع عبد الحليم ( وكانت آخر حفلات فى حياته ) المهم نزلت اتفرج الصبح فى السوق لاحظت حاجة القماش السورى رسوماته فوق مستوى الهبل والجممال 100 مرة بجد مش ممكن , عجبنى قميص مشجر كحلى بس لقيته اكبر من مقاسى , رحت محل تانى , لقيت فى الفترينة نفس الرسم بس على بنى , دخلت المحل وسألأت البياع عندك من ده كحلى ؟ كان واد غلس وغتت بس خبير فى البيع طبعا من لهجتى حس انى اجنبى يعنى معايا فلوس كتير ( سائح يعنى زى ماعندنا بيصطادوا السواح ) قال لى لأ مقاسك ماعنديش غير اللى على بنى ده , قلت له شكرا وجيت اخرج , قال لى حضرتك وراك حاجة يعنى لو فاضى قيس القميص ده وماتشتريهوش يعنى شوفه عليك وبعدين اقلعه , قلت اجرب دخلت لبست القميص التفصيل عندهم رائع يعنى كنت انا عادل لكن فى المراية شفت عمر الشريف ... اكيد مش حاقلعه مش كده ؟ طلعت قلت له خلاص حاخد القميص , قال لى طب جرب البنطلون البيج ده وماتشتريهوش , جربه بس , جربت البنطلون , ابن اللذين اختار لونين يهبلوا على بعض عارف انى فنانا ومش حقاوم قلت له خلاص حاخد البنطلون والقميص , قلنا القميص مشجر فاكرين ؟ راح مطلع لى قميص مقلم قال لى طب خلاص مدام اشترريت ممكن تجرب ده وماتشتريهوش جربت القميص التانى ع البنطلون يعنى مش ممكن , المهم قعد ورايا يقول قيس وماتشتريش لحد ما خلانى اشتريت 6 بنطلونات و13 قميص , شفتم الغلاسة ممكن تعمل ايه ؟
مع اطيب تحياتى

ههههههههههههههههههههه
انتي ماشي يابنت العرب وربنا مهسيبك في حالك انا بقولهالك وخليكي فكراها

الله يا اساذ عادل ياعني منشتريش ما لازم نجيب الحاجة شيك وحلوة امال نلبس اي حاجة وخلاص
مش عرفة ايه دا بس بجد اليومين دول اللبس صعب اوي في مصر لما انزل اشتري هدوم ببقي عايزة اولع
في نفسي اللبس كله دايق جدا وشكلة مش لذيذ ياعني شكله مش حلو واللبس الشيك المحتشم محدش بيلاقس ياشيك ومش محتشم يا محتشم ومش شيك هنعمل ايه بقي

بس علي فكرة كتير 6 بنطلونات و كمان 13 قميص مرة واحدة كويس المدام والاولاد مكنوش مع حضرتك
كان هيخلي حضرتك علي الحديدة
هههههههههههههههههههه

انتي هتبدأي ولا ايه ربنا معاية
اسكوتي ومتكلميش كتييير بدل ما ابعتلك جامايكا ههههههههههه Twisted Evil

يا حرام يا استاذ عادل الراجل فلسك
شكل زي ما مرمر قالت المدام والاولاد مكنوش مع حضرتك
كانوا مسكة الراجل affraid

وروة الويل
ومش بعيد كمان ان حضرتك تأخد الهدوم مجاناً Razz

ههههههههههههههههههههههههههه
يخربيت فقرك وحاضر

على فكرة الموضوع بقى مسلى اوى
يعنى من حسن الحظ انى ساعتها كنت لسه ماقابلتش المدام اصلا والا كانت حتعوز هى كمان 13 حاجة وإلا تقول لى اركب اول طيارة وارجع مكان ماكنت وماتجيش بإيدك فاضية
اما موضوع اذواق اللبس انصحك غيرى المكان اللى بتتفرجى فيه , يعنى انا مش عارف انتى ساكنة فين , بس طبعا انا بفهم شوية فى كل حاجة , يعنى لما تمشى فى منطقة مصر الجديدة تلاقى نوعية الذوق واحدة , لكن لو رحتى مدينة نصر عباس العقاد والحتت دى مثلا حتلاقى ذوق تانى مختلف , بس بربنا مع بابا عشان هو اللى حايتدبس فى الآخر

