قانون الطوارئ

موضوع: قانون الطوارئ السبت سبتمبر 17, 2011 2:00 pm

قانون الطارئ المعدل من المجلس العسكرى هلى انت توافق عليه ام ضده و لماذا --- أنا شخصيا مع قانون الطوائ لسبب و احد هو انى اقمت فى مصر فى عهد مبارك تقريبا 20 سنه و لم يعترضى اى شخص و لا اى جهاز أمنى لانى احترمت نفسى بعدم اثارة اى مشاكل علما بانى كنت ابدى رأى بكل حريه فى الاماكن العامه و بصوت مرتفع لدرجة ان بعض المتواجدون فى المكان كانوا يشتركون فى ابداء ارائهم فلماذا الخوف من الطوارئ اذا انت ماشى صح ؟ افيدونا افادكم الله

الأخ العزيز احمد مصر

انت كلامك كلام راجل محترم , والمشكلة ان قانون الطوارىء معمول عشان مين , عشان اللى بيخرقوا القانون , لكن الناس اللى بتحترم نفسها وتحترم القانون ماحدش بييجى جنبها , يعنى انت قلت انك كنت بتتكلم بصراحة قبل الثورة وفى اماكن عامة وكانوا النس المحترمين بيشتركوا معاك , وماحدش عمل لهم حاجة , وللعلم سمعت زمان على مراكز اقوى ايام عبد الناصر ؟ وشفت فيلم الكرنك ؟ كان فيه ممنوع اللكلام اصلا من اساسه , يعنى فى اى قهوة او اى جامعة كان بيبقى فيه جواسيس او مخبرين , بيسمعوا الكلام اللى بيتقال , وبيعملوا تقارير عن الناس اللى بتتكلم فى السياسة اى كلام من اى نوع , بحيث بيبقى عند الجهة اللى كان بيمثلها كمال الشناوى ولم تكن جهة مختصة بالضبط ولكن كانت سرطان داخل على المجتمع لدرجة انهم لما اشتكوه لعضو مجلس الشعب قال ان فلان ه مش من سلطته يقبض ع الناس ويعذبهم , ولكن الجواسيس نقلوا الخبر لكمال الشناوى واستدعى صلاح ذو الفقار وبالرغم من الحصانة هدده بالإعتقال , وكان الكلام ده مش تبع قانون الطوارىء , ولكن كانت سياسة قذرة انهم بيجمعوا اسماء ناس وكل فترة يروحوا قابضين عليهم ويمضوهم بالتهديد على اعترافات بعدين يفهموا الرئيس انهم بيقبضوا على خلايا بتهدد امن الوطن وطبعا ع الفاضى , والناس دول فى آخر الفيلم لما جه انور السادات قبض عليهم كلهم وريح الشعب منهم , لكن فى عهد مبارك مع ان كان فيه قانون طوارىء طول الوقت لكن مفيش حد محترم او بيحترم نفسهحد جه جنبه , لكن فيه استثناء , يعنى لما واحد محترم ويقعد مع ناس مشبوهين كان ممكن يتاخد فى الرجلين , انا شخصيا اوافق على قانون الطوارىء , لأنك بمتابعة الاحداث والحوارات كل مسؤول امنى تقول له عن البلطجية يقول ما اقدرش اقبض على واحد منهم إلا متلبس بجريمة وإلا حايتدخلوا بتوع حقوق الانسان , وحتى لو قبض على البلطجى اللى راعب منطقة , بدون تلبس بجريمة محددة وحسب القانون الطبيعى ما يقدرش يحتجزه اكتر من فترة محدودة جدا , يعنى 4 ايام وساعتها ممكن محامى البلطجى يدخل الظابط ده فى سين وجيم لأنه بيخترق القانون , ولازم حايضطر يفرج عنه ويبقى يابو زيد ماغزيت , لكن فى ظل قانون الطوارىء ممكن الظابط يعتقل اى واحد خطر على الأأمن ويعتقله او يحبسه فترة كافية حتى على الاقل انت لو البلطجى ده عمل معاك اى جريمة تقدر ساعتها تروح تشهد عليه وياخد العقاب الرادع , الوقت الحالى الجرائم زادت بشكل بشع , والبلطجية قربوا يمتلكوا البلد ومش عارف ازى نقدر ندخل انتخابات فى ظل مئات الآلاف من البلطجية والخرجين على القانون ممكن اى حد يأجرهم واقل حاجة عندهم القتل , زائد ان النهاردة اى مجرم بقى بيتحرك زى ماهو عايز يعنى قبل الثورة اقل شىء بيتحرك وهو مرعوب اما النهارده بيتحرك وهو عادى يعنى تاجر المخدرات بيبع فى الشارع عادى كأنه تاجر فاكهة مش خايف من حاجة , واكرر اى انسان لما ياخد باله فى اى وقت انه مش مخالف للقانون , يعنى ماتنزلش من بيتكم مثلا وانت مش معاك بطاقة وبالذات بالليل ,
يعنى كمان مش معقول واحد محترم يمشى معاه سلاح ابيض او من اى لون , ماتمشيش بعربية بدون نمر يعنى حاجات بسيطة , ممكن تقول رأيك بأدب فى الحكومة لكن ماتشتمش , او تقول عبارات اما تحريضية او ممكن حد يفهمها على انها تحريضية , ولما نقولها بإختصار شديد :
مين بيخاف من العسكرى غير الحرامى ؟؟؟؟؟؟ يعنى الانفلات الموجود مش بس وصل لكل الجرائم الممكنة والغير ممكنة والجديدة على مجتمعنا ,
ولكن تخيل سيادتك لما عشر بلطجية يهجموا على مامور قسم بولاق وهو راكب عربية الشرطة ويضربوه ويضربوا العسكرى السواق معاه بالنار ويسرقوا اربع طبنجات ميرى وجهازين لاسلكى وعربية الشرطة كمان , قانونأ الظابط ده القانون بيديه الحق يضربهم بالنار لكن ماعملهاش خايف لا يتقال انه هو اللى بدأ بالإعتداء عليهم والصحف تشتغل والناس تشتم ع الشرطة , يعنىمهازل مستحيلة
مع اطيب تحياتى

