احبائى
اشكرك يا آيات الف شكر على هذا الموضوع
واشكر الاحباء الأستاذ امير وبنت العرب على التعليق
نفسى اقول كلمة , االمسلمين والمسيحيين هم الاتنين بيعبدوا مين ؟ الله ولما نقول الله يعنى اله واحد بيعبده الاثنين مش لكل دين اله
وطالما مصدر العبادة واحد وهو اللى خلقنا كلنا وعلى شكله وادانا كلنا اجمل الصفات واحلى الاخلاق , وكل دين بيحث اتباعه على مكارم الاخلاق , والرفق والحب للآخرين , والسماحة والود والسلام , ولو تأملت فى الدنيا تلاقى كل حاجة فيها اتخلقت بنظام دقيق , مافيهاش حاجة عشةائية , والدليل على كده انك بعد ملايين السنين لما ابتدا العلم يحلل كل الظواهر وجدها معمولة او مخلوقة بدقة علمية متناهية العبقرية , يعنى آيات الله على الأرض والليل والنهار وليه الكواكب مش بتخبط فى بعض وليه ثابتة فى مكانها وليه بتلف وليه الارض كروية وليه وليه .... الخ , يبقى طالما اللاه خلق الارض واللى عليها كل حاجة بسبب ومن غير عشوائية , يعنى مش خلق حاجة وساب الامور تكمل مع نفسها , لكن خلق كل حاجة زى ما اتعلمنا فى الاديان , لما خلق الله البشر الوان واجناس , ليه ماخلقهمش كلهم لون واحد , كان ممكن لكن هو سبحانه وتعالى شاء ان يكونوا على هذا الاختلاف , ولو دققت تلاقى فيه برضه حكمة سبحانك يارب يعنى فى وسط افريقيا السود وبشرتهم سميكة جدا عشان الحرارة الشديدة وكل بلد حتلاقى فيها حاجة تناسبها , والله سبحانه وتعالى شاء ان يكون فيه 3 اديان سماوية , وفيه الاف الديانات اللى مش سماوية فى آسيا وغيرها , لو ربنا شاء كان خلاهم فى ديانة سماوية لكن ماتعرفش الحكمة اللى ورا كده , يعنى نرجع لأصل الموضوع ان كل حاجة بتحصل على الارض بإرادة وتحديد من الله
اما عن رجال الدين واللى بيطلعوا على الشاشات , المفروض انهم يقولوا كلام يرضى الاطراف اللى بتسمع بمعنى اى قناة تليفزيونية ممكن يكون بيشوفها كام مليون مشاهد , انا لما بيكون برنامج دينى اسلامى بحب اشوفه لحد آخره واجمل شىء احس ان فضيلة الشيخ بيقول كلام جميل لو سمعه المسلمين والمسيحيين , لأن الشيخ ده بيدى انطباع عن الدين وبيعلم الناس كل حاجة جميلة , واحنا كلنا بنتعلم من بعض الخصال الجميلة , يعنى انا شخصيا من اشد المعجبين بسيدنا عمربن الخطاب رضى الله عنه , ده نموذج للحاكم النموذجى بس مش حتلاقى زيه , يعنى كان من الفلتات اللى مش ممكن تتكرر , وانا من شدة اعجابى بشخصيته قريت كل كلمة ممكنة كتبت عنه , عارفين يا احبائى خليفة المسلمين ده كان عنده كام ثوب ؟ واحد , واحد فقط وكان بيغسله وينشره وينتظره لما ينشف عشان يلبسه , شوفوا التواضع , واهم حاجة انه ماكانش له مطامع , يعنى النهاردة الناس بتقتل بعضها عشان تحكم ليه ؟ طمعا فى اللى ورا الحكم من مكاسب وعظمة ومواكب وسيطرة على العباد والقصور و ... ... و ...
هات لى واحد عايز يبقى حاكم مالوش مطامع فى حاجة , وعايز يخرج من الدنيا عريان يامولايا كما خلقتنى , مش حتلاقى
فيه مشكلة مع وسائل الإعلام , بصراحة بيستسهلوا ويجيبوا المشاهر مش بيدواروا على المغمورين واللى ممكن يتكلموا كلام حلو يفيد كل الناس
يعنى البرامج اللى مش دينية اصلا لما تستضيف فيها رجل دين بيبقى الكلام هنا عام يعنى مش محدد لفئة معينة , ومع الاسف فيه مشاهير بيتقاضوا فى الحلقة مبالغ مفزعة لكن تحس ان كلامهم عادى جدا مش قد الشهرة دى , يعنى ممكن شيخ مش مشهور من الازهر بيقول كلام مفيد اكتر منه مليون مرة زائد حاجة مهمة جدا اتمنى ان يتكلموا فى الدين يكونوا متخصصين يعنى رجال دين , يعنى ماينفعش محامى او مهندس زراعى يتكلم فى الدين زى ماينفعش رجل دين يتكلم فى قانون العقوبات او زراعة الباذنجان , لو كل واحد يبقى مفيد فى تخصصه اعتقد افيد للحميه وىسف للإطالة واكرر شكرى
مع اطيب تحياتى
النوع
موضوع: الأنبا موسي أسقف الشباب >>>>>> تحيــــه الي هــذا الرجل 
الخميس يوليو 14, 2011 8:26 pm