نبدأ رخامه بقي
هههههههههههههه
لالالالالالالالالالالالالا
فى اشياء اكثر بكثير من ذلك
لما ربنا يكرمك و يبقى عندك طفل صغير مينمش الا لما يعمل دماغ عياط قبل النوم وانت لسة جيه من العمل مرهقة .
لما تجلسى فى النادى ونموسه تظل تلف حولين رأسك .
لما تجلس فى المنزل ولم تجد شئ تعمله غير انك ترخم على الى فى المنزل ولما يملوا منك ترخم على نفسك .
لما يكون مديرك ليس بدراية بالعمل وتقوله طور يقولك احلبوه .
والله موضوع جميل تسلم اديك

ههههههههههههههههههههههه
جامدة روح اركب اول طيارة وارجع مكان مجيت دي
انا ساكنة في الجيزة
بس بجد بتعب جدا والمشكلة بقي اني عايزة الهدوم محدش لبسها خالص
عايزة مصنع لواحدي
ماهو بابا اللي علطول بيدفع امال مين اللي هيدفع يعني
ربنا يخليهولنا يارب
ههههههههههههههه
جامدين جدا يا استاذ خالد
انا بعمل دي

لما تجلس فى المنزل ولم تجد شئ تعمله غير انك ترخم على الى فى المنزل ولما يملوا منك ترخم على نفسك

بس مبسبهومش ياعني لحد ما انا ازهق بقي
هههههههههههههههههههه

ههههههههههه
حلوييييين يا استاذ خالد
ههههههههههههههههههههه
يا مروة حرام عليكي سيبي العائلة في حلها ان هعمل تضامن مع عائلة مروة ضد مروة ونعمل حزب
ضد مروة tongue