حقيقتا يا أخى الكريم صموئيل انت اكثر احتراما

فى اعتقادى انه اى و احد مش موافق على قانون الطوارئ فى حاجه امنيه بتمسه عشان كده خايف و زى ما حضرتك قلت قصة المأمور فعلا محدش كان يجرئ على

فعلها قبل الثوره -- فى اى دوله الشرطى له هيبته و لا ماكنش ممكن ينضبط الشارع -- هوبس الحاجه الوحيده اللى انا بطلبها من الشرطه و اعتقد ان الكل يوافقنى عليها هى : عند القاء القبض على اى خارج عن القانون يجب عدم اهانته او المساس بكرامته كانسان علما بأنه مجرم أو مخطئ المفروض يتعامل معاه بهدوء لانه فى النهايه هيدخل السجن و يعاقب هى فقط قضية الاهانه فى الاقسام و الضرب ده بالنسبه لى مرفوض تماما

انا شخصيا تعاملت مع الشرطه و أمن الدوله بس مش متهم فى اى قضيه الحمد لله لكن فى رخص محل استخراج أوراق رسميه و الله لم يحدث فى يوم ان اى شرطى تعدى على بأى نوع من الاهانه بالعكس كانوا فى منتهى الادب و كانوا فى الخدمه حقيقتا

