الاخت العزيزة د نانسى
العملية اخطر من كده 100 ( اخطر واقذر كمان )
انا واحد كنت موسيقار بالليل والصبح فى وزارة التربية والتعليم لمدة 30 سنة .. وتدرجت لحد ما بقيت موجه اول فى ادارتين هم عين شمس والسلام
وبالطبع طبيعة عملى كنت بدخل فى الاسبوع عدد كبير من المدارس على كافة المستويات وجميع المراحل
وانا عادة شخصية متأملة يعنى بحب اشوف كل حاجة بعينى وادقق واحلل .. واللى انتى قلتيه انا شفته مئات المرات وافظع من كده
والضرب فى ابتدائى بالذات جريمة نكراء .. يعنى فى ثانوى وضع تانى
فى ابتدائى يا اخوتى الاعزاء مشكلة المدرسين بيتعاملوا مع الطفل مش ان واجبهم انهم يعلموه وده اولا اللى بياخدوا عليه مرتب وحايتسألوا عنه قدام ربنا ,, ولكن بيتعاملوا مع الطفل على انو سبوبة بيتكسبوا منها .. يعنى المدرسة فى الفصل بتعلن عن انها حاتعمل مجموعة .. وياويل الطفل اللى ما يدخلش المجموعة .. اول حاجة بيتعامل بقلة ذوق والمدرسة او المدرس بيتلكك له على اى حاجة .. وحتى لو فرضنا ان التلميذ شاطر ولهلوبة وبيحل الواجب ومذاكر 100 % المدرس برضو بيتكلكك له على اى حاجة يضربه .. وهذا المدرس لو كان هذا التلميذ التعيس بياخد عن المدرس ده مجموعة او درس خصوصى عمرو ماكان حايضربه .. وبالعكس لو التلميذ خيبان او قلليل ادب او بيشرب سجاير او بيعمل اى مصيبة كان المدرس حايطبطب عليه وما يقوولش إلا ياحبيبى .. ولو التلميذ ده ضرب واحد زميله وكان هو اللى غلطان المدرس بيقف مع الغلطان لأنه كاسر ينه بالفلوس اللى بيقبضها منه
ده التعليم يا احبائى .. والمشكلة لما مجلس الشعب بيتكلموا فى الغاء اللغة الانجليزية وبالطبع كل اللغات معنها نقفل الجامعة كمان لأن الجماعة كل المواد فيها لغات .. وحتى لو عملنا عملية الغسيل يعنى نعمل تعريب لكل المواد اولا حتاخد عشر سنين وثانيا الخريج لما يتخرج حا يبقى مالوش قيمة يعنى اولا ما ينفعش يخرج بره مصر لأن شهادته حاتبقى زى الدينار الليبى مالوش قيمة بره ليبيا .. وثانيا الجامعى حايبقى متخلف عن العالم كله لأن الابحاث والمراجع والحاجات الحديثة اللى بتطلع حايبقى هو بعيد عنها .. واقول لك حاجة صغيرة ..
تخيلى حضرتك لو اشتغلتى مع زميل دكتور يابانى انتى ماتعرفيش يابانى وهو مايعرفش عربى .. حا يبقى بينكم تفاهم وانجاز فى الشغل ممكن يصل الى 90% لأن بينكم لغة تختطب عاملية وهى المصطلحات الطبية ومش مهم اللغة لأن الإشارة ساعتها تكفى .. تخيلى لو انتى دارسة الطب بالعربى ؟
واللى بيتكلموا دول عم عايزين يلغوا المثقفين من قائمة الشعب عشان يبقى هم وحدهم اللى بيفهموا والباقيين ما يتكلموش ومش بيتعلموا من المصايب اللى حصلت فى العالم من تحت راس التخلف
يعنى الاخ الفقيد معمر القذافى مرة اتجنن وقال نلغى كل المواد بتاعة الدول الاستعمارية وعملوا مهرجان حابوا فيه كل الكتب اللى فى البلد واللى بلغات اجنبية وحرقوها فى مهرجان فى الميادين العامة وكانت النتيجة طلع جيل ما يعرفش حتى شكل الحروف الانجليزى ايه
واحدة ليبية عايزة تعمل دكتوراه فى مصر وكان شرط الدكتوراه اجتاز اختيار التويفل وتخيلم لو واحدة ماتعرف حرف انجليزى تعمل ايه يعنى لازم تدرس الانجليزى من الصفر .. وقعدت تاخد دروس بس بعد 4 سنوات ماعرفتش توصل للمستوى وضاع عليها الدكتوراه والنهاردة ليبيا بيحاولوا يصلحوا الغلطة دى بس حتاخد خمسين سنة ... لأن التلميذ عشان يفلح فى اللغات لازم امه فى البيت تكون تعرف شوية عشان فى البيت تشتغل معاه الشوية الاوائل على الاقل وفين مفيش طبعا ... ولسه
مع اطيب تحياتى
النوع
موضوع: ما رأيك في الضرب في المدارس؟ 
الأحد مارس 11, 2012 4:24 pm