ههههههههههههه وطبعاً كلهم هيوفقوا Laughing

انا كل ما اقول خلصت كلام ييجى حد يقول رد لطيف يخلينى ييجى على بالى كلام تانى ماتزهقوش منى
متعة الموضوع ده الثقافة , يعنى الانسان لما يكون مثقف اى موضوع من اى نوع بيتعلم منه حاجة ويبقى مش وقت بيضيع على الفاضى , وانا بوجه رسالة للعزيزة مروة , ومش هزار انتى نفسك يكون عندك مصنع لوحدك ؟ ممكن يكون عندك مصنع لوحدك وسهل جدا لو تحبى تتعملى منى , انتى دلوقتى فى الأجازة الصيفية وتقريبا اكيد عندك وقت فراغ كبير , اتعلمى التفصيل , وده مش محتاج مجهود كبير , وبعدين ممكن تشترى مجلة زى البوردا بيبقى فيها عشرات الموديلات والباترون بتاعها , وحبة حبة حتلاقى نفسك بقيتى استاذة , يعنى ممكن فستانين يعجبك حتة فى دى وحتة فى ده تعملى فستان فيه الحلو هنا والحلو هنا , وبالتدريج ممكن ربنا يكرمك وتبقى مصممة ازياء اد الدنيا وناخد ميعاد من السكرتيرة قبلها ب 6 شهور عشان نكلمك وتردى علينا بألاطة , بجد انا مش بهزر والأقتراح موحه ليكم كلكم , يعنى ابسط حاجة ممكن ماما او خالتك تساعدك او واحدة صاحبتك تكون عندها نفس الرغبة وبدل ما تقعدوا تنموا تعملوا حاجة مفيدة , وللعلم انزلى شوفى اى ملابس فى المحلات يعنى الفستان اللى تمنه 500 جنيه لو حسبتى مكلف كام قماش واكسسوار حتلاقيه مايزيدش عن 60 جنيه , يعنى بابا اللى ربنا يكون فى عونه لو اداكى ال 500 جنيه ممكن تعملى بنفسك خمس فساتين , بعدين احب اوضح حاجة ( والموضوع عن الغلاسة وانا حلو كده بغلس عليكم من امبارح ) ايه سبب الذوق مش حلو فى المحلات مش فى اللبس بس ولكن فى كل حاجة , ان التجار مش متخصصين , يعنى ممكن بوتيك ملبس جاهزة يكون قبل كده كان بتاع ملوحة وفسيخ وربنا كرمه وحب يفتح جادة انضف ويتعامل مع ناس اشيك , يعنى قدامه كان يفتح ادوات صحية او كهربائية راح فتح بتاع ملابس جاهزة , هنا مش بيتدخل الذوق او الفن , او اللى ساكنين فى الجيزة بيحبوا يلبسوا ايه , ولكن العملية بضاعة يعنى لو لقى قدامه وهو بيشترى البضاعة 100 بلوزة حلوة حايكسب فى الوحدة عشرة جنيه عشان تمنها اصلا غالى , و100 بلوزة زفت وحايكسب فى الوحدة 30 جنيه اكيد حايشترى الزفت عشان يكسب اكتر , والمشكلة ان فيه زباين بشترى وخلاص وبيكسب وخلاص , ماعندنا ثقافة المقاطعة زى اوروبا , يعنى تسمعى عن محل اكل محترم فى حتة شيك والناس اكلت وجالها مغص , لأيه ؟ لأن التاجر بقى كل همه يكسب , فيه لحمة ب فوق سبعين جنيه الكيلو ولحمة سعرها رخيص جدا لدرجة تشكى فيها او مشبوهة اصلا , عشان بيكسب اكتر بيشترى الرخيصة , ويكتر عليها الفلفل الاسود والذى منه والناس بتاكل , يعنى انتى ( الكلام موجه للكل ) لو رحتى بيتزا هت مثلا بيعجبك السلطات تخيلى انك بمنتهى السهولة تجيبى ازازة مايونير ب 7 جنيه وتعملى كل ده مش مشكلة الانسان بس لازم يفكر , يعنى فيه ايه لازم اشتريه من المانيا عشان مفيش حل تانى وايه ممكن اعمله فى شبرا , احنا اصابتنا خيبة لدرجة انا متوقع ان بعد عشر سنين حاتحصل حرب اقتصادية بين انجلترا واليابان على ان مين يصدر البلاليص القناوى والكشك الصعيدى والملوحة لمصر
وحتحصل اذا كان الفول بنستورده من الصين وفانوس رمضان وكمان بيغنى وحوى ياوحوى
مع اطيب تحياتى

ازيكم ..
بصراحة المحل بتاع السيدات دة لولا انة بتاعي كنت زماني سبتة من زمان
حاجة تطهق انا ماكنتش فاكر ان المجال دة غتيت كدة .. العملية مش بس فصال يا استاذ عادل دة كل حاجة
انا فاتح في مكان جميع الفئات بتجيلة الشعبي و اللارج وكلهم غلسين يعني تجيلك واحدة اليطة عاوزة بنطلون جينز كحلي مسود الحمد للة جبنالها الدرجة المطلوبة والمقاس المظبوط والصحبة اللي معااه بتأكد ان دة خطير عليها وممتاز وهي مايعجبهاش . قال اية عايزة درجة كحلي مسود اكتر من كدة قلنالها بعد كدة مفيش غير الاسود وهي مصرة علي رأيها وتسيبك وتمشي حتي بدون شكرا .. دا اية التناحة دي .