يا اخ صموئيل المحترم محترم فى اى مكان

المثل بقول --امشى عدل يحتار عدوك فيك

الأخ العزيز

اشكرك على كلامك المحترم والمتفهم , واللى ريحنى نفسيا لأن المشكلة من اول يوم فى الثورة ابتدت ناس كتير تتكلم واحيانا بتكون فاهم هم عايزين ايه واحيانا متيرة بتكون مش فاهم هم عايزين ايه يعنى بيستعبطوا او يستهلبوا , والمشكلة ان فى البلد ناس كتير بتفهم وهم دول اللى تعبانين لأنهم اكيد بيفكروا البلد رايحة على فين ومش شايفين حاجة غير الضباب .
مشكلة التعامل مع رجل الشرطة , المفروض انه مش بيضرب على طول او بيسىء التعامل على طول يعنى مش حيقول لواحد اقف يا ابن الكذا ولكن طريقة الواحد ده هى اللى بتستفز الضابط او حتى الامين , وحقول لك على سر خطير هو اللى بيخلى الشرطة تعاملهااحيانا فظ او ناشف ,
زمان من تلاتين سنة , كانت الوظائف محددة ومقننة , يعنى واحد شغلته ضابط شرطة وواحد تانى شغلته نشال او حرامى , ماتضحكوش بتكلم جد , يعنى انتم عارفين ان كل مجرم يعنى حراى او تاجر مخدرات بيتمسك وبيتحبس وبيطلع يعود لشغلته تانى مش بيقدر يبطلها , زى ما انا موسيقار وانت مهندس او تاجر فى كذا , وهنا كان الحرامية والخارجين على القانون مسجلين تبع كل قسم , والعملية منظمة جدا , يعنى لو انت مثلا اتنشلت فى اتوبيس فى منطقة ميدان العباسية مثلا , بتبقى عصابات النشل كل عصابة ليها منطقة , يعنى انشال ما يتعداش على منطقة واحد تانى , يعنى لو الاتوبيس طالع من العتبة رايح مصر الجديدة بتبقى 4 مناطق للنشل يعنى النشال بتاع العباسية بعد ما التوبيس يخرج من العباسية ما ينشلش حتى لو فيه زبون ومحفظة مليانة بتقول له خدنى , لسبب ان بينهم قانون , يعنى لو نشال العباسية سرق فى مصر الجديدة , حاتتخلط المناطق وبتوع مصر الجديدة يسرقوا فى العباسية وبكده حايقطعوا على بعض , زائد ان فيه موضوع اخطر ان النشال مش بيشتغل مع نفسه كده , ولكن بيبقى عصابة ولهم معلم كلمته تمشى على رقبتهم وآخر اليوم بيديه اللى سرقه والمعلم بيديه حصته , المهم لو انت اتنشلت فى منطقة الظاهر مثلا وعملت محضر , بيكون الظابط حافظ النشالين عنده ومن الاوصاف اللى بتديها الظابط بيحدد مين النشال ده شخصيا وبيبعت يجيبه , والنشال اللى شغلته نشال زى ماقلت من اول سؤال بيجاوب , لأنه حافظ النظام انه لو ماجاوبش فيه وراه مخبر ايده اد المرزبة حايروح مديه واحدة , يعنى حايتكلم حايتكلم
وبيتكلم بصراحة على طول عشان يوفر على نفسه الضرب , وبيتعمل له قضية وبياخد من 3 إلى 6 شهور وممكن يطلع بعد ثلاث ارباع المدة ويرجع يسرق تانى وهكذا , لذلك ساعتها تلاقى الظابط اعصابه هادئة والامور تحت السيطرة , يعنى عارف حرامية العربيات او حرامية الاجزاء من العربيات وحرامية الفراخ وحرامية الغسيل وتجار المخدرات الصغيرين , تلاقى حياته سهلة وجميلة ودائما مبتسم , لكن من عشرين سنة الاحوال اتغيرت , دخل فى الكار وجوده جديدة بتشتغل مع نفسها مش فى العصابات الاصلية صاحبة المنطقة , والسبب المخدرات والبرشام , يعنى تلاقى واد تلميذ فى ثانوى بيبرشم , وهو معدى باللايل يسرق كاسيت عربية , والعروف ان حرامى الكاسيت بيبقى بيعرف يفتح اى عربية ويفك الكاسيت بطريقة معينة , الجديد فى الاكار ممكن يجيب طوبة ويكسر الزجاج بعدين يشد الكاسيت بطريقة غشيمة ممكن كمان يكسر التابلوه , وهنا الظابط مايعرفش مين حتى لو اخد بصمات ماعندهمش بصمات الحرامى عشان يطابقوا عليها , وهنا لما الظابط بيمسك عشرين واحد اشتباه حاينكروا , ولماى يكون الاشتباه شديد لما المخبرين بيضربوهم واحد ممكن يعترف يعنى هنا اضرب بيجيب نتيجة , ومرة فى مرة بقى الظاابط بيضرب على طول دى الحكاية
حاجة تانية من بعد الثورة والاحداث الظباط دايما متعصبين ومتوترين يعنى سواق ميكروباص واقف قدام السم اللى ورا ميدان رمسيس قدام االمأمور وفى وسط الشارع بيركب وينزل وسادد وراه الشارع , يعنى قبل الثورة ده لو شاف المأمرو من بعيد كان استخبى منه فى اى بلاعة مجارى , اكيد المأمور قال له امشى من هنا , والسواق رد عليه رد ماعجبش المأمور وخلى بالك المأمور ليه هيبة وبالذات قدام الطقم اللى تحتيه وااللى واقف يتفرج راح المأمور ضربه قلم , راح السواق ضرب المامور بالقلم , بالتأكيد يعنى ممكن الظباط والعساكر والامناء لما يشوفوا المأمور بتاعهم بينضرب قلم ممكن يعملوا ايه ؟ او لو مثلا واحد شاب سايق عربية ووقفته لجنة والظابط سأله سؤال والشاب بيكون ارعن يرد على الظابط بقلة ذوق
احنا اللى بنخليهم يعاملونا وحش واحنا اللى بذوقنا نخليهم يعاملونا بأدب صح
والسؤال الخطير هل حانقدر نستغنى عن الشرطة زى ما للعلم فيه جهات كتير نفسها تقضى نهائيا على جهاز الشرطة
ساعتها لو معاك علبة سجاير فيه 3 سجاير ممكن واحد يضربكبمطواه عشان يسرقها منك , يعنى المظاهرات واللى لسه مستمرة ضد قانون الطوارىء
مش فاهمين ان الوقت الحالى اهم وقت يتطبق فيه قانون الطوارىء وان ماجايش نتيجة يبقى الحل الحتمى تطبيق الاحكام العرفية
هل حد ىمن على نفسه او بيته او ممتلكاته او اسرته ؟؟؟؟؟؟؟؟ حد يرد
مع اطيب تحياتى

