رسالة " قليلة الادب " الي رئيس وزراء مصر عصام شرف !

اعتذر علـــي سوء اخلاقي لاختياري هذا العنوان

لكني لم اجد عنوان اخر يناسب هذه المهزلة المسكوت عنها المذكورة في هذا الفيديو من برنامج محطة مصر

الفيديو

دي كارثة وبصراحة حاجة محبطة جدا.. شكرا ليكي يا آيات

شكراااااا ايااااااات ..

مش انتى اللى المفروض تعتذرى عن العنوان يا ايات

اللى المفروض يعتذر هو كل مسئول رضى ان المهزلة دى تحصل و ما اتخدش موقف سياسى أو ايجابى يرجع حق الناس اللى اتبهدلت دى

بس خلينا نقول ان اللى حصل للمعتمريين المصريين فى مطار جدة ده مش حاجة جديدة .. بكل اسف ده اللى اتعودوا يعاملوا بيه المصريين "اللى ما بيعرفوش ياخدوا حقهم بس" و العيب مش عليهم العيب كان على نظام ما كانش للمصرى عنده أى قيمة فى اى مكان للاسف بس المفروض اللوقتى الوضع اتغير و ضرورى جدا يتفتح ملف مشاكل الحجاج و المعتمريين المصريين .. اوؤكد لكم يا جماعة هنلاقى بلاوى ... بس بكل اسف البلاوى دى كان بيتسكت عنها قبل كده لأن المصرى فى بلده اصلا ما كانش واخد حقه لكن بعد الثورة ضرورى الامور تتغير و بدون قلق من ان العلاقات بين اكبر دولتين عربيتين ممكن تتوتر لان الحقيقة انهم محتاجين لينا يمكن اكتر من احتياجنا و الدبلوماسية المصرية تقدر تصمم على حسن معاملة المصريين فى السعودية خصوصا الحجاج و المعتمريين خصوصا ان ده حق و شئ المفروض انه يكون طبيعى و الازهر ممكن جدا يكون له دور فى المسألة دى لأن احنا عندنا علماء دين ازاهرة بيجلهم و يحترمهم علماء الدين فى السعودية .. لكن الامور لو اتسابت كده من غير موقف جاد خوفا على علاقات دبلوماسية او سياسية فيبقى احنا اللى علينا الغلط .. اتمنى فعلا يتفتح بشكل واسع ملف مشاكل الحجاج و المعتمريين المصريين .. اتمنى فعلا اقدس و اشرف رحلة لأى حاج مسلم مصرى تكون خالية من منغصات و معاملات دنيوية غير شريفة سواء من قبل مسئولين سعوديين أو مسئوليين و منتفعيين مصريين

السؤال دلوقتى أيه الفرق بين عصام شرف وأحمد نظيف ؟؟؟؟؟!!!!!!!!!
رئيس الوزراء الذى يقبل اهانه كرامه شعبه لا يستحق الثقه

https://www.youtube.com/watch?v=33kzkVl42PE

"المملكه" السعوديه دى مش هتجيبها لبر يعنى شويه ما فيش محاكمه وشويه سلفيين وشويه احباط ثورة اليمن وشويه جيش يروح البحرين الله يخرب بيت الكرسى اللى يعمل كل ده

لكن الحق مش عليهم الحق على حكومة ولا مؤاخذه "الثوره "التى لا تمت باى صله للثوره ووزير الخارجيه اللى اصلا جاى من هناك ومصر للطيران بتاعة شفيق واعوانه والحج شرف اللى لا بيحل ولا بيربط الاخ المشير اطال الله بقائه "على الكرسى"ولا مؤاخذه الناس دى كلها فين
فين الاخ الفنجرى يعى ما شفناش صباعه دفاعا عن كرامة المصرى
ولا الاخ الروينى وهو بيوزع الاتهامات يمين وشمال
فين كرامة المصرى
يعنى اسرائيل تخترق الحدود وتقتل ولا دنا على ارضنا وما حدش ينطق ويقولك اصلنا خايفين من الحرب طب خايفيين تحاربوا السعوديه كمان ؟؟