واحدة تانية تشتري وتبقي مبسوطة جدا وتيجي تاني وشها مقلوب عاوزة ترجع الحاجة اللي خدتها بعد ماطلعت عيون اهالينا قال اية زوجه او ابوها معجبتهوش ..

واحدة تالتة تيجي المحل وانت يدوب شاري فرشة الصيف والحبر اللي علي الشيكات بتاعة البضاعة لسة منشفش وتلقي نظرة كدة بالاطة والمحل مليان وفية حاجات ممتازة وتيجي تسألك هو انتو هتجيبو ا بضاعة تاني

واحدة تانية تدخل وتنبهر وتقولك ذوق المحل شيك جدا اقول في نفسي الحمد للة هنبيع وبعدشوية تمشي هي و القبيلة اللي معاها اسألها بأستغراب واستنكار هو فية اية ؟! تقولك من كتر الحاجات الجميلة محتارة اخد اية .

واحدة رابعة كارهة نفسها تيجيلك وتحاول تساعدها تطلعلك القط الفاطس في البضاعة وفي المحل و في اللي جابوني

ولسة .. كفاية كدة انا رخمت علي نفسي بما فية الكفاية

هههه فكرة حلوة اوي يا استاذ عادل وحضرتك كلامك مفيد ومش بنوهق منه ابدا ويا ريت يا مروة تشوفي المشروع ده ولو حقق بأذن الله تجيبي لك واحد اناا تجبيلي 5 فساتين واستاذ عادل 16 قميص و6 بناطيل
واستاذ عماد تروحي تضربي الزباين بتاعتة Laughing

بجد يا استاذ عماد ربنا يكون في عونك هههههه علي فكرة الحل الوحيد ان حضرتك تكتب علي المحل الي هيدخل وميشتريش هيضرب او توقف علي المحل اتنين من الصعيد يعملولك ارهااااااااااب Razz

تعرفي يا بنت العرب وربنا لو سمعوكي هيجوا يتعرفوا عليكي في نصف ساعة وماهيصدقوا دا انا لسة دابة خناقة في الجون دلواقتي ياعني بالعربي كدا ماهيصدقوا
هههههههههههههههههههههههههههه

والله يا استاذ عادل انا فعلا نفسي ابقي مصممة ازياء بس لما اشتغل مش هبقي كدا الاطة كدا
انت بس قولها الاستاذ عادل وهتدخل علي طول
ههههههههههههههههههههههههههه
هاحاول اعمل بالنصيحة دي بجد

ربنا يكون في عونك يا استاذ عماد يارب انا بصراحة بروح واعد بلـ5 ساعات طبعا ببقي هشد في شعري ياعني لاني مش لاقية حاجة فابدخل علي بوزي ميت قرد زي مابيتقال واخر ما بذهق بقول لماما يلا يماما مش هشتري هدوم لحد محلفت عليا انها مش هتنزل تشتري معايا هدوم تاني مين بقي اللي هينزل معايا

ههههههههههههههههههههه
من عيوني يابنت العرب بس انتي مش هعملك اي حاجة ها
لكن استاذ عادل طبعا هعمله هو والمدام والاولاد كمان اي خدمة يا استاذ عادل
اما بقي استاذ عماد هيجي يضربني لو عملت كدا
ههههههههههههههههههههه
لا طبعا انا مش ممكن اعمل كدا خالص
انا ممكن اروح اسوان علاشان لشوف الهدوم هتعجبني ولا لا
هههههههههههههههههه
مش بقولكم هيضربني

» ما رأيك في الضرب في المدارس؟
» ازاي ترديلي نتيجتي
» علمونا في مدرستمنا ازاي نحبها.........................بنحبك يا مصر
» تاني حاجة هتعملها بعد ماتقول صوتك بكره..تيجي تحكلنا تجربتك كانت ازاي
» يوميات بنت مظلومة -قصة واقعية تحتاج لحل-تحكمو عليها ازاي وبايه؟؟؟؟؟