بص حضرتك لو قانون الطوارئ ده هيطبق على البلطجيه والخارجين عن القانون بس فا مفيش مانع أنما أنا أضمن منين أنه مش هيطبق عليه أنا كمان وعلى غير عشان أبداء راى مثلا معلش محنا مش هيبقى عندنا ثقه فى الحاكم بسهوله بعد الى أحنا شفناه

يا شيماء
راجعى اللى اتكب فوق تانى , يعنى انتى مثلا لو ماشية ومعاكى بطاقتك , وفى وقت عادى تمشى فيه , يعنى البنت اللى قدك ممكن تمشى فى الشارع لحد الساعة كام فاهمة ؟ لو انتى ماشية الساعة 3 الفجر اكيد ممكن الشرطة لو قابلتك حاتوقفك تسألك ايه اللى مخرجك دلوقتى صح ؟
لكن مثلا لو دكتورة ومعاها اثبات انها فى مستشفى كذا وعندها ما يعطيها الحق انها تخرج بالليل كده اكيد الشرطة بمنتهى الذوق حاتقول لها مش عايزة حد يوصلك ...

لكن لما شاب الساعة 3 الصبح ماشى وقابلته شرطة واول ماشافها حاول يجرى اكيد حا يشتبهوا فيه
كمان ممكن تقولى رأيك زى ما انتى عايزة بس فى حدود الذوق , يعنى انا ممكن انتقد فلان بالذوق لكن ما اشتموش او اقول كلام تحريضى او ممكن يتفهم انى بسلط الناس تعمل قلق , هى المشكلة ان الشرطة ماتقدرش تقيض على البلطجى بدون تهمة محددة
مع اطيب تحياتى

لالالالالالالا يا أستاذ عادل كان فيه صحفيين وأصحاب رأى محترم كانوا بيتخدوا منم بيوتهم بليل قدام عيالهم بس عشان هاجم النظام أو قال رأيه فى قانون أو فى حد من المسئولين

قانون الطوارئ اتعمل للحفاظ على الامن العام للبلد -- مش ممكن تكونى انسانه بتكتبى مقالات حتى لو بتنتقدى النظام مش ممكن حد يتعدى عليك و المقال مش تحريضى اظن جرنال الوفد كل يوم بيكتب مقالات تنتقد النظام مين كان بيتحبس فيهم