كنت متردد لكن دلوقت 9/9 فى عيد الفلاح المصرى

ايه بقي الفرق كنا بنحسب ان كرمتنا رجت بس طلعت في الارض
يارب يبقي في حد يرد علي المهزلة دي

اولا اشكركم جميعا علي المرور الكريم والتعليق

ثانيا الي الاستاذة فرحة : لا الي احصل مش دايما بيحصل لان الي حضرتك تقصديه لو حضرتك تفتكري واكيد متابعة الاحداث انها بتكون مشاكل من عندنا..يعني الحكومة مش موفرة الاجراءات اللزمة لينا ودايما كنا بنتعلق يا في ميناء السعودية عشان العبارات ما جتش اصلا او ماعهاش تصاريح ياما بنتعلق في ميناء مصر نفسه

كان عيبنا منا ...لكن اننا نتوقف عشان احنا بتوع ثورة التحرير والظباط السعودية يشتمونا ويهنوا المصريين عشان مبارك
فده عيب بجد ولو حكومة الثورة والجيش الي حمانا مش عارف يرد يبقي ماحدش يستحق انه يحمل اسم ثورتنا منهم

بجد ادب عصام شرف الكبير ده ماينفعش خالص دلوقتي في الامور دي

تحياتي لحضرتك استاذة فرحة

وخالص تحياتي للجميع

لا يا ايات كان بيحصل يمكن الضوء ما كانش بيتسلط على المشاكل قبل كده زى الحادثة دى

افتكر من فترة يمكن خمس او ست سنين كنت طالعة عمرة برى مع اهلى من مصر و بعد يومين سفر و بهدلة العبارة اللى انا كنت فاكراها بهدلة على اساس اتاخرت كام ساعة و بعد وصولنا للحدود السعودية وبعد ما ختموا كام باسبور رجعوهم و رجعوا الجوازات كلها و قالوا للمشرفين فى مشكلة و مش هينفع تدخلوا .. اتفضلوا ارجعوا !!!!
ليه و مش ليه ؟ قالوا مشكلة فى رقم قيد الكفيل .. كفيل مين يا جماعة احنا جايين عمرة مش نشتغل .. قالولنا المشرفين ده نظام جديد لسه مطبقينه على شركات السياحة بس المشكلة دى من عندهم مش من عندنا .. طب احنا مالنا و ازاى نرجع بعد المسافة دى كلها .. مافيش هو ده اللى عندنا ... طبعا احنا كنا اول اتوبيس و خلال الحوارات دى كان اتجمع حوالى خمس اتوبيسات غيرنا ... الاول المشرفين اتكلموا مع الجنود و الظباط المسئولين و ما فيش فايدة .. بعدين مجموعة من الرجال كبار السن الوقورين جمعوا نفسهم و راحوا يتفاهموا معاهم .. بمنتهى الجليطة و قلة الذوق كانت الشبابيك و الابواب بتتقفل فى وشوش الناس المحترمة و ما فيش تفاهم
المهم المشكلة ما اتحلتش غير لما الناس اللى فى الاتوبيسات الستة نزلت و قفلوا الطريق على العربيات اللى داخلة و اللى خارجة .. طبعا الدنيا اتقلبت و فتحوا الشبابيك و بدأوا يهدوا و خلاص المشكلة ممكن تتحل و فعلا عدينا بس بعد ما ضاع نص اليوم تقريبا على مشكلة من عندهم .. طبعا الموضوع ده بعض المعتمريين صوروه بس الموبايلات كانت بتتاخد و يدلت كل اللى عليها

افتكر برده انى قضيت يوم واحد بس فى مخيم الحجاج المصريين فى منى يمكن من سنتين ـ انا مش حابه اطول و احكى عن كل اللى شوفته هناك بس كان فى اهمال كبير و زحام على دورات المياه و فوضى .. بس الحقيقة المشاكل اللى انا لمستها اليوم ده كان معظمها بسبب سلوك المصريين و لا مبالاة المشرفين المنتفعين