الا اذا قصدتى الصحفى الذى سرب خبر وفاة مبارك او مرضه طبعا لازم يتسأل -- هل تعلمى انه اذا توفى رئيس او ملك لابد من اخذ الاحتياطات الامنيه قبل اعلان وفاته فما بالك بنشر الخبر فجأه اكيد فى مخربين ممكن تنتهز الوضع لاعمال تخريبيه

زى ما قال الاستاذ صموئيل -- و احد ماشى نص الليل و اوقفوه و جرى انتى نفسك هتشكى فيه ما هو لو محترم محدش هيهوب نحيته ابدا

بس احنا عندنا احريه تعنى -- الشتيمه و اعمل ما يحلو لك و لو ضابط قالك كانى ترد و تقوله مانى

والصحفى الاستاذ عبد الحليم قنديل الى اتخطف وترمى فى الصحرا كان حرض حد او سرب اخبار كل الى عمله انه تكلم عن قضيه توريث الحكم

مش ممكن طبعا عشان اتكلم فى قضية توريث الحكم اترمى فى الصحراء -- ماهو انا كنت كل يوم بنتكلم فى الموضوع نفسه و كمان فى شاب اتكلم قدام جمال مبارك فى عدة مواضيع ومترماش فى الصحراء اى و احد يتحشر فى مشكله امنيه الطوائ بالمرصاد لانها فى الاساس بتمس امن مصر مش نقد اشخاص و امن مصر اعتقد انك توافقينى الرأى انه خط احمر لا يمكن تجاوزه ابدا مهما كان

شوفى الفيديو

https://www.youtube.com/watch?v=ap2FKIqHwX4

اعزائى الكرام مؤيدى قانون الطوارىء
طبعا تعرضون رأيا له وجاهته وان من يحترم النظم والقانون لا يتضرر من قانون الطوارىء
ولكن اذا قلت انك كنت فى ميدان التحرير وقت الاحداث ولم يحدث لك شخصيا اصابة ولم تقتل فهل معنى ذلك انه لم يحدث تجاوز او جريمة ؟

قانون الطوارىء قائم منذ 30 سنة ولم يمنع الارهاب او الجريمة وفى ظله ترعرع البلطجة وانتشر المخدرات

كل انواع الجريمة يمكن التعامل معها من خلال القانون الطبيعى ولم يستخدم قانون الطوارىء ضد الجريمة ولكن فقط استخدم ضد السياسيين والاحزاب والصحافة والاعلام وحتى المدونين

لم يزد قانون الطوارىء من هيبة الدولة واحترام القانون بل زاد من هيبة رجل الشرطة وزاد من تسلطه وتجاوزة حتى القتل مثلما حدث مع خالد سعيد او سيد بلال او الكثير غيرهم فقد وصل الاحساس لديهم انهم فوق القانون ولامحاسبة لتجاوزهم

حتى الان عندما ارادوا تطبيقه فبدأوا باحالة ناشطين سياسيين وصحفيين ومذيعة لمحاكمات عسكرية فى جريمة ابداء رأى او التجاوز فى حق المجلس الاعلى واغلاق فضائية وتهديد الباقى

قانون الطواىء لن يقضى على البلطجة ولكن فقط سيقنن بلطجة فئة من رجال الامن والسلطة على باقى خلق الله

والغاء قانون الطوارىء سيرغم الجميع على احترام القانون ابتداءا من المواطن الى رجل الامن الى رأس الدولة

نحترم رؤيتك و رأيك فى قانون الطوارئ لكن اذا تم تطبيق قانون الطوارئ فى ظل المحاسبه لكل ضابط يتجاوز حدوده القانونيه اعتقد ان المشكله ستنتهى و ايضا اذا كل و احد اقصد المواطن احترم نفسه اولا و احترم القوانيين ماحدش هيمسه اما التجاوز كما حدث و مكا زال يحدث فلابد من رادع قوى شكرا لمرورك

» قانون ونظام القسم ...الادارة
» ورجعنلكوا مره تانيه بقانون الطوارئ بس بشكل جديد
» ماهو قانون الطواري؟
» قانون فرض ضريبة على الإنتحار
» مشروع قانون الإخوان بمجلس الشعب لقصف روؤس المتظاهرين