و على فكرة مطار جدة ده دايما بيحصل فيه مشاكل للمعتمرين و الحجاج المصريين يمكن عشان اعدادنا دايما كبيرة بفضل الله فى مواسم الخير و اصلا مطار جدة ده اشبه بموقف اتوبيس يعنى ما فيهوش نظام ابدا

طيب بالنسبة للى حصل المرة دى .. الطبيعى و المفروض انه يحصل تحقيق داخلى فى مصر و يتأكدوا ان الكلام ده حصل و ان فعلا فى معتمريين ماتوا بسبب الضرب او الاهانة المتعمدة .. طبعا السفير السعودى دايما يتكلم انه لا احنا علاقتنا انتهت بمبارك بعد خلعه و لا احنا بنحترم الثورة المصرية و بنتعاون مع حكومة الدكتور شرف و الكلام الجميل ده
طيب الظباط اللى هانوا المعتمريين يتحاسبوا بقى .. و المعتمريين اللى اتلغت رحلاتهم يتم تعويضهم عن الضرر اللى وقع عليهم .. ده اقل شئ تطالب بيه الحكومة المصرية

بس للاسف لو احنا جينا نتكلم بواقعية هنعرف ان ما فيش حاجة من دى هتحصل مش بس عشان دكتور شرف مؤدب .. بس عشان احنا عشنا سنيين و سنيين بنرضى الاهانة و بنعديها فالناس اللى فى مواقع المسئولية النهاردة بتعدى حاجات اكتر من كده بحجة ان البلد فى ازمة و وقت صعب و مش عارف ايه .. فى حين ان الحقيقة ان عقولهم اتبرمجت على تقبل مثل هذه الاحداث .. و ما فيش اقرب من حادث الحدود كمثال .. يعنى اقل شئ يتطلب انه يكون فى تعويضات لاهالى الناس اللى استشهد ولادها غدر .. صحيح نزلنا العلم بس اهو اترفع تانى و فوق ده بيبنوا جدار عازل!!!!! و اتنسى الشهداء و اتنست التعويضات و الحقوق

للاسف عقول المسئولين اتبرمجت على حاجة اخطر من كده .. ان احنا دولة محدودة الموارد و ان الزيادة السكانية عبئ على الدولة المصرية و انها زيادة سكانية مش ثروة بشرية .. بالتالى احنا محتاجين مساعدات خارجية .. بالتالى محتاجين نسكت على بعض الصغائر .. للاسف ده منطق المسئولين المصريين سواء فى النظام السابق و للاسف حتى بعد الثورة شواهد كتيير بتؤكد استمرار العمل بالمنطق المغلوط ده

حقيقى ده اكتر وقت بعد الثورة حاسة فيه بالاحباط مش بس عشان ازمة المعتمريين لكن لان اننا فى مصر لسه بنتكلم اكتر ما بنشتغل و لأن على ارض الواقع الامور ما اتغيرتش كتير .. حتى القوى اللى المفروض انها وطنية مش عارفة غير انها تتخانق و تخون و تهتف فى حين ان ده وقت الشغل ..

اتمنى انى اكون غلط و ان حكومة دكتور شرف و المجلس العسكرى يكونوا بيفكروا حقيقى و بيشتغلوا على مشاكل المصريين و حفظ كرامتهم و حفظ كرامة الثورة

اسفة جدا على الاطالة .. تقبلى يا ايات و كل الافاضل المشاركين كامل ودى و احترامى

» متابعة و مشاهدة و تحميل و صور حلقة جملة مفيدة يوم السبت 17 نوفمبر . بكاء منى الشاذلى على الهواء تأثراً بكارثة قطار اسيوط . و لقاء مع رئيس وزراء تركيا ..
» حوار مني الشازلي مع عصام شرف
» موقع العاشرة يتقدم جدا بفارق مذهل في ساعات قليلة
» تحذير للمجلس الاعلى والدكتور عصام شرف
» عفواً الدكتور عصام شرف ... البلد في حاجة لديكتاتور عادل.